Kaко и секој викенд и овој, најдобрата забава во Прилеп ќе биде во ресторанот “Деспина”. Во сабота гостите ќе ги забавува најпопуларната прилепчанка Елена Јовческа.

Резервации на 072 209 996 и во порака на Фејсбук страната на ресторанот.

Персоналот на ресторан “Деспина” ве очекува!

Матео од Скопје кој има две годинки е итно пренесен и хоспитализиран во “Институт за здраствену заштиту мајке и детета Србија“ под дијагноза Syndroma haemolyticouaremica D 59.3.

Семејството апелира добронамерните луѓе да помогнат со донирање парични средства за Матео да може да се врати дома, откако ќе биде спроведена дијализата како резултат на акутната промена на бубрезите!

Малиот Матео боледува од болест која доведува до брзо откажување на функцијата на бубрезите, хемолитичка анемија и намалување на бројот на тромбоцитите.

Со оглед на сериозноста на дијагнозата, како и последиците од истата по краткиот престој во Систина малиот Матео е однесен во Србија каде лекувањето продолжува.

Во моментот состојбата се подобрува, но финансиите кои се потребни се превисоки за семејството да може да ги подмири.

ДОНИРАЈТЕ НА СЛЕДНИОТ ЛИНК: https://ecrowd.mk/projects/80cec2c4-6de6-49f6-8662-3104bceba237?fbclid=IwZXh0bgNhZW0CMTAAAR1YIdTIXI6eaQdxJNwtUEA4MNw6IDMf5dshOc8Zihr9j1JKS8h_-0_svxI_aem_ARHOyMu10ueWyqYrJVAZZsc5CNyiQPqQ1yNl6zz1Cxezp2Fz5maCZ-hB6plvHekEwhVjktPu0yyLPbeDMZeFw97B

Центарот за управување со кризи (ЦУК) информира дека имало вкупно 1 833 повици на Единствениот повикувачки број за итни случаи 112 во ЦУК во последното деноноќие, од коишто „реални“ повици биле 60,94%, а 39,06% биле за други потреби на граѓаните што не биле итни.

Од ЦУК ги потсетуваат граѓаните да бидат внимателни при појавата на змии во овој потопол период.

Вчера беше добиена пријава за змии (Општина Гази Баба) и веднаш на пријавителката и беше пренесено дека служби за фаќање на змии нема, но сепак и беа дадени информации дека и физички лица има на повик, кои се справуваат и заловуваат змии, истакнуваат од ЦУК.

Регионалниот ЦУК – Битола, известува дека преку Единствениот повикувачки број за итни повици 112, вчера, имало пријава за пронајдена змија на ул.„Мирче Ацев“ бр 9 во Прилеп, по што е интервенирано во 13.45 часот од страна на ТППЕ Прилеп со 3 пожарникари со 1 возило.

Змијата била безбедно уловена жива, па потоа транспортирана и пуштена во природа.

Витаминка ја имаше таа чест да присуствува на конференцијата Dynamics Minds во Порторож, Словенија, втората конференција на Dynamics 365 и Power Platform заедницата, воедно и место каде се среќаваат брилијантните умови. Конференцијата се одржа од 27 до 29 мај.

Васко Наумоски, Дејан Пирганоски и Бранимир Димков беа дел говорниците, учесници во дискусиите што ги опфаќаат сите комори на BizApps за финансии и операции, централизирање на деловноста, ангажирање на клиентите и платформа за зајакнување на деловноста.

Dynamics Minds имаше богата агенда од сесии, разговори и работилници, тридневната конференција овозможи поврзување и вмрежување со присутните и стручни лица во областа, размена на искуства и идеи. Воедно и инспирирање и откривање на тајните вештини на Microsoft стратегиите за најголемите предизвици, пренесени од експерти од индустријата од целиот свет.

Искуството од конференцијата Витаминка ќе го искористи за имплементирање на нови идеи во својата работа и за развој на веќе постоечките концепти и вештини.

Претседателката Гордана Сиљановска Давкова, напладне, во вила Видно, ќе го додели мандатот за формирање влада на лидерот на ВМРО-ДПМНЕ Христијан Мицкоски, кој по изборите на 8 мај обезбеди парламентарно мнозинство со коалицијата Вреди и Движењето ЗНАМ, што беше потврдено при изборот на Африм Гаши за претседател на Собранието.

