Изминатиот месец полека се ширеше мирисот на цимет и сега дознаваме зошто! Нова, миризлива и неодолива идеја пристигнува во нашиот град – цимет ролничка!

Мека, вкусна и богата со арома на цимет, создадена за сите оние моменти кога ви се јаде нешто слатко и поразлично.

Ако сè уште не сте пробале цимет ролничка, ова е вистинскиот момент! Совршена со кафе, совршена за по пат, совршена за љубителите на благо…

Една ролничка, а мирисот ќе ве натера да се вратите по уште една.

Нова идеја во Прилеп. Нов вкус што вреди да се проба!

Можи да се нарачуваат од понеделник до петок, за викендот да си го облажите!

Цимет ролничките се нарачуваат од Инстаграм @CimetRolnicka и од Фејсбук Cimet Rolnicka. Пишувате во порака количина и ги добивате викендот!

По повод 11-ти Октомври, оваа недела имаат и додадено нов вкус со јаболко и цимет што не треба да се промаши.

Пронајдете ги во Прилеп и откријте зошто циметот може да биде вашиот нов омилен вкус.

СДСМ ги повикува сите граѓани, членови и поддржувачи да се приклучат на граѓански марш кој ќе се одржи оваа сабота во Прилеп, по повод одбележувањето на 85-годишнината од почетокот на Народноослободителната борба.

Маршот ќе се одвива под мотото „Непокор. Борба. Иднина.“, со цел да се оддаде почит на историскиот и пркосен дух на Прилеп и на сите борци кои ја извојуваа слободата.

На настанот свое обраќање ќе има и претседателот на партијата, Венко Филипче.

-Ве покануваме масовно да се приклучите и заедно, со крената глава, да ги афирмираме вредностите на антифашистичката борба, државноста и заедничкиот напредок. Својот непокор и борба ги преточуваме во јасна визија за подобра иднина на сите граѓани. Се гледаме во сабота во Прилеп, стои во поканата од СДСМ.

Од 1 јули компаниите од приватниот сектор започнаа со исплата на регресот за годишен одмор, попознат како К-15. Минималниот износ што треба да го добијат вработените годинава е околу 19.116 денари.

К-15 е задолжителен годишен надоместок кој работодавачот го исплаќа на работникот како регрес за годишен одмор. Право на овој надоместок имаат вработените кои во текот на календарската година оствариле најмалку шест месеци непрекинат стаж кај истиот работодавач.

Износот на К-15 не е фиксна сума, туку се пресметува во зависност од просечната месечна нето-плата по работник во државата, исплатена во последните три месеци пред месецот во кој се врши исплатата.

Според правилата, регресот треба да изнесува најмалку 40 проценти од просечната нето-плата исплатена во последните три месеци. Во одредени случаи, максималниот неоданочен износ може да достигне до 100 проценти од просечната плата, согласно условите утврдени со колективниот договор.

К-15 треба да биде исплатен најдоцна до 31 декември во тековната година.

За работодавачите кои нема да го исплатат регресот се предвидени парични санкции. Дополнително, доколку работникот биде присилен да го врати исплатениот К-15 во готовина, законодавството предвидува и можност за затворска казна до една година.

По повод празникот 11-ти Октомври, ЦК „Марко Цепенков“ на 9-ти Октомври 2026/петок/ од 18.30 ч. во кино “Мис Стон” ќе го прикаже македонскиот филм, „До Балчак“ историска драма во режија на Столе Попов.

Влезниците за филмот се бесплатни и ќе се подигаат на билетарницата од киното секој ден од 11.00 до 13.00 часот.
Сценариото за филмот е од Горан Стефановски, директор на фотографијата е Апостол Трпески, сценограф е Миленко Јеремиќ, костимограф е Емилија И. Атанасовска, а шминкер е Светлана Гутиќ. Главните улоги во филмот ги толкуваат: Инти Шрај, Мартин Јорданоски, Сашко Коцев, Сенко Велинов, Тони Михајловски, Мики Манојловиќ, Никола Којо, Никола Ристановски, Јовица Михајловски, Искра Ветерова, Јордан Симонов, Драган Спасов, Ана Костовска, Гораст Цветковски, Владо Јовановски итн.

