Општина Битола ги известува жителите на општината дека започнува со организација на буџетски форуми во заедницата со цел заедничко планирање на општинскиот буџет за 2027 година.

Првата работна сесија од буџетскиот форум ќе се одржи на 19.10.2026 година со почеток во 12:00 часот во Офицерскиот дом.

Општина Битола, како Општина со висока транспарентност и интегритет ги поканува сите заинтересирани граѓани да земат учество во работата на Форумот и да дадат свој придонес кон планирањето на општинскиот буџет за 2027 година.

Првите електрични еколошки автобуси ќе пристигнат јануари следната година. Набавката е успешна и очекуваме со автобусите да влијаеме врз намалување на аерозагадувањето во Скопје и другите општини. Имаше обиди за манипулација за оваа јавна набавка, но споредбите се различни и несоодејствуваат со истиот тип автобуси, истакна заменик претседателот на Владата и министер за транспорт, Александар Николоски во “Само Интервју” на ТВ Канал 5

-Набавката е за 150 автобуси. Нормално, интересот е најголем за Скопје, но не сакам да ги заборавиме и другите општини. Ќе добијат и други општини автобуси, оние кои што имаат организиран јавен градски превоз. Сега, да не ми замерат, ама ќе набројам неколку: Куманово ќе добие, Штип ќе добие, Сумица ќе добие, Гевгелија, Кавадарци, Прилеп, Битола, Охрид, Гостивар, Тетово. Ќе биде објавена листата. Градот Скопје побара 250 автобуси, општините побараа 89, така што ако видите пропорционално, општините надвор од Скопје се и во подобра позиција од градот Скопје, но толку беа можностите на буџетот во моментов. Согласно динамиката, првите автобуси треба да бидат испорачани за 6 месеци од потпишување на договорот, договорот се потпиша во почеток на септември месец, но имаме ветување од добитникот на јавната набавка дека веќе во јануари ќе ги видиме првите автобуси во Скопје, истакна Николоски.

На прашањето за забелешките за набавката од страна на граѓански организции, вицепремиерот Николоски одговори дека споредбите се обид за манипулација и не соодејствуваат со видот на автобусите.

-Не мислам дека се тенденциозни, но еве, би рекол дека има многу погрешни работи во извештајот, да речам дека се од незнаење и од невнимавање. Прво, се прави споредба на електрични автобуси со автобуси на компресиран гас, целосно различен систем на работа се. Јас, како што сум систематичен, решив, еве и јас да направам мое истражување: седечки места на тие автобуси кои што се споменати имаат за три помалку од автобусите кои што ги купуваме. Тие имаат 29, овие имаат 32. Јасно беше дека има тенденција во тоа што е напишано. На крајот на денот се работи за стандардни 12-метарски автобуси и овие на компресиран гас и овие електричните. Или не направија спроредба со Загреб. Загреб за слична сума како во Македонија купи само 62 електрични автобуси, рече Николоски.

Македонија и Балканот се сеќаваат на Тоше Проески кој на денешен ден пред деветнаесет години трагично го загуби животот во сообраќајна несреќа кај Нова Градишка, на пат кон Загреб.

Една од традициите за сеќавање на Тоше е маратонот кој маратонците од Нова Градишка го трчаат до Крушево. И оваа година 14 учесници го трчаат 19-тиот маратон во чест на Тоше. Маратонот го почнаа 13 маратонци, а уште еден ќе им се придружи во Македонија. Низ Хрватска ќе истрчаат околу 200 километри, преку Србија ќе поминат со возила, како што налагаат прописите во земјата, а од границата со Македонија до Крушево, македонските маратонци ќе истрчаат уште 220 километри.

Маратонот почна од Нова Градишка, пред неговото спомен обележје, а денеска, на годишнината од неговото загинување, маратонците треба да пристигнат во Крушево.

Крајната цел на маратонците е вечното почивалиште на Тоше Проески, споменичното обележје на Гумење во Крушево.

Животот на Тоше заврши во годината кога одбележуваше десет години успешна кариера и кога таа почна да станува меѓународна. Но албумот на англиски јазик што го подготовуваше беше постхумно промовиран (The Hardest Thing).

Тодор Проески – Тоше е роден на 25 јануари 1981 година и својот музички талент го покажал уште како петтоодделенец на фестивалот „Златно славејче“ (1992) каде испеал песна на влашки јазик.

