Владата донесе нова одлука за намалување на стапката на данокот на додадена вредност (ДДВ) за дизелот, која од досегашните 18 отсто се намалува на 10 отсто. Ова претходно го најави премиерот Христијан Мицкоски.

Информацијата ја соопшти министерката за финансии Гордана Димитриеска-Кочоска, која посочи дека мерката е донесена како одговор на ризиците и актуелните движења на меѓународните пазари.

Според неа, со намалувањето на ДДВ директно ќе се влијае врз малопродажните цени на горивата, а истовремено ќе се ограничи можноста надворешните ценовни притисоци да се пренесат врз цените на останатите производи и услуги.

„Продолжуваме со навремени мерки за заштита на стандардот на граѓаните и стабилноста на домашната економија“, порача Димитриеска-Кочоска.

Министерката нагласи дека Владата реагира навремено и одговорно, со цел да го амортизира влијанието на надворешните фактори врз домашната економија.

Намалувањето на даночното оптоварување, според најавата, треба да придонесе за ублажување на ефектите од евентуалните ценовни шокови на глобалниот пазар на енергенси и да обезбеди дополнителна заштита на стандардот на граѓаните.

Директорот на Државниот инспекторат за земјоделство, Ивица Ангеловски, денеска престојуваше во Прилеп, каде што присуствуваше на традиционалниот настан „Корени и трпеза – Руралната жена денес“, организиран од здружението Slow Food Прилеп, во рамки на манифестацијата „МЛЕКО 2026“.

Настанот, кој по петти пат се одржа на платото кај Градскиот Саат, повторно ги собра домашните производители, љубителите на традиционалните вкусови и сите оние кои се залагаат за зачувување на македонското кулинарско и земјоделско наследство.

На покана на здружението Slow Food Прилеп, Ангеловски се обрати со поздравен говор, при што ја истакна важноста на руралната жена како чувар на традицијата, носител на семејните вредности и значаен фактор во развојот на локалното земјоделско производство.

„Ваквите манифестации имаат суштинско значење за зачувување на автентичните вкусови и традиционалните рецепти кои се пренесуваат со генерации, додека истовремено овозможуваат економско зајакнување и поголема јавна видливост за трудот на руралните жени“, посочи Ангеловски.

Во рамки на настанот, Aнгеловски учествуваше и на панел-дискусијата „Агро-екологија, зелени иновации и женско претприемништво“, на која се разговараше за контролата на пестицидите, безбедноста на храната и женското лидерство во руралните средини.

Покрај присуството на манифестацијата, Ангеловски оствари и средба со претседателот на здружението Slow Food Прилеп, Филип Петкоски. На средбата била разгледана можноста за продлабочување на соработката и воспоставување заеднички активности во насока на поддршка на домашните производители, промоција на локалните производи и унапредување на ваквите настани и во иднина.

Од Slow Food Прилеп посочуваат дека ваквата соработка претставува значаен чекор кон поголема институционална поддршка за производителите, зачувување на традиционалните вредности и создавање можности за нивна поголема видливост и пласман.

„МЛЕКО 2026“ и годинава го потврди значењето на Прилеп како место каде што се среќаваат традицијата, домашните вкусови и современите идеи за одржливо земјоделство, со посебен акцент на луѓето кои секојдневно придонесуваат за зачувување на локалното производство.

-На 11.09.2026 во 08.25 часот во ОВР Прилеп било пријавено дека на крстосница од ул. „Мирче Ацев“ со ул. „Трајко Тарцан“ во Прилеп се случила сообраќајна несреќа во која патничко возило „пежо” со прилепски регистарски ознаки управувано од В.Т.(72) од Прилеп удрило во велосипедист К.Д.(51) од Прилеп. По несреќата велосипедистката била пренесена во Градска болница Прилеп каде од страна на доктор констатирани и биле тешки телесни повреди. Увидот го извршила увидната екипа на ОВР Прилеп, информираат од МВР.

Платото кај Градскиот Саат, денеска беше исполнето со мириси, вкусови, традиција и бројни посетители, каде што прилепчани имаа можност на едно место да се запознаат со домашни производители и да уживаат во богатата понуда на традиционални и локални производи.

