Претседателот на Владата на Република Македонија, Христијан Мицкоски денеска одговарајќи на новинарско прашање во однос на одлуката дека ќе се прави пресметката согласно закон, она линеарно, се повлекува и критиките од опозицијата дека пензионерите се заборавени, изјави:

-Опозицијата преку свои експерти праќаше дописи и претставки до Уставниот суд за тоа што оваа Влада го зголеми за пензионерите, да им го одземе, да го враќаат назад. Тоа е лицемерието на денешната опозиција којашто преку свои експерти до пред некоја недела се трудеше тоа што оваа Влада им го овозможи на пензионерите, да им го одземе.

-Е сега да направиме споредба со тоа што е направено од оваа Влада во првите две години, бидејќи толку е оваа Влада 26-7 месеци. И тоа што е направено од претходната Влада во првите две години. Во првите две години Владата на СДСМ и ДУИ, пензиите на пензионерите ги зголеми за отприлика 540 денари. Оваа Влада за повеќе од 6.800, просечно зборувам. Просечната старосна пензија за над 6.800 денари. Јас пред некој ден дадов изјава и реков 16 пати е разликата, направив грешка се извинувам, 12,6 пати е разликата. Да бидеме сега попрецизни. Или тоа што го направивме ние за овие 25-6 месеци е повеќе отколку што тие го направија за 7 години додека беа Влада. А да не зборувам за тоа што им го укинуваа законот, па потоа измислуваа некои швајцарски модел и така натаму. Или па да не се враќаме во минатото кога им беше на пензионерите ускратен оној процент од нивната пензија во времето на претходните Влади на СДСМ.

Така што, да сумирам од една страна испраќаат свои експерти коишто ги фалат на социјалните медиуми да ги пред Уставниот суд предизвикуваат одлуките на оваа Влада за линеарното зголемување на пензиите, а од друга страна лицемерно излегуваат без никаков аргумент, се обидуваат да испратат критика. Но, нашите сограѓани се свесни за тоа што го направи оваа Влада и претходната. Така што можат да направат јасна разлика. Јас не велам дека тоа е доволно, не велам дека тоа ќе ги реши сите проблеми, но е многу подобро од тоа што беше во времето на СДСМ и ДУИ, рече премиерот на Македонија Христијан Мицкоски.

Новата одлука на Регулаторната комисија повторно го менува односот меѓу цените на бензинот и дизелот – ЕУРОСУПЕР БС-95 од полноќ ќе чини 100,50 денари, а ЕУРОДИЗЕЛ 99 денари за литар. Ако се споредува БС-95 со дизелот, бензинот повторно станува поскап, што со години беше вообичаена состојба на пумпите, пред енергетската криза и силните осцилации на дизелот.

Од почетокот на годинава и двата деривати бележат огромен раст. На 30 декември 2025 година, цените со кои практично влеговме во 2026 година беа 70,50 денари за БС-95 и 65 денари за дизел. Со новите цени, бензинот е поскап за 30 денари или околу 42,6 проценти, додека дизелот, и покрај денешното намалување, е повисок за 34 денари или околу 52,3 проценти.

Најсилниот пресврт се случи во март. На почетокот на тој месец БС-95 чинеше 74,50, а дизелот 71 денар, но само една недела подоцна дизелот скокна на 85,50 денари, додека бензинот достигна 79,50. Во април разликата дополнително се прошири и во еден период дизелот се продаваше по 98 денари, а БС-95 по 83,50 денари.

Во јуни цените повторно се приближија, а дизелот кратко падна и под бензинот. Последен пат пред денешната одлука ЕУРОСУПЕР БС-95 бил поскап од дизелот во периодот од 7 до 13 јули, кога бензинот чинел 85,50 денари, а дизелот 82,50 денари за литар. Од 14 јули дизелот повторно го презеде приматот и во поголемиот дел од летото беше поскап.

Кон крајот на август дизелот достигна 101,50 денари за литар, додека БС-95 беше 93 денари. Минатата недела разликата повторно изнесуваше четири денари во корист на бензинот – БС-95 чинеше 97, а дизелот 101 денар.

Денешниот пресврт, сепак, не е последица на поевтинување на дизелот на светските пазари. Референтната берзанска цена на дизелот во новата пресметка на РКЕ е повисока за 6,67 проценти, но Владата го намали ДДВ-то за дизелот од 18 на 10 проценти и ја продолжи намалената акциза, па наместо очекувано поскапување, дизелот поевтинува на 99 денари.