Музичката кариера ја почна со победата на „Мелфест“ во Прилеп, во 1997 година, и оттогаш настапуваше на сите значајни фестивали во земјава и регионот, а во 2004 ја претставуваше Република Македонија на Евровизија во Истанбул. Таа година стана и амбасадор на УНИЦЕФ.

Објави седум албуми – неколку и во превод на српски/хрватски јазик. Последниот – „Игри без граници“ беше промовиран две недели пред несреќата, а последниот концерт, кој беше хуманитарен и за подобрување на условите во образованието во Македонија, го одржа на Градскиот стадион на 5 октомври 2007.

Во првата неделна колумна после годишние одмори, новинарот Зоран Момироски се осврна на состојбите со спортската инфраструктура во градот под Марковите Кули, а со оглед на тоа дека се’ уште нема ништо од ветувањата за ставање во функција на двете спортски сали – сала “Македонија” и “Универзална сала”.

-Над 360 натпреварувачи од 9 држави учествуваа на меѓународниот џудо турнир ,,Прилеп град Херој – 2026,,Цевитана куп. Џудисти од 40 клубови од кои 15 од Македонија, а другите од Србија, Бугарија, Грција, Косово, Албанија, Турција, Црна Гора и Словенија.

Тој ако има образ и срам да го отвори овој голем турнир, и конечно не да ветува и лажи туку двете спортски сали да му ги врати на Прилеп. Оти било ветено спортската сала ,,Македонија,, со пари од владата да се реновира, да се возобнови и да и се врати на локалната самуправа. Ама од ветено до исполнето разликата е од Солуна до три сомуна. На крај да прашам дали има мажишта во овој Прилеп да му тропнат на маса и да му дадат рок до кога салите да бидат вратени и ставени на располагање на спортски клубови кои залужуваат и почит и респект.

Целата колумна на Момироски прочитајте ја ТУКА

Превенцијата, едукацијата и стручната поддршка се клучни за препознавање и намалување на ризиците од проблематично играње игри на среќа. Одговорното играње не почнува тогаш кога ќе се појави проблем, туку многу порано, со информираноста, свесноста за ризиците и навременото препознавање на предупредувачките знаци.

Токму затоа, Државна Видеолотарија на Македонија Касинос Австрија, преку иницијативата „Играј одговорно“, континуирано вложува во превенција, едукација и психо-социјална поддршка, со јасна цел: да ја зајакне свесноста за одговорното играње и да обезбеди стручна помош за лицата кои се соочуваат со предизвици поврзани со играњето игри на среќа.

Од 2019 година, иницијативата се развива како долгорочна програма за советување, превенција и поддршка, не само за поединците туку и за нивните семејства. Преку мрежата на советувалишта во Скопје, Куманово, Прилеп и Радовиш, поддршката станува подостапна за граѓаните на повеќе локации низ земјата. Со отворањето на советувалиштето во Радовиш во април годинава, мрежата добива нова точка на поддршка, а иницијативата дополнително го прошири својот опфат.

Зад оваа определба стои разбирањето дека одговорното приредување игри на среќа подразбира повеќе од почитување на принципи и стандарди. Тоа значи континуирана грижа, вложување во превентивни механизми и создавање услови за навремена стручна помош.

За Државна Видеолотарија на Македонија Касинос Австрија, општествената одговорност е составен дел од работењето. Преку иницијативата „Играј одговорно“, компанијата ја нагласува важноста на информираноста, раната интервенција и достапноста на поддршката, со посебен фокус на препознавањето и намалувањето на ризиците од проблематично играње.

Целта е јасна: да се зборува отворено, да се препознаваат ризиците навреме и да се знае дека поддршка постои. Бидејќи вистинската одговорност не е само во тоа како се приредуваат игрите на среќа, туку и во тоа колку активно се работи на заштитата на граѓаните и заедницата.

ИГРАЈ ОДГОВОРНО. БИДИ ИНФОРМИРАН. ПОБАРАЈ ПОДДРШКА.

Преку ИПА 3 програма на ЕУ планираме да ја реконструираме, надградиме и електрифицираме пругата од Велес до Битола, истакна во емисијата “Само Интервју” на ТВ Канал 5, заменик претседателот на Владaта и министер за транспорт Александар Николоси.

