Во второто коло од одбојкарската лига на ветерани одиграно во Тетово, екипата на 11-ти Октомври се сретна со екипата на Струмица.
Со дисциплинирана игра прилепчани ја осигураа победата со 2:0 во сетови (25:18, 25:15) и сега имаат две победи од два натпревари, и со тоа се во самиот врв на табелата.
На вчерашниот натпревар екипата на прилепчани ја сочинуваа: Жарко Илиески, Теодор Ангелески, Димитар Стрезоски, Мартин Наумоски, Илија Милошевски, Александар Савиноски, Гоце Бурнески и Атанас Николоски.
Во третото коло 11-ти Октомври е слободен, а во четвртото коло играат против фаворизираната екипа на Шкендија
Прес-конференција денеска во 12:00 часот пред Основното јавно обвинителство ќе одржи Јане Ченто, на која, како што најави ќе бидат споделени информации за поднесување кривична пријава против поранешен јавен обвинител и ќе бидат изнесени детали и аргументи поврзани со постапката за настаните од 27 април.
– Време е за вистинска правда и вистината за 27 април. Ве покануваме да присуствувате на прес-конференција која ќе се одржи на 27 април 2026 година во 12:00 часот пред Основното јавно обвинителство. На прес-конференцијата ќе бидат споделени информации за поднесување кривична пријава против поранешен јавен обвинител со иницијали В.Р. и ќе бидат изнесени детали и аргументи поврзани со постапката – се наведува во најавата.
Во најавата Ченто вели дека ова претставува почеток на процес за утврдување одговорност и расчистување на сите околности поврзани со судскиот процес за 27 април.
– Во име на опфатените со судскиот процес изјава за медиумите ќе даде Јане Ченто, се вели во најавата.
Апелациониот суд минатата недела донесе одлука со која не го прифати барањето за повторно судење на осудените за насилството при упадот во Собранието на 27 април 2017 година.
– Жалбата е неоснована. Судот го ценеше жалбениот наод за сторена суштествена повреда на одредбите на кривичната постапка од член 415 ст.1 т.11 од ЗКП, меѓутоа истиот не го прифати како основан, со оглед да образложеноро решението не содржи такви недсостатоци поради кои што не би можело да биде испитано во однос на неговата правилност и законитост, изреката на решението е јасна и разбирлива, а во образложението се содржани доволно причини за решителните факти и заземени правни ставови на судот, се вели во одлуката на Апелација, која е потврда на решението на Кривичниот суд од декември.
Јане Ченто заедно со уште 15 други лица во 2019 година беше правосилно осуден на 13 годишна затворска казна под обвинение за „терористичко загрозување на уставниот поредок“ а во предметот „27 април“ поврзан со упадот во Собранието. Предметот го судеше судијката Добрила Кацарска, сега судијка во Уставниот суд.
Дел од обвинетите во случајот добија амнестија со законот кој беше донесен во Собранието кон крајот на 2018.
Во Прилеп наскоро своите врати ќе ги отвори новиот модерен ресторан Cipriani, сместен во просторот на поранешниот ресторан Лидер – место кое ќе внесе свежина и ново гастрономско искуство во градот.
Со современ концепт, пријатен амбиент и високи стандарди во услуга, Cipriani има за цел да стане едно од омилените места за излегување, уживање и дружење во Прилеп.
Во пресрет на отворањето, сопствениците го избираат тимот кој ќе работи на реализација на новата гастрономска приказна во градот. Се бараат мотивирани, одговорни и позитивни личности, кои сакаат да работат во динамична и професионална атмосфера.
Доколку си комуникативен/на, тимски играч и имаш желба за работа – ова е вистинската можност за тебе. Се нудат конкурентна плата, одлични услови за работа и пријатна работна средина.
📞 Јавете се на: 078 534 334
👉 Аплицирај веднаш и стани дел од тимот на Cipriani!
