Според календарот на МПЦ (Јулијанскиот календар) денеска е 8 мај.

Денеска е Св. апостол и евангелист Јован.

Споменот на овој голем апостол и евангелист се празнува на 26 септември. А на 8 мај се споменува чудото пројавено на неговиот гроб. Имено, кога Јован имаше повеќе од сто години, зеде седуммина од своите ученици, излезе од Ефес и им нареди на учениците да му ископаат гроб во вид на крст. Потоа старецот слезе жив во гробот и беше погребан. Кога подоцна верните го отворија Јовановиот гроб, не го најдоа телото во гробот. А на 8 мај секоја година се креваше некоја прашина од неговиот гроб, од која се исцелуваа болни од разни болести.

Тропар
Апостоле, возљубен од Христа Бога, побрзај да ги избавиш луѓето без одбрана, оти, Оној што ти дозволи да се потслониш на Неговите гради, ќе ти дозволи и да Го помолиш за нас. Него моли Го, Богослове, да го растера и темниот облак на незнабошците, просејќи за нас мир и милост голема.

Кондак
Твоето величие, девственику, кој може да го прикаже, зашто точиш чудеса и излеваш исцеленија, и се молиш за душите наши, како богослов и Христов пријател.

Сопствениците на еден од најдобрите ресторани во Прилеп, ресторанот BEER TI & JA, денеска донираа машина за перење и хигиенски средства, за потребите на Одделението за максилофацијална хирургија – уво, нос и грло, во прилепската болница “Борка Талески”.

Нека овој гест на Мартина и Благојче Кочоски, биде поттик за останатите стопанственици во нашиот град, редовно да помагаат онаму каде што е најпотребно, а во интерес на сите граѓани.

Општествената одговорност и хуманите вредности, се нешто што остава траен белег во нашето општество, значи љубов, значи благодарност кон оние од кои зависи работењето и успешноста на фирмите, фабриките, рестораните…. а тоа се граѓаните.

Секоја чест!

На влезот во Прилеп се наоѓа најмераклиското место: Еве зошто ресторан “Beer ti & ja” стана главна дестинација за сите гурмани и боеми (ФОТО ГАЛЕРИЈА)

Селекторот на кадетската репрезентација на Македонија, прилепчанецот Горан Кузманоски – Таста, го формираше својот стручен штаб пред стартот на подготовките за настапот на Европскиот младински олимписки фестивал.

Во стручниот штаб на Таста, ќе бидат тренерот на голманите во македонскиот шампион Еурофарм Пелистер, Ице Соколески, и поранешниот македонски репрезентативец Митко Стоилов, кој во моментов е тренер на Младост Богданци.

Стоилов зад себе има богата кариера, со настапите во Младост Богданци, Вардар, Металург, Загреб, Одорхеи, а Соколески пак е познат по одличната работа досега со младинските категории.

Ова ќе биде супер можност за младите ракометари да учат и да се подготвуваат преку совети од врвни ракометни имиња, па сите заедно веруваме дека ќе прераснат во одлични ракометари, кои еден ден ќе ги заменат големите ракометни ѕвезди.

На 20 Мај, ТППЕ Прилеп со голема гордост го одбележува Денот на македонските пожарникари. Овој ден е посветен на храбрите луѓе кои несебично се борат за спас на човечки животи и имот.

По повод одбележувањето на овој значаен ден, градоначалникот на општина Прилеп ја посети Територијалната противпожарна единица – Прилеп, каде што заедно со пожарникарите разговараа за нивната работа, предизвиците и потребите со кои секојдневно се соочуваат во служба на граѓаните.

Притоа Јовчески објави дека е потпишан договор за набавка на ново противпожарно возило – клучна инвестиција за зголемување на капацитетите за брза и безбедна интервенција. Овој проект е реализиран преку Министерството за локална самоуправа, со вкупна вредност од 8,5 милиони денари, при што Општина Прилеп учествува со значителни 3,5 милиони денари.

“Во моментов е во тек и редовна постапка за набавка на нова заштитна опрема за нашите пожарникари – затоа што нивната безбедност, подготовка и опременост се наша заедничка одговорност и приоритет.

Ви го честитам Денот на пожарникарството со желби за добро здравје, безбедни интервенции и – што е најважно – што помалку работа”, истакна Јовчески.

Вицепремиерот и министер за транспорт Александар Николоски на денешната пресконференција објави дека Владата го усвоила Договорот за стратешко партнерство со Обединетото Кралство и најави дека истиот Договор веќе во четврток, делегација предводена од вицепремиерот Николоски ќе биде потпишан во Лондон.

Во продолжение интегралното обраќање на вицепремиерот Николоски:

“Една од одлуките на седница е Владата на Република Македонија да го прифати Договорот меѓу Владата на Република Македонија и Владата на Обединетето Кралство во врска со партнерство за реализација на инфраструктурни проекти, односно Договорот Влада со Влада.
Целта нa Договорот е да воспостави партнерство за поддршка на реализација на инфраструктурни проекти во секторите здравство, транспорт, технологија, енергетика, дигитална трансформација и други критични сектори во Република Македонија.

