Витаминка е food & beverage партнер на AI Tech Summit 2026, кој се одржува во Скопје, во фокусот на вештачката интелигенција, новите технологии и нивното влијание врз современото работење.

Како компанија која континуирано вложува во развој и следење на современите трендови, Витаминка на учесниците и посетителите им обезбедува Fit!n, како здрава енергија за време на паузите и вмрежувањето меѓу панелите.

Од компанијата посочуваат дека комбинацијата од напредна технологија, континуирана едукација и позитивна енергија е важна за создавање услови за одржлив деловен успех.

Витаминка упати благодарност до организаторите и сите учесници за продуктивните дискусии и одличната атмосфера на самитот.

Ракометарите на Прилеп и Тиквеш ги поделија бодовите во последниот натпревар од 3. коло во Супер машката лига, откако одиграа нерешено 28:28 во натпревар со драматична завршница.

Кавадарчани подобро го отворија мечот и поведоа со 6:2, но Прилеп постепено го фати ритамот и на полувреме замина со предност од 16:14.

Во вториот дел Тиквеш успеа да го преземе водството, а двете екипи се менуваа во сериите и резултатот беше израмнет на 21:21. Во финишот гостите повторно се одлепија и поведоа со 28:26 на 90 секунди до крајот.

Прилеп не се предаде. Тренчевски намали на 27:28, а по нова грешка на гостите, домаќините добија последен напад. Со игра „седум на шест“, Кастратовиќ погоди за 28:28 и голем бод за Прилеп.

Андреј Стојановски беше најефикасен кај Прилеп со 10 голови, додека Шипинкоски постигна шест. Кај Тиквеш, Ончев и Бен Махфуд постигнаа по пет гола, а голманот Солев имаше 10 одбрани.

-На 23.09.2026 во 00:30 часот во ОВР Прилеп, В.З.(39) од с.Кривогаштани, општина Кривогаштани, пријавил дека пред неговата куќа во с.Кривогаштани, тој и неговиот татко биле физички нападнати од група од повеќе лица, кои биле работници и биле сместени во соседната куќа, а според пријавеното употребиле и тврди и остри предмети. По преземени мерки и активности, во врска со настанот од слобода се лишени 13 лица од Струмица. По целосно расчистување и документирање на случајот ќе бидат поднесени соодветни пријави, информираат од СВР Битола

Иницијатива за унапредување на мрежата на итна медицинска помош и воспоставување подрачна служба, пункт или друг соодветен модел за брзо медицинско реагирање во Општина Кривогаштани е доставена до Министерството за здравство.

Како што информира градоначалникот на Општина Кривогаштани, Игор Каравилоски, потребата од ваква служба произлегува од оддалеченоста на општината од постојните центри за итна медицинска помош, што може да влијае врз времето на пристигнување на медицинските екипи, особено до руралните и потешко пристапните населени места.

„Во итни и животозагрозувачки состојби, секоја минута може да биде пресудна“, посочува Каравилоски.

Според иницијативата, поволната географска положба на Кривогаштани овозможува евентуалната служба да опслужува и повеќе населени места од соседните општини Крушево и Долнени, каде што од оваа локација би можело да се интервенира во пократок временски период.

Од Министерството за здравство се бара да ја разгледа можноста за обезбедување медицински тим, интервентно возило, како и неопходната медицинска и комуникациска опрема, во координација со надлежните здравствени установи.

Од Општина Кривогаштани, пак, изразуваат подготвеност да обезбедат соодветен простор, логистичка поддршка и целосна соработка за реализација на иницијативата.

„Нашите граѓани заслужуваат навремена и ефикасна итна медицинска помош“, порачува градоначалникот Каравилоски.

Повардарската епархија и годинава организира бесплатни групни венчавки за брачни парови кои досега не го крунисале својот брак пред Бога.

Групната венчавка ќе се одржи во храмот „Св. вмч. Димитриј“ во Кавадарци, во недела, 15 ноември 2026 година, со почеток во 12:00 часот.

Овој викенд AVRA – Bites & Cocktails подготвува вистинско уживање за сите сетила. Од врвни коктели по специјални промотивни цени, преку внимателно подготвени гастрономски специјалитети, па сè до музика во живо и настап на специјални гости – четвртокот, петокот, саботата и неделата во AVRA носат различна приказна.

