Заменик министерот за економија и труд, Марјан Ристески, одговараше на пратенички прашања за новиот Оперативен план за вработување на Владата, кој предвидува мерки и решенија кои ќе ја подобрат перспективата и можностите за вработување на младите.

На пратеничко прашање од пратеникот Никола Мицевски, за тоа колку лица се планира и се очекува да бидат вработени со овој план, што содржи планот на Владата и што може младите и невработените лица да очекуваат од овој план, Ристески одговори дека Оперативниот план за 2025 година тежи цели 2,5 милијарди денари, или 40 милиони евра.

-Ова е за 7,5 милиони евра повеќе од претходната година, пари наменети за вработување на младите луѓе во Република Македонија. Со оперативниот план вкупно ќе бидат опфатени рекордни 16.507 лица. Со овој оперативен план, посебен акцент се става на младите невработени лица до 29 години. Прво, во рамките на мерката 1, поддршка за самовработување, претприемништво, вкупно се предвидени 1.730 лица, од кои 720 млади лица.

Ристески додаде дека со планот Владата предвидува финансиска помош и за поддршка за самовработување. Оваа мерка се однесува на невработени лица со минимум основно образование, кои ќе можат да започнат сопствен бизнис. Тука висината на финансиската поддршка изнесува 7.000 евра неповратни средства, што е за 1.000 евра повеќе споредено со претходните години.

Нема повредени во несреќата кога падна кран врз објект во градба во поранешната битолска Касарна, потврди полицијата. Од СВР Битола првично изјавија дека во несреќата има и повредени, зашто така им било пријавено, но по час и пол соопштија дека во извршениот увид е констатирано дека нема повредени.

Градоначалникот на Битола, Тони Коњановски соопшти дека веднаш излегол на лице место каде што се случи немил настан при изведување на градежни активности на приватен објект, кој се гради во старата битолска касарна со цел Општина Битола веднаш да реагира соодветно и согласно своите надлежности.

„Исто така со мене на терен е и овластениот градежен инспектор кој ќе изврши надзор врз активностите на инвеститорот, изведувачот и надзорот на објект каде се случи овој настан. Причинета е само материјална штета. Од клиничка болница Битола и службата за итната медицинска помош ме информираа дека нема пријавено повредени лица. Објектот има уредно издадено решение за градбa. Издададено ќе биде и решение за затворање на градилиштето“ соопшти Коњановски преку објавата и со фотографии на својот Фејзбук профил.

Во организација на Општина Македонски Брод и здружението Форум за Авангардна Креативност, викендов (31 мај и 01 јуни 2025г) во Самоков се одржyva четвртиот по ред адреналински фестивал SAMOKOV XTREME.

Главната цел на овој фестивал е развојот на туризмот во Поречкиот регион и ставање на Самоков на мапата на атрактивни дестинации за авантуристички туризам. Базата на фестивалот на кој очекуваме да присуствуваат околу 500 вљубеници на природата и авантуристи ќе биде на фудбалскиот стадион, каде ќе има организирано кампување на учесниците придружено со културно забавни активности.

Учесниците со своите спортски вештини ке можат да се презентираат во следните дисциплини и истите ќе имаат ревијален карактер:

-возење со теренски возила ( џипови);
-возење со мотокрос ;
-возење со АТВ возила;
-планинарење;

Важна вест за сите прилепчани вљубеници во природата, кои сакаат да учествуваат на утрешната планинарска тура, организаторите имаат обезбедено бесплатен автобуски превоз до стартот на турата. Автобусот тргнува во 07:00часот пред “Палма Шоп”.

Планинарската тура е следна:

Се стремиме кон Порече заради не толку често посетените убавини кои пленат со зеленило и недопрена природна убавина. Добра Вода е не толку посетена планина и токму заради тоа плени со својата недопрена убавина. Таа е висока венечна планина во Македонија што се издига помеѓу долината на Мала Река од исток и Кичевската Котлина од запад. Се дели на два дела: северен (познат и под името Челоица) со највисок врв Добра Вода (2.062 м) и јужен (познат како Песјак) со врвовите Кула (1.917 м) и Коњарник (1.874 м).

