Дежурен јавен обвинител од Основното јавно обвинителство Битола изврши увид во битолско на локација каде едно лице по кое, според првичните сознанија, полицијата трагала, пукало со огнено оружје кон службени лица.

Полициски службеник возвратил, при што лицето е повредено, по што е лишено од слобода и задржано на лекување под надзор.

Јавниот обвинител издава наредби и насоки за целосно расчистување на настанот.

Фудбалскиот клуб од прилепско Големо Коњари, го претстави првото поголемо засилување за новата сезона.

Боите на новиот второлигаш ќе ги брани искусниот Зоран Даноски познат како Шукер. 34-годишниот напаѓач кој зад себе има богато искуство како на домашната сцена, така и во странство, ќе биде одлично освежување во тимот кој ќе го предводи Јовица Блажевски.

Даноски во својата кариера настапуваше за екипите на: Металург, Победа, Кожув, Тиквеш, Брегалница, како и за Баник Мост и Прибрам во Чешка, Интер Запрешиќ во Хрватска, екипата на Ѕвезда 09 во БиХ и Младост, Нови Пазар, Радник и Пролет во Србија.

Фудбалските вљубеници веруваат дека богатата кариера на Даноски ќе се одрази врз мотивот на останатите играчи и дека тој ќе биде вистински лидер во тимот.

Од полноќ се врши намалување на малопродажните цени на нафтените деривати во просек за 0,73% во однос на малопродажните цени на нафтените деривати утврдени согласно одлуката за утврдување на највисоки малопродажни цени на нафтените деривати и горива за транспорт на Регулаторна комисија за енергетика, водни услуги и услуги за управување со комунален отпад на Република Северна Македонија од 30.06.2025 година.

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,50 ден/лит, во однос на малопродажните цени утврдени со одлуката за утврдување на највисоки малопродажни цени на нафтените деривати и горива за транспорт од 30.06.2025 година и со тоа малопродажната цена на ЕУРОСУПЕР БС-95 изнесува 74,00 ден/лит, додека малопродажната цена на ЕУРОСУПЕР БС-98 изнесува 76,00 ден/лит.

Малопродажната цена на ЕУРОДИЗЕЛ (Д-Е V) се зголемуваа за 0,50 ден/лит, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 30.06.2025 година и со тоа, малопродажната цена на ЕУРОДИЗЕЛ (Д-Е V) изнесува 70,00 ден/лит.

Малопродажната цена на Екстра лесното масло за домаќинство на (ЕЛ-1), не се менува, односно останува на исто ниво како што била утврдена со одлуката за утврдување на највисоки малопродажни цени на нафтените деривати и горива за транспорт од 30.06.2025 година и со тоа, малопродажната цена на Екстра лесното масло за домаќинство на (ЕЛ-1) изнесува 69,50 ден/лит.

Малопродажната цена на Мазутот М-1 НС, се намалува за 0,174 ден/кг, во однос на малопродажната цена утврдена со одлуката за утврдување на највисоки малопродажни цени на нафтените деривати и горива за транспорт од 30.06.2025 година и со тоа малопродажната цена на Мазутот М-1 НС изнесува 39,409 ден/кг.

На 06.07.2025 во 17.39 часот на ул.„Македонски гемиџии“ во Битола полициски службеници од СВР Битола го лишиле од слобода Х.Р.(32) од Битола. При контрола во патниот сообраќај, полициските службеници сопреле патничко моторно возило „голф” со битолски регистарски ознаки, кое го управувал Х.Р. и по преземени мерки било констатирано дека бил под дејство на алкохол, односно измерени му биле 1,51 промили алкохол во крвта.

На 06.07.2025 во 13.01 часот, полициски службеници од ОВР Македонски Брод кај с.Латово, Македонски Брод, го лишиле од слобода В.Т.(39) од Скопје. При контрола во патниот сообраќај, полициските службеници сопреле патничко моторно возило „цитроен” со скопски регистарски ознаки, управувано од В.Т. и по преземени мерки било констатирано дека бил под дејство на алкохол, односно измерени му биле 2,55 промили алкохол во крвта.

