Соопштение до верниците од црковниот храм Св. Петка во населбата “Точила” во Прилеп:
Почитувани верници, во пресрет на Велики Петок, храмот Св. Петка широко ги отвора портите а свештенството, црковниот одбор и вработените при храмот ве покануваат заеднички да се присетиме, визулено да ги пресоздадеме и преживееме настаните што се случиле пред повеќе од две илјади години преку богослужбата која ќе ги следи тие траорни моменти кои му претходеле на Христовото погребение.
Со симнувањето од Крстот, погребението и изнесувањето на Плаштаницата, пак и пак, да ги восприемиме најтажните мигови од овоземниот живот на Христа Спасителот. Во атмосфера на плачно расположение, да го симнеме Христос од Крстот, да го повиеме во чиста плаштаница и да го положиме во гробот, во овој ден на универзална жалост – Велики Петок.
Зошто ќе го правиме тоа? Зошто е потребно да се присетуваме на тие тажни моменти и болни настани? Одговорот е едноставен: Најпрво, за подлабоко да ја сфатиме смислата и значењето на Христовите страдања и, второ, да разбереме дека Исусовата смрт е добра и воедно претставува светол настан. Да, токму така! Не чудете се! Зашто ако не се случеше смртта, немаше да се случи и најважното – воскресението! А ако не се случеше воскресението, залудна ќе беше нашата вера, како што вели ап. Павле. Па така, славејќи ја смртта Христова, го славиме Животот што го имаме денес, односно фактот дека сега имаме пристап до рајот. Велики Петок е можеби единствениот ден во годината кога се сплотени тагата и радоста.
Затоа, драги наши верни прилепчани, ве покануваме заедно да оддадеме почит пред Христовиот гроб, бакнувајќи ја плаштаницата на која е изобразено починатото тело Христово. Да се поклониме пред оној кој беше распнат заради нас грешните; да ги целиваме со љубов и солзи Неговите рани и, со радоста која ќе ја потисне тагата, да Го прославиме Неговото свето име!
Нека е за многу години!