Новиот владин кабинет е проектиран со реорганизација на ресорите и ВМРО-ДПМНЕ вчера до Собранието достави предлог законски измени кои веќе се ставени на собраниска седница закажана за утре.

Според Мицкоски, преговорите за владата се веќе завршени во делот на формирање на владините ресори и во делот на третиот ешалон.

-Очекувам час поскоро да го поднесам составот на членовите на идната влада која ќе биде изгласана пред крајниот рок што е дефиниран согласно закон и Устав, изјави Мицкоски во Собранието по поднесувањето на измените на Законот за организација на работата на органите на државната управа.

Од 12 до 16. јуни во унгарската престолнина Будимпешта, ќе се одржи Светското првенство во модерни танци WDA 2024.

На ова првенство ќе настапат и прилепските амбасадори, студиото NEW GENERATION, и тоа со 30 свои учесници.

Прилепската група ќе настапи во повеќе категории, и тоа: соло точки во хип-хоп, два дуети, едно трио, две точки во формации, и секако најтешката категорија за изведба – продукција.

Менторот на групата од нашиот град, Оливер Богојевски вели дека ова е шанса за Прилеп и Македонија да испишат историја. Дечките се мотивирани и ги чекаме да се вратат со медали.

Да им посакаме среќа и одличен настап во Будимпешта!

На 04.06.2024 во 13.53 часот во СВР Битола било пријавено дека на крстосница од ул.„Наум Наумовски“ со ул.„Прилепска“ во Битола се случила сообраќајна несреќа помеѓу патничко возило „фолксваген голф“ со битолски регистарски ознаки, управувано од Д.П.(65) од Битола и патничко возило „шкода“ со скопски регистарски ознаки, управувано од Г.С.(53) од Куманово.

Во несреќата со тешки телесни повреди се здобил возачот Д.П. и бил пренесен во Клиничка болница Битола, каде што подоцна починал. Со телесни повреди се здобила К.С.(53) од Скопје, сопатничка во возилото „шкода“, констатирани, исто така, во Клиничка болница Битола.

Извршен бил увид од увидна екипа од СВР Битола, а по наредба на јавен обвинител телото на починатиот било предадено на обдукција – информираат од СВР Битола.

Мое човеково право, гарантирано со многу конвенции, е правото на слобода на изразување и говор. За мене мојата татковина во секоја моја изјава е Македонија и ќе остане Македонија. Целокупната институционална комуникација, која што е дел од законите и Уставот, ќе биде почитувана се додека тие закони и Устав се во сила онакви какви што се, изјави претседателот на ВМРО-ДПМНЕ и иден мандатар Христијан Мицкоски.

Одговорот на хистеријата која, како што вели, се случува кај нашиот јужен сосед, Мицкоски рече го дал уште пред неколку недели и дека претпоставува дека тоа е дел од нивната предизборна кампања.

– Не очекувам талибански однос, цензурирање на елементарно човеково право, а се што е содржано во Преспанскиот договор и дел од нашиот правен систем и уставен поредок, идната влада на ВМРО-ДПМНЕ тоа ќе го почитува. Вклучително еве и решенијата за пратеници коишто ги добивме, ги добивме со придавката содржана. Вклучително и предлог законот којшто денес го доставувам, е со придавката вклучена во него, изјави Мицкоски, одговарајќи на новинарски прашања на прес-конференција во Собранието.

Не им се лутам, продолжи Мицкоски, на политичарите кога не го кажуваат целото и потполно име на нивната држава, туку едноставно крајот или дел од тоа име.

– Не можете да барате да се почитуваат законите, да владее правото, да спроведувате реформи, а од друга страна да сте лицемерни и кажувате работи коишто не се вистински и не можете да ги спроведете. Но во моите изјави ова ќе биде името, за мојата татковина, а тоа ќе биде е Македонија, изјави Мицкоски.

Ако на Самитот во НАТО се отвори тоа прашање, Мицкоски рече, дека неговата порака ќе биде дека би сакал да гради мостови на соработка, на пријателство со нашите соседи, вклучително и со нашиот јужен сосед, источен, северен западен.

– Македонскиот народ и граѓаните се мирољубиви луѓе, мирољубив народ којшто гостопримлив народ. така се однесувале. Очекувам така да се однесуваат и нашите соседи да соработуваме и да негуваме добрососедски односи, рече Мицкоски.

