ЕВН – Македонија информира за планирани прекини на електрична енергија, за утре (04.04.), во следните населени места во oпштина Прилеп и oпштина Долнени, и тоа:
-Викенд населба Кишовица и ул.,,Леце Котески” од 09.00 ч. до 11.00 ч. и с. Небрегово, с. Дупјачани и с. Дреновци од 09.30 ч. до 15.00 часот во ЕЛС- Долнени.
Македонскиот бренд број еден, прилепска ВИТАМИНКА, со гордост ја поддржа мисијата на СОС Детско село на настанот “ЕДНО СЕМЕЈСТВО”, кој собра над 150 претставници од 50 компании со заедничка цел – да се обезбеди топол дом и сигурност на децата без родителска грижа.
-Годинава фокусот беше на позитивното родителство и јакнењето на семејствата, со цел да се спречи раздвојувањето на децата од нивните биолошки семејства. Почесен гостин беше Н.Е. Мартин Памер, амбасадорот на Австрија, кој ја најави зголемената поддршка од австриските компании. Доделени беа признанија на 20+ компании кои направија разлика во животите на децата. Витаминка продолжува да биде дел од хуманоста што обединува – напишаа од компанијата.
Денеска попладне и во текот на ноќта, во западните, а утре во источните делови ќе има повремени врнежи од дожд, наместа пообилни (над 15 л/м2), соопшти УХМР.
Во сабота ќе има услови за локална појава на нестабилност со пороен дожд, грмежи и засилен ветер. Во недела ќе има брз продор на студена воздушна маса од север и ќе има врнежи од дожд, на планините и на повисоките места од снег. Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места. Во понеделник наместа ќе има провејување на слаб снег, а утринските температури на повеќе места ќе бидат негативни.
Потоа следува период на стабилно и постудено време со утрински температури кои насекаде ќе бидат под нула.
Во Скопје, попладне и во текот на ноќта ќе има врнежи од дожд, во делови од котлината повремено пообилни (10 – 15 л/м2). Утре ќе се задржи променливо облачно време со повремен дожд. Во сабота ќе има преодно стабилизирање на времето, а во недела ќе биде претежно облачно, ветровито и студено со повремени врнежи од дожд. Во вечерните часови во повисоките делови од котлината ќе има услови за повремен слаб снег.
Премиерот Христијан Мицкоски во одговор на пратеничко прашање од лидерот и пратеник на Левица, Димитар Апасиев, искажа сомневање за кривично дело при купување нделовен простор по ниска цена во центарот на Скопје преку Универзална инвестициска банка. Апасиев, на денешната седница за опозициски пратенички прашања постави прашање до премиерот Мицкоски, за како што рече, неговиот однос и селективноста на истрагата за трагедијата во Кочани, и изрази сомнеж од опасност за несоодветни обвиненија.
– Политичката партија Левица купила деловен имот од 409 метри квадратни на адвокатската улица за 295.000 евра со ДДВ или 721 евро во центар на Скопје. Ќе ви кажам какво е ова кривично дело. Градот Скопје ви пресметал цена квадрат од 1.150 евра, па сте платиле данок во вредност од 739.285 денари. Ќе видиме дали е кога ќе се позанимаваат органите, рече Мицкоски.
Мицкоски во одговорот на прашањето од Апасиев посочи дека кога станува збор за кривични дела, се надева оти органите ќе имаат можност длабински да истражат што е тоа што претставува кривично дело.
Јавно го прашувам Димитар Апасиев дали му е познат објектот во центарот на Скопје, каде што Левица на 26 ноември 2024 година купила деловен простор од 409 м² по 721 €/м², што е далеку под реалната вредност. Град Скопје ја проценил недвижноста повисоко, а пресметаниот данок… pic.twitter.com/PLkLGCKX6p
— Христијан Мицкоски (@MickoskiHM) April 3, 2025
– Тоа што јас можам да ви го кажам е дека со криминалците нема играње, вклучително и со оние кои се потенцијални криминалци. Без разлика од која политичка партија доаѓаат, дали се од СДСМ, дали се од ДУИ, Левица или од ВМРО-ДПМНЕ, рече Мицкоски.
Апасиев рече дека е незадоволен од одговорот, а тоа што го прави Мицкоски го оквалификува како „реторика која се нарекува синдром на коза“ или „вербална дијареа“, дека зборувал за сè, само не за она што прашал. Апасиев, во репликата напомена дека не му било одговорено на поставеното прашање. Тој потврди дека партијата Левица купила простор подрумски простории и дека тоа е причината за ниската цена.