По петти пат во Прилеп се одржа настанот „МЛЕКО 2026“, кој е во организација на Slow Food, a оваа година мотото на настанот беше „Корени и трпеза – Руралната жена денес“.

Настанот уште еднаш ја стави во фокусот вредноста на домашното производство, традиционалните рецепти и трудот на луѓето кои со своите раце и знаење ги зачувуваат вкусовите кои се дел од македонската традиција.

Од раните утрински часови, па во текот на целиот настан, кај Градскиот Саат се менуваа посетители. Прилепчани разгледуваа, дегустираа, разговараа со производителите, а голем дел од нив си заминаа и со производи кои можеа директно да ги купат од изложувачите.

На едно место беа собрани различни вкусови и производи – од домашни млечни производи и сирења, до мед и пчелни производи, месни специјалитети, вина и ракии, рачно изработени производи и домашна козметика.

Посебно внимание привлекоа производите од овчо млеко од мандрите на падините на Пелистер, домашните млечни производи од Фарма Дихово, како и производите од козарската фарма на семејството Мирчески од Прилеп.

Својата понуда ја претставија и прилепските пчелари и производители на мед, меѓу кои Пчеларник Гвероски, Пчеларник Талевски, Пчеларник Ѓорѓиоски, како и семејството Талески со производите „Здравје од пчела“.

Љубителите на традиционалните месни производи имаа можност да ги пробаат и производите на Гаврилоски, додека љубителите на виното и домашните дестилати можеа да уживаат во понудата на винарија „Сарика“, Дестилерија Лезет и „Љубовна Ракија“.

Но, „МЛЕКО“ не беше само приказна за храна.

Посетителите имаа можност да разгледаат и да купат рачно изработени производи и уникатен декор од „Рачни изработки Кока“ и „Рачно изработен декор Лола“, како и производи од домашна козметика „Мона“.

Токму ова шаренило му даде посебен карактер на денешниот настан. Различни производи, различни приказни и различни луѓе, но една заедничка нишка, љубовта кон домашното и желбата традицијата да продолжи да живее.

А мотото „Корени и трпеза – Руралната жена денес“ беше присутно во секој дел од настанот.

Зашто зад секој производ што денес можеше да се проба или купи стои труд, стои семејство, знаење, искуство и желба од традицијата да се создаде нешто што ќе трае и во иднина.

„МЛЕКО 2026“ уште еднаш покажа дека кога домашните производители ќе ги добијат своето место и вниманието што го заслужуваат, граѓаните знаат да го препознаат квалитетот.

Денешната слика од Градскиот Саат беше токму таква, многу посетители, дегустации, разговори, пазарување и прекрасна атмосфера во срцето на Прилеп.

И можеби најубавата порака од целиот настан е едноставна: “Кога купуваме домашно, не купуваме само производ. Поддржуваме човек, семејство, традиција и иднинa.”

Наставничката по англиски јазик Благица Чатлеска од ООУ „Гоце Делчев“ од Прилеп е меѓу добитниците на признанието „Просветен работник на годината за учебната 2025/2026 година“, кое го доделува Сојузот на просветните работници на Македонија.

Одлуката за доделување на признанијата е донесена на седницата на Сојузот одржана минатиот четврток, по спроведениот конкурс распишан во јуни годинава. Признанието ги опфаќа просветните работници од повеќе степени на образованието, како потврда за нивниот професионален ангажман и придонес во воспитно-образовниот процес.

Во категоријата предметна настава, покрај Благица Чатлеска од Прилеп, наградени се и Томе Китановски од ООУ „Гоце Делчев“ – Василево, Струмица, Бојанка Ципунова Ташова од ООУ „Васил Главинов“ – Велес, Вера Зороска од ООУ „Христо Узунов“ – Охрид и Оливера Шиклевска Грозданова од ООУ „Ѓорѓи Сугарев“ – Битола.