Без даночната интервенција, според владините пресметки, дизелот би се движел околу 106 денари за литар и повторно би бил значително поскап од бензинот. Така, бензинот сега формално е поскап од дизелот за 1,50 денари, но тоа е резултат пред сè на привремената државна мерка, а не на пресврт на светските пазари.

Како функционираат фотонапонските системи, кои се можностите за нивно поставување во домаќинствата и како граѓаните можат од потрошувачи да станат и производители на електрична енергија? Одговори на овие и на низа други прашања ќе се бараат на „Соларниот саем“ што ќе се одржи утре, во среда, на Градскиот плоштад во Прилеп, од 11:00 до 14:00 часот.

Настанот ќе им овозможи на прилепчани одблизу да се запознаат со практичните решенија за користење на сончевата енергија во своите домови. Преку штандови, демонстрации и разговори со компании и организации, посетителите ќе можат да добијат информации за различните технологии, можностите за поставување фотонапонски системи и начините на користење на произведената електрична енергија.

Во фокусот ќе биде и концептот на просумер – граѓанин кој истовремено произведува и користи сопствена електрична енергија. Наместо домаќинствата да бидат само потрошувачи, идејата е тие да можат активно да учествуваат во енергетската транзиција преку производство на електрична енергија од обновливи извори.

На саемот ќе бидат претставени конкретни решенија и практични примери преку кои граѓаните полесно ќе можат да разберат како функционираат соларните системи, како се произведува електрична енергија од сонцето и како таа може да се користи за потребите на едно домаќинство.

За најмладите се предвидени интерактивни работилници, преку кои низ игра и практични активности ќе се запознаат со обновливите извори на енергија и со значењето на сончевата енергија за иднината.

Соларниот саем го организира Центарот за климатски промени, со цел темата за обновливите извори на енергија да стане поблиска и поразбирлива за граѓаните. Посетителите ќе имаат можност директно да разговараат со претставници на компании и организации, да поставуваат прашања и да добијат практични информации за можностите што ги нуди сончевата енергија.

Настанот се реализира во рамките на проектот „Зајакнување на позитивната перцепција за процесите на праведна транзиција на локално ниво“, кој е дел од иницијативата „Финансирање на поправедни иднини: проширување на ангажманот и овозможување на инклузивна и родово трансформативна климатска правда во Европа и пошироко“.

Проектот е координиран од CAN Europe и кофинансиран од Европската Унија, а една од неговите цели е да се зголеми информираноста и да се поттикне вклучувањето на граѓаните во процесите што водат кон почист и поодржлив енергетски систем.

Од Центарот за климатски промени ги повикуваат прилепчани да го посетат саемот, да се информираат и да дознаат повеќе за можностите сончевата енергија да стане дел од нивното секојдневие.

Општина Прилеп ги информира граѓаните дека од 14 септември 2026 година ќе започне спроведувањето на превентивна систематска дератизација на канализацискиот систем на територијата на Општина Прилеп.

Дератизацијата ќе се спроведува согласно договорот за изведување со ЈЗУ Центар за јавно здравје – Скопје и со ЈЗУ Центар за јавно здравје – Прилеп како надзорен орган, а ќе опфати вкупно 3.750 шахти од канализационата мрежа.
Во рамки на активностите ќе бидат поставени статички и стативни мамци од по 200 грама со родентицид, со цел навремена превенција и контрола на појавата на глодари во канализациониот систем.

Активностите на терен ќе се спроведуваат по работни групи, согласно утврдената динамика. Во случај на обилни врнежи, дератизацијата ќе биде одложена и ќе продолжи во првиот нареден поволен ден за безбедно и непречено спроведување на активностите.

Општина Прилеп апелира до граѓаните за разбирање и соработка во текот на реализацијата на превентивната мерка, информираат од Општина Прилеп.

Александар Степенулески ја доби наградата за најдобро актерско остварување на 34. издание на Меѓународниот фестивал на камерен театар „Ристо Шишков“, што вечерва заврши во Струмица. Наградата ја доби за улогата на Луков во претставата „Црнила“ од Коле Чашуле, во режија на Дејан Пројковски, во изведба на Прилепскиот народен театар, која ја спушти завесата на годинашното издание.

Одлуката на фестивалското жири ја образложи претседателката, ланската лауретка, Билјана Драгичевиќ Пројковска, во кое, покрај неа, играта на актерите ја оценуваа Иван Додовски, универзитетски професор и драмски автор и Билјана Ѓуровиќ, актерка и професор од Белград.

