Прилеп се најде на врвот на македонската покер сцена. Далибор „Дадо“ Думаниќ е прогласен за играч на годината за 2025 година, на традиционалната Awards Ceremony на Македонската покер федерација (МПФ).

Свеченото доделување, кое годинава се одржа по 15-ти пат, се одржа во престижниот SkyLounge во Limak Hotel во Скопје, во присуство на претставници и љубители на покерот.

Думаниќ едногласно го доби признанието за најдобар играч за 2025 година, со што уште еднаш беше потврден неговиот успех на македонската покер сцена.

Покрај него, уште едно значајно признание замина во Прилеп. Ице Боцески го освои златниот медал во онлајн лигата „Macedonian Open“, пред Андреја Андреевски од Скопје, кој го освои среброто. Бронзениот медал му припадна на Марио Мојсов од Велес.

Свеченоста продолжи со забава до доцна во ноќта, со настап на „Brass Brothers“, придружени од моделите на модното студио „Crnokrak“ и водителката Вера Мештеровиќ.

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 1,85% во однос на одлуката од 28.9.2026 година.

Референтните цени на нафтените деривати на светскиот пазар во споредба со претходната пресметка бележат намалување и тоа во просек: кај бензините за 2,885%, кај дизелот за 4,770%, кај екстра лесното масло за 4,384% и кај мазутот намалувањето е за 1,807%.

Курсот на денарот во однос на доларот во изминатиот период по кој беа формирани цените со претходната пресметка е повисок за 0,9101%.

Во Одлуката на РКЕ е применета владината одлука за намалениот износ на ДДВ за нафтениот дериват ЕУРОДИЗЕЛ (Д-Е V) во износ од 10% и е применет намален износ на акцизата од 4,00 ден/лит кај бензините ЕУРОСУПЕР БС-95 и ЕУРОСУПЕР БС-98 и кај ЕУРОДИЗЕЛ (Д-Е V).

Од 6.10.2026 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 98,50 (денари/литар)

Моторен бензин ЕУРОСУПЕР БС – 98 100,50 (денари/литар)

Дизел гориво ЕУРОДИЗЕЛ БС (Д-Е V) 97,00 (денари/литар)

Масло за горење Екстра лесно 1 (ЕЛ-1) 108,50 (денари/литар)

Мазут М-1 НС 49,597 (денари/килограм)

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 1,50 ден/лит.

Малопродажната цена на ЕУРОДИЗЕЛ (Д-Е V) се намалува за 3,00 ден/лит.

Малопродажната цена на Екстра лесното масло за домаќинство (ЕЛ-1) се намалува за 3,00 ден/лит.

Малопродажната цена на Мазутот М-1 НС се намалува за 0,285 ден/кг и сега ќе изнесува 49,597 ден/кг.

-Напоменуваме дека ова се максималните цени на нафтените деривати од 00:01 часот на 6.10.2026 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени, велат од Регулаторна.

ЈКП „Водовод“ – Битола започнува организирана теренска акција за проверка и ажурирање на податоците за корисниците, водомерите и водоводните приклучоци.

Во првата фаза, теренските екипи ќе работат во Долно Оризари, Буковски Ливади и Стара Битолска Чаршија.

Од комуналното претпријатие ги повикуваат корисниците од овие подрачја да овозможат слободен и безбеден пристап до водомерите, а доколку е потребно, да бидат достапни и за проверка и усогласување на корисничките податоци.

Акцијата ќе се спроведува етапно и во останатите региони, за што граѓаните дополнително и навремено ќе бидат информирани.

Од „Водовод“ Битола упатуваат благодарност до граѓаните за соработката, со цел да се обезбеди посигурно и поефикасно водоснабдување.

Богато војничко погребување со штит, шлем, копја, меч и предмети од злато, бронза и килибар е најновото исклучително откритие на археолозите на архајската некропола Расница кај струшкото село Корошишта, со што дополнително се потврдува значењето на локалитетот за проучување на Охридско-струшкиот регион во VI век пред нашата ера.