Местото каде што добрата храна, коктелите и атмосферата се спојуваат во едно, овој викенд повторно носи богата програма за прилепската публика.

🍹 ЧЕТВРТОК – Martini Club | All Day + ЕX YU хитови

Викендот започнува со Martini Club, со премиум Мартини коктели и уникатни комбинации создадени за љубителите на поинакви вкусови.

На менито ќе се најдат:

• Јагода & ванила
• Праска & ванила
• Пешн & ванила
• Свежо еспресо & ликер од кафе
• Зелено јаболко & бозел

Промо цена: 270 денари

🎷 ПЕТОК (25.09) – ConTruDJ + All Day Sour Promo

Во петок во AVRA пристигнуваат специјални гости – ConTruDJ, со музичка комбинација во која се спојуваат саксофон, перкусиски ритми и DJ сет.

Вечер создадена за добра атмосфера, ритам и уживање, а покрај музичката програма ќе има и All Day Sour Promo.

Ќе можете да избирате помеѓу различни Sour коктели, меѓу кои:

Vodka Sour, Gin Sour, Tequila Sour, Whiskey Sour, Aperol Sour, Amaretto Sour и уште многу други.

Промо цена: 250 денари

 

View this post on Instagram

 

A post shared by ConTruDj (@contrudj)

🎸 САБОТА (26.09) – Македонски евергини & Margarita All Day

Саботната вечер во AVRA е резервирана за македонските евергини.

Од 21:00 часот, за музичката атмосфера ќе се погрижи Акустика Бенд, носејќи ги добро познатите македонски хитови и евергини во акустична изведба.

Во текот на целиот ден продолжува и Margarita All Day Promo, со избор од:

Classic, Strawberry, Mango, Pineapple и Passion Margarita.

Промо цена: 260 денари

 

View this post on Instagram

 

A post shared by 💫🎙️MARTINA ELIORA🎙️💫 (@martina.eliora)

🍹 НЕДЕЛА (27.09) – Paloma All Day & Night

Неделата е резервирана за љубителите на свежите и поинакви коктел вкусови.

Во AVRA ќе се ужива во специјални Paloma комбинации:

Classic, Kumova, Spicy & Smoky Paloma.

Промо цена: 260 денари

ВРВНА ГАСТРОНОМИЈА ЗА СОВРШЕНО ЗАОКРУЖУВАЊЕ НА ВИКЕНДОТ

Покрај богатата коктел понуда и музичката програма, AVRA – Bites & Cocktails нуди и гастрономско искуство со специјалитети подготвени од свежи и внимателно избрани состојки.

Без разлика дали сте расположени за вечерно излегување, коктел со пријателите, добра храна или музика во живо, овој викенд AVRA носи по нешто за секој вкус.

📞 Резервации: 078 564 477

Местата се ограничени – резервирајте ја вашата маса навреме и бидете дел од викендот исполнет со добар вкус, одлична музика и атмосфера.

Американската компанија Гентерм, денеска одбележа 10 години постоење на нивната фабрика во  ТИРЗ Прилеп.

Една деценија во која компанијата прерасна во еден од позначајните работодавачи во градот, со нови инвестиции, производствени капацитети, работни места и најави за понатамошно проширување.

Од институциите денеска слушнавме пораки за значењето на континуитетот, инвестициите, извозот, работните места и развојот на компанијата. И неспорно е дека присуството на една голема меѓународна компанија има економско значење за еден град како Прилеп.

Но, десетгодишниот јубилеј отвора и едно друго прашање.

Колку Гентерм во овие 10 години му вратил на градот во кој работи?

Не само преку платите на вработените и економската активност, туку и преку она што се нарекува општествена одговорност.

Колку и дали доволно средства, опрема, донации или спонзорства се вложени во прилепскиот спорт?

Колку и дали доволно компанијата вложи во културата и во настаните кои се дел од идентитетот на градот?

Колку во здравството, каде што секоја помош за јавните здравствени установи може директно да значи подобри услови за граѓаните?

Колку во образованието, училиштата, детските градинки, младите и нивните иницијативи?

