Жално и бедно во која состојба се пони коњчињата во паркот на “Могилата на непобедените” во Прилеп… На сликата на која деновиве наишле посетители и активисти за животните во паркот, реагираат бурно и бараат надлежните во ЈКП Комуналец Прилеп итно да ги средат копитата на двете коњчиња.
На фотографиите јасно се гледа екстремно прераснати копита кои веќе почнале енормно да се искривуваат нагоре. Оваа состојба е класичен знак за тешко, долготрајно занемарување на животното од страна на тие што се задолжени да се грижат за него во Паркот на Могилата на непобедените во Прилеп.
Што вели струката?
Ова што го гледаме не е моментален проблем, туку резултат на повеќемесечна или дури повеќегодишна тотална негрижа. Стручно ветеринарно гледано, копитата на коњот се прераснати до фаза каде што се деформираат нагоре. Ваквата состојба:
• Прекумерно ги оптоварува тетивите, зглобовите и коските на нозете.
• Предизвикува константна и силна болка при секој обид за чекорење.
• На долг рок води до траен инвалидитет, куцање и појава на ламинитис (болно воспаление).
Копитата на понијата мора редовно да се кратат и рамнат од страна на стручно лице (потковувач/ветеринар) на секои 4 до 6 недели. Овде е повеќе од очигледно дека животното со месеци не видело никаква нега.
Активистите бараат итна реакција од надлежните!
Активистите за заштита на животните апелираат и бараат од Локалната самоуправа на Прилеп, ЈП „Комуналец“ (или институцијата под чија директна надлежност е паркот и животните во него) веднаш да ангажираат ветеринар и професионален потковувач за да му се помогне на ова животно и да му се олеснат маките.
Овие коњчиња требаше да бидат атракција и убавина за паркот, а не жртви на системска неодговорност.