Дејството на филмот се случува во 1907 г. во Отоманска Македонија, неколку години по крваво задушеното Илинденско востание, по што земјата се наоѓа во општа пропаст и целосен пустош. Приказната ги следи случувањата на сложен љубовен четириаголник помеѓу: Крсто (Сашко Коцев), бескомпромисен и идеалистичен комита; Музафер (Тони Михајловски), безмилосен турски офицер; Филип (Мартин Јорданоски), „татин син“ опортунист што се враќа дома по завршени студии во Европа; и Тереза (Инти Срај), прониклива и слободоумна Европјанка во потрага по авантура, која ги залудува тројцата мажи и предизвикува серија настани со далекусежни и несогледиви последици. Ликовите минуваат низ бурни судири, доживуваат катарзични искуства и стекнуваат длабоки нови самосознанија. Филмот е сурова, но љубовна приказна во која вечната македонска кауза за сопствен идентитет и самостојност е видена низ призмата на релативноста на идеите за слобода, правда, љубов, жртва и предавство…Ова е филм за дијалектичката средба на митското со антимитското, филм во кој се среќаваат легендите и раскажувањата со реалната стварност на суровиот живот, низ македонската историја, исполнет со историски апсурди.

Народниот театар Битола се приклучува на хуманитарната кампања на СОС Детско село Македонија.

Публиката на Битолскиот театар знае што значи да се биде хуман. А сега повторно има можност, заедно со НТБ да направи нешто добро за децата на кои им е потребна нашата поддршка.

Имено сите средства од продадените билети за 100.изведба на претставата „Кокошка“, која ќе биде изведена на 24.октомври од 20 часот, ќе бидат донирани за децата од СОС Детско село.

Една од најбараните комедии на НТБ, претстава која ја сака публиката и овојпат ќе има уште едно посебно значење.

Комедијата на Николај Кољада, во режија на Марјан Георгиевски, ве води низ свет каде што амбициите, љубовта, суетата и желбата за успех се судираат на најнеочекувани и најкомични начини.

Претставата со брилијантен хумор, живи дијалози и препознатливи ситуации, ја освојува публиката затоа што сите се пронаоѓаме во неа. Смеата доаѓа природно, искрено и – до солзи.

За сценографијата се погрижи Валентин Светозарев, костимографија Благој Мицевски, драматург Оливера Павловиќ.

Во претставата играат: Јулијана Мирчевска, Катерина Аневска, Соња Ошавкова, Александар Димитровски, Николче Пројчевски.

„Дојдете да се смееме, да го прославиме 100-тиот пат на „Кокошка“ и, со еден едноставен билет, да бидеме дел од нешто поголемо од самата претстава.
Еден град. Еден театар. 100 пати „Кокошка“.
И многу детски насмевки што можеме да ги помогнеме“, велат од НТБ.

🎟️ Влезници на билетарницата на НТБ и онлајн на
https://narodenteatarbitola.com/events/kokoshka-28/

Најдобрата прилепска ТЕРАСА е подготвена за празничниот продолжен викенд, кога со празнувањето на 11-ти Октомври Прилеп е во центарот на вниманието во цела држава. Локалот кој само за една година изгради успешна приказна во прилепската чаршија, овој викенд ќе зрачи со позитивна енергија и ќе се бара место повеќе, а причината за тоа се знае – TEРАСА нe пропушта викенд, а да нема ангажирано одлични музички бендови.

Во ПЕТОК, 09.10., празничниот викенд започнува со QR CODE BAND – млад музички состав за кој допрва ќе се дознае ширум Македонија. Сме ги слушнале како звучат, и верувајте не смеете да ги пропуштите!

САБОТА, 10.10., викендот продолжува со AURA BAND, состав кој веќе одлично се етаблира во Прилеп, прават одлични свирки, ве држат на нозе цела вечер.

Не е само да се биде во центарот на случувањата, важно е да се биде онаму каде е најубаво, најпријатно, каде е полно со насмеани лица, каде се игра и ужива од почеток до самиот крај!

Резервирајте навреме на: 070 304 967

Се гледаме на ТЕРАСА!

