На 15.10.2023 на патот помеѓу селата Могила и Вашарејца, битолско, полициски службеници од криминалистичката полиција и Полициската станица од општа надлежност при СВР Битола ги лишиле од слобода Д.Ќ.(23), Н.М.(18) и С.М.(22), сите од Битола.

Тие се сомничат дека со употреба на сила и подесен алат влегле во објект на правно лице и одзеле повеќе предмети. Кај нив биле пронајдени одземените предмети и биле вратени на сопственикот.

Лицата биле задржани во полициска станица и по целосно документирање на случајот против нив ќе биде поднесена соодветна пријава.

На 15.10.2023 во Битола, полициски службеници од криминалистичката полиција на СВР Битола во координација со Одделот за криминалистичка полиција – Сектор за недозволена трговија со дрога, оружје и опасни материи при МВР ги лишиле од слобода М.С.(42) и 30-годишната С.К., двајцата од Битола.

При претрес во домот на М.С., извршен со судска наредба, биле пронајдени и одземени нож и други предмети со остатоци од дрога и пари во различни апоени и валути за кои постои сомнение дека потекнуваат од кривично дело.

Додека, при претрес во домот на С.К., извршен исто така со судска наредба, биле пронајдени одземени кокаин, грутчеста материја, куршуми и пари во различни апоени и валути за кои постои сомнение дека потекнуваат од кривично дело.

Двајцата биле задржани во полициска станица и по документирање на случајот, до Основното јавно обвинителство Битола, против нив е поднесена кривична пријава по член 215 од Кривичниот законик за „неовластено производство и пуштање во промет на наркотични дроги, психотропни супстанци и прекурзори“.

Поради зголемување на производните капацитети и обем на работа конфекција”MB” има потреба од:

– шивачки СО РАБОТНО ИСКУСТВО на права машина и оверлак и

-2 работници во производство

Пријавете се и ве очекуваме во колегијална и пријателска работна атмосфера. Повеќе информации нa телефонскиот број: 075 208 848

Новоформираниот клуб во футсал Победа, имаше одлично деби на стартот од Втората футсал лига на Македонија.

Во спортската сала на СОУ “Ристе Ристески – Ричко”, црвено-белите триумфираа над КФМ Јувентус Серава со 9:6.

Виктор Тошески постигна 4 погодоци, Бобан Ѓорчески 2, а по еден постигнаа Илија Ристески, Борче Макешоски и Владимир Ачкоски.

Од клубот упатуваат особена благодарност до навивачката група Мајмуни Прилеп 1997 за поддршката во текот на целиот натпревар, како и до целата публика присутна во салата.

Викендов со натпреварите од првото коло во Супер лигата за мажи и Прва лига за жени, почна новата сезона од пингпонгарското првенство на Македонија, каде екипата на Младост96 ја брани шампионската титула во машка конкуренција.

Во Скопје во СЦ “Јане Сандански”, пингпонгарите остварија победа над минатогодишниот финалист Телеком Нец 2 со убедливи 4-0.

Екипата ја сочинуваа Ѓорѓе Борчиќ, кој имаше две победи, Стомнароски и Лашкоски со по една победа, додека резерви на овој натпревар беа Александар Рикалоски и Лука Огненоски.

Победата е огромен успех, ако се знае дека оваа сезона Младост96 настапува ослабен без Петар Костовски, кој својата кариера ја продолжи во САД, каде настапува за екипата на Атланта.

Негова замена оваа сезона ќе биди Фатих Карабаџаку од Косово, кој на овој натпревар не беше присутен, бидеќи се наоѓа на турнир во Финска. На располагање го имаме и нашинецот во Шведска, Раиф Рустемовски.

Женската екипа на Младост96 засилена со играчот од Косово, Шега Хашани, како и со Васе Богоеска и Камелија Стојческа, исто така имаше убедлив старт и победа над градскиот ривал Младост, победуваќи со 4-2. Хашани имаше две победи, a исто колку постигна и Васе Богоеска.

Наредниот викенд се натпреварите од второто и третото коло. Женската екипа своите натпревари од наредните две кола ќе ги игра во Прилеп, во сабота, додека машката екипа ќе игра во СЦ “Јане Сандански”, во недела.

