Лидерот на ВМРО-ДПМНЕ го честиташе 8-ми Септември – Денот на независноста на Македонија од врвот Црн Камен на Јабланица.

Пред 32 години на денешен ден, над 95 проценти од граѓаните на референдум се изјаснија за самостојна и суверена држава. Претходно, на 25 јануари 1991 година, беше усвоена Декларацијата за независност од првото повеќепартиско македонско Собрание, а два дена подоцна пратениците го избраа Киро Глигоров за прв претседател на самостојна и суверена Република Македонија.

Важни чекори за утврдување на државноста беа усвојувањето на новиот Устав на 17 ноември 1991 година, монетарното осамостојување и воведувањето на денарот на 26 април 1992, формирањето на сопствени вооружение сили. Меѓународно-правниот субјективитет на државата дефинитивно беше потврден на 8 април 1993 година, кога со акламација во Генералното собрание на Обединетите нации, беше примена како 181. полноправна членка на Светската организација.

Поради противењето и притисоците од страна на Грција, која не го прифаќаше уставното име на Република Македонија, зачленувањето во ОН беше под привремената референца: Поранешна Југословенска Република Македонија.

Низ 32-годишното самостојно опстојување, државата помина низ низа проблеми и тешкотии. Троцифрената инфлација на почетокот на 90-те години, грчкото ембарго, косовската бегалска криза и конфликтот во 2001 година беа вистински предизвици и закани за младата македонска држава што го забавија нејзиниот пат.

Спорот со Грција поради името, по долгогодишни разговори под покровителство на Обединетите нации, конечно беше решен на 17 јуни 2018 година во Преспа со попишување договор меѓу двете држави. Со тоа се отвори патот на земјава кон НАТО и ЕУ. На 27 март 2020 година Северна Македонија стана 30 членка на НАТО. Како земја кандидат за членство во ЕУ веќе 18 години, со добиена прва препорака за почеток на преговори во 2009 година, државава сега се соочува со блокада од Бугарија.

Почна процесот за промена на Уставот, што е услов Бугарија да го тргне ветото за продолжување на преговарачкиот процес со Унијата. За да почне земјава да отвора кластери во преговорите со ЕУ Софија бара Бугарите да бидат вклучени во Уставот.

Во Собранието минатиот месец почна пленарната седница за усвојувањето на амандманите за уставни измени, но поради потребното двотретинско мнозинство за кое власта нема поддршка од опозицијата, продолжението ќе се одржи, како што е најавено, тогаш кога ќе се создадат соодветни услови.

Триесет и вториот роденден државата го одбележува со стапка на невработеност од 13,1 процент, раст на БДП од 2,5 отсто, 36 527 денари просечна нето плата и инфлација од 8,3 отсто.

Денот на независноста денеска ќе се одбележи под мотото „Гласник на слободата“ со повеќе активности. Најавена е бесплатна посета на музејски и галериски поставки во ликовните салони и археолошки локалитети низ целата држава, тактичко показни вежби и изложба на единиците на Армијата и на Министерството за внатрешни работи, спортски активности во соработка со Агенцијата за млади и спорт, културно-уметнички програми, …

Активностите стартуваа синоќа во Скопје со свечена академија на тема „32 години независност“ на која се обрати премиерот Димитар Ковачевски.

Во рамки на чествувањето 32 години од прогласувањето на независноста на државата, изутрина во 10:00 часот, владина делегација предводена од премиерот Ковачевски, ќе оддаде почит и ќе положи цвеќе на вечните почивалишта на поранешните претседатели на државата, Киро Глигоров и Борис Трајковски, во Алејата на великаните на Градските гробишта „Бутел“ во Скопје. Во делегацијата ќе бидат првиот вицепремиер и министер за политички систем и односи меѓу заедниците, Артан Груби и министрите за одбрана Славјанка Петровска, за внатрешни работи Оливер Спасовски и за здравство Фатмир Меџити.

Активностите продолжуваат во ГОБ „8-ми Септември“ каде во присуство на премиерот Ковачевски и министерот Меџити ќе бидат презентирани нова опрема и апарати.

Традиционално, во Собранието ќе бидат доделени државните награди „8 Септември“ за 2023 година за остварување во областа на спортот, во организација на Агенцијата за млади и спорт и Одборот за доделување на Државната награда „8 Септември“.

Во Градскиот парк во Скопје, на просторот во близина на локацијата „Школка“, пак, ќе се одржи тактичко-показни вежби на единиците на Армијата и на Министерството за внатрешни работи. На локацијата „Школка“ е предвидена и културно-уметничка програма, во рамки на која ќе учествува воениот оркестар на Армијата, културно-уметнички друштва, членовите на „Златно славејче, како и програма за деца, со учество на Театарот за деца и младинци кои ќе ја одиграат претстава „Гига Мега бајка“, во режија на Хана Миленковска, дело на Горјан Милошевски (по мотиви од Ш. Перо). Во текот на денот, на истата локација, сите заинтересирани ќе имаат можност да бидат дел од серија спортски активности организирани во соработка со Агенцијата за млади и спорт.