Градот кој важи за расадник на театарската култура во Македонија, продолжува да живее без функционална театарска зграда.
Театарот “Војдан Чернодрински” веќе цела година е затворен, просторот околу истиот е запустен, претворен во џунгла, а на повидок нема ништо од најавената реконструкција.
Во изминатите години се најавуваше изградба на нов театар во центарот на градот, во склоп на Центарот за култура “Марко Цепенков”, но таа идеја се чини се напушти. Следуваше ветување дека целосно ќе се реконструира и обнови старата театарска зграда, но и тоа не е на повидок.
Прилеп – градот кој го има најголемиот театарски фестивал, гости и оваа година ќе пречекува без театарска зграда…Жално и срамно кон генерации на актери и театарски работници, кон целиот таленти и култура кои постојат на овие простори и кон илјадниците вљубеници во театарската култура во градот под Марковите Кули.
Веб сајтот timeout.com, за кој работат локални новинари и експерти и кој е дел од компанијата Time Out, основана уште во 1968 во Лондон, објави статија со наслов „Најпотценетите дестинации во Европа за 2026 година – скриени бисери подалеку од толпите“. На оваа листа, од предложените 24 локации, Битола се наоѓа на четвртото место како прекрасна дестинација за голем број посетители кои може да уживаат во прекрасната архитектура и во познатиот град на конзулите да ја почувствуваат историјата која блеска од секој агол.
Токму ваквиот контекст со кој Битола станува европски и светски препознатлива е потврда за оправданоста на инвестициите со кои локалната самоуправа неодамна инвестираше во осветлување на најпознатата и најамбиенталната улица во Битола, Широк Сокак (https://www.facebook.com/share/v/1DGKwr4T45/).
Исто така, оваа локална самоуправа после 10 години, во 2023 година, изготви нова Стратегија за локален економски развој, со која беа детектирани сите недостатоци и потреби за економски и туристички напредок на Битола, вклучувајќи и инвестиции во потепелистерието кои се од голема важност за промоција на Битола како туристичка дестинација.
Ваквите објави кои ја промовираат Битола во своето најдобро светло, истакнувајќи ја убавината на нејзината архитектура и пелистерското богатство, претставуваат силен мотив за нови инвестиции, дури и кога тоа подразбира повеќегодишна и макотрпна работа.
26-годишниот Андреј Тодороски е роден во Прилеп. Веќе втора сезона има одлични настапи за српси ТСЦ
Тодороски во последното коло од Српската супер лига постигна два гола во триумфот на својата екипа над Спартак Суботица, носејќи на својот тим важни три бода во обидот да се обезбеди уште една сезона настап во прволигашката конкуренција.
Тодороски, кој во зимскиот преоден рок 2025 година пристигна во ТСЦ за сума од околу 450.000 евра, одигра еден од своите најдобри натпревари во дресот на клубот од Бачка Топола. Покрај головите, се истакна и со низа квалитетни дриблинзи, креативни додавања и постојана опасност по противничката одбрана.
На листата на стрелци, Тодороски сега има 6 погодоци и уште исто толку асистенции.
15 години од отворањето на Спомен куќата на Тоше Проески – симбол на љубовта и хуманоста.
Во Крушево одбележана 15-годишнината од отворањето на Спомен куќата на Тоше Проески – едно од најзначајните места кое го чува споменот за неговиот лик и дело.
На одбележувањето присуствуваше и градоначалникот Нико Чонески, кој истакна дека Спомен куќата претставува симбол на големото срце, хуманоста и безвременската музика на Тоше.
„Тоше е спомен и дел од нашиот идентитет и гордост на Крушево и Македонија. Неговото дело продолжува да инспирира генерации и да не обединува во љубовта, добрината и човечноста“, порача Чонески.
Тој нагласи дека локалната самоуправа останува посветена на негувањето на наследството на Тоше Проески, како и на развојот на Крушево како достојно место кое го чува споменот за една од најголемите музички ѕвезди на Балканот.