На компанијата и’ честитаме за 10-годишниот јубилеј и посакуваме и понатаму да ги шири своите производствени капацитети и да обезбеди што повисоки плати, за што подостоинствен живот на нивните вработени.

А вас, нашите читатели, ве прашуваме: Дали Гентерм му помогна доволно на Прилеп, и што можеме да очекуваме од компанијата во следните 10 години?

Денеска со свечено поставување на камен-темелник, компанијата Lidl официјално го означи почетокот на изградбата на својот втор продажен објект во Битола. Додека првиот маркет на компанијата во градот е веќе во финална фаза од изградбата, со овој нов проект Битола станува еден од клучните места во земјава каде што Lidl ќе овозможи современо и модерно шопинг искуство преку повеќе продажни локации.

Оваа инвестиција претставува уште еден значаен и конкретен чекор во реализацијата на долгорочната стратегија на Lidl за развој на сопствена продажна мрежа во Северна Македонија. Преку паралелни инвестиции на повеќе локации ширум земјата, компанијата гради модерна малопродажна и логистичка инфраструктура со цел да ги направи своите производи и услуги лесно достапни за сите потрошувачи.

Во своето обраќање пред присутните, Катарина Зориќ, директорка за недвижности во Lidl Северна Македонија, го истакна бизнис-моделот на компанијата кој се темели на развој на сопствени објекти изградени според највисоките меѓународни стандарди.

„Ние инвестираме во изградба на сопствени објекти, што значи дека секој маркет го градиме од самиот почеток, со примена на строги стандарди за квалитет и внимателно планирање на сите сегменти од неговата реализација. Нашата цел е да создадеме широка и функционална мрежа на маркети, со највисоко ниво на квалитет, енергетска ефикасност и одржливост, како и решенија што нудат пријатна средина за потрошувачите. Веруваме дека нашите потрошувачи треба да имаат и понуда на најквалитетни производи по пристапна цена кои ќе ги купат во објекти каде ќе имаат комотно и пријатно искуство како наши клиенти.“

Градоначалникот на Битола, Тони Коњановски, истакна дека вториот маркет на Lidl е значајна инвестиција за градот, која носи придобивки за локалната економија и потрошувачите, но и потврда дека Битола е град во кој компанијата препознава потенцијал.

„Задоволство е што денеска го означуваме официјалниот почеток на изградбата на вашиот, а и нашиот Lidl маркет, втор во Битола. Велам нашиот затоа што верувам дека битолчани со нетрпение очекуваат да се изгради, а потоа и да се отворат вратите на овој препознатлив бренд. Оваа значајна инвестиција ќе биде додадена вредност за битолската економија, ќе придонесе за отворање нови работни места и ќе обезбеди квалитетна понуда за потрошувачите, а воедно ќе отвори можности за партнерства со домашни компании. Ви благодарам што по втор пат ја избравте Битола и со нетрпение очекуваме да ги отворите вратите за сите нас“, изјавиКоњановски.

Основни карактеристики на новиот маркет во Битола:

• Современа градежна концепција: Изградба по највисоки стандарди за енергетска ефикасност и еколошка одржливост на простор од 5 288 м².
• Простран и функционален распоред: Современо уредена продажна сала од 1 546 м² за пријатно искуство при пазарењето.
• Пристапност и паркинг: Обезбедени 108 паркинг места за удобно пазарување на нашите клиенти.
• Зелена површина: Над 20% од парцелата е предвидена за хортикултурно уредување и зеленило.

Како дел од Schwarz Group, еден од водечките европски синџири во малопродажбата на храна, Lidl управува со околу 12.900 маркети во 31 држава и вработува над 395.000 луѓе.

Младиот пејач од Прилеп, Сергеј Попоски, со сè посигурни чекори ја носи македонската музичка енергија и дух и надвор од границите на својата земја. Неговиот глас, непосредноста и емоцијата со која настапува веќе му носат споредби со Тоше Проески, а дел од публиката во него препознава еден нов млад македонски глас со потенцијал да допре и далеку надвор од Македонија.Еден од најзначајните моменти во неговата досегашна кариера се случи на легендарната сцена на Крижанке во Љубљана, каде што настапи пред концертот на Жељко Бебек и ја воодушеви публиката до тој степен што од гледалиштето се слушна: „Hoćemo još!“ Иако во овој период дел од својата музичка приказна ја создава и гради во Љубљана, Сергеј јасно нагласува: неговата појдовна точка, неговиот идентитет и неговиот дом во срцето остануваат Македонија.