“Вчера имавме состанок за ИПA-2 и ИПA-3 со амбасадорот на ЕУ и неговиот тим и веќе целата делница од Велес до Битола влезе во ИПА-3, која што треба да биде усвоена до крајот на годината од ЕУ и веќе од 1 јануари да е оперативна. Секако, ќе има процес на тендерирање, избор на изведувач, изведба, но веќе Велес-Битола влезе како приоритет. Таму одиме со реконструкција, надградба и многу важно електрификација, затоа што сега до исклучувањето кај Велес е електрична, а после тоа мора да се користи дизел локомотива. Така што, ако имаме електрична, ем ќе е поевтино, ем еколошки е подобро” -истакна Николоски.

Тој најави и набавка на нови возови и локомотиви

“ Се договоривме со Европската банка за обнова и развој за набавка на најмалку 5 електрични локомотиви, нагласувам електрични, тоа е во насока на оваа зелена агенда којашто ја тераме. И второ, при крај сме на договор со Светска банка за набавка на 5 до 7 патнички гарнитури, а дополнително на тоа од сопствени средства, затоа што МЖ Транспорт е веќе во далеку подобра финансиска состојба, очекувам 2 воза да набават сами во текот на следната година. Значи, ќе имаме 9 нови воза во следните 2 до 3 години и 5 нови локомотиви” – истакна вицепремиерот Николоски.

Под превезот на собирање предлози и идеи на граѓаните на Прилеп за креирање на општинскиот буџет за следната 2027 година, градоначалникот Дејан Проданоски направи груба партизација и злоупотреба на Општината.
Фотографиите објавени на фејсбук профилот на Проданоски потврдуваат дека освен директорите на локалните институции, советниците на ДПМНЕ во општинскиот Совет и раководителите од општинската администрација, на средбата со граѓаните од трите урбани заедници Аличаир, Вишне и Ѓогдере, на синоќешното фијаско присуствуваа едвај 15-ина луѓе, сите до еден активисти на ДПМНЕ – стои во соопштението од ОО СДСМ Прилеп.

Соопштението во целост го пренесуваме во продолжение:

Наместо да организира транспарентно планирање на буџетот, Проданоски се затвори во тесен круг опкружен со партиски војници од јавната администрација, исклучувајќи ги од дебата опозициските советници и жителите од урбаните заедници кои не се поддржувачи на ДПМНЕ.

Но, тоа што се соочи со бојкот од неговите сопартијци кои одбија да присуствуваат на однапред договорено сценарио чија единствена цел е сликање и создавање лажна слика за транспарентноста на Проданоски и локалната самоуправа, кажува за огромното незадоволство на прилепчани од работењето, односно неработењето на градоначалникот.
Најлошиот градоначалник во историјата на Прилеп, кој за една година не успеа да реализира ниту еден од ветените проекти и кој бесрамно ги излажа своите сограѓани, сега од истите тие граѓани бара предлози за нови проекти.
Чисто лицемерие и срамен обид за амнестирање од сопствената неспособност!

Наместо бегање од граѓаните, Проданоски конечно треба да покаже почит кон нив и кон советниците од редовите на опозицијата, да го испочитува Деловникот за работа на Советот на општина Прилеп, да се појави на седницата за советнички прашања и да одговори зошто се’ уште не е завршен кружниот тек Табана, до каде е изградбата на најавениот спортско-рекреативен парк од 30.000 квадратни метри кај Волково, зошто е градот во темница, каде исчезна елитната населба „Градина“, што се случува со реконструкцијата на сала „Македонија“ и Универзалната сала, кога ќе сече лента на обиколниците „Исток“ и „Запад“…?

Конечно, прво да даде отчет каде и како потроши 40 милиони евра од годинешниот буџет, па дури потоа да „собира идеи и предлози“ и да го крои буџетот за следната 2027 година. Градоначалниче Проданоски, со лага ага не бидува!

Под мотото “Здравата храна е извор на здрав живот”, утре, 16.10.2026год., со почеток од 11:30часот во училишниот двор на ООУ “Кире Гаврилоски-Јане” во Прилеп, ќе се одржи традиционалниот есенски панаѓур.

Целта на настанот е да се развие свеста кај учениците за значењето на здравата храна и здравите навики за правилен раст и развој.

Сите одделенија ќе бидат активно вклучени во организирањето и претставувањето на различни штандови, каде ќе има изложено разновидни видови на здрава храна, како: овошје, зеленчук, житни продукти, јаткасти плодови и домашни производи, како природни џемови и печива од интегрално брашно.