Првичната група на проекти се веќе споменати во јавноста во делот на здрaвството и во делот на транспортот. Исто така многу значајно за мене е да се разменуваат знаења и практики користејќи експертиза од Владата на Обединетото Кралство и од британски деловни субјекти за подршка на реализација на проекти но исто така и на трансформација на јавната администрација и приватниот сектор со експертиза од бизнис заедницата од Обединетото Кралство но и од владините агенции.

Ќе се разменуваат знаења во здравството, транспортот, технологијата, енергетиката и клучните критични сектори, а за изградба на капацитетите на Владата на Македонија ќе се користи експертиза од Обединетото Кралство. Оваа соработка ќе биде во согласност со важечкото законодавство, правилата и политиките на секоја од двете земји. Учесниците ќе работат заедно да ги истражат можностите за мобилизирање на средства за финансирање на проекти и што е многу значајно, Владата на Обединетото Кралство го потврдува интересот и капацитетот преку Инструмнтот за финансирање на извозот или УКЕФ, со што става на располагање 5 милијарди фунти или 6 милијарди евра за реализација на проекти во Македонија. Нагласувам ова ќе биде проектно финансирање и финансирање кое ќе оди исклучиво со реализација на проекти. Ова е рамка која не значи дека целосно ќе се искористи но е рамка што е располагање и која што можеме да ја користиме.

Она што сум горд е што добивме и официјална покана од Владата на Обединетото Кралство и покана до мене, за да се потпише овој Договор Влада со Влада на 22 мај, тоа е овој четврток и можам да Ве информирам дека Владата ме овласти да го потпишам овој договор. Ќе предводам владина делегација која што покрај мене, ќе бидат и потпретседателот на Владата и министер за животна средина Изет Меџити, понатму министерката за образование Весна Јаневска, директорот на ЈП за Железничка Инфраструктура Синиша Ивановски и останати соработници и мислам дека ќе имаме два плодни дена за соработка. Утре имаме средби со министерот за внатрешни работи на Обединетото Кралство и министерот за одбрана, имаме и средби со претставници од Инструментот за финансирање. Во четврток е главната церемонија, а исто така во четврток ќе имам средба и со директорот на Рајанер од каде што очекувам да произлезат и нови летови кон Скопје.

Сметам дека се работи за историски момент, за датум кој ќе остане во аналите на македонската историја, 22 мај ќе биде датум кој долго ќе се споменува во македонската историја затоа што се работи за досега најобемен дооговр кој Македонија го постигнала со било која држава.
Тоа не е било која држава, тоа е втората светска сила, држава со која имаме одлична соработка во рамки на НАТО Алијансата, дел е од западната цивилизација, става на располагање најмногу средства и за мене е наважен политичкиот момент бидејќи влегуваме во партнерство со клучен западен сојузник што јасно ја дефинира политиката на Владата, но исто така и позицијата на Македонија како прозападно ориентирана држава и држава која ги почитува евроатланските вредности. Исто ми е драго што Обединетото Кралство објави дека постигнале договор со ЕУ, што значи дека во еден пакет ги имаме трите клучни сојузници на Македонија, тоа е ЕУ, Обединетото Кралство и САД”- истакна вицепремиерот Николоски.

Поради сообраќајна незгода што се случила вечерва, товарно моторно возило (ТМВ) е попречено на експресниот пат Градско – Прилеп, поточно кон селото Дреново.

Сообраќајот на овој дел од патот е во целосен прекин, а возилата се пренасочуваат по стариот пат низ село Росоман.

Надлежните служби се на терен и работат на расчистување и нормализирање на сообраќајот. Се апелира до возачите да бидат внимателни и да го следат насочувањето од сообраќајната полиција.

Изминатиов викенд Иџе повторно на пиедестал. Трката во Шпанија беше трка за паметење.

„Изгубено е првото место за 0.8 стоти делови од секунда. Тоа докажува какви се овие трки, неизвесност до самиот крај, борба при секоја кривина за што подобар пласман. И покрај тоа што во првото и третото возење, имав најдобро време и прва позиција од сите натпреварувачи, за жал, во второто возење направив грешка, која не чинеше позиција на пиедесталот. Секако, можам да кажам дека сум исклучително задоволен од трката која помина. Огромен успех за мене и за Македонија е да се биде на еден ваков натпревар со 100 натпреварувачи, вели Стефановски.

Иџе додава дека е вистински горд што публиката во Шпанија го дочека величествено, како трикратен европски шампион.

Благодарност до мојот тим, како и тимот на Ферари кои беа со мене во последниве трки. Благодарен сум за нивната пожртвуваност и подготовката на автомобилот за постигнување на овие вистински, извонредни резултати. Со оваа трка и освоените бодови, се позициониравме на првото место во групата 1, и второ место во генералниот пласман од сите натпреварувачи. Со мојата екипа, веќе сме на пат за Македонија, а веќе следната недела не очекува петтата трка од ФИА Европскиот шампионат на ридски патеки (еHC) која ќе се вози во Чешка, изјави Стефановски.

Стефановски се трка со автомобилскиот ѕвер од Ферари 488 B8, специјално дизајниран за овие патеки.

