Извадоци од полицискиот билтен на МВР:

-На 11.08.2026 во 15:15 часот во ОВР Прилеп, 35-годишна жена од прилепско село пријави дека во домот била физички нападната од невенчаниот сопруг Д.П. и неговиот брат А.П.

-На 11.08.2026 во 08:00 часот, полициски службеници од СВР Битола го лишија од слобода И.М.(31) од Битола, затоа што во семејниот дом физички ја нападнал неговата 29-годишна сопруга, при што ѝ се заканувал со остар предмет.

По документирање на двата настани ќе следуваат соодветни поднесоци – информираат од МВР.

Заменик-претседателот на Владата и министер за транспорт Александар Николоски оствари работна средба со претставници на меѓународната туристичка групација „Корендон“, на која во фокусот беа можностите за соработка во областа на авиосообраќајот и туризмот.

Како што соопштуваат од Министерството за туризам, на средбата Николоски го истакнал огромниот потенцијал на Македонија како туристичка и авио-дестинација, особено во услови на континуиран раст на воздушниот сообраќај и зголемен прилив на странски туристи.

„Македонија има голем потенцијал за развој на авиосообраќајот и туризмот и тоа го докажуваме во континуитет. 28 нови дестинации, растот од 40 проценти во авиосообраќајот, преку 20 проценти раст на туристите е јасен показател дека интересот за Македонија расте. Нашата цел е овој тренд да го претвориме во нови авиолинии, повеќе туристи и нови инвестиции и отворени сме за соработка“, истакнал Николоски, велат од таму.

„Корендон“ е меѓу трите водечки туроператори во Холандија и Белгија и нуди пакет-патувања до повеќе од 50 дестинации. Групацијата располага со повеќе од 40 авиони кои летаат под знамињата на Турција, Холандија и Малта, а во сегментот на тур-операторските услуги годишно опслужува околу 850.000 клиенти. „Корендон ерлајнс“ годишно превезува меѓу 6 и 10 милиони патници.

На средбата било заклучено дека постои простор за идна соработка, особено преку отворање нови можности во авиосообраќајот, привлекување странски туристи и разгледување потенцијални инвестиции во Македонија, соопштуваат од Министерството за туризам.

Утре и во петок времето наместа ќе биде нестабилно со пороен дожд, грмежи и засилен ветер. Како што информира УХМР, локално процесите ќе бидат во форма на невреме со силен ветер и услови за појава на град. Температурата ќе опадне за неколку степени.

Во Скопје времето ќе биде променливо облачно со сончеви периоди и со постепен пад на температурата.

Институтот за јавно здравје и Центарот за јавно здравје од Скопје прогласија епидемија на западнонилска треска на подрачјето на следните делови од Скопје: Кисела Вода кај Пржино, Аеродром, Бутел, Гази Баба, Илинден, Драчево, Идризово, Јурумлери и Трубарево.

Според здравствените власти, од почетокот на годината има 24 потврдени пациенти заболени од западнонилска треска, а двајца се суспектни.

Дваесет се хоспитализирани на Инфективната клиника од кои пет се во тешка состојба и на механичка вентилација. Најголем дел од заболените се повозрасни мажи над 60 години, кои претежно работеле земјоделско градинарски работи во приквечерните и раноутринските часови.

Викендов починал 83 годишен пациент со западнонилска треска, кој имал повеќе коморбидитети.

Официјалните податоци покажуваат дека во последните 15 години во Македонија се евидентирани вкупно пет смртни случаи поврзани со вирусот на западнонилска треска.

На 12 август се одбележува Меѓународниот ден на младите, посветен на младите, нивните права, потреби, предизвици и можности, како и на нивната важна улога во создавањето на поинклузивни и одржливи општества.

Темата на Меѓународниот ден на младите за 2026 година е „Different Contexts, Common Aspirations“ („Различни контексти, заеднички аспирации“). Таа ја истакнува пораката дека, иако младите живеат во различни услови и се соочуваат со различни предизвици, нивните аспирации често се исти – да имаат можности за образование, достоинствена работа, личен развој, активно учество во заедницата и подобра иднина.

