Крушево денеска ќе биде во знакот на природата, авантурата и параглајдингот. Во градот ќе биде претставен прекуграничниот проект „Крушево и Елбасан – патување во природа и авантура“, поддржан од Европската Унија, а воедно ќе биде отворено и Светското јуниорско првенство во параглајдинг – Крушево 2026.

Проектот се реализира во рамки на програмата за прекугранична соработка меѓу Северна Македонија и Албанија. На промоцијата се најавени обраќања на градоначалникот на Крушево, Нико Чонески, претставници на Делегацијата на Европската Унија и Министерството за локална самоуправа, како и проектниот менаџер Елизабета Ѓоргиевска.

Во рамки на настанот ќе биде отворена и натпреварувачката програма на светското јуниорско првенство, на кое ќе присуствуваат претседателот на Светскиот параглајдинг куп, Горан Димишковски, и делегација од Општина Елбасан.

Присутните ќе имаат можност да го посетат и новоизграденото полетувалиште за параглајдинг „Црн Врв“, каде што е најавен и првиот официјален демонстративен лет.

Авто Контрол активно се вклучи во кампањата „Безбедно на мотоцикл“, чија цел е подигнување на сообраќајната свест и унапредување на безбедноста на мотоциклистите и сите останати учесници во сообраќајот.

Во Прилеп викендов се одржа мото фестивал, а тука беа присутни и претставници од Републичкиот совет за безбедност на сообраќајот на патиштата (РСБСП), Општинскиот совет за безбедност на сообраќајот, Отсекот за превенција при СВР Битола, полициски службеници од ПО за БПС Прилеп, кои заедно со претставници на мотоклубовите ја презентираа кампањата.

Преку непосредна комуникација со мотоциклистите и граѓаните, беа испратени важни превентивно-едукативни пораки за одговорно учество во сообраќајот, почитување на сообраќајните правила и користење соодветна заштитна опрема.

Како компанија која повеќе од 12 години е присутна и активна во областа на сообраќајот, Авто Контрол ја поддржа иницијативата со конкретен придонес. Во рамките на мото хепенингот беа поделени заштитни елеци за мотоциклистите, со јасна порака дека безбедноста секогаш треба да биде на прво место.

Кампањата потсетува на неколку основни, но исклучително важни правила: носење заштитна кацига, одговорно управување со мотоциклот, непочитување на алкохол при управување со моторно возило и доследно почитување на сообраќајните правила и прописи.

Со поддршката на ваквите активности, Авто Контрол продолжува да придонесува кон подигнување на сообраќајната култура и создавање побезбедни услови за сите учесници во сообраќајот.

„Возете одговорно, носете кацига, почитувајте ги правилата. Секој живот е важен”, порачуваат од Авто Контрол.

Авто Контрол – 12 години со вас, за побезбедни патишта.

Ракометарите на Прилеп се победници на 11. издание на Меморијалниот ракометен турнир „Миле Нешкоски“, откако во финалниот натпревар убедливо го совладаа Тиквеш со 36-29.

Домашниот состав уште во првото полувреме го најави патот кон трофејот. Избраниците на Наум Танески на паузата заминаа со предност од пет гола, 17-12, а во вториот дел искусно ја контролираа играта и не дозволија противникот да ја загрози победата.

Покрај трофејот за најдобрата екипа, беа доделени и индивидуалните признанија. За најдобар стрелец на турнирот беше прогласен Кристијан Симоноски од Еурофарм Пелистер 2, најдобар голман е Благојче Трајкоски од Прилеп, додека признанието за најкорисен играч (МВП) му припадна на Димитар Димитриоски од домашниот состав.

Третото место го освои Еурофарм Пелистер 2, кој во натпреварот за бронзата славеше против Автокоманда со 32-29. Петтото место му припадна на Бутел Скопје по победата над Младост Богданци со 32-30.