По документирање на случаите, ќе бидат поднесени пријави по член 297-а од КЗ.

Околу 3.000 верници и гости синоќа го посетија преубавиот манастир Св. Јован Крстител над село Беранци, битолско по повод празнувањето на големиот христијански празник – Иванден.

Нешто невидено, така посетителите ја опишаа сликата, гледајќи надолу кон огромната колона возила која се движеше кон манастирот. Речиси целото село и сите селски улици беа преполни со автомобили. Луѓе доаѓаа од сите пелагониски населени места и градови, а имаше зошто. После вечерната богослужба, за добро празнично расположение се погрижија оркестарот “Маестрал” и естрадниот пејач Благоја Грујовски.

Се пееја песни, се играа ора, една преубава слика која ќе остане во сеќавање на сите присутни.

Манастирот во Беранци е еден од најубавите во Пелагонија, а најпосетен е токму за Иванден.

За многу години и напомош, а до в година уште побројни!

Со особено задоволство, Видеолотарија Касинос Австрија ја поддржа реализацијата на концертот „Од МОБ за Скопје“, одржан во чест на 200-годишнината од раѓањето на еден од најголемите светски композитори – Јохан Штраус.

Ова значајно културно случување, организирано од Амбасадата на Република Австрија во Скопје, се одржа во саботата на 5 јули, под отворено небо пред Националната опера и балет. Во вечер исполнета со музика, оркестарот на МОБ под диригентската палка на Винсенз Праксмарер и врвните солисти Бригита Симон и Иван Наумовски, ѝ приредија на публиката вистинско музичко доживување – патување низ најпознатите валцери, маршеви и арии на Штраус.

Поддршката на културните настани е клучен сегмент од корпоративната стратегија на Видеолотарија Касинос Австрија, насочена кон поттикнување на уметноста и збогатување на културниот живот во земјава. Преку ова спонзорство, ја потврдуваме нашата заложба за поддршка на вредностите што културата ги носи во едно општество – убавината, инспирацијата, духовноста и заедништвото.

Видеолотарија Касинос Австрија ќе продолжи активно да вложува во иницијативи што го збогатуваат општеството и го поддржуваат културниот развој на Македонија.

Од Територијалната противпожарна единица Прилеп упатуваат апел до граѓаните, да внимаваат кога палат и оставаат запалени свеќи на гробиштата.

Имено, во текот на вчерашниот ден е спречено ширење на пожар на новите градски гробишта, кој настанал од запалени свеќи. Пожарот се заканувал да се прошири и да зафати поголема површина.

За среќа пожарникарите навремено реагирале со три возила и шест пожарникари, па пожарот бил изгаснат.

ЈКП Водовод и канализација Прилеп алармира за зголемена нерационална потрошувачка на водата за пиење, што резултира со губење на притисокот во повисоките делови од градот

-Веќе извесен период потрошувачката на вода во град Прилеп е енормно зголемена поради нерационално користење на пивката вода, што предизвикува намалување на притисокот на водоснабдувањето во повисоките реони, а посебно во зградите на горните катови.

Апелираме на совесно и одговорно користење на основниот ресурс за живот и животните потреби – информираат од ЈКП Водовод Прилеп.

„Македонската интервентна пожарна, еве така да ја наречеме оваа единица, денес делуваше многу импресивно и мотивирачки. Денес се случи комплетна пренамена на полициските и армиски „БТР 80“, „Хермелини“ и „Пинцгауери“ кои беа управувани од луѓе кои се вешти од МВР и Армијата. На сите тие возила им е вграден различен резервоар, во зависност од статиката на возилото, да не дојде до изместување на тежиштето и да не дојде до превртување. Работеа инженери на овој проект. Резервоарите се од 1,5 метар кубен до 6, исто така се со вградени пумпи со различна „коњажа“, пумпи со различна можност, притисок итн и навистина тоа делува импресивно. Кога зборувавме со луѓето од Армијата колкав терен тие би можеле да покријат, ми беше кажано дека до 20 километри само овие возила кога би се распределиле би изгасиле пожар.“,рече премиерот Мицкоски во гостувањето на „Тема на денот“ во Дневникот на Сител телевизија.