Младински културен центар – Битола (МКЦ-Битола), како организација која континуирано работи со и за младите, го одбележува овој ден преку активност посветена на младите, нивните цели и нивната визија за иднината.

Во соработка со Свесност ‒ центар за психотерапија, денес, среда 12 август 2026 година, МКЦ-Битола на летната сцена во својот простор на ул. Цар Самоил 29 Битола, во 19:30 часот организира интерактивна работилница за млади со наслов „Патот до целта“. Низ интерактивно искуство и лично истражување ќе се даде можност на младите да создадат простор за подобро разбирање на себеси и начинот на кој тие ги поставуваат и остваруваат своите цели. Работилницата не е класично предавање, туку простор за размислување, размена на идеи, запознавање и позитивна енергија.

По работилницата, од 21:00 часот, програмата продолжува со неформално дружење и музика со DJ Chiko.

Со ова одбележување, МКЦ-Битола сака да испрати порака дека секој млад човек има свој пат, но сите млади имаат право на можности, поддршка и простор да ја креираат својата иднина.

Силно светнал ден во Битола, нека ни е вечна Македонија, едногласна беше пораката на многубројната публика која синоќа беше дел од програмата за прославата на независноста на Македонија.

Спектакуларно и претесно беше на платото пред Офицерскиот дом во Битола каде пристигна караванот со музичко-сценскиот спектакл „Силно светнал ден”, по повод 35 години независност на Македонија.

Преку музика, глума и танц, во форма на мултимедијален сценски спектакл, беше раскажана приказната за 35 години независност на нашата татковина, истакнувајќи ги најзначајните историски моменти, подемите, предизвиците и достигнувањата од изминатите три и пол децении.

Во пресрет на 8 Септември, кој годинава го одбележува големиот јубилеј 35 години независност, караванот со настапи на познати македонски изведувачи и актери ќе биде во 11 градови низ државата.

Караванот „Силно светнал ден”, на емотивен и спектакуларен начин го започна одбележувањето на 35 години независност.

Веќе знаеме дека четвртоците во Прилеп имаат некоја посебна магија, а причина за тоа е AVRA – Bites & Cocktails. Овој што ни доаѓа ќе биде зачинет со совршена комбинација од Deep House, Afro House, Sunset Vibes и шест различни Gin & Tonic комбинации создадени за вистинско уживање.

На 13 август, AVRA ве очекува со избор кој ќе ги задоволи и најголемите љубители на добриот G&T:

🍋 Classic G&T
🍓 Strawberry G&T
🥭🌶️ Mango Chili G&T
🥒🌿 Cucumber Elderflower G&T
🌿🍋 Basil & Lemon G&T
🍐🌿 Pear & Rosemary G&T

А најдоброто? Сите коктели се по промотивна цена од само 230 денари!

Затоа, ако четвртокот ви звучи како идеален ден за добро друштво, одлична музика, коктел во рака и атмосфера која ве носи далеку од секојдневието, AVRA е местото каде што треба да бидете.

Резервирајте навреме на 078 564 477, изберете го вашиот фаворит и наздравете со убави луѓе околу вас.

И да не заборавиме, AVRA има широк и простран паркинг простор веднаш до објектот, па изговори од типот каде ќе оставам кола, не држат воопшто место!!!

Дојдете и почувствувајте ја магијата на AVRA!

Коритото на Река Дабничка во Прилеп е извор на нечистотија, зараза, а во последно време и на влекачи и инсекти, а тоа најдобро на своја когаж го чувствуваат жителите на најелитната населба во Прилеп – “Типските куќи”.

Велат дворовите ни зовреа од гуштери и смокови, а коритото на реката врие од инсекти, особено комарци… Причината е тоа што коритото долго време не е исчистено, а Комуналец како да заборавил на оваа должност.