За вас подготвивме многу интересна тура со локалните волонтери од Самоков заради подобро запознавање на магијата на Порече. Самоков е срцето на Порече, ако не верувате дојдете и ќе видите сами.

ОПИС НА ТУРАТА:

– Старт од село Самоков во 10:00ч. Селото Самоков се наоѓа во областа Порече, во западниот висок планински дел на територијата на Општина Македонски Брод, на просторот на левата страна на реката Треска. Селото е ридско, на надморска височина од 600 метри.

– пешачење по асфатиран пат од 1.5 км до село Ковач. Селото Ковач исто така се наоѓа во областа Порече, во западниот висок планински дел на територијата на Општина Македонски Брод, над селото Самоков. Селото е ридско, на надморска височина од 720 метри, не е заведено во катастарската евиденција и го дели атарот со соседното село Самоков.

– по изминување на асфалтот движењето е низ шумска патека кадешто во најголем дел сме под сенка, континуирано сме опколени со високостеблеста шума и сите нијанси на зелено. Попатно правиме кратки паузи.

– пристигнување во село Бенче кадешто правиме подолга пауза за ручек и освежување. Селото Бенче е на половина од патеката… од стартот до село Бенче има 7,5 км.

– од село Бенче продолжуваме да се движиме по планинска/козја патека до село Самоков во должина од околу 7 км од кои околу 1 км пред финиш одиме по асфалтен пат.

– Ова е средно тешка тура со околу 15км вкупна должина (12 км – шумска патека, околу 3 км асфалтен пат). Патеката е кружна, но стартот и финишот е на местото кадешто е поставен кампот, на фудбалското игралиште во Самоков.

– Предвидено е пристигнување во кампот најдоцна до 16 часот.

ПОТРЕБНА ОПРЕМА И УСЛОВИ:

– психофизичка подготвеност за пешачење
– удобни чевли/ чизми (не е препорачано да се носат патики)
– Панталони со долги ногавици
– Планинарски стапчиња
– Капа и средства за УВ заштита.
– Кабаница

ИСХРАНА:

– секој сам си носи исхрана од ранец;
– вода 2 литри. (вода има во селото Бенче);
– суво овошје, сендвичи и сл.

НАПОМЕНА:

– За да не дојде до оптоварување на турата, задолжително е претходно пријавување за учество;

– Секој учесник е должен да ги почитува правилата и насоките на организаторот и водичите, во спротивно сам е одговорен за несаканите последици;

– Организаторот и водичите имаат право да исклучат член пред стартот на планинарската акција доколку не ги исполнува наведените услови и не ја поседува соодветната планинарска опрема за предвидената планинарска акција.

– Организаторот и водичите го задржуваат правото на измени на термините и редоследот на акцијата во зависност од временските услови и останатите технички препреки.

– За сите планинари кои доаѓаат од Прилеп, организаторот ќе обезбеди автобуски превоз на релација Прилеп – Самоков.

ВОДИЧИ НА АКЦИЈАТА:

1.Елена Младеноска 071 278 365
2. Марјан Ристески 071 201 111
3.Анѓелески Златко 078 445 055

16.00 – 18.00 организиран заеднички ручек (војничко гравче) за сите учесници на настанот

ВАЖНО!!!

Учесниците на настанот кои ќе не посетат треба најпрво да се регистрираат на пунктот за пријавување, да си подигнат стартен пакет и да потпишат Изјава за учество на сопствена одговорност. Стартниот пакет чини 600 денари и содржи: место во кампот, сувенир маичка, присуство на вечерната забава,доручек, ручек, учество во адреналинскиот конвој и производи од спонзорите на фестивалот.

Оние учесници кои нема да бидат дел од кампот во Самоков во саботата, односно ќе пристигнат утрото во неделата ќе треба : најпрво да се регистрираат, да подигнат стартен пакет и да потпишат Изјава за учество на сопствена одговорност .

ПС.во недела наутро за планинарите ќе има организиран превоз на релација Прилеп – Самоков – Прилеп со автобус.Учесниците кои ќе доаѓаат со автобусот можат да си купат стартен пакет или да си уплатат 200 денари за превозот.

