Доколку добиете електронска порака во име на директорот на Бирото за јавна безбедност Сашо Тасевски која изгледа како судска покана, не наседнувајте бидејќи станува збор за измама во меѓународни рамки.

Од МВР информираат дека деновиве имале пријави од граѓани за добиенa електронска порака наводно во име на директорот на Бирото за јавна безбедност Сашо Тасевски, во која во вид на наводна покана за суд, примачот на пораката се известува дека е предмет на правни постапки за низа измислени кривични дела, кои ги нема сторено, како детска порнографија, педофилија, егзибиционизам… Притоа, примачот на пораката се повикува да се регистрира преку мејл и да ги даде неговите лични податоци.

-МВР ги известува граѓаните дека станува збор за лажна порака која не е испратена од страна на МВР, односно од БЈБ. Овие електронски пораки се класичен обид за измама во кој целта на измамниците е да дојдат до личните податоци на граѓаните со цел нивна понатамошна злоупотреба. Судските покани не се испраќаат преку мејл, а и доколку внимателно се прочитаат овие пораки, видливо е дека станува збор за измама.

Затоа, апелираме на посебно внимание, овие пораки да не се отвораат, да не се контактира испраќачот и никако да не се споделуваат личните податоци кои ги бараат измамниците. Исто така, предупредуваме да не отворате линкови и датотеки кои се испратени во прилог на електронска порака која доаѓа од непознат испраќач, со цел заштита на вашиот компјутерски систем од малициозен софтвер.

Воедно, информираме дека ваквите обиди за измама се со меѓународен предзнак, имајќи предвид дека електронски пораки со слична содржина, а со иста цел – злоупотреба на лични податоци, во изминатиот период беа испраќани и на граѓани во земјите од регионот, се вели во соопштението на МВР.

На 27.09.2023 полициски службеници од СВР Битола-ОВР Прилеп го лишиле од слобода С.Л.(26) од Прилеп.

При претрес во неговиот дом на ул. “Гостиварска” во Прилеп, спроведен врз основа на наредба од Основен суд Прилеп, пронајдени се и одземени кутија со цветови од растението Cannabis, шеснаесет опаковки со бела грутчеста материја, дваесет опаковки со марихуана и предмети со остатоци од марихуана.

Лицето е приведено во полициска станица Прилеп и по документирање на случајот ќе следува соодветна пријава – информираат од ОВР Прилеп.

На 27.09.2023 полициски службеници од криминалистичката полиција на СВР Битола, врз основа на наредба за претрес од Основен суд – Битола, извршиле претрес во дом во с.Дихово, битолско, сопственост на Ф.Ј.(29) од истото село.

При претресот се пронајдени и одземени марихуана, прашкаста материја, дробилка и предмети со остатоци од прашкаста материја, за кои е утврдено дека припаѓаат на неговиот брат В.Ј.(23).

По документирање на случајот против него ќе следува кривична пријава – информираат од СВР Битола.

Караванот “Македонијо во срце те носиме” синоќа беше во Прилеп, на огромна радост на прилепчани.

На преполниот плоштад “Методија Андонов – Ченто”, публиката уживаше во стиховите на „Заветна“, „Налеј, налеј“, „Народе македонски“, „Едно име имаме“, „Земјо македонска“, „Ој, Вардаре“, „Оган да го гори“, „Послушајте патриоти“, „Ми заплакало село Ваташа“…, но и гласовите на Бојана Скендеровски, Сузана Спасовска, Наум Петрески, Зуица Лазова, Андријана Јаневска, Александар Тарабунов, Огнен Здравковски, Марија Спасовска, Мина Блажев, ДНК, Ламбе Алабаковски и Миле Кузмановски.

Развиорени знамиња, стотици пееја во еден глас, една прекрасна атмосфера од која вредеше да се биде дел.

На 22.09.2023 и 23.09.2023, ТППЕ со сите свои расположливи средства и човечки ресурси (10 возила и 40 пожарникари), од кои некои пожарникари беа и без престан на терен (повеќе од 24 до 32 часа), успеа да се справи со неколку пожари на отворен простор од поголеми размери, при тоа заштитувајки и спасувајки 11 населени места и повеќе од 6 манастири и 5 цркви без направена материјална штета – стои во соопштението од Територијалната противпожарна единица Битола.