Видеолотарија Касинос Австрија уште еднаш упатува искрени честити до Иџе за постигнатиот успех во оваа трка. До крајот на овој шампионат, остануваме посветени во поддршката и ќе продолжиме заедно да навиваме за Иџе и Македонија.

Безвременскиот Стоби Флипс на Витаминка со гордост ја презеде улогата на генерален спонзор на детската спортска манифестација „Децата под Исарот“, која по втор пат го оживеа Штип оваа година. Настанот кој е посветен на радоста, движењето и единството, се одржа под покровителство на брендот што неуморно ги поддржува вредностите на активниот и здрав начин на живот.

Трката е уникатна можност за најмладите да ги искажат своите спортски таленти, да се натпреваруваат во безбедна и стимулирачка атмосфера, а пред сè – да научат дека движењето и тимскиот дух се основа на секоја здружена заедница.

„За нас во Витаминка, поддршката на вакви настани не е само обврска, туку страст. Веруваме дека децата се иднината, а нивното здравје и насмевки се најголемото богатство. Со учеството во „Децата под Исарот“, сакаме да ја истакнеме важноста на физичката активност и радоста од споделување“, истакнуваа од маркетинг секторот на Витаминка.

Оваа година, на настанот учество зедоа околу 700 деца, поделени во повеќе категории од 4 до 14 годишна возраст. Трката е со хуманитарен карактер и сите средства ќе бидат донирани.

Стоби Флипс и Витаминка искрено им се заблагодаруваат на организаторите за довербата и можноста да се биде дел од оваа прекрасна иницијатива. Заедно, продолжуваме да градиме свет каде што секое дете ќе има можност да расте силно, здраво и исполнето со позитивна енергија!

Во пожар што се случи ноќеска 20 минути по полноќ изгореа три автомобили паркирани пред колективна зграда на улицата Леринска во Битола.

Огнот прво избувнал во „тојота“, а потоа зафатил уште две возила паркирани до тој автомобил.

Според неофицијални информации, едниот опожарен автомобил е сопственост на бизнисменот и поранешен кандидат за градоначалник од редовите на СДСМ, Христо Кондовски.

Од полицијата потврдуваат дека се опожарени возилата, а екипи на противпожарната служба интервенирале веднаш по дојавата и спречиле пошироко проширување на огнот. Немало повредени лица.

Според портпаролот на СВР Битола, Сања Стаматова, трите опожарени возила се водат на приватни фирми, битолска, скопска и тетовска фирма.

– Пожарот избувнал на паркинг на улица Леринска каде од страна на непознат сторител била фрлена запаллива течност при што опожарени биле три возила ‘тојота рав’ хибрид со битолски ознаки сопственост на приватна фирма, корисник била С.К. Другото опожарено возило е ‘пасат’ со тетовски регистерски ознаки сопственост на приватна фирма и третето зафатено со оган возило е ‘дачија’ со скопски ознаки исто така сопственост на приватна фирма. Извршен е увид на местото на настанот се преземаат мерки да се расчисти случајот – изјави Стаматова.

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши зголемување на малопродажните цени на нафтените деривати во просек за 2,08 % во однос на одлуката од 16.05.2025 година.

Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 4,668%, кај дизелот за 1,642%, кај екстра лесното масло за 4,856% и кај мазутот зголемувањето е за 0,580%.

Курсот на денарот во однос на доларот во изминатиот период по кој беа формирани цените со претходната пресметка е повисок за 0,1804%.

РКЕ ја информира јавноста дека со денешната одлука, согласно Законот за акциза, РКЕ е обврзана да го вкалкулира новиот соодветен износ на акциза при пресметка на цената за Екстра лесно 1 (ЕЛ-1). Како резултат на зголемувањето на берзанските цени на нафтениот продукт Gasoil 0,1% во првата половина од месец мај, исполнети се предусловите да се применува дополнителното зголемување на акцизата (ДАЕ) за гасно масло како гориво за греење кое изнесува 2,00 денари за литар.

Од 20.5.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 75,50 (денари/литар)

Моторен бензин ЕУРОСУПЕР БС – 98 77,50 (денари/литар)

Дизел гориво ЕУРОДИЗЕЛ БС (Д-Е V) 67,00 (денари/литар)

Масло за горење Екстра лесно 1 (ЕЛ-1) 69,00 (денари/литар)

Мазут М-1 НС 36,808 (денари/килограм)

Малопродажната цена на бензинот ЕУРОСУПЕР БС-95 се зголемува за 2,00 ден/лит.

Малопродажната цена на бензинот ЕУРОСУПЕР БС-98 не се менува.

Малопродажната цена на ЕУРОДИЗЕЛ (Д-Е V) се зголемува за 0,50 ден/лит.

Малопродажната цена на Екстра лесното масло за домаќинство на (ЕЛ-1) се зголемува за 4,00 ден/лит.

Малопродажната цена на Мазутот М-1 НС се зголемува за 0,279 ден/кг и сега ќе изнесува 36,808 ден/кг.

-Напоменуваме дека ова се максималните цени на нафтените деривати од 00:01 часот на 20.5.2025 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени, велат од РКЕ.