Утре, (среда, 13.12 20230, од 08,30 до 16,30 часот елeктрична енергија ќе немаат жителите од ул: ул. “Пецо Крстески Даскало”, ул. “Браќа Шемкоски”, ул. “Стојан Јошески” и дел од ул. “Пиринска”, а од 9,30 па се до 16h без електрична енергија ќе останат жителите на ул: ул. “Генерал Васко Карангелески” кај самопослуга “Меше Промет”, ул. “11-ти Октомври”, ул. “Крушевска” и Зграда “Техника”.

Актуелниот бранител на титулата, тимот на Еурофарм Пелистер со победа ја заврши полусезоната, откако на гостувањето во Прилеп потешко од очекуваното триумфираше со 38:33.

Избраниците на Божидар Мојсов се вратија во второто полувреме, во неколку наврати изедначија и им „покажаа заби“ на гостите и до 55 минута се играше во егал. Сепак, поискусната екипа со мини серија го скрши отпорот на домаќинот во финишот и со победа ја затвори годината.

Кај прилепчани се истакнаа: Денис Шабановиќ со 8 погодици, Никола Цветаноски и Давид Трајкоски со по 6, а еден помалку од нив постигна Владан Кастратович.

За гостите од Битола Павле Петровиќ постигна дури 10 погодици, а Петар Атанасијевиќ 7 пати го наоѓаше патот до мрежата на прилепчани.

Со еден гол од контра во листата на стрелци се запиша и капитенот Велески.

Управата на клубот на чело со Претседателот Мариноски има доволно време да размисли како ќе продолжат во плеј-аут разигрувањето, бидејќи од досегашните настапи на клубот нема некој што е задоволен во градот.

Организациониот одбор при храм „Св. преп. мчца. Параскева (Петка) Римјанка“ во нас. Точила, Прилеп, за прв пат објавува ГОЛЕМ БОЖИКЕН КОНКУРС за литературна творба (проза или поезија) и ликовна творба на тема: “РОЖДЕСТВО ХРИСТОВО – БОЖИК”

Овој голем христијански празник е повод за инспирација и творештво на малите уметници од нашиот град, а со цел приближување на верата и овој радосен празник до нивните срца како и нивно обединување и интегрирање во црковниот живот.

На конкурсот може да учествуваат сите ученици од основно образование од нашата општина. Учесниците ќе се натпреваруваат во две категории – литературна и ликовна:

I категорија: Од 1-во до 5-тто одделение и
II категорија: Од 6-то до 9-тто одделение.

За литературната категорија учесниците можат да пишуваат проза или поезија, најмногу две страници А4 формат (12 фонт), а во ликовната категорија можат да учествуваат со цртеж (на блок бр. 4 или 5).

Конкурсот ќе трае од 12.12.2023 до 31.12.2023 година. Творбите да бидат потпишани со име, презиме, училиште, одделение, одделенски или предметен наставник, адреса на живеење и телефонски број за контакт. Творбите да бидат доставени во писмена и во електронска форма(за цртежите фотографија) на е-поштата на храм Св. Петка: [email protected].

Творбите ќе ги оцени жири комисија:

В.д. старешина на храм Св. Петка, протоереј Љупче Петрески,
Блага Тутеска, наставник по македонски јазик во пензија и поетеса,
Павлинче Чочкова, наставник во пензија,
М-р Александар Џинго, професор по ликовна уметност во средно училиште и,
Елена Димоска, наставник по ликовно образование.

Во секоја од четирите поткатегории ќе бидат рангирани победници на прво, второ и трето место. Жири комисијата во литературната и ликовната категорија ќе додели и две специјални награди од првите две места во двете категории.

Резултатите ќе бидат објавени на 5 јануари 2024 г. на фејсбук страницата на храмот: Света Петка Прилеп.

Утрото на Бадник, по завршувањето на богослужбата, ќе биде свеченото доделување на наградите пропратено со кратка пригодна програма. Сите учесници ќе добијат пофалници и пригодни награди а првите, вторите и третите места ќе добијат дипломи и предметни или парични награди.

Сите уметнички дела кои ќе учествуваат на конкурсот ќе бидат изложени во храмот во текот на цела седмица по Божик, а на Бадник победниците во литературните поткатегории ќе треба да ги прочитаат своите дела пред присутните а по завршувањето на богослужбата.

Храмот, како организатор, има право сите, или дел, од творбите да ги објави и на својата фејсбук страна.

Се надеваме дека ќе имаме голем број на учесници кои ќе не мотивираат ваков конкурс да биде организиран и во наредните години!

Бог да ве благослови и да ве инспирира да ја распалите вашата имагинација и талент!

Со почит,
в.д. старешина на храм Св. Петка
Протоереј Љупче Петрески

Професорката по математика Фросина Митрушева сподели дел од македонски учебник.