Соопштението подетално го пренесуваме во продолжение:

22.09. 2023
Вашарејца-Лознани-Ивањевци

Заштитено целосно село Лознани, спречено проширување кон соседни села, заштитен манастирот пред селото Лознани, како и манастирот помеѓу Лознани и Новоселани, спречено проширување кон населено место Ивањевци. На овој пожар екипите беа навредувани и попречувани во извршување на своите задачи

Дедебалци-Црничани- Арматуш

На овај пожар изразуваме благодарност на укажаната поддршка и помош на жителите на С. Арматуш

23.09.2023
Лознани-Новоселани-Ивањевци

Голема битка пожарникарите водеа со пламените јазици кои од сите страни се закануваа на населеното место Новоселани

Дедебалци-Црничани-Путурус-Мојно-Мусинци

Овде можеме да ја издвоиме борбата со пламените јазици во населено место Путурус, каде од сите четири страни огнот навлезе во селото и ветрот кој од минута во минута имаше променлив правец се закануваше кон секоја ќука. ТППЕ Битола со 5 екипи беше во селото и секој обид на пламените јазици да зафатат објект беше спречен. Голема благодарност во оваа интервенција до мештаните на Путурус, Мусинци, Мојно кои помагаа во линијата за спречување огнот да стигни до селата Мојно и Мусинци.

Орле-Маково-Рапеш

На крај исто така изразуваме благодарност до ЈКП Водовод кое со својата цистерна вршеше дотур на вода на возилата на ТППЕ Битола каде и да имаше потреба

Д-р Христијан Трпчевски од Болница “Плодност” од Битола и д-р Синиша Трпчевски од Кlinicum Wels Аustrija, беа на 15 дневна едукација во клиниката Хаген-Хаспе во Германија, кај д-р Јачек Кочижевски.

-„Herr Dr. med. dr hab. Jacek Kociszewski (неговата полна титула) е многу искусен и познат надвор од границите на Германија, како гинеколог-уролог, кој несебично го пренесува неговото знаење на сите, кои ја посетиле оваа клиника.

Неговиот тим има усвоено неколку алгоритми и препораки за прецизна дијагностика и поставување мрежа кај пациентките со уринарна стрес инконтиненција. За тоа имаат патентирано неколку инструменти и мрежички за решавање на оваа проблематика.

Она што ни остави впечаток е дека цел тим, а посебно д-р Kociszewski, несебично сакаше да го пренесе своето знаење на нас и активно не вклучи во предоперативната дијагностика на урогинеколошките заболувања, а особено во оперативната сала како асистенти.

Многу сме среќни што ги сподели несебично неговите искуства во третманот на уринарната стресна инконтиненција и пролапс на генитални органи кај жената, како и реконструктивна хирургија на карлично дно.

Иако млади, искуството со кое располагаме и техниките со кои работиме, му оставија голем впечаток на овој светски реномиран доктор, кој ни кажа дека вратите за понатамошна едукација на оваа клиника ни се отворени, односно ја отвори и можноста за активна соработка со Болница Плодност.

На овај начин, ја споделуваме нашата благодарност до д-р Kociszewski и неговиот тим во клиниката Хаген, еден од најпознатите гинеколошко-уролошки центри во светот“, рече д-р Христијан Трпчевски, по враќањето од клиниката во Германија.

Со цел да ги подобриме условите за работа во сите училишта во нашиот град и населените места и да изградиме поквалитетен образоваен систем во првите две години од нашиот мандат, како Локална самоуправа од Буџетот на Општина Прилеп одвоивме над 50 милиони денари за инвестициии во сите основни и средни училишта во општина Прилеп – стои во денешното соопштение од општината.

-Благодарение на беспрекорната соработка помеѓу Општината и директорите на училиштата, во рамките на овие инвестиции направени се реконструкции и рехабилитации на училниците, ходниците, тоалетите, кабинетите, канцелариите, спортските сали и спортските игралишта, исто така поставени се образовни помагала смарт табли, хортикултурно и партерно уредување на дворовите, набавени се компјутери, телевизори и извршени се адаптации на неискористени простории. Овие инфраструктурни уредувања и тековни активности кои ги реализираа училиштата за подобрување на условите за работа и одвивање на наставно-образовниот процес, се суштински важни за квалитетно образование на нашите деца.
Децата и нивното образование остануваат наш приоритет – велат од општина Прилеп.

Стопанска комора на Македонија преку Регионалната комора Прилеп е информирана дека е подготвена Одлука во општината, за финансирање на нови 33 административни вработувања за идната 2024 година, согласно проекциите на буџетската градска каса за следната година – стои во соопштението од СКМ.