За подетални информации за настанот:

Гоце Бојкоски 075 770 600
Горан Дамчески 077 976 869

-На 30.05.2025 полициски службеници од ОВР Демир Хисар, по претходно добиени оперативни сознанија, на патот Демир Хисар – Кичево сопреле товарно моторно возило “цитроен” со прилепски регистарски ознаки, управувано од С.Б.(39) од Прилеп.

При преглед на возилото била пронајдена акцизна стока – 26 паковки тутун со вкупна маса од 13 килограми, како и различен вид на текстил.

Тутунот е одземен и предаден на Царинска управа Битола, а возилото со текстилот е предадено на Царински терминал Битола за понатамошна постапка. С.Б. е лишен од слобода и по документирање на случајот, против него ќе биде поднесена соодветна пријава.

Во археолошкиот локалитет „Стоби“ денеска во пресрет на Неделата на светите отци од Првиот вселенски собор, ќе биде отслужена Света Божествена литургија, со која ќе чиноначалствува Архиепископот Охридски и Македонски г. г. Стефан, во сослужение со повеќе македонски архијереи и со бројно свештенство.

МПЦ – ОА упати повик до сите православни верници од земјава да дојдат и во заедничка радост, соборно да биде прославена 1700-годишнината од одржувањето на историскиот Прв вселенски собор.

На Првиот вселенски собор, одржан во Никеја, во 325 година, присуствувале и тројца македонски епископи: Александар, Епископ на Солун, Будиј, Епископ на Стоби и Дакиј, Епископ на Скупи.

Присуството на македонски епископи на овој Собор, како што нагласуваат од МПЦО-ОА, е историски показател за длабоките корени на христијанството во Македонија, односно за тоа дека во тој период, на нашиве простори веќе постоел организиран христијански живот со добро раководена Црква и црковна заедница.

Ученичка Исидора Мирческа од ООУ “Кире Гаврилоски” од осмо одделение, под менторство на нејзината наставничка Сузана Николоска, на дванаесеттиот фестивал “Алекса Шантиќ” за деца поети кој се одржа во Мостар, а во организација на СПДК “Просвјета Мостар”, освоија прво место. На фестивалот учествуваа деца поети од целиот регион.

Фестивалот траеше три дена, од 26. до 28. мај, а во конкуренција од 1.500 песни, избрани беа 11 финалисти.

-Во Домот на културата во Мостар, гордо се рецитираа стиховите на Македонски јазик. Достоинствено го претставивме нашето училиште, нашиот град и нашата Македонија. Со наградата понесовме прекрасни спомени од топлите прегратки на Мостар и гостољубивоста на организаторите, на најубавиот, најголемиот и најдобро менаџиран фестивал во регионот, вели менторката на Исидора, Сузана Николоска.

По повод Светскиот ден на пчелата – 20 мај, на Плоштадот „Магнолија“ се одржа манифестацијата „Мед и млеко на Широк Сокак“, во организација на Сојузот на пчеларски здруженија, пчеларското здружение „Нектар“, Амбасадата на Република Словенија и општина Битола.

Во своето обраќање до присутните, амбасадорот Грегор Пескер истакна дека долги години Словенија посветува големо внимание на вклучувањето на младите во пчеларските активности.

„Затоа оваа година, нашата амбасада одлучи да даде приоритет на вклучувањето на младите во пчеларството и зачувувањето на опрашувачите,
бидејќи тие се идните чувари на нашата животна средина. Со ангажирање на младите луѓе во пчеларски активности, едукативни иницијативи и напори за застапување, можеме да инспирираме нова генерација лидери во животната средина и да ги поттикнеме позитивно да влијаат на светот“, истакна Н.Е. Пескер.

Градоначалникот на општина Битола Тони Коњановски истакна дека оваа манифестација треба да прерасне во традиционална, бидејќи значењето и
постоењето на пчелата е важно за одржувањето на човештвото на планетата.

„Овие манифестации се многу значајни, бидејќи го истакнуваат производството на медот како значајна гранка од земјоделството, а голем
број лица се занимаваат со производство на мед. За некои тоа е животна професија, но е многу важно да се одржува животната средина чиста, со цел и производоството на медот да биде квалитетно и природно“, рече Коњановски.

