Претседателката Гордана Сиљановска-Давкова го одликува кардиологот и алпинист Сашко Кедев со Орден „8 Септември“, за особените заслуги во медицината, не само дома, туку и во европски и светски рамки, како и за историскиот подвиг во алпинизмот како прв Македонец којшто ги искачил 14-те светски планински врвови над 8 000 метри надморска височина.

Сиљановска-Давкова, на доделувањето на орденот вечерва во Македонската филхармонија, порача дека академик Сашко Кедев е човек, чијшто персонален и општествен интегритет ги надминуваат границите на потесната стручна област и се интегрирааат во колективната меморија на државата и општеството.

-Сите го знаеме како врвен медицински авторитет, еден од пионерите и лидерите во развојот на интервентната кардиологија. Неговата личност ја красат благородноста, моралниот интегритет и хуманоста… Биографијата на академик Кедев е поучен пример за секој од нас, но и добар прирачник за идните генерации. Таа е доказ дека успесите не се ниту привилегија, ниту случајност, туку логична последица и заслужена награда за енормните, натчовечки напори на човек со голема буква, рече Сиљановска-Давкова.

За сето она што го направи за медицината, науката, спортот, за меѓународниот углед на нашата земја, но и за македонската демократија, најмалку што можеме да сториме, рече Сиљановска-Давкова, е да му оддадеме признание. Не може да говориме за него, а да не го занемариме неговиот активен и видлив придонес за македонската демократија од првите денови на самостојноста и независноста до денес.

-Каде и да оди и што и да работи по светот, тој ја персонифицира на најдобар начин Македонија. Доказ за тоа е и неговиот статус на почесен конзул на Индонезија, плод на неговите неимарски способности во градењето мостови на доверба и партнерство меѓу народите и државите, нагласи Сиљановска-Давкова.

Доктор Кедев, нагласи, има биографија што не ја опишуваат епитети, туку ја потврдуваат суперлативи.

– Фактите говорат дека тој е меѓу водачите, првенците – интервентни кардиолози на Универзитетската клиника за кардиологија, но и во другите центри во земјата, како и во бројни престижни меѓународни медицински институции, од Канада до Јужна Африка, што од него прави своевиден колумбовски или магелановски докторски профил, порача претседателката.Неговиот научен опус е вонсериски во домашeн контекст, рече Сиљановска-Давкова, нагласувајќи дека академик Кедев вовел револуционерни техники во нашата кардиологија, со што поставил повисоки стандарди, отворил нови и пошироки хоризонти, давајќи им нова шанса на илјадници пациенти.

-Ако во медицината, д-р Кедев ги достигна највисоките професионални и хумани височини, тогаш во алпинизмот, буквално, ги освои највисоките врвови на светот. И тоа, не во младешките денови на бунтовник без причина, туку во зрелата доба, како бунтовник со цел: умен, искусен, но се уште детски љубопитен; храбар, но внимателен; желен за нови подвизи, но наоружан со богато искуство, дисциплина и истрајност и … разбран и придружуван, дополни Сиљановска-Давкова.

Таа истакна дека во период подолг од две децении, Сашко Кедев ги искачи сите 14 највисоки врвови над осумилјади метри.

-Неговите подвизи не само што предизвикуваат дилеми, чудење и восхит, туку ги поместуваат границите на човечката издржливост и верба… Цврсто верувам и ве уверувам дека успесите на академик Кедев не се случајност, туку резултат на енормно знаење и сизифовски напори, потпрени на цврст морален темел и чиста и длабока духовност. Храброста и неуморноста што ги учел и вежбал во салите за операции, го поттикнуваат и водат на највисоките планински врвови, а вербата во правдата и моралот, го инспирираат и придружуваат во општествената битка за подобро, поправедно, демократско општество, изјави Сиљановска-Давкова.

Како што потецираше, секогаш кога е потребно гласно, чесно и одговорно да се проговори, тој е тука, дома, во Македонија.

На доделувањето на Орденот, вечерва во Македонската филхармонија, присуствуваа премиерот Христијан Мицкоски и министри од Владата, градоначалници, академици и голем број личности од општествениот живот.

Орденот на Кедев му се доделува и за храбриот придонес во конституирањето на самостојна и независна Република Македонија и за активното учество во развојот на македонската демократија, за особените заслуги во медицината, не само дома, туку и во европски и светски рамки, крунисани со членство во престижни научни меѓународни асоцијации. Понатаму, за уживањето посебен углед како врвен интервентен кардиолог којшто вовел иновативни техники и методи, извршил неколку илјади коронарни интервенции и над 1 600 транс-радијални каротидни стентирања, за исклучителните образовни и научни успеси, потврдени со 230 публикации со импакт-фактор на платформата „Wеb of Science“, H-индекс 36 и 13 650 цитати, за продлабочувањето на меѓународната соработка како почесен конзул на Индонезија.