Таа како професионалец во својата работа сигурно има за приоритет да го пренесе знаењето на своите ученици. Но, македонските учебници наместо да помогнат, го прават токму спротивното.

Имено, таму во задача е наведено дека збирот на аглите во затворен тријаголник е 190, а не како што треба – 180.

„Ја сакам математиката, меѓу другото, и заради доследноста.

Збирот на агли во триаголник (во Евклидова геометрија) секогаш до сега бил 180 без разлика кој бил на власт или кој ја изгубил војната.

Одеднаш -190!

Нешто сум пропуштила!

Живот во заблуда!

Ми се плаче, ми се урла“ – напиша таа.

Во пресрет на вечерашниот натпревар помеѓу РК Прилеп и Еурофарм Пелистер, ракометарите на битолскиот шампион беа на кафе дружба во градот под Марковите Кули, а домаќин им беше тренерот на голманите во редовите на пелистерци, Ице Соколески.

Соколески ја искористи приликата да ги запознае колегите со својот роден град пред натпреварот со РК Прилеп, на кој само триумф и нови три бода е опција за гостите од Битола.

Во продолжение линк за следење на натпреварот во живо:

Од 14-ти до 16-ти декември, ни пристигнува фестивалот кој што ќе го оживее Прилеп преку филмови, музика, работилници, разговори, дружби и добро друштво. Со големо задоволство ве покануваме на 8-то издание на Mеѓународниот филмски фестивал „Winter Apricots“.

За време на фестивалските денови ќе имате можност да погледнете филмови во три натпреварувачки селекции (национална, балканска и интернационална), како и неколку придружни програми. Покрај филмови, фестивалот ќе биде домаќин и на повеќе гости, работилници, концерти, како и специјални програми.

Чест ни е да ви ја претставиме и нашата најнова соработка. Оваа година, во партнерство со амбасадата на Република Италија во Скопје Ambasciata d’Italia in Skopje, возбудени сме што ќе бидеме домаќини на една специјална селекција на кратки филмови подготвена од Италијанскиот национален институт за кратки филмови во Торино Centro Nazionale del Cortometraggio / Italian Short Film Center, по повод
одбележувањето на Меѓународниот ден на краткиот филм!

Подгответе се за внимателно избрана селекција на нови италијански кратки филмови, кои ќе ни понудат увид во современата филмска продукција низ различните жанрови. Исто така со задоволство ви соопштуваме дека ја продолжуваме соработката со локалното здружение Slow Food Prilep, кое и оваа година ќе ја збогати трепезата на “Winter Apricots” со храна и пијалоци. Уште еден начин да ги споиме нашите енергии и да ја прествиме нашата земја и она што таа може да ни го понуди.

Билетите можат да се купат секој ден, по цена од 100 денари во кафе-галерија “Лувр“ (luvrgallerycafe) од 10.00 до 16.00 часот, или со резервации на телефонскиот број 075 806 340. Ве очекуваме!!

Денеска го исплаќаме надоместокот за годишен одмор (регрес) за 2023 година во износ од 10.000 денари за вработени во МВР, односно бруто износ од 125.498.745 денари, објави министерот за внатрешни работи Оливер Спасовски на социјалните мрежи.

,,Како раководство на МВР се обврзавме кон континуирано унапредување на социјалниот статус на полициските службениците и вработените во МВР – со зголемување на платите за 35% откако сум на чело на МВР и со редовно исплаќање на 6 бонус плати, а со една единствена цел – создавање задоволна и мотивирана полиција која ја гарантира безбедноста на граѓаните” вели Спасовски.

Првите три денови од новата седмица ни носи стабилно, суво и потопло време со повеќе сонце, иако повремено ќе има и облачност над македонското небо. Наутро и понатаму ќе биде релативно студено со минимални температури на воздухот кој на повеќе места ќе се спуштаат до околу нулата, а понекаде тие ќе се спуштат и за некој степен под нулата, прогнозира Славчо Попоски.

Најтопло ќе биде на средината од седмицата кога максималните дневни температури на воздухот ќе бидат натпросечно високи и ќе се искачуваат во интервалот од 8 до 16 степени. Тогаш ќе дува и умерен, повремено засилен ветер од јужен и од југозападен правец.

Сепак ова затоплување ќе трае многу кратко. Веќе од четврток доцна попладне и навечер следува нова голема промена на времето и нов голем бран на врнежи од запад. Од петок, па во деновите потоа поради нов голем продор на поларниот вртлог од север очекуваме ново големо заладување на времето и поинтензивни врнежи од дожд и снег, како и значителна снежна покривка на планините и на Скијачките центри.