Во рамките на завршната церемонија беа доделени и посебни признанија за придонес во развојот на ракометот во Прилеп. Награди добија спортскиот новинар Миле Талески и спортскиот работник Драган Василески.

Признанието за животно дело му припадна на Димитар Богдан, поранешен голман и некогашен претседател на ТК Бренд.

Со успешно завршување на 11. издание, Меморијалниот турнир „Миле Нешкоски“ уште еднаш го потврди своето значење како традиционална ракометна манифестација која го негува споменот на една од најзначајните личности за прилепскиот и македонскиот ракомет.

-На 22.08.2026 во 10:20 часот во Крушево, полициски службеници од ОВР Крушево го лишија од слобода К.Г.(58) од Крушево. При претрес во неговиот дом, извршен со судска нредба, биле пронајдени и одземени марихуана, стебла на канабис, семки и револвер. По целосно документирање на настанот, против него ќе следува соодветна пријава, информираат од МВР.

Не престануваат поплаките на жителите од Типската населба во Прилеп, десетици коњи секојдневно се шетаат слободно по улиците, им влегуваат по дворовите, им ги пустошат дрвцата и зеленилото.

Животните чии сопственици се често непознати, претставуваат опасност и за сообраќајот, особено во вечерните часови, па граѓаните да бидат внимателни кога поминуваат во овој дел од градот.

Граѓаните апелираат надлежните час поскоро да го решат овој проблем и да ги заштитат нивните имоти.

Катастрофа била избегната во прилепското село Бонче, откако силен ветер рано утрово го пренел пожарот кон населеното место и огнената линија се приближила до куќите, изјави директорот на Дирекцијата за заштита и спасување, Стојанче Ангелов.

Според Ангелов, пожарот околу 4 часот се спуштил кон долот над селото, при што ситуацијата била исклучително сериозна. Во гаснењето биле ангажирани доброволни пожарникари од Битола и Кочани, а дополнително била побарана помош од екипи од Прилеп и Кавадарци.

-Благодарение на храбрите пожарникари од Битола и Кочани, селото беше спасено, рече Ангелов, посочувајќи дека теренот бил тежок, со ридови и висока вегетација, а огнената линија била долга.

Во интервенцијата учествувале и доброволци од Битола, од кои дел се наголтале чад. Ангелов предупреди дека без навремена интервенција огнот можел да помине низ селото, во кое има повеќе од 50 куќи и живеат повеќе од десет лица, меѓу кои и мајка со бебе.

Сериозна е состојбата и кај селото Палиград во Општина Студеничани, каде пожарот повеќепати бил ставен под контрола, но повторно се активира поради тешкиот терен, високите температури и силниот ветер. Таму се ангажирани професионални пожарникари од Скопје, возило „Пинцгауер“ на ДЗС и три „ер трактори“.

Активни пожари има и на териториите на Маврово-Ростуше и Кичево.

Ангелов повторно апелираше до граѓаните да бидат крајно внимателни, предупредувајќи дека една искра може да предизвика голема катастрофа.

Денеска во Битола се одржа централниот настан по повод одбележувањето на 25 години од формирањето на Единицата за брзо распоредување. Претходно два дена граѓаните имаа можност да проследат дел од професионалноста, подготвеноста и вештините на припадниците на ЕБР, со вежбовни активности на единицата на платото на Офицерскиот дом.

На настанот се обрати министерот за внатрешни работи Панче Тошковски кој рече дека безбедносните предизвици денес се многу поразлични од оние пред 25 години.

„Организираниот криминал се менува. Криминалните структури стануваат сè помобилни и пософистицирани. Современите безбедносни ризици бараат побрза размена на информации, подобра координација, современа технологија, специјализирана опрема и, пред сè, врвно обучени луѓе. Затоа не можеме полицијата на иднината да ја градиме со методите од минатото.