За Сергеј Попоски приказната не започнува во Љубљана, Загреб или на социјалните мрежи. Таа започнува во Прилеп, во Македонија. Таму 23-годишниот пејач пораснал, таму за првпат се сретнал со музиката и токму таму биле поставени темелите на артистот кој денес сè посигурно настапува и пред публика надвор од границите на својата земја. Регионалниот успех за него не значи дека треба да го остави македонскиот идентитет зад себе. Напротив – сака да го носи со себе каде и да го однесе музиката.

Музиката влегла во неговиот живот уште многу рано. На петгодишна возраст во нејзиниот свет го вовел неговиот дедо, класично образован пијанист, виолинист и диригент. На петнаесет години Сергеј почнал посериозно да го развива својот вокал во музичкото училиште Matrix, а само една година подоцна веќе знаел дека музиката за него нема да биде само хоби, туку животен пат. Потоа следувале настапи на Охрид фест и Макфест, суперфиналето на телевизиското шоу „Пат до ѕвездите“, меѓународни натпревари и признанија, а годинава во Скопје го освои и Grand Prix на WAF Awards, неговиот најголем натпреварувачки успех досега.

МАКЕДОНИЈА МУ ГИ ДАДЕ КОРЕНИТЕ ШТО ГИ НОСИ НА СЕКОЈА СЦЕНА

Сергеј никогаш не го доживува својот музички подем како заминување од Македонија, туку како продолжение на приказната што токму таму започнала. Македонскиот мелос, темпераментот, луѓето и средината во која пораснал остануваат со него и тогаш кога настапува пред публика што зборува друг јазик. Неговата амбиција е голема, но суштината е едноставна: да покаже дека млад македонски изведувач со својот глас, енергија и искреност може да допре до луѓе далеку надвор од домашните граници.

„Македонија ми даде огромно многу. Ми ги даде моите први музички спомени, првите настапи, луѓето што веруваа во мене и, пред сè, чувството за тоа кој сум. Затоа за мене има посебно значење кога ќе излезам на сцена во друга земја и ќе почувствувам дека луѓето ме прифаќаат мене, мојата енергија и музиката што ја носам со себе. Во тие моменти имам чувство како заедно со мене на сцената да излегува и еден дел од Македонија“, вели Сергеј.

Во последно време неговиот глас стигна до нова публика и преку TikTok. Некои од видеата, создадени сосема спонтано, само со телефон и неговиот глас, достигнаа десетици илјади прегледи, а поединечни снимки надминаа и 170.000 прегледи. Она што започна во Прилеп, полека прераснува во приказна што денес ја следи сè поширока регионална публика.

ОД ПРИЛЕП ДО КРИЖАНКЕ: ПУБЛИКАТА НЕ ГО ПУШТИ ДА СЛЕЗЕ ОД СЦЕНАТА

Еден од најсилните моменти на неговиот досегашен пат се случи во Љубљана. Сергеј доби можност да настапи на легендарната сцена на Крижанке пред концертот на Жељко Бебек, еден од најпрепознатливите гласови на регионалната музичка сцена. За младиот пејач од Прилеп тоа не беше само уште еден настап, туку момент во кој пред публика надвор од својата татковина можеше да покаже дека музичката емоција навистина не познава граници.

На сцената ги изведе песните „Motori“, „Jedina“, „Mi plešemo“, „Ako su to samo bile laži“, „Jesen u meni“, како и култната „I Want to Break Free“ на Queen. Но најнезаборавниот момент на вечерта дојде на самиот крај. Кога веќе се подготвуваше да ја напушти сцената, од публиката одекнаа гласни повици: „Hoćemo još!“

Сергеј повторно се врати на сцената и уште еднаш ја испеа „Motori“.