View this post on Instagram

A post shared by Pub_Club_Terasa (@pub_club_terasa)

Театарот „Војдан Чернодрински“ при НУЦК „Марко Цепенков“ на 7-ми и 8 – ми октомври 2026г. /среда и четврток/ во два термини, од 20.00 часот, на камерната сцена во ЦК „Марко Цепенков“ премиерно ќе ја изведе претставата:
„Животинска фарма“ според Џорџ Орвел, во режија на Ќендрим Ријани.

Раководителот на театарот Михајло Миленкоски вели дека „Животинска фарма“ е едно од најпоставуваните дела во светот, дело кое ги спои ансамблот на театарот и режисерот, и дека е четврта премиера годинава, поддржана од Министерството за култура и туризам.

Режисерот Ќендрим Ријани, посочува дека благодарение на ансамблот од театарот стигнале до добра премиера.

– Направив претстава каде се изјаснив за сите мои прашања и одговори, кои публиката ќе ги добие, преку еден концепт, кој дава одговор зошто театарот е важен и зошто е неопходен…„Животинска фарма“ е еден од најдраматизираните текстови во светот. Во претставата главна тема ни е уметноста. Се зборува за сите линии, за секоја пора во општеството. Претставата има можност да стане „огледало“ за сите професии, за сите маки, за сите недостигнати целини што луѓето се трудат да ги стигнат. Ваква претстава можеше да се постави само во прилепскиот театар, кој нема театар– рече режисерот Ријани.

Актерите се задоволни што играат сите заедно, што се во колективна претстава и што соработувале со режисерот, и дека публиката ќе ужива во „Животинска фарма“.

„Безброј пати низ човековата историја се покажало дека дури и најблагородните идеи не успеваат да стигнат до својот зенит кога се поткопани од желбата за моќ и контрола, од лични интереси, или едноставно – од малодушност. Токму така и пропаѓаат. Во тие случаи вистината станува еластична, фактите се предмет на интерпретација, а политичкиот јазик е неопходно средство, бидејќи – како што вели Орвел – тој е така создаден што прави лагите да звучат како вистина.Оваа адаптација на култното дело Животинска фарма ја пренесува Орвеловата приказна во нашиот контекст и се занимава со механизмите на моќта кои го деформираат општеството. Иако некои имиња и околности се променети, системот е добро познат: заедницата повторно верува во оној што зборува најгласно, ветува најмногу и тврди дека дејствува „за наше добро“. Трагедијата е во неспособноста на животните да ја препознаат манипулацијата што се одвива пред нивните очи. Нивната доверба, лојалност и верба во подобра иднина – вредностите што некогаш ги обединиле и им давале надеж – стануваат синџири што ги држат во покорност. Набљудувајќи го сето тоа однадвор, се прашуваме: Зошто не гледаат? Како сè уште паѓаат на истите измами? Ние сакаме да веруваме дека сме поинакви, дека сме единствениот интелигентен вид на планетата, способен за логика, разум и самосвест. А сепак, кога ќе се соочиме со најочигледните замки, се однесуваме токму како животните на фармата. Затоа Животинска фарма ипонатамуостанува моќна критика на тоталитаризмот, како и силнопредупредување за кревкоста на слободата и еднаквостa”.

Лидија Митоска-Ѓорѓиевска

*********

„ЖИВОТИНСКА ФАРМА“

Режија: Ќендрим Ријани
Драматизација:Лидија Митоска-Ѓорѓиевска и Ќендрим Ријани
Асистент на режија: Лидија Митоска-Ѓорѓиевска
Сценографија: Валентин Светозарев
Костимографија: Марија Пупучевска
Музика: Томе Темелкоски

ИГРААТ:

Наполеон – Зоран Иваноски
Пискало – Димитар Ѓорѓиевски
Снежец – Игор Трпчески
Боксер – Илија Волчески
Детелинка – Даниела Иваноска
Мирна – Наташа Ачански
Гена – Марија Спиркоска-Илијеска
Роса – Јасмина Мицовска-Станкоска
Бенџамин – Михајло Миленкоски
Мојсеј – Александар Тодески
Минимус – Томе Темелкоски

*************************

Техничка екипа:

Инспициент – Елена Иваноска
Суфлер – Кети Јанчески
Светло мајстор – Гоце Ристоски
Сликар исполнител – Пеце Ристески
Реквизитер – Гоце Тодороски
Гардеробер – Снежана Ѓорѓиоска
Фризер-перикер – Даринка Богојеска
Декоратери – Сашо Смоквоски, Роберт Стојкоски, Владимир Владимироски, Јане Јанкулоски

По речиси 11 години од почетокот на изградбата, Охрид конечно ќе го добие затворениот базен, откако Владата на денешната седница ја усвои одлуката со која се овозможува продолжување и завршување на проектот, соопшти Министерството за спорт.