Соопштението во целост го објавуваме во продолжение:

-Ваквото функционирање со кое наместо средства за капитални инвестиции се планираат непродуктивни трошења не е во согласност со ставовите и заложбите на бизнис заедницата кои во континуитет се испраќаат, дека час поскоро е потребно средување на состојбите во јавната администрација и конечно да се стави приоритет на бизнисот врз политиката во наредниот период. Бизнис секторот од Прилеп укажува дека со ваквите одлуки кои се во најава од пазарот на труд се намалуваат 33 потенцијални вработени во приватниот сектор кој се соочува со сериозен недостиг на кадар и би продолжила доминацијата статус ков позицијата на сметка на развојната компонента.

Регионалната комора изразува благодарност што градоначалникот на општина Прилеп од својата позиција како татко на градот континуирано учествува на расправите и активностите организирани од страна на бизнис секторот во градот, но истовремени укажуваме дека на вакви дејствија спротивни на бизнисот ќе реагираме. Ако ова остане пример за сите општини во предизборието, тогаш навистина ќе потврдиме дека развојната компонента ќе причека за уште најмалку една година.

РК Прилеп укажува и дека тешко оди издавањето на градежни дозволи во општината што е основен услов да бидат стопирани секакви инвестициони активности. Има безброј примери на погрешни одлуки на општината во Прилеп кои доведоа до ваквата состојба и се прашуваме дали тоа не е основа од регион на најдобар регион и најплодна земја да се доведеме до најзагадена животна средина.

Оттука, барањето Регионалната комора е оваа Одлука веднаш да се измени и планирањето на трошоците на буџетската каса за 2024 година да се врши во заедничко содејство со Регионалната комора од Прилеп – стои во соопштението.

Интересно е тоа што ваквите реакции од истото место изостанаа за време на мандатот на претходната општинска администрација, кога градоначалник беше Илија Јованоски, а во тие четири години во општината и јавните претпријатија се вработуваше како никогаш порано.

Еве само дел од тие огласи кои ја наполнија општинската зграда и јавните претпријатија до речиси последно место:

ВРАБОТУВАЊЕ ВО ОПШТИНА ПРИЛЕП: Плата 28.000 денари! АПЛИЦИРАЈТЕ!

Koнкypc за 18 нови во ЈП за ПУП Прилеп, а тие за плата не можат да coбepaт?

Вие скенирајте сметки и чекајте ваучери: Нови 5 работни места во општина Прилеп, плата до 29.000 денари

Нов оглас за вработување на 9 службеници во општина Прилеп, плата од 16 до 29.000 – Аплицирајте!

Hoви седум огласи за вработување во општина Прилеп: Плата до 30.000 денари, аплицирајте

Огласи за вработување во Општина Прилеп! Аплицирајте!

Ова погоре се реализирани вработувања, додека пак планот за нови вработувања во општинската администрација, во случајов 33 на број за 2024год., е само законска обврска на општината, која секоја година треба да достави ваков план до Советот, а советниците да гласаат по него. Се работи за можни вработувања, кои можеби ќе се реализираат, а можеби и не.

На 29.09.2023 / петок/ од 20.00 часот во киното МИС СТОН премиерно ќе биде прикажан филмот „ТЕ ДУА, ЖИМИ МЕНЕ“.

Влезници на билетарницата од киното четврток и петок од 10 до 13 часот и два часа пред проекцијата на филмот

СОДРЖИНА:

Маалски џанак, коцкар и армоникаш, трудејќи се да ја вратат назад купената жена од Албанија, стануваат дел од мафијашка зделка и мораат да се справат со низа на несекојдневни ликови.

За филмот

-Филмот е социјална комедија што обработува плејада тематики, почнувајќи од лажна љубов преку пријателство, религија, феминизам, криминал, па сѐ до вистинска љубов. Би рекол дека филмот под лупа ги набљудува различностите, сѐ со цел на површина да го извлече она што е заедничко меѓу нив, а тоа е човечката емоција што нѐ поврзува сите нас. Се работи за приказна што следи тројца другари што се впуштаат во патувачка авантура низ која се среќаваат со разни ликови што чекорат на раб на сатира со цел да ги карикатуризираат целните групи што ги претставуваат. „Те дуа, жими мене“ зборува за горчливи работи на сладок начин – вели сценаристот и актер Никола Кузелов.

Глумци: Никола Кузелов, Атанас Атанасовски, Валентин Видовиќ, Ангела Стојановска, Сенко Велинов, Тони Михајловски, Игор Џамбазов, Исмаил Касуми, Мирсад Ибази, Мими Таневска, Владо Јовановски, Фирдаус Неби, Елдин Широки, Надица Петрова, Руиш Беговска, Талија Настова

Режија: Марјан Гавриловски

Траење на филмот: 124 Минути