„Тоа е еден од оние моменти кога на неколку секунди забораваш на сè. Доаѓам од Македонија, стојам на сцената во Крижанке, а луѓе кои можеби дотогаш воопшто не ме познавале бараат уште една песна. За мене тоа не е само аплауз. Тоа е доказ дека музиката од нашиот регион и понатаму ги поврзува луѓето и дека и еден млад изведувач може да го најде своето место пред публика надвор од Македонија.“

Токму таа вечер за него беше еден од оние моменти кога амбициите престануваат да изгледаат далечни и почнуваат да стануваат реалност. Не само затоа што стоеше на голема сцена, туку затоа што го почувствува непосредниот и искрен одѕив на публиката.

ЉУБЉАНА Е ДЕЛ ОД СЕГАШНОСТА, НО МАКЕДОНИЈА ОСТАНУВА ДОМОТ

Важен дел од своето ново креативно поглавје Сергеј во моментов го гради и во Љубљана. Градот станува дел од неговото секојдневие, новите соработки и музичкото создавање, но тој многу јасно нагласува дека новото место не значи и нов идентитет. Неговите корени остануваат во Прилеп и во Македонија.

„Во овој период многу создавам тука и Љубљана навистина стана важен дел од мојот живот. Но Македонија е со мене цело време. Тоа не е нешто што можеш да го оставиш зад себе кога ќе ја поминеш границата. Македонија е мојот дом, моето семејство, мојот почеток и огромен дел од она што сум како човек и музичар. Ако успеам да создадам голема приказна надвор од Македонија, сакам секогаш да биде јасно од каде доаѓам.“

И токму во тоа Сергеј ја гледа суштината на својот пат. Не во тоа дека заминал од Македонија, туку во можноста да ја носи со себе – нејзиниот мелос, темперамент, емоција и оној посебен однос кон музиката, според кој таа никогаш не е само звук, туку дел од животот.

А сега следува и следниот голем чекор. По фестивалите, натпреварите, настапите и виралните видеа, дојде време Сергеј да ја раскаже сопствената приказна преку сопствена музика. Тој ја подготвува својата прва авторска песна, со која сака да отвори ново поглавје во кариерата. Неговата желба е песната најпрво силно да заживее дома, во Македонија, а потоа да го продолжи својот пат низ регионот и пошироко.

За него меѓународната кариера не значи откажување од она што е. Токму спротивното. Колку подалеку ќе стигне, толку повеќе сака со себе да го носи местото од кое тргнал.

Прилеп му го даде почетокот. Македонија му ги даде корените. А големите сцени сега му даваат можност тие корени да ги покаже пред сè поголема публика.

Во рамки на партнерството со Националната опера и балет, Видеолотарија Касинос Австрија со особено задоволство ја најавува балетската претстава за деца „Доктор Офболи“, која на 26 септември ќе биде изведена на сцената на Националната опера и балет.

Со почеток во 19:00 часот, најмладата публика ќе има можност да ја проследи една од најпознатите и најгледаните балетски претстави наменети за деца приказна исполнета со музика, танц, авантури и бајковит сценски свет. Во светот на „Доктор Офболи“ животните зборуваат преку танцот, пријателите си помагаат, а добрината секогаш го наоѓа својот пат. Претстава преку игра, музика и фантазија им зборува на децата за пријателството, храброста и грижата за другите.

„Доктор Офболи“ е создадена според познатата сказна на рускиот писател К. Чуковски, со музика на Игор Морозов. Кореографијата е на познатиот руски балет-мајстор Михаил Крапивин, додека сценографијата и костимите се дело на Живојин Трајановиќ и Марија Пупучевска.

Во претставата настапуваат солисти и балетскиот ансамбл на Националната опера и балет, кои преку танцот ја оживуваат приказната за добриот доктор Офболи и неговите необични авантури.

Динамичната кореографија, впечатливата сценографија, живописните костими и музиката создаваат волшебна атмосфера во која балетот им станува близок и разбирлив на најмладите.

Поддршката на културата и културните проекти е значаен дел од општествената одговорност на Видеолотарија Касинос Австрија. Горди сме што преку партнерствата со националните културни институции даваме свој придонес кон создавање содржини кои ги инспирираат најмладите и ја збогатуваат културната сцена во земјата.