Во последните денови на подрачјето на СВР Битола настанаа неколку пожари на отворен простор како последица од намерно запалени стрништа.
СВР Битола апелира до граѓаните на подрачјето на СВР Битола:

– да не се пали оган на отворен простор;
– да не се палат стрништа, земјоделски и други површини;
– да не се пали отпад и друг горлив материјал;
– да не се фрлаат отпушоци од цигари и догорчиња.

Доколку забележат пожар на отворен простор граѓаните најбрзо што може да го пријават во надлежните институции. Потсетуваме и дека непочитувањето на законите ќе биде санкционирано и соодветно ќе бидат казнети сите кои ја загрозуваат безбедноста на граѓаните – стои во апелот упатен од СВР Битола.

Со пратеничката група на ВМРО-ДПМНЕ и Коалицијата сме апсолутно истомисленици. Никогаш јас не сум сакал да наметнам таков тип на авторитет, па сега некого да контролирам, управувам и така натаму, ниту пак некогаш додека сум претседател тоа ќе се случи. Ние овој став кој што го имаме како ВМРО-ДПМНЕ и како коалиција е заеднички став и тој е принципиелен став и ние веруваме во тој став дека е исправен, бидејќи до сега веќе 15 месеци не добивме аргумент со кој што нашиот став ќе биде, да кажам, демантиран па ние ќе мора да го менуваме. Така што, кога ме прашувате дали сме истомисленици, да сме истомисленици со 44 пратеници кои што се дел од пратеничката група на коалицијата предводена од ВМРО-ДПМНЕ, вели претседателот на ВМРО-ДПМНЕ, Христијан Мицкоски во интервју на телевизија Алсат М.

Мицкоски посочи дека иако целта на оската е носење на уставни измени под бугарски диктат, тоа нема да се случи и тие нема да поминат, со тоа само ние како македонски граѓани губиме време.

Додаде дека како тој и партијата упорно се трудеа да им објаснат на власта дека оваа нивна политика на форсирање на една тема која што ќе заврши во бездна и нема да успее, а на сметка на тоа уривање на државата во секоја пора, полна со криминал и корупција, не е добра политика и затоа им понудија многу решенија во минатото, кои за жал ги одбија.

-Нема да се случат уставните измени, ни еден пратеник од коалицијата предводена од ВМРО-ДПМНЕ нема да гласа и тоа се виде на седницата на 18 август, кога 44 пратеници кои гласаа против дневниот ред. Тоа јасно покажува дека немаат двотретинско мнозинство, затоа што ако беа сигурни дека имаат макар и еден, тие ќе одеа до крај на таа собраниска седница, претпоставувам ќе пропаднеше и после тоа хорски ќе бараа оставка на Христијан Мицкоски. И Мицкоски е проблем, затоа што тој не се договара со политички криминалци и разно разни кланови, ниту за политички амнестии, ниту за политички криминали, ниту за тендери затоа што имаме принципиелен став, истакна Мицкоски.

Македонија е најбитна, посочи Мицкоски и таа е пред и над се, додавајќи дека уставните измени се нај небитниот и нај понижувачкиот дел за Македонија.

-Тие се најпонижувачкиот дел за Македонија и мислам дека тоа што не ги гласаме тие уставни измени и мислиме добро на Македонија, затоа што ако се случеше такво нешто, тогаш ќе беше лошо за Македонија. Бидејќи ги слушате пораките кои што доаѓаат од Софија, па дури и од денешната ново избрана евро комесарка која што јасно кажа кои се обврските на Македонија кои што се содржани и во протоколите, а во протоколите богами се содржани озбилни обврски кои што имаат јасна цел. А, тоа е асимилација на македонскиот народ, рече Мицкоски.

Под влијание на влажен бран в недела на повеќе места ќе биде нестабилно со пороен дожд, грмежи и засилен ветер, локално и во форма на невреме. Пороен дожд и грмежи ќе има и в понеделник. Повеќе врнежи во овие два дена ќе има во западните делови, каде што локално се очекува да наврнат над 30 л/м2.

Потоа времето ќе биде променливо облачно со сончеви периоди и со слаб локален дожд. Температурата ќе опадне неколку степени.

Во Скопската Котлина в недела попладне ќе има пороен дожд, грмежи, засилен ветер и услови за краткотрајно невреме. Потоа ќе преовладува променливо облачно време со сончеви периоди и малку посвежо.

Во случај на појава на електрични празнења се препорачува поголема внимателност, да не се престојува на отворен простор и под осамени дрвја.

Тимот на ⋮ИВЕЦ доаѓа во Прилеп! На 23.09.2023год. (сабота) со почеток од 12:00 часот, во пица бар Академи организираме средба со сите кои сакаат да го запознаат нашиот тим, нашите предавачи и обуките за деца кои ги нуди едукативниот центар.

Во дигиталната ера што брзо се развива, подготовката на вашите деца за иднината значи стекнување со основните вештини во областа на информатичката технологија. Како што технологијата станува се’ повеќе интегрирана во нашиот секојдневен живот, владеењето на ИТ повеќе не е опција, туку неопходност. Токму затоа нашиот центар подготви различни обуки кои ќе им помогнат на идните генерации да се стекнат со најбараните технолошки вештини.

⋮ИВЕЦ обуките за деца се внимателно дизајнирани да го направат учењето забавно и едукативно, погодни за различни возрасни групи, почнувајќи од девет години.

Нашите искусни и посветени инструктори создаваат стимулативна средина за учење каде што децата можат да ја истражат својата креативност и способности за решавање проблеми. Преку практични активности и проекти, децата не само што ги учат основите на програмирањето, туку развиваат и вештини за критичко размислување што добро ќе им служи во секое поле во нивниот живот.