На манифестацијата во Градскиот парк, ќе присуствуваат премиерот и членови на Владата.

Дополнително, како дел од одбележувањето на Денот на Независноста, во организација на Владата, покрај многубројните пригодни манифестации, за граѓаните, од 11:00 часот во целата држава, ќе почне културната манифестација „Отворен ден за граѓаните“, во чии рамки ќе се обезбеди бесплатен влез за граѓаните во културните установи, музеи и галерии во целата Република.

Сите заинтересирани граѓани ширум државата, ќе имаат можност да ги посетат археолошките наоѓалишта „Стоби“, „Хераклеја“, „Баргала“, мегалитската опсерваторија „Кокино“, Музејот Охрид, музеите и заводите во Прилеп, Битола, Штип и Струмица, музеите на Куманово, на Крушево и на Гевгелија, како и во Тетово: Музејот на Тетовскиот крај и Уметничката галерија. Бесплатен влез за граѓаните ќе биде и во Спомен-куќата на Тодор Проески во Крушево. Во Битола, граѓаните ќе имаат можност за бесплатен влез во Музејот на албанската азбука како и во Заводот за заштита на спомениците на културата и музеј, во Кичево пак, во Музејот на Западна Македонија во НОВ, додека во Струга ќе биде бесплатен влезот во Музејот д-р Никола Незлобински.

Во Скопје ќе бидат отворени за посета Археолошкиот, Природонаучниот музеј, Музејот на македонската борба за самостојност, Музејот на Северна Македонија, Музејот на современата уметност, Националната Галерија на Северна Македонија, Спомен-куќата на Мајка Тереза како и Конзерваторскиот центар (црквата Св. Спас).

Во Музејот на македонската борба за самостојност на 8 септември во 12:00 часот, гудачкиот квартет „Луј“ од ДМБУЦ „Илија Николовски-Луј“ од Скопје ќе одржи концерт на кој ќе бидат изведени дела од Равел, Дворжак, Пјацола и други. Посетителите ќе имаат можност да ја разгледаат и привремената изложба „Темелник на државноста“, посветена на клучните настани во формирањето на државата – Илинден 1903, Илинден 1944 и прогласувањето на независноста во 1991 година.

Националната опера и балет се приклучува во прославата со концерт на познати оперски арии, кој на 8 септември во 20:00 часот ќе се одржи пред платото на институцијата.

По повод Денот на независноста, во Кинотеката во 18:00 часот ќе се прикаже еден од најтрофејните македонски документарни филмови, „Медена земја“, во режија на Тамара Kотевска и Љубомир Стефанов. Во 20:00 часот ќе се прикаже филмот „Исцелител“, кој е прв дебитантски долгометражен филм на режисерот и сценарист Ѓорче Ставрески.

Откако популарниот фолк музичар Јордан Митев го откажа своето учество на настанот ,,Традиционален пикник Пеленица”, организиран од Општинската организација на СДСМ Кисела Вода, бидејќи не пеел на настани одбележани со партиски симболи, се огласи и неговата колешка Адријана Кеш.

-Почитувани фанови, да се настапи за денот на независноста на мојата земја Македонија, како автор и изведувач на македонска музика за мене е голема чест. Тој празник е за сите кои што си ја сакаат и почитуваат својата земја и истиот сметам дека не треба да биде политизиран или обележуван со партиски симболи.

Нека е за многу години престојниот празник, денот на независноста на Република Македонија, реагираше Митев на социјалните мрежи.

Андријана Кеш пак напиша: “Почитувани… сакам и јас да се обратам во врска со настанот кој треба да се случи на 8 септември… Во тек на договорот никој не спомна дека ова ке биде партиски поврзано… Рекламата ја видов утрово… НЕ СУМ ПАРТИСКИ ОПРЕДЕЛЕНА ни ке бидам … така што јавно се откажувам од овој настап за кој, уште еднаш ке кажам, требаше да биде НАРОДЕН СОБИР, а не ПАРТИСКИ НАСТАП”.

Oд СДСМ Кисела Вода потоа го променија постерот за настанот, па на местото од Јордан Митев го ставија Ефто Пупиновски, но и тој им го откажа настапот.

На неговиот профил на ФБ стои: “Почитувани пријатели, Сакам да Ве информирам дека Ефто Пупиноски НЕМА ДА НАСТАПУВА на прославата по повод независноста на Република Македонија која ќе се одржи на ден 08.09.23 г. на Пеленица, општина Кисела Вода. Исто така, нагласувам дека Ефто нема да биде нечија замена, а од што е толку оргинален самиот по себе е незаменлив”.

Градоначалникот на општина Делчево, по повод одбележувањето на Денот на ослободувањето на градот, му додели плакета на градоначалникот на општина Прилеп, за помошта која градот под Марковите Кули ја испрати за справување со поплавите, кои летово предизвикаа огромни штети во оваа македонска општина од истокот.