Признанија се доделени и во другите образовни категории. Од одделенската настава наградени се Соња Трифуновска од ООУ „Гоце Делчев“ – Тетово, Виолета Поповска од ООУ „Вера Јоциќ“ – Скопје, Габриела Мерчаноска од ООУ „Гоце Делчев“ – Гостивар, Ксенија Николова од ООУ „Гоце Делчев“ – Босилово и Весна Тодоровска Унковска од ООУ „Партение Зографски“ – Кисела Вода, Скопје.

Од предучилишното воспитание, признанието ѝ припадна на воспитувачката Климентина Петрушевска од градинката „Весели цветови“ во Општина Кисела Вода, Скопје. Во категоријата средни училишта, пак, награден е професорот Никола Делевски од Регионалниот центар за стручно образование „Никола Карев“ од Струмица.

Постхумно признанието ќе му биде доделено и на професорот Слаѓан Станковиќ Битрак од СОУ „Наце Буѓони“ – Куманово.

Свеченото врачување на признанијата е предвидено на посебен настан по повод Денот на учителот.

Од Маркукуле упатуваме честитки до Благица Чатлеска и до сите наградени просветни работници за ова значајно признание.

“ЛИНИЈА, ФОРМА И ПРОСТОР” е изложбата од уметникот Филип Перески , отворена синоќа во Ликовната галерија од ЦК “Марко Цепенков” во Прилеп.

Поставката содржи слики и скулптури преку кои, како што вели м-р Викторија Димеска, уметникот ликовно ги истражува бескрајните можности и начини со коишто инвентивно ги реконтекстуализира – линијата врз дводимензионалната површина на сликарското платно и формата во тродимензионалниот простор.

-Неговото сликарство се одликува со спонтани искривени линии коишто асоцираат на органски и динамични облици. Во апстрактно-асоцијативните композиции доминира активниот однос и слободната креативна игра меѓу ликовните елементи во просторот: контраст и градација на линијата и бојата….Во скулптурата, Перески ја искривува и раскршува линијата создавајќи минималистички геометриски форми со „полна“ маса и мрежно испреплетени „празни“ колоритни интервенции-посочува Димеска, историчар на уметност.

Филип Перески е академски уметник, работи како наставник по ликовно образование во Прилеп и има реализирано повеќе самостојни и групни изложби и учествувано на колонии.

Изложбата е поддржана од Министерството за култура и туризам.

Претседателката на ОО СДСМ Прилеп, Петра Лукароска, после подолго време одржа прес конференција на која обвини дека локалната власт предводена од градоначалникот Проданоски не направила ништо за Прилеп во изминатите 10 месеци раководење со општината.

Прес конференцијата во целост ја пренесуваме во продолжение:

“Како послушник и беспоговорен извршител на политиките на Мицкоски, Проданоски не почека отчетот за своето работење да го даде на крајот на првата година од 4-годишниот мандат, туку тоа го направи два месеца порано. И тоа не таму каде што единствено треба – во општинската зграда, пред своите сограѓани, туку во Скопје, од партискиот штаб во арамиската „Бела палата“.

Немајќи со што да се пофали, Проданоски посегна по туѓи проекти невешто обидувајќи се да ги прикаже како свои.
Граѓаните на општина Прилеп ги интересира каде се најавените обиколници „Исток“ и „Запад“, што се случува со најавениот спортско-рекреативен парк од 30.000 квадратни метри кај Волково, зошто во населбата Градина нема никакви градежни активности, што е со ветеното уредување на Градска река по целата нејзина должина, кога ќе биде готова новата градинка во населбата Рид?

Прилепчани сакаат да знаат кога ќе добијат нов театар, кога ќе бидат одиграни првите натпревари во двете спортски сали „Универзална“ и „Македонија“, зошто преку ноќ двојно се зголеми цената на мостот „Табана“, што се случува со улицата „Победа“, кој ги доведе во колапс јавните претпријатија, кој го загадува воздухот во Прилеп, зошто граѓаните плаќаат улично осветлување а прилепските улици со месеци се во мрак, зошто одбивате да ги наградите пожарникарите…?

За недоличниот настап на седницата на Совет и навредливите зборови кои градоначалникот Проданоски ги упати кон опозициските советници, пошироката јавност на социјалните мрежи веќе го искажа своето мислење.
Се’ на се’, за 10-те месеци на Дејан Проданоски во градоначалничката фотелја, една голема НУЛА!”