Со овој продор на студен бран снег барем отсега гледано би можело да има и во градовите. Што значи по краткотрајното затоплување, повторно ни следува вистинска зима.

И во Скопје и околината очекуваме слично време, најпрвин потопло и суво, а потоа од петок нови врнежи и големо заладување на времето.

Со овој нов продор на поларниот вртлог од север, очекуваме и минусни температури како и појава на мраз, но и засилен северен ветер, предвидува Попоски во објавата на Фејсбук.

Минијатура од тркачкото порше со кое македонскиот професионален автомобилист Ристо Вуков се тркаше на патеките на Формула, во СН Мото Центарот во Скопје му беше врачена на Претседателот на Одборот на директори на СН Осигурителен Брокер АД Битола, Христо Кондовски.

Минијатурниот автомобил му го врачи лично Вуков во знак на благодарност за поддршката која СН Групацијата ја овозможи за учеството на македонскиот тим на годинашниот Порше Супер Куп.

Минијатурата е автеничено изработена во Италија во размер 1 према 18 и во целост одговара на тркачкото возило Порше 992 ГТ3, модел со 510 коњски сили. Во продукцијата на минијатурата е вклучена и рачна изработка за што беше задолжен реномираниот италијански уметник Габриеле Франко.

„Ова е само мал гест со кој сакам да се заблагодарам на СН Групацијата за поддршката за моето учество на Порше Супер Купот. Многу ми значи што СН Групацијата ги препозна моите напори и напорите на мојот тим. Трките од Порше Суперкупот спаѓаат во групата на врвни натпревари на глобално ниво. Колкаво е нивното значење зборува податокот дека тие се возат заедно со Формула 1 веќе три децении. Затоа за мене е голема чест и задоволство не само да се учестува на еден ваков светски куп, туку и затоа што врвни компании застанаа во наша поддршка.“-изјави Вуков.

СН Осигурителен брокер АД Битола и СН Мото центарот во Скопје, како дел од СН Групацијата, во улога на генерални спонзори обезбедија поддршка за учеството на Вуков на годинашниот суперкуп.

„Горди сме што Вуков, кој на патеките на Формула возеше под логото на СН Групацијата, е првиот и досега единствен Македонец на Порше Супер купот. Голем предизвик е да се влезе во трка со најдобрите возачи од целиот свет. СН Групацијата ја препозна неговата посветеност и затоа чест ни е што обезбедивме поддршка за учеството на македонскиот тим на светски престижните трки. Големите предизвици заслужуваат голема поддршка и ние веруваме дека за Омбра тимот допрва ќе се слуша.“-изјави Кондовски, посакувајќи му успех во натамошната кариера на младиот талентиран автомобилист.

Инаку, Вуков минатите три сезони ги мина како возач во Порше Карера Купот на Италија, каде што се етаблираше како возач кој континуирано освојува поени. Годинава тој настапи во највисокото по ранг светско натпреварување од ГТ трките, Порше Суперкуп.

Вуков, зад себе го има искуството на двократен европски шампион во картинг и единствен тогашен претставник од Балканот на Светското првенство во оваа категорија (2008-2009). По одличните резултати, се префрлува во автомобилизмот, каде постигнува значајни успеси на домашната, како и на меѓународната сцена.

Тој е актуелен шампион на Македонија во класата Југо хибрид и првак во отвореното првенство на Србија во силна и бројна конкуренција. На крајот, неизбежно беше после сите овие резултати, во 2020 година, Рико да ја добие поканата од GDL Racing за да биде нивниот пилот во престижниот Порше Карера Куп Италија, каде настапуваше три години по ред.
Оваа сезона неговата кариера ја одбележа префрлањето во Порше Суперкупот, кое е највисока форма на овие трки со легендарните ГТ возила.

Од вечерва на полноќ малопродажните цени на бензините ЕУРОСУПЕР БС-95 и ЕУРОСУПЕР БС-98, на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1), се намалуваат за 2,00 ден/лит, во однос на малопродажните цени утврдени со одлуката за утврдување на највисоки малопродажни цени на нафтените деривати и горива за транспорт од 04.12.2023 година.

Со тоа малопродажната цена на ЕУРОСУПЕР БС-95 изнесува 76,50 ден/лит, малопродажната цена на ЕУРОСУПЕР БС-98 изнесува 78,50 ден/лит, малопродажната цена на ЕУРОДИЗЕЛ (Д-Е V) изнесува 74,00 ден/лит, додека малопродажната цена на Екстра лесното масло за домаќинство на (ЕЛ-1) изнесува 73,00 ден/лит.

Малопродажната цена на Мазутот М-1 НС, се намалува за 1,514 ден/кг, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 04.12.2023 година и со тоа малопродажната цена на Мазутот М-1 НС изнесува 40,572 ден/кг.