Спомен куќата на Тоше Проески, сместена на Гумење, веќе 15 години привлекува илјадници посетители од земјата и странство, кои доаѓаат да му оддадат почит на легендарниот пејач чија музика и хуманост оставија неизбришлива трага.
Викендов во ООУ “Гоце Делчев” Прилеп се одржаа Регионалните натпревари по Македонски јазик и литература. На истите, гимназијалците од “Мирче Ацев” покажаа одлични резултати и дури четири ученици се пласираа на Државниот натпревар.
Ивана Атанасоска од IV година освои 95 поени, а Марија Матеска од прва година 85. И двете ученички се под менторство на проф. Мартин Наумоски.
Пласман на Државно првенство имаат и Мила Вршкоска со 92 и Јована Тодороска со 79 од втора година под менторство на проф Емона Јованоска.
Успешно учество, но за жал без пласман на Државно имаше и ученикот Матеј Комициоски под менторство на проф Христина Кочоска.
Им посакуваме успех и одлични резултати во иднина.
На 19 април 2026 година, Прилеп беше сведок на настан што со право ќе остане врежан во колективната меморија како симбол на врвна посветеност, визија и беспрекорна реализација. По повеќе од 25 години, повторно се испиша ново поглавје во историјата на ритмичката и естетската групна гимнастика со величествениот „Авантгард Куп“, организиран од Клубот за естетска гимнастика „Авантгард“ – Прилеп.
Во спортската сала се одвиваше вистински спектакл, каде секој детал беше доведен до совршенство. Организацијата беше на ниво што ретко се гледа – не само кај нас, туку и во европски и светски рамки. Од прецизната координација, техничката подготвеност, до топлата атмосфера и професионалниот пристап – сè беше доказ за една висока спортска култура и извонредна организациска моќ.
На ,,Авантгард Куп,, учество зедоа околу 100 учесници од различни категории ( А, Б и Ц) во индивидуални и групни вежби со и без реквизит од клубовите:
-Клуб Авантгард Прилеп
-Клуб Салто Битола
-Клуб Ритмико Пируета Скопје и
-Клуб Ритмикс Косово
Настапите на учесниците донесоа магија на подиумот – грациозност, синхронизација и уметничка експресија што ги воодушеви присутните. Публиката беше дел од едно неповторливо доживување, каде спортот и уметноста се споија во едно возвишено искуство.
На крајот беа доделени медали и награди во секоја категорија за кои награди одлучуваше професионално жири составено од 11 национални и 2 интернационални судии.
„Авантгард“ – Прилеп не само што го врати сјајот на ваквите настани во градот, туку постави нови стандарди за организација, квалитет и инспирација. Овој куп не беше само натпревар – беше празник на гимнастиката, доказ дека со визија, труд и љубов се создаваат настани што ја надминуваат сегашноста и оставаат траен белег за иднината.
Прилеп блескаше, гимнастиката триумфираше, а „Авантгард Куп 2026“ засекогаш ќе остане запаметен како симбол на успех, гордост и беспрекорност.
Клуб Авантгард упатува искрена благодарност до нашите спонзори Витаминка, Кожувчанка, BIMFOOD, MATADOR и Општина Прилеп за поддршката и довербата што ја дадоа за успешно реализирање на настанот Авантгард Куп, одржан на 19.04.2026 година.
-Вашата помош беше значаен дел од организацијата и придонесе овој спортски настан да биде вистински празник на гимнастиката. Воедно, огромна благодарност и до целиот тим, сите соработници и ангажирани лица кои со труд, посветеност и енергија овозможија овој настан да изгледа навистина спектакуларно. Заедно покажавме дека кога има љубов кон спортот, тимска работа и поддршка – резултатите се незаборавни. Благодариме од срце – велат од прилепскиот клуб.