Во просториите на Секторот за внатрешни работи Битола, беше пуштена во употреба нова специјализирана просторија за работа со деца и други ранливи категории лица. Активноста е реализирана во рамки на програмата „Шведска поддршка на полициските реформи во Северна Македонија“, поддржана од Владата на Кралството Шведска и Шведската агенција за меѓународен развој – СИДА, во партнерство со Мисијата на ОБСЕ во Скопје.
На настанот присуствуваа заменик-министерот за внатрешни работи Астрит Исени, амбасадорот на Кралството Шведска во Северна Македонија, Ола Солстром, и шефот на Мисијата на ОБСЕ во Скопје, Килијан Вал, како и претставници на проектните тимови и полициски службеници.

Новата просторија претставува значаен исчекор во унапредувањето на условите за работа на полициските службеници кои постапуваат во случаи поврзани со деца – како жртви, сведоци или сторители на кривични дела – како и во случаи на семејно насилство. Просторот е опремен согласно меѓународните стандарди, со цел овозможување безбедна, соодветно прилагодена и чувствителна средина за разговор со малолетни и ранливи лица.

Министерството за внатрешни работи активно работи на воспоставување и унапредување на инфраструктурата и професионалните стандарди во оваа област. Во сите сектори за внатрешни работи постојат посебни простории за разговор со деца, а дел од нив ќе бидат реновирани или дополнително опремени согласно утврдените потреби. При секоја поголема реконструкција или изградба на полициски станици, ваквите простории се предвидени како составен дел од инфраструктурните планови.

Во тек е и изработката на Стандардни оперативни процедури за постапување со деца кои се во судир со законот, процес кој се реализира со поддршка од меѓународните партнери.

„Децата се нашето најголемо богатство и наша заедничка обврска е да обезбедиме услови за нивно безбедно и безгрижно детство. Кога малолетник учествува во постапка како сведок, жртва или сторител, институциите мора да гарантираат средина која е чувствителна на неговата возраст и потреби. Новата просторија во СВР Битола е важен чекор напред – не само во обезбедување достоинствен третман, туку и во превенирање на ревиктимизацијата преку современи технички решенија за документирање на разговорите.“, истакна во своето обраќање заменик министерот Исени.

Исени упати благодарност до Амбасадата на Кралството Шведска, СИДА и Мисијата на ОБСЕ за континуираната поддршка во подобрувањето на истрагите за малолетнички случаи и семејно насилство, како и за придонесот во унапредувањето на меѓуинституционалната соработка – клучен сегмент за успешно и навремено постапување.

Во петокот во Ликовна Галерија од ЦК”Марко Цепенков “во Прилеп, беше отворена изложбата „A” од уметницата Олгица Антовска, која се претстави со дванаесет дела изработени во комбинирана техника, со специфични димензии и форми.

“Делата се структурирани во четири поврзани циклуси, кои претставуваат своевидно движење патување на водата, интегрирана како жив субјект. Со оваа вибрирачка приказна за водата, во сите нејзини облици, сакав да воспоставам активна комуникација со гледачот и да поттикнам можни дијалози” вели авторката Антовска.

Изложбата ја отвори сликарот м-р Тони Чатлески, кој посочи дека со циклусот, авторката нè внесува во едно лирско патување каде водата не е само мотив, туку живо суштество, органска меморија, емоционален простор.

“Секоја слика претставува различна состојба на водата: тишината на замрзнатите кристали, вибрациите на невидливите струи, моќта на брановите, како и нежноста на една единствена капка живот. Овие дела не се само визуелно доживување — тие се емотивни огледала кои ја рефлектираат нашата свест за природата, нашата одговорност кон околината и потребата за дијалог со светот што нè опкружува…. Делата нè повикуваат да застанеме, да се вгледаме, да размислиме — за водата како извор на живот, но и како огледало на нашата колективна свест. Со најновите дела на Антовска ќе запловиме во овој визуелен океан, ќе го почувствуваме неговиот ритам и самите ќе проговорат – рече Чатлески, на отворањето на изложбата, поддржана од Министерството за култура и туризам.

До крајот на годината задолжително најмалку по 300 евра ќе им легнат на сметките на работниците за регрес за годишен одмор.

Согласно законот, газдите до 31 декември треба да исплатат К-15, кој изнесува најмалку 40 отсто од просечната плата, а најмногу 100 отсто.

К-15 им следува и на административците, кој е помал за 100 евра од оној кој се исплаќа во приватниот сектор.

Минималната сума за исплата на регрес за годишен одмор, согласно законот е утврден на 40% од просчената исплатена плата и за оваа година сумата е 18.141 денари за приватен сектор, додека за јавниот сектор сумата изнесува 12.372 денари.

Минатата година имало само 22 пријави за неисплатен К-15 од вкупно 4,000 работници и тоа претежно од текстилната индустрија.

Ако вработените не го добијат законскиот минимум за К-15, можат да пријават во Синдикатот или во Државниот инспекторат за труд.

Првпат во историјата, и во машка и во женска поединечна конкуренција U21 – во двете финалиња играат брат и сестра. Неверојатен, историски момент за нашиот спорт, објави градоначалникот на Општина Ѓорче Петров, Александар Стојкоски.

