На 14.11.2023 во Прилеп, полициски службеници од СВР Битола-Надворешната канцеларија за криминалистички работи при ОВР Прилеп го лишиле од слобода Д.Н.(45) од Прилеп.

При претрес во неговиот дом, извршен со судска наредба, биле пронајдени и одземени марихуана и прашкаста материја.

Лицето било приведено во полициска станица и по целосно документирање на случајот против него ќе биде поднесена соодветна пријава – информираат од ОВР Прилеп.

Се погласни се шпекулациите дека од 1. декември хотелот “Монтана” во Крушево ќе има нова сопственичка структура.

Неофицијално, кичевска фирма што работи со нафтени деривати е новиот сопственик на овој атрактивен објект.

Македонската бодибилдерка Мери Акиевска која три пати е светски првак во боди-билдинг во гостување во Магазин на Сител Телевизија проговори за нејзиното тешко минато кое го поминала.

– Израснав во семејно насилство, татко алкохоличар, по некое време го изгубив и него. Мајка ми ми е огромна подршка, во сите припреми за се ми помага. Жена борец, мајка кралица. Како самохран родител многу има направено за мене, за возврат и носам среќа и се надевам дека е горда да има дете како мене. По потекло сум од Крива Паланка. Во интернат во Скопје имав повеќе услови отколку во Крива Паланка. Живеев без струја и без вода и немав никакви услови.

Мајка ми не доволуваше да се одвојам од останатите, даваше се од себе да не се приметува нешто дека ми недостасвува и дека сум поразлична од другите. Се дружев со сите деца и тие што беа како мене случаи и тие што беа многу имотни за разлика со мене. Со сите имав добра комуникација, освен со сама себе кога ќе се вратев дома размислував како ќе учам во темно, учев на свеќа. Во училиште сите си купуваа храна од продавница, бурекџилница јас носев од дома или мајка ми ќе замолеше некој да ми даде да јадам за да опстанам. Целата ситуација траеше со години се додека не дојдов тука, кажа Акиевска.

Мери додаде дека е горда на своето минато и испрати мотивирачка порака до сите они кои немаат услови да дадат се од себе, да веруваат во себе бидејќи се е остварливо и можно.

Во салата на Советот на општина Битола, во присуство на градоначалникот Тони Коњановски, претседателката на Советот Габриела Илиевска, советниците, вработените во општинската администрација и медиумите, денес се одржа јавна презентација на изработената Физибилити студија за видео надзор во Битола. Согласно Програмата за животна средина за 2023 година, изгласана од Советот на општина Битола, распишана е јавна набавка за избор на фирма, по што е избрана фирмата Кабтел од Скопје.

Се очекува оваа физибилити студија да биде добра основа за преземање на следниот чекор и завршување на овој проект со инсталирање на систем за видео надзор, со кој ќе го зголемиме нивото на безбедност и ќе ги сочуваме во добра состојба, сите инвестиции кои се наоѓаат на јавните површини во градот, рече во своето обраќање градоначалникот на општина Битола Тони Коњановски.

„Во Општина Битола, повеќе години наназад јасно се зборува за потребата од видео надзор, со цел подигнување на нивото на безбедност во градот, заштита од вандализми со кои се уништуваат објекти или опрема поставена на јавни површини, или накратко по примерот на повеќе градови во Европа и светот и во нашиот град да се придонесе за намалување на криминалот, насилството, одржувањето на хигиената и постигнување на поголем број на бенефити.
Потребата од изготвување на Физибилити студија за видео надзор во Битола, е со цел да се истражат сите аспекти во однос на можноста за инсталацијата, употреба и одржување на систем за видео надзор.

Токму затоа, нашето барање беше да се изготви студија која треба да ги анализира опциите за поставување на системи за видео надзор на одредени клучни локации во градот, покривање на најзначајните локации во Битола, избор на капацитет и технологија со детален осврт кон главната опрема и со анализа на алтернативни решенија, сеопфатна техноекономска анализа, прашањата поврзани со влијанието на системот врз животната средина, заштита на лични податоци и други аспекти.

Главната цел на студијата е да се даде одговор на прашањето за оправданоста од идни вложувања за вакви надзорни точки како дел од еден целосен систем за видео надзор, имајќи ги предвид потребите на Општина Битола“, истакна градоначалникот Коњановски.

Претставникот на компанијата Кабтел, Тони Ѓорѓиев, пред присутните ја образложи методологијата за изработка на студијата, незјините цели и задачи, како и начинот на избор на локациите каде што треба да бидат поставени камерите за видео надзор.

Во наредниот период Физибилити студијата ќе биде ставена на увид на советниците и јавноста на веб страната на општината, по што ќе се разгледаат сите можни аспекти за поставување на видео надзор во Битола.

Oрганизацијата “Дрим Тим – Од Деца За Деца” повторно организира хуманитарна забава, каде ќе ве пречека со добра музика со LOCKDOWN и THE DREAMERS и топол амбиент во “Кафе Пауза” на 18.11.2023 година, со почеток во 20:30 часот.