Маркукуле во име на граѓаните за овој проблем реагираше и пред неколку месеци, но надлежните на очигледно останаа и глуви и слепи.

Локалниот младински совет на Општина Прилеп, во соработка со Europe House Bitola, вечерва организира настан посветен на младите, нивните идеи, ставови и активно учество во креирањето на младинските политики.

Настанот ќе се одржи вечерва кај Саат кулата, со почеток во 19:00 часот, а е организиран во пресрет на Светскиот ден на младите, кој се одбележува на 12 август.

Програмата е поделена на два дела – формален и неформален, со цел да се создаде простор за отворена дискусија, но и дружење и забава.

Во првиот дел, од 19:00 часот, ќе се одржи панел-дискусија и претставување на членовите на Локалниот младински совет. Предвиден е и отворен микрофон, преку кој младите ќе можат директно да се вклучат во разговорот, да споделат свое мислење, идеја, прашање или лична приказна.

Од 20:30 часот, настанот продолжува во неформална атмосфера со DJ сет на Emily Nas, а младите ќе имаат можност да се дружат и да учествуваат во различни интерактивни активности, меѓу кои пинг-понг, photo scavenger hunt и други забавни содржини.

Организаторите упатуваат покана до младите прилепчани да бидат дел од настанот и заеднички да го одбележат Светскиот ден на младите, но и да покажат дека нивниот глас, идеите и активното учество се важен дел од развојот на локалната заедница.

Настанот е замислен како можност младите да се запознаат, да разменат идеи и искуства, но и отворено да разговараат за прашањата и предизвиците што ги засегаат.

Жителите на Подвис, Кореница и Годивле и понатаму се соочуваат со прекини и нередовно водоснабдување, а Општина Кривогаштани и ЈП „Пелагонија“ продолжуваат со активности за утврдување на причината за недоволното количество вода во системот.

Градоначалникот на Општина Кривогаштани, Игор Каравилоски, заедно со екипа на ЈП „Пелагонија“ извршил увид по трасата на водоводниот систем на територијата на општината, до резервоарот над населеното место Локвени.

При увидот повторно било констатирано дека резервоарот кај Локвени е празен и дека во него пристигнува многу мала количина вода. Поради недоволниот доток, не може да се обезбеди потребното количество вода за полнење на резервоарите и редовно снабдување на домаќинствата во трите населени места.

Подвис, Кореница и Годивле се снабдуваат преку системот „Студенчица“. Главниот цевковод минува низ територијата на Општина Долнени и ја доведува водата до резервоарот над Локвени. Оттаму водата се насочува кон Подвис, додека за снабдување на Годивле и Кореница потребно е најпрво да се наполни и резервоарот над Годивле.

Од Општина Кривогаштани информираат дека изминатиот период се одржува постојана комуникација со надлежните служби во ЈП „Студенчица“, Општина Долнени и ЈП „Долнени“, со цел да се утврди причината за намалениот доток и да се воспостави редовно водоснабдување.

Според досегашните сознанија, проблемот се појавува во дотокот низ главниот цевковод до резервоарот кај Локвени, на делот што минува низ територијата на Општина Долнени. Сепак, како што посочува градоначалникот Каравилоски, точната техничка причина сè уште не е утврдена и потребна е заедничка стручна контрола на цевководот и целиот систем од страна на надлежните претпријатија.

Засега не се исклучува можноста да станува збор за дефект, загуба на вода, проблем со вентилите или недоволна количина вода пуштена во системот.

„Како градоначалник, продолжувам лично да ја следам состојбата и да барам координирано и итно постапување од сите надлежни институции“, наведува Каравилоски, додавајќи дека Општина Кривогаштани и ЈП „Пелагонија“ ќе ги преземат сите активности што се во нивна надлежност.

Јавноста, како што најавува општината, навремено ќе биде информирана за утврдените причини за проблемот и за понатамошните чекори за нормализирање на водоснабдувањето во Подвис, Кореница и Годивле.