Општина Кривогаштани со задоволство ги поканува сите граѓани и посетители да бидат дел од овогодишното Културно-спортско лето во Кривогаштани, програма исполнета со спорт, култура, музика, театар, традиција и забава за сите генерации.

Во рамките на манифестацијата ќе се одржи турнир во мал фудбал, кој ќе ги собере љубителите на спортот и ќе донесе натпреварувачки дух и дружење во нашата општина.

Посебно место во програмата има концертот на отворено „Врбјанска Чука“, кој е организиран од Центарот за истражување на предисторијата, во соработка со Општина Кривогаштани.

Овој настан е можност за уживање во музиката и дружењето под отворено небо, на самиот археолошки локалитет. Љубителите на театарот ќе имаат можност да уживаат во претставата „Девојките на Марко“, реализирана во соработка со Народниот театар „Војдан Чернодрински“ – Прилеп.

Спортската програма продолжува со меморијален турнир во баскет, во организација на здружението ,,Урбано Гнездо Кривогаштани” кој ќе биде уште една можност за спортско натпреварување. Традицијата и локалните производи ќе бидат во центарот на вниманието на Фестивалот на пиперката, организиран во соработка со ,,ЛАГ Агро Лидер”.

Фестивалот има за цел да ја промовира пиперката како значаен земјоделски производ и да ја истакне локалната традиција, производството и вредностите на нашиот крај. Културно – спортското лето ќе заврши со „Бела ноќ“, која и оваа година ја организира ,,Урбано Гнездо Кривогаштани” со поддршка од Општина Кривогаштани.

Вечер исполнета со музика, забава и дружење ќе биде убаво заокружување на целиот месец со активности. Ве покануваме заедно да го прославиме летото во Кривогаштани, со спорт, култура, музика, традиција, дружење и добра енергија.

Прилеп вечерва, 13 август, ќе биде во знакот на рок и блуз музиката. Во рамките на проектот „Од 0 до КултурА“, на Камената Бина на Плоштадот “Александрија” ќе настапи прилепскиот ROCK BLUES BAND, со концерт посветен на легендарниот британски рок-бенд The Rolling Stones.

Концертот започнува во 21:00 часот, а публиката ќе има можност да ужива во препознатливите рок-класики на The Rolling Stones, во живата и енергична изведба на прилепските музичари.

ROCK BLUES BAND е формиран во 2015 година, а низ годините го изгради својот препознатлив стил, негувајќи го звукот на рок и блуз класиката. Бендот своите почетоци ги има на прилепската музичка сцена, а денес настапува и низ други градови во Македонија.

Во состав на бендот се Борче Шабаноски на гитара, Игор Јагуриноски како вокал, Горан Иваноски на тапани и Методија Костоски на бас.

Утрешната музичка вечер е уште една можност проектот „Од 0 до КултурА“ да ја донесе културата, музиката и живите настапи поблиску до прилепската публика.

Камената Бина на Плоштад Александрија, 13 август, со почеток во 21:00 часот. Вечер исполнета со рок-класици, музиката на The Rolling Stones и енергијата на ROCK BLUES BAND.

Четиргодишниот Богдан од Македонија, кој беше пријавен за исчезнат во познатото летувалиште во Голем во Република Албанија е пронајден жив и здрав, објави JOQ Albania.

Претходно, како што објави JOQ Albania, 4-годишното дете исчезнало во областа Алто Маре. Според пријавата, семејството подолго време го барало детето, а ја известило и полицијата во Голем.

За среќе, детето е пронајдено и е заедно со своите родители.

Само два дена пред почетокот на 16-то издание на популарниот „КГЈ 3×3“ турнир во Прилеп, неизвесно е дали најпознатиот баскет спектакл во градот ќе се одржи на својата традиционална локација.

Од 14 до 16 август е предвидено да се игра 16-то издание на „KGJ3X3“, турнир кој со години е синоним за oдличен баскет, спортска атмосфера и дружење, а на кој учествуваат екипи од Прилеп, но и од други градови во земјава.

Култното игралиште во ООУ „Кире Гаврилоски-Јане“ е местото по кое овој турнир практично го доби својот препознатлив идентитет. Токму тука низ годините се создаваше атмосферата по која „КГЈ 3×3“ стана еден од најпознатите регионални турнири во 3х3 баскетот.

Но, оваа година ситуацијата е поинаква.

Иако до почетокот на турнирот остануваат само два дена, градежните и реконструктивните работи на спортското игралиште во училиштето сè уште не се завршени.

Поради ваквата состојба, според информациите кои се споделуваат во пресрет на турнирот, се разгледува можноста „КГЈ 3×3“ годинава да биде дислоциран на друга локација, а како можна алтернатива се споменува просторот кај „Могилата на непобедените“.

Доколку тоа се случи, би било првпат по 16 години турнирот да не се одржи на игралиштето кое е неразделно поврзано со неговото име, традиција и препознатливост.