Собраните средства од забавата ќе бидат наменети за 2-годишниот Марко од Прилеп, кој боледува од Ангелман синдром – еден од најретките во светот.

Малиот Марко се уште не оди и не зборува, а често се соочува и со бубрежни инфекции, за што досега му се извршени 4 хирушки интервенции. Неговите родители надеж гледаат во третманите со матични клетки во Турција. За Марко се потребни 3 третмани, а еден чини 19.000 евра, средства кои семејството не е во можност сами да ги обезбедат.

Дојдете, забавувајте се и донирајте за Марко!

На 11.11.2023 во Софија Бугарија се одржа 18-от Меѓународен Турнир во Џудо “ОЛИМПИЈА-2023” во организација на ЏК Олимпија – Софија.

На овој турнир настапија околу 400 џудисти од 7 Држави (Бугарија, Грција, Турција, Србија, Словачка, Романија и Македонија).

ЏК Сеишин-Прилеп настапи со 4 натпреварувачи и освои 2 Медали (1 сребрен и 1 бронзен).

Резултати поединечно:
1. Христијан Бунески 2 ро место
2. Владан Стрезовски 3 то место.

-Одлични и пожртвувани борби прикажаа Ване Ацески и Арсениј Димески, кои не успеаја да изборат место меѓу првите три, бидејќи ги загубија борбите за бронзени медали. Во една ваква силна конкуренција на вакви престижни меѓународни натпревари, тренерот Марио Тошески кој ја водеше екипата е задоволен од прикажаното – информираат од прилепскиот џудо клуб.

Новата малопродажна цена на ЕУРОСУПЕР БС-95 ќе изнесува 80 денари за литар, ЕУРОСУПЕР БС-98 ќе се продава за 82, Екстра лесното масло за домаќинство (ЕЛ-1) за 76,5, а ЕУРОДИЗЕЛ БС (Д-Е V) за 77,5 денари за литар. Со одлуката на РКЕ за 0,411 денари за килограм се намалува и малопродажната цена на Мазутот М-1 НС и ќе изнесува 43,332 денари.

Од РКЕ посочуваат дека референтните цени на нафтените деривати на светскиот пазар во споредба со претходната пресметка бележат намалување кај бензините во просек за 1,435 отсто, кај дизелот за 5,152, кај екстра лесното масло за 1,608 и кај мазутот за 1,143 отсто. Курсот на денарот во однос на доларот по кој беа формирани цените со претходната пресметка е понизок за 0,06 отсто.

Криминалистичката полиција на СВР Битола поднесе кривична пријава против И.Г.(34) со привремен престој во Битола поради постоење основано сомнение дека извршил кривично дело „задоволување полови страсти пред друг“ по член 190 од Кривичниот законик.

На 08.11.2023, тој излегол без облека во ходник од зграда во Битола во која живеел и ги вознемирил станарите, информира СВР Битола.

Од среда 15-ти номеври започнува задолжителната обврска за носење зимска опрема во возилата, а ова е последно предупредување до сите учесници во сообраќајот да ги проверат своите пневматици и реагираат навреме. Ако досега оваа законска обврска сте ја обавувале само со цел да ги избегнете паричните казни, оваа година за прв пат направете го тоа водени од мислата колку човечки животи ќе заштитиме, ако сите се придржуваме до законски предвидените норми за безбедност во сообраќајот.

Водени од таа мисла, а со цел да ја продолжат мисијата за превенција против незнаењето, некултурата и непочитувањето на правилата во сообраќајот, компанијата “АВТО КОНТРОЛ”, како една од компаниите која важи за пример за општествена одговорност, во соработка со “УНИ РОЈАЛ”, на сите свои клиенти при регистрација на возилата, ќе им подари ваучер во вредност од 1.000ден. за набавка на четири пневматици во “УНИ РОЈАЛ”.

Од друга страна пак, “УНИ РОЈАЛ”, при користење на одредени услуги од својот асортиман, на своите клиенти ќе им подари ваучер во иста вредност, кој ќе можат да го искористат при регистрација на своето возило.

Инаку ова не е прв пат “АВТО КОНТРОЛ” да застане на првата линија, кога во прашање е грижата за безбедноста на возачите и сите учесници во сообраќајот. Компанијата во безброј наврати, самостојно, но и во соработка со останати фирми и државните органи, организираше предавања, превентивни активности, делење на флаери со едукативна содржина и слично. Во една прилика генералната менаџерка на компанијата, Даниела Перканоска, рече:

-Да се почитуваме меѓу себе, како луѓе и како учесници во сообраќајот, и заеднички да изградиме систем на општествени вредности во кој културата во сообраќајот ќе има водечко место. Да ја зголемиме свеста и одговорноста на нашите клиенти и сограѓани и сите заедно да допринесеме за безбедно учество во сообраќајот.

Искористете ја оваа можност, бидете совесни и одговорни возачи, затоа што ниту една сума пари платена платена за нови пневматици и исправност на вашите возила, не е поскапа од изгубен човечки живот. Нека почитувањето на сообраќајните правила и прописи стане наша навика, и сите заедно да придонесеме во промовирање на истите.