За целосно довршување на објектот се обезбедени 470 милиони денари, а од Министерството наведуваат дека со тоа се надминува долгогодишниот застој на еден од најзначајните спортски инфраструктурни проекти во градот.

Според Министерството, по преземањето на надлежностите била спроведена темелна анализа и ревизија на проектот со цел да се утврдат техничките, финансиските и административните пречки што го оневозможувале неговото завршување. По ревизијата биле преземени конкретни мерки за надминување на проблемите, меѓу кои и измена на основниот проект, со што се создаваат услови градежните работи да продолжат.

Од ресорното Mинистерство оценуваат дека затворениот базен е инвестиција од големо значење за Охрид и за развојот на пливачките спортови во државата, бидејќи ќе обезбеди современи услови за тренинг, развој на младите категории и организирање натпревари.

Информацијата на социјалните мрежи ја сподели и вицепремиерот, Александар Николоски.

Мицкоски против кратење на празниците: Стекнатите права на работниците треба да се почитуваат

Премиерот Христијан Мицкоски е против иницијативата на Стопанската комора за намалување на бројот на празници и неработни денови.

„Во принцип мислам дека стекнатите права на работниците треба да се почитуваат и тука немам никаква дилема“, изјави Мицкоски.

Со тоа премиерот практично не даде поддршка на предлогот на Комората за промена на сегашното решение, според кое доколку државен празник се падне во недела, следниот ден е неработен.

Стопанската комора предлага измени со кои би се намалил бројот на неработни денови, со образложение дека честите празници влијаат врз продуктивноста и создаваат дополнителни трошоци за компаниите.

На иницијативата се спротивставија и синдикатите, од каде оценуваат дека евентуалното кратење на неработните денови би значело намалување на веќе стекнати работнички права.

Според ставот на Мицкоски, Владата нема намера да поддржи решение со кое би се одземале права што работниците веќе ги имаат.

Повеќе од 4.500 корисници на гарантирана минимална помош и социјална сигурност за кои, според премиерот Христијан Мицкоски, било утврдено дека не требало да примаат средства, се откриени во досегашните проверки на системот.

Мицкоски тврди дека меѓу лицата за кои државата исплаќала средства имало починати лица, иселени граѓани, но и фиктивни корисници.

– До овој момент имаме повеќе од 4.500, значи не 45, не 450, туку 4.500 лажни корисници на гарантирана минимална помош и социјална сигурност – рече Мицкоски.

Според премиерот, по направените анализи и теренските проверки, износот на средствата предвидени за исплата овој месец е за околу 200 милиони денари помал во споредба со истиот месец минатата година.

– Како е тоа возможно? Возможно е затоа што корисници биле, за жал, починати луѓе, отселени луѓе, лажни луѓе и така натаму – изјави Мицкоски.

Тој процени дека на годишно ниво од државниот буџет биле издвојувани повеќе од една милијарда, а можеби и до 1,5 милијарди денари за исплати на вакви корисници или околу 25 милиони евра.

Проверките, како што посочи премиерот, сè уште не се завршени. Останува да бидат проверени уште приближно една петтина до една шестина од вкупниот број корисници.

Мицкоски најави дека контролите нема да завршат со системот за гарантирана минимална помош и социјална сигурност. Според него, слични проверки ќе опфатат и други области, вклучително и здравството, каде што, како што тврди, исто така постојат можности за заштеда на јавни средства.

Премиерот проверките ги оцени како реформа со потенцијален финансиски ефект од околу 25 милиони евра годишно.

– Некој ќе рече: „Добро, па тоа е една обична проверка, за каква реформа зборувате“? Реформа која е 25 милиони евра – рече Мицкоски.

Тој додаде дека доколку слични заштеди се постигнат и во други области, ослободените средства би можеле да се пренасочат кон капитални инвестиции, со кои, според него, би се создале услови за привлекување нови инвестиции.