Нашата определба како раководство на Министерството за внатрешни работи е јасна – модерна, професионална, добро опремена и мотивирана македонска полиција, способна да одговори на секој современ безбедносен предизвик.
Во изминатиот период започнавме сериозен процес на модернизација на Министерството. Инвестираме во опрема, возила, инфраструктура и подобри услови за работа. Ја забрзуваме дигитализацијата, воведуваме современи технологии и системи, ги унапредуваме полициските капацитети и инвестираме во она што е најважно – знаењето, обуката и професионалниот развој на полициските службеници.

Во тој процес, единиците кои носат најголем оперативен товар мора да добијат и соодветна институционална поддршка. ЕБР била и ќе остане еден од нашите приоритети. Не затоа што така налага традицијата, туку затоа што тоа го налага безбедноста на државата“, рече министерот Тошковски.

Министерот кажа дека резултатите што денес ги постигнува македонската полиција покажуваат дека сме на вистинскиот пат, дека имаме најнизок криминалитет во последните дваесет години, а тоа не е резултат на една акција, една единица или еден човек, туку тоа е резултат на илјадници полициски службеници кои секојдневно ја носат одговорноста за безбедноста на граѓаните. И во тие резултати, свој значаен удел имаат припадниците на Единицата за брзо распоредување, истакна министерот Тошковски.

Во своето обраќање командантот на Единицата за брзо распоредување, Стојанче Николов рече дека од формација создадена за потребите на еден конкретен безбедносен период, ЕБР прерасна во една од најподготвените и најангажираните оперативни единици на македонската полиција.

„За еден командант нема поголема чест од тоа да предводи луѓе на кои може да им верува кога е најтешко. А, за мене е особена чест и привилегија што во годината кога Единицата одбележува четврт век постоење ја имам одговорноста да бидам нејзин командант. Тоа не го доживувам само како функција.

Го доживувам како обврска кон секој од вас, кон сите што ја носеле оваа униформа пред нас и кон оние што ќе дојдат по нас – Единицата што ја наследивме да ја оставиме уште подобра, попрофесионална и посилна.
Затоа што ниту еден командант не ја создава ЕБР сам. ЕБР ја создаваат нејзините луѓе. Ја создавале сите генерации што поминале низ нејзините редови во изминатите 25 години и секој од нив оставил дел од себе во она што Единицата претставува денес.

Со длабока почит, се сеќаваме на нашите загинати и починати колеги. На луѓето со кои дел од вас стоеле рамо до рамо, делеле задачи, обуки, тешки моменти, но и успеси. Нивните имиња се дел од историјата на ЕБР“, рече Николов.
По повод големиот јубилеј беа доделени признанија на пријатели и поддржувачи на Единицата, како и плакети за најдобриот припадник на ЕБР и за полициските службеници кои се дел од Единицата од нејзиното формирање, односно цели 25 години, како признание за нивната долгогодишна посветеност, професионалност и придонес во градењето и развојот на Единицата.

Директорот на Бирото за јавна безбедност Александар Јанев на градоначалникот на Битола, Тони Коњановски му додели плакета.

Во рамки на одбележувањето беше изведена тактичко-показна вежба, во која припадниците на Единицата ги презентираат своите вештини, како и изложба на опрема која ја користи Единицата за брзо распоредување.

РК Прилеп 2010 е во финале на Меморијалниот ракометен турнир „Миле Нешкоски“, откако прилепчани ги совладаа двата противника во групната фаза и со максимален учинок обезбедија борба за трофејот.

По убедливата победа над Мулти Есенс од Скопје со 31:26 во четвртокот, избраниците на РК Прилеп 2010 синоќа одиграа уште еден одличен натпревар и го совладаа РК Младост со 31:27.

Прилепчани имаа послабо прво полувреме и на паузата заминаа со негатива од 10:14. Сепак, во вториот дел покажаа карактер, борбеност и огромна енергија. Во последните 15 минути целосно го презедоа натпреварот и направија голем пресврт за победа од 31:27.

Голем придонес во триумфот имаше и голманот Трајкоски, кој со неколку клучни одбрани во финишот го запре налетот на противникот и им овозможи на своите соиграчи да го комплетираат пресвртот.