Кога здравствената состојба на пациентот бара итна реакција, навремената координација и достапноста на стручна медицинска помош можат да бидат од особено значење. Токму таков пример доаѓа од Прилеп, каде што по влошување на состојбата на пациент со повреда на ’рбетот, веднаш била започната организација за оперативна интервенција.

Како што информира директорот на ЈЗУ Општа болница со проширена дејност „Борка Талески“ – Прилеп, д-р Кире Јоноски, по појавата на невролошки испади на долните екстремитети, тој стапил во контакт со директорот на Клиниката за ТОАРИЛУЦ, трауматологот и спинален хирург д-р Игор Мерџаноски.

Реакцијата, според директорот, била непосредна и професионална. Денеска, во сабота, д-р Мерџаноски пристигнува во прилепската болница, заедно со анестезиологот д-р Александар Димитровски и тим од ТОАРИЛУЦ, со цел заеднички да ја изведат оперативната интервенција и да му биде обезбедена најсоодветна здравствена грижа на пациентот.

„Ова е пример како треба да функционира здравствениот систем – со брза координација, меѓуинституционална соработка и достапност на специјализирани медицински тимови таму каде што се најпотребни“, наведува д-р Јоноски.

Тој упатува посебна благодарност до д-р Игор Мерџаноски, д-р Александар Димитровски и целиот тим на ТОАРИЛУЦ за професионалноста, одговорноста и подготвеноста веднаш да одговорат на потребите на пациентот.

Овој случај е позитивен пример за тоа колку е важно здравствените установи да соработуваат и специјализираната помош да биде достапна навреме, без оглед на денот, времето или околностите.

Грижата за пациентот не завршува со работното време. Напротив, токму во најтешките моменти се покажува значењето на одговорноста, стручноста и координираното функционирање на здравствениот систем.

Кога се уредува домот, секој детал има свое значење. Од бојата на ѕидовите и мебелот, па сè до подот и вратите, токму правилниот избор може да направи просторот да изгледа топло, современо и целосно усогласено. За оние кои бараат квалитет, разновиден избор и практични решенија, LTP подови во Прилеп е адреса на која вреди да се погледне.

Сместен на улица „Прилепски Бранители“, во непосредна близина на Здравствен Дом Прилеп кон гимназијата, LTP подови нуди богата палета на материјали за уредување на подови и ентериери, со можност за избор од комплетниот асортиман на Flooring AGT и KAINDL.

Во понудата се достапни ламинати со дебелина од 8, 10 и 12 mm, во различни декори, нијанси и стилови, што овозможува секој купувач да пронајде решение според својот вкус и карактерот на просторот.

Без разлика дали станува збор за дневна соба, спална, детска соба, ходник или деловен простор, изборот на вистинскиот ламинат може значително да го промени изгледот на ентериерот.

Во LTP подови купувачите можат директно во изложбениот салон да ги разгледаат моделите и материјалите, да ги споредат различните декори и полесно да го изберат подот кој најдобро ќе се вклопи во нивниот простор.

Покрај самиот ламинат, LTP подови располага и со подлоги, лајсни и дополнителни материјали, со што купувачите можат да го комплетираат потребното за поставување на подот на едно место.

За оние кои сакаат професионална завршница, достапна е и услуга за монтажа, со што целиот процес, од изборот на материјал до поставувањето, може да биде поедноставен и поефикасен.

Посебно внимание заслужува понудата на Vinyl подови, кои се интересна и практична опција за различни видови простори. Тие се одличен избор и за летни бавчи, каде што со соодветниот избор на модел може да се создаде уреден, модерен и пријатен амбиент за престој и уживање во топлите денови.

Во LTP подови се достапни и врати, со избор на модели кои можат лесно да се вклопат во различни стилови на ентериер. Бидејќи вратата е еден од првите детали што се забележуваат при влегување во просторијата, правилниот избор може да придонесе целиот дом да изгледа поусогласено. Од посовремени до покласични решенија, понудата е прилагодена на различни вкусови и потреби.

