Стрелките се враќаат еден час назад

Следниот викенд повторно преминуваме на зимско сметање на времето. Во ноќта меѓу сабота и недела, на 25 октомври, стрелките на часовникот ќе се поместат еден час назад, од 3 на 2 часот по полноќ.

Тоа значи дека ќе спиеме еден час подолго, но и дека вечерите ќе стануваат потемни порано. Промената ќе ја почувствуваме уште во првите денови, особено оние што поголемиот дел од денот го поминуваат на работа или надвор од домот.

Во сабота, на 24 октомври, сонцето ќе зајде во 17:39 часот, додека во недела, по промената на часовникот, зајдисонцето ќе биде во 16:37 часот. Според наведените податоци, целосно ќе се стемни околу 19:12 часот во сабота, односно околу 18:11 часот во недела.

Со приближувањето на зимата, деновите ќе продолжат да се скратуваат, а дневната светлина ќе ја има сè помалку.

Промената може да влијае врз сонот и концентрацијата

Иако дополнителниот час за спиење звучи привлечно, на организмот може да му биде потребно време за да се приспособи на новиот распоред.

Човечкото тело има внатрешен биолошки часовник кој го регулира циклусот на спиење и будење. Промената на секојдневниот ритам кај некои луѓе може да предизвика замор, поспаност во текот на денот, нарушен сон и потешкотии со концентрацијата.

Периодот на приспособување е различен кај секого. Кај некои луѓе трае неколку дена, додека кај други може да потрае подолго.

Особено е важно лицата со хронични заболувања да внимаваат на евентуалните промени во здравствената состојба. Луѓето што редовно земаат терапија, особено за срцеви заболувања, треба да продолжат да ги следат упатствата од лекар и да не го менуваат времето на земање на лековите без медицински совет.

Како полесно да се приспособите на зимското сметање на времето?

За промената да помине полесно, експертите вообичаено препорачуваат одржување редовен распоред за спиење и будење, доволно изложување на дневна светлина и редовна физичка активност.

Избегнувајте кафе и други пијалаци со кофеин во доцните вечерни часови, а пред спиење обидете се да создадете мирна рутина. Не правете големи промени во распоредот за спиење и дозволете му на телото постепено да се приспособи.

Доколку забележите невообичаени или продолжени симптоми, особено ако имате хронично заболување, консултирајте се со лекар.

До кога ќе важи зимското сметање на времето?

Зимското сметање на времето ќе трае до 28 март 2027 година, кога часовниците повторно ќе се поместат еден час нанапред и ќе започне летното сметање на времето.

Дотогаш, пократките денови и пораното стемнување ќе бидат дел од секојдневието, па добро е навреме да се приспособиме на променетиот ритам.

Koшаркарите на прилепски Мега Баскет ја забележаа првата сезонска победа во Првата лига – Група А, откако вечерва триумфираа на домашен терен против ИБА Скопје.

Крајниот резултат на семафорот беше 87:74. Пред преполна трибина во училишната сала во ООУ “Добре Јованоски”, вечерва дебитираше и најновото засилување на прилепчани, кој постигна и двоцифрен број поени. Станува збор за Канаѓанецот, Отас Ијекекполор, кој во кариерата има настапувано за клубови од Франција, Естонија, Бугарија, Босна и Херцеговина, Летонија…

Отас ќе биде одлично засилување под обрачот на прилепчани, а тоа го видовме и од неговото деби денеска.

Да ја поздравиме победата на прилепчани, и да им посакаме многу вакви претстави пред публиката сезонава.

На 21 Октомври 2026 г. / среда/ од 19.00 часот во киното “Мис Стон” во Прилеп ќе се прикажува филмот „Скејтбордингот не е за девојчиња“, филм на Дина Дума.

За филмот: Кога сиромаштијата го загрозува нејзиното семејство, Адела мора да се бори преку својата страст кон скејтбордингот против конзервативното традиционално општество, за да ја спаси својата постара сестра – која сè уште е малолетна – од судбина што станува неизбежна: договорен брак.

***Времетраење: 83 минути/

Влезници на билетарницата од киното: понеделник, вторник и среда од 11.00 до 13.00 часот и еден час пред проекцијата на филмот.

Со три победи, два нерешени резултати и еден пораз, Прилеп го држи петтото место на суперлигашката табела, а вечерва во “Ричко” доаѓа ѕвездениот тим на Еурофарм Пелистер, предводен од Лино Червар.

Со сигурност ќе биде натпревар за уживање, а избраниците на Наум Танески, ќе се обидат да го изненадат фаворитот кој во моментов заостанува за еден бод пред водечките Вардар и Алкалоид на табелата.

Натпреварот започнува во 18:30 часот, да ја наполнеме трибината до последно место и да ги бодриме нашите момци!

МВР соопшти дека вчера попладне, во 17:05 часот, полициски службеници од ОВР Македонски Брод го лишија од слобода С.В.(22) од Македонски Брод.

При претрес во неговиот дом, истиот со Наредба од основен суд Кичево пронајдена и одземена била грутчеста материја, марихуана, шише со течна материја и хартија за тутун.

По документирање на настанот ќе следува соодветен поднесок.

Синоќа во преполната сала на театарот во Бјалисток, Полска, Народниот театар Битола ја изведе „Кориолан“ како дел од јубилејното 10. издание на меѓународниот театарски фестивал „Direction East“. Делото од Вилијам Шекспир, во режија и адаптација на Џон Блондел, и овојпат го привлече вниманието на публиката која ги награди актерите со долготрајни и стоечки аплаузи.