Да ги поддржиме дечките со наше присуство на настанот! Дојдете и купете нешто за дома или подарете нешто здраво и свежо на некој близок.

Лајонс клубот „Кабадаја“ Битола денес го одбележа 15 Октомври – Меѓународниот ден на белиот стап. Заедно со Здружението на слепи лица маршираа низ Широк Сокак под мотото „Марш на солидарноста“.

Ова е традиционален марш за поддршка, подигнување на јавната свест и подобрување на квалитетот на животот на слепите и слабовидните лица.

„Слепите не гледаат со очи, туку гледаат со срце! Да бидеме нивна поддршка“ порачаа од Лајонс клубот „Кабадаја“ на маршот кој започна од кај хотелот „Епинал“, а заврши кај Премиер Центар.

На маршот се придружи и градоначалникот на Битола Тони Коњановски кој посочи дека Општина Битола продолжува во континуитет со поддршка за слепите лица, во насока на поголемо олеснување во нивното секојдневие.

Преку Програмата за социјална заштита се предвидени средства за адаптација на физичка пристапност, мобилност и функционалност на лица со попреченост, до 61.000 денари за набавка на опрема или адаптација на домот согласно потребите на лицата со попреченост.

Исто така и бесплатно користење на градски автобуски превоз, а Општина Битола започна да ги покрива и трошоците за превоз на лица со попреченост, наменски транспорт со адаптирано возило на Црвениот крст Битола до здравствени установи во и надвор од Битола.

Компанијата „Кромберг и Шуберт“ започнува нов инвестициски проект каде што во следните четири години се предвидува отворање на нови 2.000 работни места, информира денес премиерот Христијан Мицкоски.

-Она коешто тамо ќе се произведува се автомобилски компоненти за германскиот гигант Ауди. Не треба да ве потсетувам што е Ауди и што значи за автомобилската индустрија. Ова е важна инвестиција за Битола, за Пелагонискиот Регион и за целокупната економија, но и потврда дека како држава располагаме со квалификувана работна сила и индустриски капацитети кои можат да одговорат на највисоките европски стандарди. Во фабриката во индустриската зона Жабени ќе се произведуваат системи за нов модел на Ауди, со планиран обем од над 3.000 снопови дневно. Инаку, проектот предвидува и воведување современи технологии и дигитализација на производството. „Кромберг и Шуберт“ досега има реализирано три инвестициски проекти во Жабени. Во Битола до сега се околу 5.300 или 5.280, во Скопје се нешто над 1.700, со овој проект ќе дојдеме веќе до 10.000 вработени. Така што довербата што ја има „Кромберг и Шуберт“ во земјата е огромна, посочи премиерот.

За Битола и цела Пелагонија ова значи нов развоен импулс, за локалното стопанство дополнителни можности, а за граѓаните перспектива за стабилна работа и економска сигурност.

-Нашата цел е да бидеме препознаени како сигурна и конкурентна инвестициска дестинација, со силна индустрија, зголемен извоз. Тоа го разговаравме пред почетокот на оваа прес-конференција, следната година од „Кромберг и Шуберт“ очекуваат да надминат 400 милиони евра извоз од своите производни капацитети кај нас. И подобро платени работни места, навистина просечните плати, посебно за висококвалификуваниот кадар се над 80% над просекот во Македонија. Упатувам благодарност до раководството на „Кромберг и Шуберт“ за довербата, како и до сите вработени кои со својата стручност и посветеност придонесуваат за реализација на вакви проекти. На крај, сакам да испратам јасна порака. Ова се нашите цели, ова се нашите приоритети и вака треба да работиме и во иднина за сопствената татковина. Со конкретни инвестиции, со отворање работни места и со резултати. За жал имаме сѐ уште политички сили коишто се преокупирани со секојдневни политички пресметки, кои што се базирани на конструкции, лаги и измислици, а ние ќе останеме посветени на она што им е важно на граѓаните, тоа се капитални инвестиции, и проекти и приватни инцијативи од овој тип, коишто овозможуваат илјадници работни места, добро платени илјадници работни места. Со тоа ја правиме разликата, којашто е во делата, а не во зборовите. Граѓаните очекуваат работа, одговорност и резултати, и по тој пат ќе продолжиме, порача Мицкоски.