Дозволете вашите деца да поминат незаборавна школска годинa стекнувајќи се со квалитетни ИТ знаења и вештини и вистински пријателства. Нашиот едукативен центар е тука за да ги поддржи младите генерации да ги стекнат неопходните технолошки вештини, осигурувајќи дека тие се добро подготвени за можностите и предизвиците на дигиталната ера.

Дојдете во сабота во пица бар Академи за да дознаете повеќе за нашите обуки, распореди и детали за запишување. Заедно, можеме да ги поттикнеме и создадеме идните технолошки лидери.

Можности, Успеси, Напредок, Квалитет, Знаење, Креативност, Дружење со ⋮ИВЕЦ.

Се гледаме во сабота во градот под Марковите кули!

Паднаа потписи и договори меѓу надлежните за покачување на платите на наставниците во основното и средното образование за 15%. Веста ја соопшти на социјалните мрежи Јаким Неделков, кој објави фотографии заедно со министерот за образование и наука Јетон Шаќири, како се ракуваат и како го потпишале договорот.

„Честито!!!! Септемвриските плати во основното и средното образование повисоки за 15 %.
Продолжуваме понатаму со потпишување на колективните договори за основно, средно и високо образование“, се наведува во објавата на Неделков.

Лидерот на ВМРО-ДПМНЕ, Христијан Мицкоски денеска се сретна со Гордана Јанкулоска. Веста ја соопшти актуелниот претседател на опозициската партија на ФБ.

Средба силна колку Горде. Неправдата никогаш не нè скршила, напиша Мицкоски во описот на фотографијата.

Расфрлан отпад на сите страни, преполни и испокршени корпи за отпадоци…. ова била сликата на која вчера наишле прилепчани кои рекреирале околу вештачкото езеро.

Прашањето е кој е виновен за ова, некултурата на поединци, или немањето мониторинг од страна на надлежните и недоволната ажурност на МВР да спречи вакви вандалски дејствија?

Три јавни претпријатија од Прилеп, ја потпишаа Декларацијата за антикорупциски практики во јавните претпријатија
На настанот кој се организира во Скопје, а по повод започнувањето на проектот „Поттикнување на овозможувачката средина за пријавување корупција во јавните претпријатија”, кој го реализира ИСИЕ и Амбасадата на САД, се изврши потпишувањето на Декларацијата за антикорупциски практики и политики во јавните претпријатија.

Декларацијата ја потпишаа 36 директори и овластени лица на јавни претпријатија, а на настанот беа презентирани главните наоди и ресурси подготвени преку проектот. Декларацијата ја потпишаа и директорите на трите јавни претпријатија од Прилеп, Рубинчо Абрашоски директор на ЈКП,, Комуналец’’- Прилеп, Игор Гулабоски директор на ЈКП ,,Водовод и канализација’’, и Зоран Јовески директор на ЈП за ПУП.

На настанот свое обраќање имаше и г-дин Ерик Мејер, Заменик шеф на мисијата на Амбасадата на САД во Скопје, како и професорите на Правниот факултет „Јустинијан Први“ во Скопје и соработници на ИСИЕ: проф. д-р Мишо Докмановиќ и проф. д-р Дарко Спасевски, кои дадоа свој придонес и поттик да се создаде поволна средина и да им се овозможи на граѓаните и вработените во јавните претпријатија да пријавуваат корупција во јавните претпријатија.

Проектот „Поттикнување на овозможувачка средина за пријавување корупција во јавните претпријатија”, е финансиран од Амбасадата на САД.

Претседателот на Владата, Димитар Ковачевски, во рамките на работната посета на Њујорк се сретна со извршниот директор на Филип Морис, Јацек Олчак.

На состанокот е оценето дека Македонија се развива во држава со атрактивна клима за инвестирање, по интеграцијата во НАТО и отворените перспективи за полноправно членство во ЕУ во динамичен процес, што обезбедуваат еден од клучните услови на инвеститорите, стабилна и предвидлива инвестициска клима.

Разговарано е за значајните инвестиции на компанијата Филип Морис во Тутунскиот комбинат АД Прилеп, во рамки на стратешкото партнерство на светски познатата компанија и комбинатот, при што е формирана заедничката компанија Филип Морис Тутунски Комбинат АД Прилеп (ФМТКП).

Истакнато е значењето на зголемените инвестиции на Филип Морис во модернизацијата на производството во Комбинатот, со што е отпочнато производство на зголемен број брендови од портфолиото на Филип Морис Интернешнл.

При тоа, од јули годинава е започнат и извоз на брендовите коишто покрај во земјава, сега се пласираат и во Ерменија, Албанија, Црна Гора, Босна и Херцеговина, Србија, а се очекува проширување на извозот и во Европската Унија.

На состанокот е разговарано и за планираните нови инвестиции во фотоволтаици. И е истакнато значењето на споделените знаења и експертизи. Со сето тоа, добивките на компанијата Филип Морис Тутунски Комбинат АД Прилеп се зголемуваат и конкретно се четирикратно зголемени во однос на 2019 и 2020 година.

Премиерот Ковачевски се заблагодари за придонесот на Филип Морис Интернешнл во развојот на една од најстарите компании во нашата држава, Тутунски комбинат АД Прилеп, којашто годинава одбележува голем јубилеј – 150 години постоење.

„Успешната работа на Филип Морис Тутунски Комбинат АД Прилеп е значајна придобивка и во развојот на македонската економија и силна порака до странските инвеститори за поволната инвестициска клима во нашата држава“, оцени премиерот Ковачевски.

На средбата е разговарано и околу можности за натамошно унапредување на соработката, соопшти Владата.