Тој потенцираше дека оваа пренамена на старите армиски и полициски возила не ја чинело државата ништо, туку тоа било направено од општествено одговорни компании, а ако едно вакво возило чини 400 илјади евра, тогаш тоа значи дека заштедени се неколку десетици милиони евра од буџетот.

„Од друга страна отпочнат е огласот за вработување на 400 нови пожарникари. Ги охрабрувам луѓето преку општините, тие кои се чувствуваат подготвени да влезат во овој процес. Оваа единица, армиските хеликоптери и хеликоптерите на полицијата, а на тоа додадени и Ер тракторите, еден е вратен од сервис, другиот се враќа оваа недела, а третиот до крај на јули, ценам дека сме подготвени доколку оваа година се случат пожари да ги совладаме.“,истакна премиерот Мицкоски и дополни дека направените промени ветуваат спремност во справувањето со пожарите и за разлика од минатото државата ќе биде проактивна, а не реактивна на ова поле.

Топлотниот бран со температури до 41 степен продолжува и во следните два дена, а освежување продор на посвежа воздушна маса од север се очекува од задутре. Управата за хидрометеоролошки работи за денеска најави сончево и многу топло време со мала до умерена облачност. Минималната температура ќе биде во интервал од 14 до 22, а максималната ќе достигне од 33 до 41 степен. Попладне има услови за локална појава на нестабилност со краткотраен пороен дожд и грмежи. Ќе дува слаб до умерен, наместа повремено засилен ветер од југозападен правец.

За Скопје исто така прогноза за сончево и многу топло, со минимална температура до 20, а максимална до 40степени. Попладне со мала до умерена облачност, а ќе дува слаб до умерен југозападен ветер.

И утре ќе се задржи многу топло време со дневна температура наместа и над 40 степени. Во попладневните часови ќе има услови за локална појава на нестабилност со краткотраен пороен дожд и грмежи. Ќе дува умерен, а во западните делови повремено засилен ветер од југозападен правец.

Според прогнозата на УХМР, во среда, а особено во четврток поради продор на посвежа воздушна маса од север ќе има значително опаѓање на дневната температура. Ќе дува засилен северен ветер, а претежно во северните делови ќе има повремен дожд.

Поради високите температури, минатата недела во петок беше активирана фазата 3 од Акцискиот план за превенирање на последиците од топлотни бранови, а Владата донесе препораки за заштита на населението кои ќе траат до вторник, 8 јули.

Од работни обврски се ослободени бремени жени и лица постари од 60 години, но тоа не се однесува на вработени во критичната инфраструктура (здравство, полиција, армија, транспорт, енергетика, јавни комунални претпријатија).

Во препораките на Владата се и одложување на работниот процес од 11 до 17 часот за работници изложени на директна топлина; работа од далечина, флексибилно или двократно работно време, каде што е изводливо; обезбедување микроклиматски услови за работа односно простории со температура до 25 степени Целзиусови, освен таму каде природата на работниот процес налага поинаку.

Препорачано е и активирање планови за вонредни услови и сите здравствени установи, установи за згрижување стари лица и образовни институции да постапат согласно интерните протоколи за кризна состојба.

-Мерките имаат цел да обезбедат континуирана и ефикасна заштита на здравјето на населението преку превентивно дејствување и соодветна институционална подготвеност, посочуваат од Министерството за здравство и додаваат дека заедно со сите надлежни институции ќе продолжат со редовно информирање и спроведување на мерките, со цел заштита на здравјето на граѓаните.