– Зборувате за сè освен за тоа што ве прашав. А тоа што ве прашав е всушност констатација дека вашите часовници вредат повеќе од таа зграда. Ние купивме подрумски простории со приземје, ете затоа е толкава сумата. Уште утре да ни поднесете кривична пријава. Исто како што јас следната недела ќе поднесам против вас, дело „Попречување на правдата“ и за кривични дела „Оддавање службена тајна“ одговори Апасиев.
Во тек на дебатата беа изнесени и ставови за обвинителите во истрагата, при што Мицкоски алудирајќи на Гаврил Бубевски рече дека првпат го сретнал на трагедијата во Кочани, а на што Апасиев прочита, како што рече, „препорака издадена во 2009 година од ВМРО-ДПМНЕ ОК Пехчево, на која се потпишани 8 членови на Партијата од комитетот во Пехчево, за вработување на Бубевски како јавен обвинител во Скопје.
Зголемување на безбедносните стандарди што ќе треба да ги исполнуваат сите објекти кои извршуваат угостителска дејност, поголема контрола на процесот на издавање на лиценци и утврдување на обврските на сите државни институции кои што се поврзани со целиот процес на издавање на лиценци, на овие теми и за тоа што точно ќе содржат законските измени кои ќе следуваат, во утринската програма на МРТВ зборуваше заменик министерот за економија и труд, Марјан Ристески.
-Според податоците од Државниот пазарен инспекторат, станува збор за фрапантни податоци на еден тотален хаос кој што се случувал во минатото, посебно со овие објекти поврзани со угостителството, а тука пред се’ ноќните клубови, дискотеки, вклучувајќи го и така нареченото кабаре кое во црно ја зави цела Македонија. Направени се 116 контроли, каде се контролирани овие лиценци за ноќни клубови и утврдено е дека 13 од нив не ги исполнуваат воопшто минимално-техничките услови, за кои е изречена забрана за вршење дејност, изречени се парични казни и е даден предлог да им бидат одземени лиценците. Исто така кај 10 угостителски објекти се откриени потполни неисполнувања на другите услови кои што се во законот. И кај нив е извршена забрана за дејност и изречени се парични казни. Шест од тие ноќни клубови, кабариња и дискотеки работеле со помината лиценца и кај нив е изречена забрана за вршење дејност. Меѓутоа направени се и други контроли кај угостителски објекти и изречени се казни од околу 500.000 денари, за неисполнување на други услови кои исто така се пропишани во Законот за угостителство, истакна Ристески кој потенцираше дека контролите до крајот на неделата ќе продолжат и кај објекти во кои се одвиваат разни свечености и прослави.
Ристески потенцираше дека со оваа опсежна акција, државата за прв пат има реална слика за тоа што се случува и како функционираат угостителските објекти на целата територија.
Заменик министерот ги потенцираше слабостите во моменталната законска регулатива, како норми кои се премногу либерални и многу работи оставаат на совеста на угостителите, а покрај тоа било забележано и дека изостанувала строга контрола во изминатите години од инспекциските служби.
– Промената на законската регулатива треба да се одвива во неколку насоки, пред се промена во критериумите за издавање на лиценци, исто така промена во контролата да биде засилена и не како досега да се остава на совеста на испекторите и да не биде воведувана во онаа годишна програма за инспекциски надзор, туку да имаат задолжителна контрола еднаш годишно, бидејќи и лиценците најчесто се со важност од една година. Исто така казнената политика да биде многу поригорозна, со оглед на тоа дека казните сега се многу мали, смешно од 100 до 500 евра. Можат и да се затвораат објекти, да се пломбираат, а не како досега било изрекувано забрана за 30 дена, и најчесто тие сопственици ги отварале пред истекот на казната или воопшто не ја почитувале казната. Дури и да има промена во кривичниот законик, за овие лица кои нема да ги почитуваат одредбите од законот, додаде заменик министерот Ристески.
Како eдно од можните решенија за зголемување на критериумите за издавање лиценци, Ристески го потенцираше и формирањето на стручна комисија која ќе ги контролира новите предвидени услови во Законот за угостителство и целиот процес на издавање лиценци.
– Всушност така било до 2008 година, кога стручни лица оделе, ги проверувале минимално-техничките услови за работа и со свој потпис гарантирале и после тоа се носело лиценца за тие објекти, истакна Ристески кој потенцираше дека во оваа комисија треба да има лица од различни области како машински и електро инженери, архитекти и слично и дека оваа комисија треба да биде составена од повеќе институции како Државниот пазарен инспекторат, МВР, Трудовиот инспекторат, општината каде се наоѓаат соодветните објекти, како и Дирекцијата за заштита и спасување.