-Александар Степанулески го гради Луков како фигура на привидна неприкосновена моќ, која постепено се распаѓа и ги открива стравот, зависноста и моралната разграденост на ликот. Со силно сценско присуство, прецизни промени на актерските регистри и уверлива игра на авторитетот и неговото нарушување, тој ја разоткрива противречноста на човекот што манипулира, заплашува и организира политичко убиство, а истовремено останува заробеник на системот на кој му служи, стои во образложението за наградата на жири комисијата.

Годинашниов лауреат, Александар Степенулески, не ја очекувал наградата, а радоста најпрвин ја сподели со своите колеги од Прилепскиот театар.

-Не ја очекував наградата, морам да бидам искрен. Одлично ја изигравме претставата, која помина така како што е направена. Наградата ја доживувам многу лично, многу драго, многу убаво, многу важно затоа што „Ристо Шишков“ е еден од двата наши најголеми фестивали и е признание кое секој актер може само да го посака, изјави Степанулески по добивањето на наградата.

Наградата, која се состои од златен медалјон со ликот на Шишков, парична награда во износ од 1.500 евра и плакета на најдобриот актер му ја врачи директорот на Фестивалот, Ванчо Ристов Патриков.

Во име на Фестивалот медалјони со ликот на Шишков им беа доделени на писателот Јордан Плевнеш,членовите на жири комисијата, селекторот Љупчо Ѓоргиевски и на водителот на Фестивалот, Ѓорги Калајџиев.

Над 1.500 тркачи од 18 земји вчера во Битола беа дел од 8-мото издание на ТРЧАЈ БЕ 2026, спортска манифестација која од година во година расте и ја зацврстува позицијата на градот на конзулите како значајна дестинација за спортски туризам во регионот.

Свежото утро создаде одлични услови за трчање, а годинешното издание донесе и исклучителни спортски резултати. На битолската патека беа постигнати најбрзите времиња досега и соборени рекордите на ТРЧАЈ БЕ.

Низ улиците на Битола денес трчаа натпреварувачи од различни земји, бодрени од бројна публика, волонтери и сите оние кои беа дел од организацијата и реализацијата на трката.

ТРЧАЈ БЕ е спортски настан, но и приказна за Битола како отворен и активен град кој преку спортот привлекува гости, создава дополнителна вредност за локалната економија и се промовира надвор од границите на државата.

Општина Битола упатува честитки до организаторите на ТРЧАЈ БЕ, до сите институции, партнери, волонтери и служби вклучени во реализацијата, како и до граѓаните кои со својата поддршка придонесоа за атмосферата долж патеката.

Посебни честитки до победниците и до сите над 1.500 учесници кои денес ја истрчаа Битола.

Уште едно успешно издание на ТРЧАЈ БЕ, уште еден голем спортски ден за Битола.

До вторник, 15 септември е последниот рок за двата повици на Министерството за економија и труд на кои компаниите може да се пријават и да добијат субвенции за да ги подобрат квалитетот на работењето и конкуретноста на фирмите, посебно на производните капацитети. Од едниот, компаниите може да добијат до 500 000 денари, а од другиот до 200.000 денари. Трошоците во 70 проценти ги покрива Министерството.

-Едниот јавен повик се однесува на продлабочување на односот помеѓу производствените капацитети и универзитетите со што се овозможува подобрување на технологијата и технолошките процеси во фирмите за одредени иновативни методи во воведувањето на циркуларната економија, дигитализацијата, паметната специјализација. Овој повик е во вредност од 5 милиони денари, конкурсот трае до понеделник, 15 септември. Може да учествуваат сите преработувачки капацитети заедно со универзитетите и вредноста која би ја добиле е до 500 000 денари, а 70 проценти од трошоците ги покрива министерството за економија и труд. Вториот јавен повик, исто така, се однесува на домашните компании со цел имплементирање и стандардизирање на општествените процеси и подобрување на конкурентноста на компаниите. И овој повик трае до понеделник, 15 септември. Вкупната вредност е 2 милиона денари. Компаниите најмногу може да добијат до 200 000 денари, аминистерството за економија и труд покрива 70 проценти од трошоците во тековната година, објаснува Марјан Ристески, заменик министер за економија и труд.

Преку овие два повици се овозможувааат многу иновативни методи во компаниите: подобрување на нивната конкурентност на домашниот и на странскиот пазар, поврзување со странски компании, а сето тоа резултира и на подобрување на економијата и на целокупнат економска состојба во Македонија.