Прашањето кое логично се наметнува е како можеше реконструкцијата на игралиштето да се одвива токму во периодот непосредно пред одржувањето на еден од најмасовните спортски настани во Прилеп, особено кога датумите за турнирот се однапред познати.

„КГЈ 3×3“ не е само уште еден спортски турнир во календарот. Шеснаесет години овој настан собира млади кошаркари, рекреативци, љубители на баскетот и бројна публика, а со годините прерасна во препознатлив прилепски спортски бренд.

Годинава, покрај баскетот, организаторите подготвија и дополнителна програма со музички настапи, 3-point contest, награди за публиката и други изненадувања. Во петок на сцената се најавени Sexy Marsa и Bon Praskiza, додека во сабота ќе настапи Zeebomb.

Останува да се види дали до петок игралиштето во ООУ „Кире Гаврилоски-Јане“ ќе биде подготвено за најголемиот баскет настан кој традиционално се игра токму таму, или 16-тото издание ќе мора да се пресели на друга локација.

Она што е сигурно е дека по 16 години традиција, би било навистина штета култниот „КГЈ 3×3“ да биде принуден да го напушти својот дом поради ненавремено завршени градежни работи.

Летните четвртоци во Прилеп добија нова димензија, а Cipriani Fine Dining & Lounge Bar продолжува да носи музички вечери кои не се само за слушање, туку за паметење.

Овој четврток, 13 август, со почеток од 21:00 часот, сцената на Cipriani ќе биде резервирана за Слободанка Танева, во придружба на Bongas & Guitares, музички спој кој ветува вечер исполнета со моќен вокал, одлична музика и препознатлива атмосфера.

Слободанка Танева веќе привлече сериозно внимание на регионалната музичка сцена. Образувана оперска пејачка која пее од својата десетта година, таа пред пошироката публика се претстави преку „Hype Zvezde“, каде што со својот вокал и сценски настап успеа да остави силен впечаток.

Нејзиниот музички пат е приказна за талент, образование, но и за храброст. Иако со години го усовршувала својот глас како оперска уметница, долго време чекала да го направи чекорот и да застане пред пошироката јавност. Токму настапот на „Hype Zvezde“ беше моментот кога одлучи својот талент повеќе да не го чува само за себе.

View this post on Instagram

A post shared by HYPE ZVEZDE – Zvuk nove generacije (@hypezvezde)

И тоа беше одлука која се покажа како вистинска. Слободанка стигна до самата завршница на натпреварот, освојувајќи го третото место, во конкуренција која привлече големо внимание во регионот.

Сега нејзиниот моќен вокал пристигнува во Прилеп, а во комбинација со Bongas & Guitares создава музичка поставка која едноставно не смее да се пропушти.

View this post on Instagram

A post shared by HYPE ZVEZDE – Zvuk nove generacije (@hypezvezde)

Cipriani повторно го заокружува доживувањето со она по кое е препознатлив – врвна кујна, внимателно креиран амбиент и атмосфера создадена за уживање. Без разлика дали планирате романтична вечера, дружење со пријателите или едноставно сакате четвртокот да го поминете со добра музика и уште подобро друштво, ова е вечер која вреди да се запише во календарот.

Четврток, 13 август. 21:00 часот. Слободанка Танева + Bongas & Guitares во Cipriani.

Резервирајте го вашето место навреме на 078 534 334 или преку порака на Facebook и Instagram.

Ве очекува вечер во која моќниот вокал, живата музика и уникатниот амбиент на Cipriani ќе се спојат во едно незаборавно летно доживување.

Вашето омилено место за разладување во тропските летни денови – Brunch Box Cafe повторно подготвува пријатно изненадување.

Овoj четврток Box Cafe ве кани да уживате во опуштена атмосфера, разладувачки коктели, свежи цедени сокови, неодоливи закуски и настап во живо на момчето со прекрасен глас од Прилеп, Александар Здравков – совршена комбинација за една убава опуштена вечер и одмор од работните обврски.

Дополнително, Brunch Box Cafe e единственото место надвор од центарот на градот, кое нуди прекрасна пространа летна бавча, имаат богато мени со закуски и мезлаци, а во жешките летни денови се разбира, и одличен избор на коктели.

На коктел менито ќе ги пронајдете вистинските летни класици – Mojito, Sex on the Beach, Hugo и Aperol Spritz, подготвени со квалитетни состојки и совршено разладени за високите температури. Без разлика дали сте љубител на свежите цитрусни вкусови, овошните ароми или пенливите коктели, овде сигурно ќе го пронајдете омиленото летно освежување.

Резервирајте навреме на телефонскиот број: 078 845 442

Почеток: 21 часот!

Локација: Веднаш до градската болница

Македонскиот истражувач и финансиски експерт Бојан Москов од Прилеп, се вклучува во креирањето на новите научни насоки за европската монетарна и фискална политика, преку истражување кое отвора значајни прашања за начинот на кој Европската Унија треба да се справува со инфлацијата и идните економски кризи – објави порталот “Факултети.мк”

Неговиот научен труд „Monetary and fiscal policy coordination as a risk governance mechanism for inflation control in the European Union“ е објавен во меѓународното научно списание Risk Governance and Control: Financial Markets & Institutions.