Секое гостување надвор од границите на нашата земја е повеќе од сценски настап – тоа е можност македонската култура да биде видена, слушната и препознаена. Секое учество на фестивал од меѓународен карактер отвора простор за размена на уметнички искуства, нови професионални контакти и идни соработки, а воедно го потврдува местото на Народниот театар Битола во современиот европски театарски простор.

„Токму преку ваквите гостувања, театарот станува културен амбасадор на својата земја – носејќи ги со себе јазикот на уметноста, креативноста на нашите уметници и приказните што ги поврзуваат различните култури“, истакнуваат од НТБ.

Оваа изведба во Полска, следуваше по гостувањата на „Охридско лето“, Shakespeare Fringe Festival во Верона и „Magical Nights in Butrint“ во Саранда.

Современата адаптација на безвременската трагедија на Вилијам Шекспир отвора актуелни прашања за власта, политичката одговорност и односот меѓу поединецот и општеството. Во претставата играат: Васко Мавровски, Петар Горко, Марјан Георгиевски, Борче Ѓаковски, Петар Спировски, Јулијана Мирчевска и Сандра Грибовска Илиевска. Асистент на режија е младиот уметник и режисер Дамјан Димовски, сценографијата и костимите се на Благој Мицевски, дизајн на светло: Џонатан Хикс, светло мајстор: Горан Петровски, музика: Александар Димовски, видео: Владимир Переловски, инспициент: Оливер Петровски. Суфлер: Мирјана Христовска.

Од Битола кон европските сцени – и овојпат со гордост НТБ го претстави македонскиот театар и понатаму продолжува да гради мостови преку уметноста.

Фотографии: Ивона Кочов

Во битолската Зоолошка градина се одржа едукативно-забавен хепенинг, каде учениците се дружеа, учеа за животните, сликаа…, а исто така беа доделени куќарки за птици наменети за основните училишта од Битола.

Преку оваа активност, учениците имаат можност да научат повеќе за значењето на птиците во природата, потребата од нивна заштита и важноста на грижата за животната средина.

Настанот кој е организиран во соработка со Државното музичко училиште и основните училишта од Битола, понуди содржини што ги обединија едукацијата, креативноста, музиката и дружењето.

Со ваквите иницијативи, Зоолошката градина Битола продолжува да ја поттикнува еколошката свест кај најмладите, учејќи ги дека грижата за природата започнува со мали, но значајни дела.

Во периодот што следува, предвидена е реконструкција на три нови живеалишта, со што ќе се продолжи процесот на подобрување и осовременување на просторот во Зоолошката градина.

Со голема почит и рози, Крушево ги пречека 14-те маратонци кои тргнаа од Нова Градишка, Хрватска, за да му оддадат почит на македонскиот музички ангел Тоше Проески, на денот кога се навршуваат 19 години од неговата трагична смрт.

Маратонците на 13 октомври го започнале својот пат од местото во кое Тоше го загуби животот во сообраќајната несреќа, а денес пристигнаа во неговиот роден град, Крушево, за да се поклонат на неговото вечно почивалиште на Гумење.

Со положување цвеќе на неговиот гроб, тие уште еднаш ја потврдија својата посветеност на споменот за Тоше, чиј лик, дело и хуманост и по толку години продолжуваат да ги обединуваат луѓето, без разлика на националноста и границите.

Нивниот маратон е многу повеќе од спортски подвиг – тоа е чин на љубов, почит и благодарност кон човекот кој остави неизбришлива трага во срцата на милиони луѓе.

Благодарност до маратонците кои со секој изминат километар ја пренесуваат пораката дека вистинските вредности и споменот за Тоше не познаваат граници, а неговата музика, хуманост и човечност продолжуваат да живеат.

По поразот во воведното коло на гостувањето кај Феник, кошаркарите на прилепски Мега Баскет утре (сабота), со почеток од 18:00 часот, во спортската сала на ООУ “Добре Јованоски”, ја пречекуваат екипата на ИБА од Скопје.

Поддршката на трибината е секако неопходна, но она што е интересно е тоа што, на овој натпревар свое деби ќе има црномурестиот Канаѓанец, Отас Ијекекполор.

Станува збор за 30 годишен кошаркар кој игра на позиција центар, висок 203цм, а во кариерата има настапувано за клубови во Франција, Естонија, Бугарија, Босна и Херцеговина…

Отас ќе биде одлично засилување под обрачот на прилепчани, а какво ќе биде неговото деби, останува да видиме во утрешниот натпревар.

Градоначалникот на Битола Тони Коњановски денес присуствуваше на јубилејната прослава 65 години од основањето на Техничкиот факултет Битола при универзитетот „Св. Климент Охридски“.

Шест и пол децении техничкиот факултет е столб на техничката мисла, едукацијата и науката. На свеченоста се обратија ректорот на универзитетот проф. д-р Игор Неделковски, деканот на факултетот проф. д-р Митко Костов, а свое
обраќање имаше и градоначалникот Тони Коњановски.

„Овој јубилеј е заеднички успех на сите генерации студенти, професори и деловни партнери кои помогнаа во градењето на современиот инженерски кадар, а соработката со Oпштина Битола е на високо ниво и со техничкиот факултет и воопшто со Универзитетот „Св. Климент Охридски“.

И во оваа прилика сакам да ја истакнам една од работите со која бевме пионери во Македонија, а тоа е универзитетската летна пракса која студенти од факултетите на битолскиот универзитет во текот на летните месеци ја спроведуваат во Oпштина Битола и нашите јавни претпријатија, а потоа овој пример го следеа и други градови“ истакна градоначалникот на Битола.

Градоначалникот им го честиташе големиот јубилеј и им посака успешни академски години, како на студентите така и на наставниот кадар и сите вработени на високообразовните институции.

„Битола е горда со науката која шест и пол децении го гради нашето општество“, рече градоначалникот Коњановски.