LTP подови работи со цени на големо и мало, што значи дека понудата е достапна и за оние кои уредуваат една просторија, но и за купувачи на кои им се потребни поголеми количини материјал.

Со богата понуда, продажно место каде што производите можат да се видат во живо и можност за монтажа, идејата е купувачот да има едно место каде што може да го направи својот избор и да го реализира целиот процес на уредување.

LTP подови – подот не е само основа на просторот, тој е дел од неговиот стил!

Посетете ги, или контактирајте на телефонскиот број: 077 600 113

Смелите чекори отсекогаш биле дел од спортскиот Ресен, особено од ракометот. Од формирањето на ракометниот спорт во градот па сè до денес, љубителите на спортот, клубските управи, а пред сè играчите, имаат голема улога во развојот и промоцијата на ракометот, но и во афирмацијата на градот Ресен и прекрасното Преспанско Езеро.

Еден од најзначајните моменти на храброст и одлучност во историјата на ресенскиот ракомет беше историскиот настап на РК Јафа Промет – Ресен, клубот кој во сезоната 1997/98 испиша нова страница во македонскиот ракомет, станувајќи првиот македонски клуб што заигра во групната фаза на Лигата на шампионите.

По ерата на РК Јафа Промет, ресенскиот ракомет продолжи да се гради преку една нова генерација деца и млади играчи, кои повторно го донесоа градот до европската сцена. Тоа беше генерација составена исклучиво од играчи од Преспа, деца кои без финансиски примања, туку пред сè водени од љубовта кон ракометот, посветеноста и желбата за успех, успеаја да стигнат до историски настап во европскиот Челинџ куп.

Тие млади ракометари беа производ на школата и традицијата на ресенскиот ракомет. Како пионери, кадети и младинци, освојуваа титули и се искачуваа на врвот на македонскиот младински ракомет, докажувајќи дека и од еден мал град може да се создаваат големи спортски вредности.

Нивната приказна подоцна продолжи и надвор од Ресен. Дел од овие играчи станаа интернационалци, настапуваа во некои од најсилните европски ракометни лиги, а дел од нив ги бранеа и боите на македонската ракометна репрезентација.

Тогаш, како и денес, успехот е заедничка работа на сите чинители – од ракометната управа, спортските работници и играчите, до пошироката општествена заедница во Ресен. Тоа покажува дека преку ракометот може да се направи многу повеќе за спортот, за градот и за неговиот развој.

Денес, ГРК Преспа 2025 прави нов чекор напред, соочувајќи се со новите предизвици што ги носи современиот ракомет. Ракометот денес не е само нов начин на натпреварување, нови стилови на игра и современи спортски стратегии, туку и можност за поголема општествена и спортска одговорност.

Една од задачите и целите на новата управа е во новото време и со новите можности, преку ракометот да отвори нови перспективи за промоција на Преспанското Езеро, кое претставува голема туристичка атракција не само во Македонија, туку и надвор од нејзините граници.

Паралелно со тоа, ваквата спортска промоција може да придонесе и за создавање нови економски можности за градот Ресен, како и за афирмација на препознатливиот ресенски производ – јаболкото. Ресенското јаболко, едно од најпознатите и најквалитетни македонски производи, со години се пласира на различни пазари ширум светот.

Во тек е и подготовката на меѓународна документација за идното визуелно решение на нова ракометна маскота, која ќе има и улога на спортски амбасадор на градот Ресен.

Како клуб, ГРК Преспа 2025 е меѓу првите што реализира ваква иницијатива, со која преку спортското натпреварување и клубскиот идентитет сака да стави дополнителен акцент на промоцијата на ракометот, создавањето нов туристички препознатлив симбол и отворањето можности за позитивен економски импакт врз градот.

Со оваа иницијатива сакаме да дадеме нов придонес кон ракометот, градот Ресен и Преспа, но и кон нашата верна публика и поддржувачи, кои ги очекуваме да бидат со нас на натпреварите, и дома и на гостувањата.

Ракометот во Ресен има традиција. Сега е време таа традиција да добие нова, модерна и препознатлива визија.