Иако не би сакал, Мицкоски рече, дека може не само таму, туку на било кој форум да отвориме дебата па да видиме кој колку реализирал од Преспанскиот договор.

– Би сакал да зборуваме за инвестиции, за подобар стандард, за развој, за реформи. Тоа е она коешто го очекуваат граѓаните од нас, и тоа е она за коешто граѓаните го дадоа својот глас, изјави Мицкоски.

На денешен ден пред 23 години во близина на селото Гајре, загинаа Благојче Сиљанов,Влатко Миленковски и Пеце Матичевски,воени резервисти,припадници на баталјонот на Воена полиција од Битолскиот корпус во конфликтот во 2001 година.

Во име на општина Битола,градоначалникот Тони Коњановски заедно со претставници на Советот на општина Битола,како и семејствата на прерано загинатите бранители,Сојуз на борци,СВР Битола,колеги,воени старешини,здруженија и поединци, оддадоа почит со положување на свежо цвеќе на споменикот „Ангел“ кај Саат кулата и споменикот „Стив Наумов“ во поранешната касарна.

Комеморативните настани во чест на тројцата бранители се организирани од Министерството за одбрана- Регионално одделение за одбрана во Битола, покрај полагање на цвеќе на гробовите на загинатите бранители во Битола и Новаци и на двата претходно споменати споменици, вклучуваат и организација на меморијален турнир во мал фудбал во спортската сала „Павел Шатев“, по што ќе бидат доделени дипломи и благодарници на учесниците.

Благојче Павлески од Прилеп е единствениот Македонец кој учествуваше и е еден од победниците на 24-тиот меѓународен натпревар по програмирање CodeIT, организиран од Мусала Софт, дел од Киншифт. Павлески натпреварот во програмирање го заврши како треторангиран меѓу 12те финалисти, врвни таленти кои влегоа во годинешното натпреварувачко финале.

CodeIT е создаден од Мусала Софт во 2000 година и е едно од најстарите натпреварувања за програмирање во светот. Привлекува стотици учесници од целиот свет и досега учествувале над 2300 натпреварувачи од повеќе од 20 земји, вклучувајќи ги Кина, Србија, Северна Македонија, Швајцарија, Иран, Индија, Шведска, Јужна Африка, Белгија, Норвешка, Финска, Хрватска, Ерменија, Ирска, Египет, Кенија, Украина и други.

„Мусала Софт, еден од столбовите на Киншифт, постојано демонстрира извонредни деловни достигнувања и силна посветеност за унапредување на ИТ заедницата во сите земји каде што работи. Наградите за CodeIT ги доделуваме со голема гордост и со цврста посветеност да ги одржиме и надградиме заложбите на Мусала Софт за препознавање и поддршка на ИТ талентите,“ истакна Марина Домазетовска, глобален раководител за комуникации во Qinshift.

Оваа година на CodeIT учествуваа програмери од 5 земји, Македонија, Бугарија, Србија, Босна и Херцеговина, Хрватска. Масовното учество на програмерите од овие земји говори за одржливите традиции во информатиката и растечката популарност на програмирањето.

„Успешен живот значи да воспитате среќно дете и да правите добри дела кои се паметат. CodeIT е едно такво дело. Ви благодариме на сите вклучени во текот на речиси четвртвековната историја на заедницата CodeIT“, истакна Елена Маринова, ко-основач на Мусала Софт и член на Советодавниот одбор на Киншифт.

За натпреварот е одговорен тим од над 40 елитни натпреварувачи и олимпијци по информатика од Мусала Софт (CSLAB – Computer Science Lab), кој досега во текот на 23 години има креирано повеќе од 300 задачи. Во 2011 година, натпреварот усвои нов формат во кој секоја сезона е поделена на два вида натпреварувачки делови – СПРИНТ (5+3 задачи) и МАРАТОН (1 задача). Фазите вклучуваат „брзи и бавни“ задачи, распоредени во шест круга задачи. Најдобрите 12 натпреварувачи влегуваат во големото финале. Од 2013/2014, CodeIT стана меѓународно натпреварување и воведува категорија за помлади, до 8-мо одделение, што е клучен чекор во раното вклучување во науката и технологијата. Најдобрите 5 џуниор натпреварувачи од секоја сезона се натпреваруваат во финалето, формирајќи посебен младински ранг.