Невремето во јуни, кое беше проследено со досега невидени врнежи од дожд, предизвика огромни штети врз инфраструктурата во градот, а оштетени беа и голем број домови.

Општина Прилеп се солидаризираше и помогна со 300.000 денари, а Делчево покажа дека не ја заборавиле добрината. Едноставно, нема функционери од ВМРО и СДСМ кога се работи за човечката мака и судбина, само така ќе придонесеме сите за градење на едно подобро општество, во кое ќе преовладува разумот, хуманоста и меѓусебното помагање.

Две лица го загубиле животот вечерва во пожар кој избувнал во куќа на ул. “Цане Илиески” во Прилеп околу 22ч.

Според првичните информации, во пожарот кој настанал како последица на експлодирана плинска боца, животот го загубиле татко и син.

Засега не е познато на која возраст се лицата.

Повеќе информации во текот на утринските часови!

Вистинстинска позитива како никогаш досега ја огреа прилепската Стара чаршија денеска. Во пресрет на Денот на независноста – 8-ми Септември, малите ангелчиња од градинките “Наша иднина”, заедно со нивните воспитувачки, покажаа дека и тоа како си ја сакаат државата во која живеат.

Насмеаните дечиња ја украсија со македонски знамиња камената бина во центарот на градот, а потоа извикувајќи: “Македонија, Македонија…”, прошетаа низ чаршијата, а на случајните минувачи, дуќанџиите и на оние кои одмараа на клупите, им делеа македонски знаменца.

Една искрена, весела и среќна дружина која ни го разубави денот, и воспитувачки кои заслужуваат награда. Ако најмалите ги воспитуваме вака, од мали нозе да си ја сакаат Македонија, тогаш се уште можеме да ја исправиме иднината.

На 06.09.2023 на ул.„Лазо Трповски“ во Битола, полициски службеници од криминалистичката полиција на СВР Битола ги лишиле од слобода Б.И.(58), Б.С.(60), А.Д.(55), П.В.(69), С.И.(50) и С.С.(38), сите од Битола.

Тие биле затекнати како на јавно место играат комар. Од нив биле одземени пари и други предмети поврзани со делото.

По целосно документирање на случајот против нив ќе бидат поднесени соодветни поднесоци – информираат од СВР Битола.

Денеска, 07.09. во просториите на Europe House, во Скопје, беше свеченото доделување на плакетите за еТвининг ознаката за училишта.

OOУ “Климент Охридски” од Прилеп е едно од 24 училишта во Македонија кои ја добија оваа престижна ознака.

Тоа е доказ дека ова прилепско училиште е на еднакво рамниште со европските училишта, во однос на педагошките практики и иновативните пристапи кои се користат во наставата.

На свеченото доделување се обрати Марко Ѓоргиевски, директор на Националната агенција и Мила Протуѓер, координатор за еТвининг.

Оваа ознака на ООУ “Климент Охридски” му е доделена втор пат последователно.

Џорџ стана вистински хит на социјалните мрежи, а причина за тоа е неговата човечка големина во ова сивило во кое живееме.

Овој средовечен велешанец решил самоиницијативно да ги поправи испокршените летниковци кај училиштето “Васил Главинов” во градот на гемиџиите.

Од неговата скромна пензија, Џорџ одделил средства за шајки и боја, а кој е во можност може и да му донира дополнителен материјал.

СЕКОЈА ЧЕСТ ГОЛЕМ ЧОВЕКУ!

Од 8. до 10. септември во Прилеп, во организација на фудбалската школа “Евро Гол”, ќе се одржи турнирот “Евро Гол – Македонија Куп”, кој на едно место ќе собере екипи од целата држава. На турнирот ќе настапат млади фудбалски екипи од цела Македонија од генерациите 2011, 2012, 2013, 2014, 2015 и 2016год – дечки кои ќе ги покажат своите фудбалски вештини, ќе се забавуваат и ќе се дружат.

Покрај спортскиот карактер, турнирот ќе има и свој забавен дел, а гости ќе бидат другарчињата од “СТАРО МAАЛО”, или суперпопуларните деца од “Дајте музика”, кои на Могилата на непобедените ќе ги испејат своите најголеми хитови.

Концертот е закажан на Денот на независноста – 8. Септември со почеток од 20:00ч, а картите за овој музички настан се по цена од само 100денари.

Дел од средствата собрани од овој концерт ќе бидат наменети за хуманитарни цели, па затоа мајки и татковци, баби и дедовци…. донесете ги вашите најмали и пружете им незаборавна забава која ќе ја паметат. Дојдете забавувајте се, бидете хумани и поддржете го овој спортски настан, кој секако придонесува за здрав и правилен развој на младите генерации.

Картите се веќе во продажба и истите можат да се набават во “Голд Кафе” во населбата “Точила” и од штандот кој е поставен на градскиот плоштад “Методија Андонов-Ченто”. Штандчето се наоѓа пред “City Tobaco”, а тука карти ќе можат да се купуваат до утре (08.09.) до 18ч. Цената на картите на влез ќе изнесува 150 денари.

ПОБРЗАЈТЕ!