Ристески го потенцираше и проблемот со недостиг на кадар во инспекторатите, за сметка на останатите институции каде постои и пренатрупаност со административни службеници.
-Една од идните работи на оваа Влада ќе биде докомплетирање на инспекторатите во било која институција, вклучувајќи ги тука Државниот пазарен и трудовиот инспекторат. И да напоменам дека ќе се врши не само зајакнување на инспекциските служби на централно ниво, туку и зајакнување на испекциските служби на локално ниво. Ние имаме општини со повеќе десетици илјади жители, кои немаат ниту еден или имаат еден градежен инспектор, истакна Ристески.
-На 03.04.2025 полициски службеници од ОВР Прилеп при СВР Битола го лишиле од слобода Ј.А.(45) од Скопје. Врз основа на судска наредба од Основен суд Прилеп, извршен е претрес во викендичка во близина на с.Витолиште, прилепско, во сопственост на Ј.А.(45) од Скопје. При претресот била пронајдена ловна пушка со калибар 16мм , ловни патрони со калибар 16мм, 223 куршуми од автоматска пушка, 70 куршуми за пиштол, четири рамки од автоматска пушка, две рамки од полуавтоматска пушка и граната. По документирање на случајот, ќе биде поднесена соодветна пријава.
Зголемени плати, реален раст – Македонија се буди! Од 1 април започна исплатата на зголемените плати во јавното здравство: линеарно зголемување од 2.500 денари нето за сите! Со зголемувањето во ноември, вкупното зголемување достигнува 4.815 денари, а за медицинските сестри дури 6.200 денари, истакнува премиерот Христијан Мицкоски на својот Фејсбук профил.
-Со тоа, просечната плата се зголемува на околу 50.200 денари. Октомвриското зголемување изнесува 10.49%, а кумулативно – дури 17.18%! Со инфлација од околу 3.5%, реалниот раст за 2024/25 ќе биде околу 9.4%. За споредба, во периодот 2021–2023 реалниот раст изнесуваше само 3.8%. Промените се случуваат. Македонија повторно станува ваша, порача премиерот.
Јавен обвинител од Основното јавно обвинителство Скопје поднесе Обвинителен предлог против 50-годишен скопјанец за кривично дело – Предизвикување општа опасност од член 288 став 4 во врска со став 1 од Кривичниот законик.
-Во текот на претходната постапка, јавниот обвинител обезбеди докази од кои произлегува дека обвинетиот, во периодот од 04.11.2022 до 30.01.2025 година со општоопасно дејствие предизвикал опасност за животот и телото на луѓето, свесен дека поради неговите сторувања можат да настапат штетни последици, а сепак лекомислено сметал дека тие нема да настапат.
Тој на својот син му давал да управува патничко моторно возило „Пежо 207“, иако знаел дека синот не смее да управува со автомобил бидејќи нема возачка дозвола и е повеќекратен сторител на сообраќајни деликти, и тоа: едно кривично дело – сообраќајна несреќа со полесни последици во ноември 2022 година, 11 сообраќајни прекршоци (возење без возачка дозвола, возење под дејство на алкохол, непочитување на семафор и на пешачки премин) во текот на 2023 и 2024 година, како и кривично дело – сообраќајна несреќа со смртни последици на 29.01.2025 година, информира Обвинителството.
-На 02.04.2025 во 01.20 часот, полициски службеници од ОВР Прилеп на ул.”Братство Единство” во Прилеп, го лишиле од слобода Г.К.(22) од Прилеп, затоа што вознемирувал и следел 30-годишна жена од Прилеп.
Се преземаат мерки за расчистување на настанот – информираат од ОВР Прилеп.
Исполнето е ветувањето за зголемување на пензиите од 5.000 денари на над 330.000 пензионери. Со исплата на мартовската пензија за 2.500 денари, се заокружи циклусот за линеарно покачување на пензионерите за 5.000 денари, велат од Владата.
Со сегашното зголемување, како што појаснуваат, најниската пензија во март изнесува 18.192 денари, додека просечната пензија изнесува околу 26.258 денари.
-Пензионерите заслужуваат сигурен и достоинствен живот. Дополнително дека работиме во интерес на граѓаните покажува и фактот што како Влада имаме став дека нема да ја зголемиме старосната граница за пензионирање која сега е 62 години за жени и 64 години за мажи и најмалку 15 години стаж. Грижата за пензионерите е наша обврска и цел, се вели во денешното владино соопштение.
Како Влада, додаваат, продолжуваме целосно посветено и одговорно да работиме за подобар и поквалитетен живот за сите граѓани.