Незаборавна вечер во преполниот со народ, храм Св. Петка во Прилеп. Реномираниот естраден уметник Сузана Спасовска во придружба од протопсалтот м-р Георгиј Секулоски, клиросите Бранче Трајкоски и Александар Трајкоски и хорот при храмот „Св. Петка“, ги поведоа присутните гости на невообичаено патување, чија траекторија водеше низ црковното музичко минато, но за цело време, оттаму, наѕираше во вечноста.

Како што и самата уметничка рече, ова и за неа „невообичаено патување кое се одвива на една поинаква за неа сцена“, започна токму во храмот „Св. Петка“ во Прилеп, односно ова беше прва концертна изведба на црковните песнопенија од проектот наречен „Терирем“.

Добро познатиот глас на солистката Сузана Спасовска одзвонуваше во храмот, изведувајќи црковни песнопенија кои ги воодушевија сите присутни.

Пеејќи од душа, со срце набиено емоции и надополнето со вера во Бога, солистката со својот добро познат, моќен а во исто време нежен вокал, задре во најдлабоките сокровишта на душите „топејќи“ ги срцата на присутните па не беше реткост да се видат и насолзени очи.
После секоја песна следуваше силен аплауз а на крајот, Неговото Високопреосвештенство митрополитот Преспанско-пелагониски и администратор Австралиско-новозеландски г. Петар, одржа кратко пофално слово.

Воодушевувањето лебдеше околу храмот уште долго по завршувањето на концертот, пропратено со благодарност на Бога за прекрасната вечер која ни ја приреди нашата Сузана Спасовска. Веруваме дека ехото од овој концерт на духовна музика силно ќе одекне не само во Македонија и македонските храмови ами и во соседните православни дршави и цркви и, се разбира низ храмовите во дијаспората.

в.д. старешина на храм „Св. Петка“
протоереј Љупче Петрески

Фотографија: Андреј Иваноски

Со средства од локалната самоуправа, во СОУ “Орде Чопела” во Прилеп се реализираше проектот “Отворена училница”, што на учениците и нивните наставници ќе им овозможи дел од наставата да ја одржуваат на отворено, во едно прекрасно уредено катче.

На ден 14.10.2023, Боречкиот клуб “7-ми Мај” од Прилеп, учествуваше на првиот Меѓународен турнир во борење во чест на Тони Танчев, кој се одржа во општина Конче.

Прилепската екипа беше предводена од тренерите Стојанче Тушески и Филип Јованоски, и ги забележаа следните резултати:

Јована Тодороска трето место во категорија до 48 кг;
Анегела Трајкоска второ место;
Елена Дејкоска трето место во категорија до 52кг;
Тамара Цветкоска прво место во категорија до 58 кг;
Андреа Маркоска и Јована Мидоска oсвоија трети места во категорија до 70кг.

Во машка конкуренција Христијан Аризанкоски освои второ место во категорија до 33 кг, а Стефан Аризанкоски трето место во категорија до 37 кг.

Честитки за најновите успеси за прилепските борачи и борачки!

Јавен обвинител од Основното јавно обвинителство Скопје донесе Наредба за спроведување истражна постапка против едно лице за кривично дело – Тешка телесна повреда од член 131 став 3 од Кривичниот законик.

На 14 октомври, осомничениот тешко телесно ја повредил и го нарушил здравјето на неговата бремена сопруга, доведувајќи го во опасност нејзиниот и животот на плодот.

Додека заедно со оштетената и нивното 2-годишно дете се движеле со автомобил, осомничениот најпрвин започнал вербална расправија, а потоа и физички ја нападнал сопругата која седела на совозачко седиште.

Оштетената излегла од автомобилот и се обидела да побара помош, но осомничениот тргнал по неа и продолжил да ја влече и удира. На тој начин и нанел тешки телесни повреди, загрозувајќи го и плодот. При дополнителен преглед било констатирано дека плодот починал.

Јавниот обвинител нареди судско-медицинско вештачење и доколку со наодот се потврди дека причина за смртта на плодот бил физичкиот напад, ќе се изврши соодветна квалификација на делото.

До судијата на претходна постапка од Основниот кривичен суд Скопје доставен е предлог за определување мерка притвор за осомничениот, бидејќи постојат околности кои укажуваат на опасност од бегство, можност да влијае врз сведоците и оштетената и да го повтори делото.