Националниот археолошки музеј денеска ќе ги презентира најновите резултати од археолошките истражувања на локалитетот, каде годинава е откриено богато војничко погребување со комплетна воена опрема.

Од Националниот археолошки музеј истакнуваат дека новите наоди недвосмислено го потврдуваат карактерот на Расница како архајска некропола и отвораат можности за подлабоко проучување на погребните обичаи, воената организација и општествената структура на тогашните заедници.

Локалитетот го привлече вниманието на стручната и пошироката јавност во 2024 година, кога беа откриени монументална гробна целина и исклучително богат археолошки материјал, меѓу кој бронзен шлем со златни апликации, бронзен штит, златен надградник, златни прстени и фолии, килибарни и стаклени мониста, сребрени игли и кантарос, како и повеќе бронзени садови.

Најновите откритија, според музејот, носат нова димензија во толкувањето на некрополата, бидејќи богатото војничко погребување овозможува попрецизно согледување на статусот, идентитетот и улогата на лицата што биле погребувани на овој простор.

Археолошките истражувања ги предводи д-р Перо Арџанлиев, кустос советник во Националниот археолошки музеј, а на денешната презентација на локалитетот ќе присуствуваат и директорката на Националниот археолошки музеј Магдалена Манаскова и директорката на Управата за заштита на културното наследство Весела Честоева.

Септември го заокруживме со среќни приказни, нови добитници и 54.345.757денари исплатени на ВЛТ играчите.

Среќните ВЛТ приказни продолжија и во септември. Видеолотарија Касинос Австрија во периодот од 1 до 30 септември 2026 година исплати 54.345.757 денари за ВЛТ џекпот добивки.

И овој месец донесе нови добитници и значајни џекпот износи. На ВЛТ терминалите низ земјава беа освоени:

-4 СУПЕР МИЛИОНЕР џекпот добивки, со вкупно исплатени 25.664.311 денари;


-15 МИЛИОНЕР џекпот добивки, со вкупно исплатени 21.741.268 денари;


-МИНИ џекпот добивки, преку кои играчите заедно освоија 6.940.178 денари.


Видеолотарија Касинос Австрија повеќе од една деценија успешно работи во согласност со важечките законски регулативи и меѓународните стандарди, со посветеност на одговорното приредување игри на среќа.

#ИграјЗаЗабава #ИграјОдговорно #ИграјСоНајдобрите

-На 02.10.2026 во 17:00 часот во с.Заполжани, општина Долнени, полициски службеници од полициско одделение Ропотово го лишија од слобода К.М.(48) од с.Заполжани. Според пријавеното од З.Т. од с.Заполжани, додека работел во неговиот двор, бил физички нападнат од неговиот соселанец К.М., кој притоа извадил и остар предмет и упатил закана по живот кон пријавителот. По документирање на настанот ќе следува соодветен поднесок, информираат во полицискиот билтен на МВР.

Прилепскиот театар „Војдан Чернодрински“ на 7 октомври премиерно ќе ја изведе претставата „Животинска фарма“, во режија на Ќендрим Ријани.

Претставата, според култното дело на Џорџ Орвел, ќе биде изведена на камерната сцена со почеток во 20:00 часот.

Драматизацијата е на Лидија Митоска-Ѓорѓиевска и Ќендрим Ријани, а асистент на режија е Митоска-Ѓорѓиевска. Сценографијата е на Валентин Светозарев, костимографијата на Марија Пупучевска, додека музиката е на Томе Темелкоски.

Во претставата настапуваат Зоран Иваноски како Наполеон, Димитар Ѓорѓиевски како Пискало, Игор Трпчески како Снежец, Илија Волчески како Боксер, Даниела Иваноска како Детелинка, Наташа Ачански како Мирна, Марија Спиркоска-Илијеска како Гена, Јасмина Мицовска-Станкоска како Роса, Михајло Миленкоски како Бенџамин, Александар Тодески како Мојсеј и Томе Темелкоски како Минимус.