Во првиот натпревар од групната фаза против Мулти Есенс, најефикасен кај РК Прилеп беше Денис Шабановиќ со осум голови, додека Димитар Димитриоски постигна пет, а Андреј Стојаноски четири погодоци.

Со две победи во групата, РК Прилеп 2010 заслужено се пласираше во големото финале, каде што ќе се бори за трофејот на турнирот „Миле Нешкоски“.

Финалето е закажано за во недела со почеток во 20:00 часот, во салата „Ристе Ристески – Ричко“.

Прилепчани сега се на чекор до трофејот, а поддршката од домашната публика ќе биде дополнителен мотив за освојување на турнирот посветен на една од најзначајните личности во прилепскиот и македонскиот ракомет.

Во Ликовната галерија од ЦК”Марко Цепенков” Прилеп, синоќа беше отворена изложбата “Тивок ритам на формите” од Милица Алимпиќ Илиќ.

Уметницaта се претставува со дела на кои се појавуваат изразени женски фигури како централен носител на визуелната и емотивната приказна.

Изложбата ја отвори Бранко Трајкоски кој посочи дека сликите од Милица Алимпиќ Илиќ претставуваат спој на геометриска апстракција, организам и метафизичко сликарство, односно геометриски фигуративен модернизам и современ кубизам со арт деко влијание.

“Тематскиот фокус е врз женската енергија, движењето, емоционалната состојба и просторот, преку кој, заради спојот на сценскиот дизајн, циркуско театарските мотиви и геометриската архитектура во позадина има доближување на руската авангарда….Во одредени слики , заради мистериозната перспектива, чудните рамки и прозорци и атмосферата на осаменост и интроспекција, се пронаоѓа референтност кон амбиентот на Џорџо де Кирило” – рече на отворањето на изложбата Трајкоски.

Милица Алимпиќ Илиќ е академска уметница од Србија, која има реализирано повеќе изложби, а се занимава и со едукација и илустрација.

Изложбата е поддржана од Министерство за култура и туризам.

Фудбалската неизвесност во Прилеп добива нова димензија, а како светло на крајот од тунелот се појави иницијатива за враќање на оригиналната ФК Победа во натпреварувачкиот фудбал.

Иницијативата официјално ја потврди својата намера, со најава дека ќе бидат преземени конкретни чекори за обновување на историскиот клуб, неговиот идентитет и фудбалското наследство.

„Сакаме пред прилепската и македонска спортска јавност и официјално да ја потврдиме нашата намера дека ги преземаме неопходните чекори за да ја обновиме и вратиме оригиналната ФК Победа Прилеп во натпреварувачкиот фудбал“, се наведува во изјавата.

Од иницијативата посочуваат дека проектот е фокусиран на историската Победа, нејзиниот идентитет, наследство и местото во спортската историја на Прилеп, а нагласуваат и дека нема никаква врска со неодамна формираниот ФК Победа Прилеп.

Следниот чекор е најавен за в понеделник, кога претставници на иницијативата треба да ја поднесат потребната пријава и документација до надлежните фудбалски институции со цел оригиналната Победа да биде вклучена во системот на натпревари.

„Разбираме дека официјалните фудбалски власти на крајот ќе ја одредат подобноста на клубот и соодветната лига во која може да учествува. Нашата цел е затоа да ги исполниме сите потребни услови и да соработуваме конструктивно со соодветните власти за да го обезбедиме враќањето на клубот во натпреварувачки карактер“, се додава во објавата.

Иницијаторите воедно нагласуваат дека проектот не бара финансиска поддршка, инвестиција или средства од надворешни страни. Доколку планот добие зелено светло, Прилеп би можел да ја дочека новата ера со враќање на клубот кој е длабоко врежан во спортската историја на градот. Сега останува да се види дали најавената иницијатива ќе добие официјална потврда и ќе го отвори патот за големото враќање на Победа.