Истражувањето ја анализира ефикасноста на монетарните и фискалните инструменти за управување со инфлацијата во сите 27 земји членки на Европската Унија, во периодот од 2010 до 2022 година. Станува збор за период во кој европската економија се соочи со последиците од должничката криза, долгогодишната политика на ниски каматни стапки, пандемијата и силните постпандемиски инфлаторни притисоци.

Целиот текст прочитајте го ТУКА

Битола го добива својот прв фестивал посветен на чалгијата. На 14 и 15 август, градот ќе пулсира во ритамот на традиционалната чалгиска музика, низ настанот „Битолски чалгиски денови“, кој е дел од програмата на Битолското културно лето – БИТ ФЕСТ, во организација на Културно-информативниот центар – Битола.

Фестивалот е замислен како своевидно враќање на чалгијата во просторот на градот – таму каде што со децении се создавале и пренесувале музичките приказни, традициите и духот на некогашна Битола. Преку богата дводневна програма, чалгијата ќе биде претставена не само како музика, туку и како дел од културното наследство и препознатливиот градски идентитет.

Првиот фестивалски ден, 14 август, започнува во 11:00 часот во Офицерскиот дом, со семинарот „Канон – Чалгиска музика“, под менторство на Филип Михајловски. Едукативната содржина ќе биде можност за запознавање со традицијата, структурата и спецификите на чалгиската музика.

Фестивалската атмосфера продолжува во 18:00 часот на Широк Сокак, со пајтонско дефиле, кое низ препознатливиот битолски амбиент ќе го најави големиот музички дел од програмата.

Вечерта, центарот на случувањата се сели во Старата Чаршија кај Монмартр, каде од 20:30 часот ќе настапат Чапче и Тајфата. Во 21:30 часот следува настапот на Филип Шурбевски Езгија Квартет, а во 22:30 часот вечерта продолжува со „Мерак чалгии“, Димитар Андоновски и Бојан Стојков.

На 15 август, чалгиската приказна продолжува во Старата Чаршија. Од 20:30 часот повторно ќе настапат Чапче и Тајфата, додека за 22:00 часот настапуваат Љубојна и Битолскиот Чалгиски Оркестар.

Со својата премиерна фестивалска програма, „Битолски чалгиски денови“ отвора нов простор за афирмација на чалгијата и нејзино приближување до новите генерации, истовремено потсетувајќи на богатото музичко наследство на Битола.

Два дена чалгија. Два дена традиција. Една Битола.

Првиот фестивал на чалгијата во градот е покана за битолчани и гостите на Битола да ја почувствуваат музиката на чаршијата, да ја доживеат традицијата на поинаков начин и заедно да бидат дел од создавањето на една нова фестивалска традиција.

„Битолски чалгиски денови“ – 14 и 15 август, во рамките на БИТ ФЕСТ, во организација на Културно – информативниот центар – Битола.

Вчераутро во нива во атарот на селото Беровци бил пронајден починат 68-годишен жител на селото, со прострелна рана во пределот на градниот кош.

Како што информираат од СВР Битола, на 11 август 2026 година во 07:33 часот, во полицијата било пријавено дека во нива во атарот на село Беровци бил пронајден починатиот С.Б. (68) од истото село.

На местото пристигнала екипа на Итната медицинска помош од Прилеп, чии лекари констатирале смрт.

Во возилото на починатиот била пронајдена ловечка пушка со испалена чаура во цевката.

Полициски екипи извршиле увид на местото, а по наредба на јавен обвинител телото на починатиот ќе биде предадено на обдукција.

Истрагата треба да ги утврди сите околности поврзани со случајот.

Тажна глетка од село Боротино, општина Кривогаштани. Две мали штркчиња останале сами во гнездото, откако возрасните штркови ги напуштиле своите живеалишта. Штркчињата се покасно изведени и сè уште не се доволно големи и силни за да летаат и самостојно да се снајдат.

На високите августовски температури, малите штркови се изложени на жешкото сонце и без заштита останале сами и беспомошни. Фотографиите и информацијата се испратени од велосипедист, а случајот го објави Здружението за заштита на животни „Шанса за живот“ од Прилеп.

Од здружението апелираат информацијата да се споделува, со надеж дека ќе стигне до некој кој може да помогне и да им обезбеди соодветна грижа на двете мали птици.

Целта е штркчињата да добијат шанса да пораснат, да зајакнат и еден ден самостојно да ги рашират крилјата и да полетаат.

Во вакви ситуации секоја помош може да биде драгоцена. Споделете ја информацијата и помогнете оваа приказна да стигне до луѓето кои можат да реагираат.

Овие благородни птици заслужуваат спас!