Оваа адаптација ја пренесува Орвеловата приказна во современ контекст и се занимава со механизмите на моќта, манипулацијата и контролата врз општеството. Преку приказната за животните кои се борат за подобар и поправеден свет, претставата отвора прашања за тоа како идеалите можат да бидат изневерени, а довербата и вербата во подобра иднина да се претворат во средство за покорност.

„Животинска фарма“ останува силна критика на тоталитаризмот, но и потсетување на кревкоста на слободата и еднаквоста.

По повеќе од три децении под домашна сопственост, малопродажниот синџир „Тинекс“ влегува во нова фаза. Од петокот, сопственик на малопродажниот бизнис е косовската компанија „Проекс интернационал“ од Приштина.

Преземањето се реализира преку новоформираното друштво „Тинекс маркет“, преку кое продолжува работењето на супермаркетите што досега беа дел од „Тинекс-МТ“. Во преземањето се опфатени брендовите „Тинекс“, „СуперТинекс“, „Тинекс деликатес“, „Конто“ и „Спот“.

Трансакцијата претходно ја одобри и Комисијата за заштита на конкуренцијата, која на 25 август даде согласност „Проекс интернационал“ да стекне контрола врз „Тинекс маркет“.

Со промената на сопственикот доаѓа и промена во управувањето. За нов управител на „Тинекс маркет“ е назначен Лиридон Бериша од Косово, кој ја презема функцијата од Кристина Тодоровиќ-Николиќ.

„Проекс интернационал“ е компанија со седиште во Приштина и е дел од „Проекс група“, која работи во областа на малопродажбата, увозот и дистрибуцијата на стоки за широка потрошувачка, логистиката и трговијата со нафтени деривати.

На денешен ден, пред 19 години, својот последниот концерт го одржа македонската и балканска поп-легенда, Тоше Проески кој само единаесет дена подоцна го загуби животот во тешка сообраќајна несреќа на автопатот кај Нова Градишка, Хрватска.

Концертот остана запаметен како едно од последните големи обраќања на легендарната поп-ѕвезда кон својата публика.

Со својот препознатлив глас, енергија и искрен однос кон луѓето, Проески уште еднаш покажа зошто беше толку сакан во Македонија и пошироко.

На 16 октомври 2007 година, Македонија ја потресе веста за неговата прерана смрт, на само 26 години. Неговото заминување остави празнина која времето не ја потполни. И денес, неговите песни се слушаат, неговиот глас одекнува меѓу луѓето, а споменот за човекот кој често велеше „сите ве сакам“ продолжува да живее.

Петти октомври остана запаметен како датумот на еден неповторлив концерт полн со љубов, додека пак, шеснаесетти, денот кога една музичка ѕвезда прерано отиде меѓу ангелите, за и понатаму да живее во срцата на неговите обожаватели.

Податоците од Управата за јавни приходи (УЈП) покажуваат дека во текот на првата половина од оваа година, граѓаните на Македонија и странските државјани потрошиле вкупно речиси 1,6 милијарди евра на игри на среќа.

Најголем дел од оваа сума е вложен во електронски апарати за игри на среќа, додека казината и обложувалниците и понатаму заземаат значителен дел од пазарот.

Бројките покажуваат дека секторот за игри на среќа останува финансиски огромен, и покрај новите мерки насочени кон ограничување на близината на објектите за игри на среќа до училиштата и другите образовни институции.

Од друга страна, приредувачите на игри на среќа се противат на дислоцирањето на нивните објекти, тврдејќи дека таквата мерка нема да го елиминира коцкањето, туку би можела да создаде простор за пораст на нелегалните активности поврзани со игрите на среќа.

Според нив, отстранувањето на казината, салите со слот-апарати и обложувалниците од непосредната близина на образовните институции нема да го намали коцкањето, туку би можело да пренасочи дел од активноста кон канали надвор од државната контрола и надзор.