За значењето на настанот говореа и Верче Мицевска, Национална координаторка за безбедност на храна, ветеринарна и фитосанитарна
политика, како и претседателот на пчеларското здружение „Нектар“, Менде
Трајковски.

Покрај производите од мед, на Магнолија беа изложени и млечни производи од млекарата Вемилк. Настанот беше збогатен со настап на најмладите од битолските детски градинки.

Позната по производство на врвни лубриканти, компанијата Liqi Moly чие седиште е во Улм, Германија, со своите производи е присутна во дури 150 земји ширум светот и е синоним за квалитет, не само за лубриканти, туку и за сите други производи од нивниот асортиман.

Liqui Moly Македонија, како минатите две години, така и оваа, на дилерска средба ги претстави резулатите од работа на компанијата како независен дистрибутер за продуктите на германскиот производител.

За завршница на настанот им беа доделени плакети на најдобрите дистрибутери на Liqui Moly Македонија, а признанието за најдобар партнер, трета година по ред освои компанијата “Матадор” oд Прилеп.

Прилепската компанија е препознаена како МАСТЕР ПАРТНЕР на германскиот гигант, а нивните клиенти го знаат тоа и затоа Матадор ужива најголема доверба на пазарот.

По 44 пат, во Старата битолска чаршија, на Платото пред Детското ликовно студио „Кирил и Методиј“ , беа додели наградите на најуспешните учесници на затворањето на годинешното издание на Малиот Битолски Монмартр.

По одлука на Жири комисија во име на градоначалникот на општина Битола, заменик градоначалникот Бојан Бојковски ја додели наградата за најдобро училиште – учесник на светската детска ликовна колонија Мал Битолски Монмартр на ликовното ателје Артино од Белград , Србија.

Детското ликовно студио Свети Кирил и Методиј Битола ја додели наградата „Најдобар учесник – ученик” на 44. Издание на светската детска ликовна колонија Мал Битолски Монмартр на Ајпенур Карадениз од Ателјето на Професор Вејсел Аџар од Трабзон – Турција. Беа доделени и други
поединечни награди, а на сите 150 учесници, односно на учениците, нивите професори и асистенти, им беа доделени дипломи за учество.

Општина Битола, традиционално го поддржува Малиот Битолски Монмартр, на кој годинава учествуваа 150 гости со 18 делегации од 17 земји, меѓу кои и Македонија, Албанија, Бугарија, Босна и Херцеговина, Хрватска, Чешка, Индија, Израел, Малезија, Црна Гора, Полска, Романија, Србија, Словачка, Русија и региони од Турција (Трабзон и Кајсери).

Оперативниот план за вработување за оваа година предвидува обуки за повеќе од 2.000 лица, со приоритет на жени, млади до 29 години и долгорочно невработени, изјави денеска владината портпаролка, Марија Митева.

Според планот, првата група опфаќа 245 лица кои се регистрирани како невработени во Агенцијата за вработување. Обуките ќе се одвиваат на конкретни работни места кај конкретни работодавачи и ќе траат до три месеци, а учесниците ќе добиваат месечен надомест од 12.000 денари.

„Приоритет при изборот ќе имаат жените, младите до 29 години и долгорочно невработените лица“, нагласи Митева.

Втората група од 600 лица ќе посетува обуки за занимања кои се веќе барани на пазарот на труд, а фокусот ќе биде на социјалните услуги, зелените работни места и секторите трговија и услуги. И овде месечниот надоместок е исто така 12.000 денари.

Дополнително, 720 лица ќе бидат вклучени во обуки за развој на основни и напредни компјутерски и јазични вештини.

Митева посебно ги истакна обуките за напредни дигитални и ИТ вештини, кои ќе опфатат 470 лица и ќе бидат реализирани преку лиценцирани програми. По завршувањето, учесниците ќе добијат меѓународно признати сертификати, што значително ќе ја зголеми нивната конкурентност на пазарот на трудот.

Според владата, оваа мерка има за цел да ги намали бариерите за влез на пазарот на труд и да го зголеми вработувањето на младите и жените во земјава.