-Интересот е голем, бидејќи секоја компанија сака да го унапредува своето производство, да го зголемува својот квалитет, да воведува европски стандарди во работењето, дигитализација, паметна специјализација. Тоа многу значи за развојот на компаниите, а тоа индиректно значи, не само подобрување на економската состојба, туку и нови капацитети, отворање на нови работни места, што е приоритет на Владата и на министерството за економија и труд, вели Ристески.

Според Ристески, преку вакви позитивни мерки денес имаме зголемување на индустриското производство, зголемување на инвестициите во домашните компании, нови инвестиции, нови капацитети во постојните компании, зголемување на странските инвестиции.

-Сето тоа резултира со подобрување на БДП, на отворање нови работни места, а индиректно влијае на подобрување на животниот стандард, смета заеменик министерот за економија и труд, Марјан Ристески.

Владата има и ќе креира мерки за поддршка на процесот на циркуларна економија. Неодамна во прилепската индустриска зона беше отворен нов погон со 300 вработени на компанијата „Вик“ кој фунцкионира врз принципите на циркуларната економија и е меѓу првите во Пелагонискиот регион.

На 12.09.2026 во 22:20 часот, полициски службеници од мобилниот тим „Task Force“ при Регионалниот центар за гранични работи Запад-Охрид, во рамки на преземените мерки и активности во врска со недозволена трговија со дрога, кај Автокамп „Љубаништа“ извршиле контрола и преглед над А.Ш.(43) од Прилеп.

При извршениот преглед кај лицето биле пронајдени повеќе пакувања со марихуана, како и една сина таблета.

Лицето било лишено од слобода, а за настанот бил известен јавен обвинител од Основното јавно обвинителство Охрид. По целосно документирање на случајот против лицето ќе биде поднесена соодветна пријава.

Ракометарите на Прилеп приредија вистинска драма во Богданци, откако со гол во последната секунда го совладаа домашниот Младост со 29-30. Прилепчани во еден момент имаа негатива од седум гола, но со феноменална завршница успеаја да направат целосен пресврт и да стигнат до втора победа во првите две кола од сезоната.

Главниот јунак на гостите беше Димитар Димитриоски. Тој постигна три од последните четири гола на Прилеп, вклучувајќи го и решавачкиот погодок со кој гостите ја однесоа победата од Богданци.

Младост имаше одлична позиција за триумф. Домаќините на полувреме заминаа со предност од 15-10, откако со серија од 4-0 направија пресврт од 11-10 и се одлепија на плус пет. По паузата богданчани продолжија во ист ритам и во 35. минута стигнаа до највисоката предност од 19-12.

Но, Прилеп не се предаде. Гостите одговорија со серија од четири гола и намалија на 19-16, со што повторно ја вратија неизвесноста. Младост успеваше да ја одржува предноста, а во 55. минута имаше 29-26, по погодокот на Андоновски.

Од тој момент започна неверојатната завршница. Младост не постигна ниту еден гол до крајот, а Прилеп со три последователни погодоци стигна до целосен пресврт. Димитриоски намали на 29-27, Кастратовиќ погоди за 29-28, а потоа и за израмнување на 29-29.

Кога се чинеше дека натпреварот ќе заврши нерешено, Димитриоски во последната секунда го постигна победничкиот гол за 29-30 и донесе голема радост за прилепскиот состав.

Со овој пораз, Младост остана без првата суперлигашка победа по враќањето во елитното друштво. Последниот триумф во Суперлигата богданчани го остварија на 24 април 2021 година, кога ја совладаа Астраион со 30-19. По повеќе од пет години чекање, Младост беше на чекор до нова победа, но Прилеп им ја одзеде во драматичната завршница.

Најефикасен кај Прилеп беше Димитар Димитриоски со 10 гола, додека Петар Маркоски постигна 6. Кај Младост, Владимир Бојаниќ реализираше 7 пати, а по 6 гола постигнаа Андоновски, Јанковски и Ѓуриќ.

Прилеп по две кола има максимален учинок, откако на стартот славеше и против Куманово.

Прилепското архиерејско намесништво ги предупреди верниците за појава на стаклени кутии со икони преку кои, наводно, се собираат донации за изградба и помош на цркви и манастири.

Од намесништвото велат дека ваквиот начин на собирање средства не е со благослов на Македонската православна црква и се оградуваат од овие активности.

Тие апелираат до граѓаните да бидат внимателни, бидејќи, според нив, средствата оставени во ваквите кутии не се наменети за црковни потреби.

За легитимни донации и помош за верските објекти, граѓаните се повикуваат да се обратат директно во храмовите или да користат официјални жиро-сметки на Црквата.