Тој ги објави и одличните резултати на пинг понг клубот 1060 од Ѓорче.

-Сара Стојановска – НОВА ДРЖАВНА ШАМПИОНКА U21! Андреј Стојановски – ДРЖАВЕН ВИЦЕШАМПИОН!
И уште повеќе: За прв пат во историјата – брат и сестра освојуваат 6 медали од 6 можни во сите 6 категории! Ова е подвиг што ја подигнува македонската спортска приказна на ново ниво! Голема чест, голема надеж и огромна гордост за македонскиот пинг-понг, објави Стојкоски.

Настапот на српската ѕвезда Аца Лукас во Кавадарци бил прекинат поради сериозни безбедносни пропусти, непријавен ангажман и прекршување на правилата за работа на локалот, потврди градоначалникот на општина Кавадарци, Митко Јанчев.

Инцидентот се случил синоќа, нешто по полноќ, кога полицијата заедно со инспекции од повеќе институции влегла во угостителскиот објект каде што настапувал Лукас. Набргу по контролата, пејачот бил приведен во полициската станица.

„Нема да дозволиме Кочани сценарио. Безбедноста е прва!“

Градоначалникот Јанчев објасни дека организаторите однапред поднеле барање до Општина Кавадарци за поставување урбана опрема и проширување на просторот за концерт, но барањето било одбиено поради проценка дека условите се небезбедни.

– Беше побарано од Општина Кавадарци дозвола за поставување опрема за настанот на Аца Лукас. Комисијата утврди дека нема услови за тоа, поради безбедносни причини. На 14.11 барањето беше одбиено, а сопственикот беше писмено и усно информиран – рече Јанчев.

Тој истакна дека локалот има капацитет од 200 гости, а внатре биле затекнати дури 700 лица.

– Не смееме да дозволиме да се повтори трагедија како онаа во Кочани. Локали пренатрупани со гости, без почитување на безбедносните мерки, тоа во Кавадарци нема да помине – додаде тој.

Јанчев напомена и дека ангажманот на самиот изведувач не бил пријавен ниту во Агенцијата за вработување, ниту во Министерството за труд, што претставува дополнителен прекршок.

Лукас настапувал без дозвола, доби казна и прекршочна пријава

Од Министерството за внатрешни работи ја потврдија интервенцијата.

– Констатиравме дека Аца Лукас настапувал без потребната дозвола. За тоа му е изречена парична казна, а поднесена е и прекршочна пријава – соопштија од МВР.

Контролата ја извршиле полициски службеници од Кавадарци, инспектори за странци, пазарен инспекторат, трудов инспекторат и Управа за јавни приходи.

Настапот бил веднаш прекинат, а Лукас бил приведен околу десет минути по полноќ.

По повод 20 ноември, Меѓународнот ден на детето,  учениците од четврто еден од ООУ „Кире Гаврилоски-Јане“ со нивната наставничка Розита Кареска,  беа во посета на учениците од 5-а и нивната наставничка Наташа Мирческа во ООУ „Кочо Рацин“.

Учениците од “Кочо Рацин” овој настан го реализираа по изборниот предмет “Готвење”, а на помош ги викнаа своите баби кои ги приготвија вкусните традиционални јадења и слатки задоволства.

-Сите наши баби, многу деца, вкусно, превкусно и немерно среќно. Училницата ни се прошири од љубов и солзи. Бабите ни подготвија она што тие некогаш го јаделе, а ние им напишавме пораки и стихови. И знаевме дека ќе биде за паметење, па задоволството го поделивме со учениците од 4-1 одд. од ООУ “Кире Гаврилоски Јане” и наставничката Розита Мирческа Кареска. “Јаневци” ни донесоа рој пораки за секое дете, многу насмевки и желби за нови другарства. Секоја чест за нашите баби, им благодариме и никогаш да не се сомневаат во себе: Тие на секое дете секогаш му се малку мајка, малку учителка и малку другарка – напишаа од ООУ “Кочо Рацин” на ФБ.

Еден навистина прекрасен настан кој заслужува внимание и треба да биде пример за останатите училишта.

На 19.11.2025 во 00:05 часот во с.Годивле, општина Кривогаштани, полициски службеници од Полициското одделение Кривогаштани ги лишија од слобода И.И. (55) и Ќ.С.(42) од с.Дебреште, општина Долнени.

Полициски службеници извршиле преглед на патничко возило “фолксваген туран” со прилепски регистарски ознаки, управувано од И.И., а сопатник бил Ќ.С., при што во возилото се пронајдени и одземени повеќе низи тутун за кои постои сомнение дека потекнуваат од кривично дело “кражба”.

По целосно документирање на случајот, ќе следува соодветна пријава – информираат од СВР Битола.

Се приближуваме кон крајот на ноември, почетокот на декември и завршницата на 2025 година. Светските метеоролошки сервиси најавуваат студен и нестабилен декември.

Во првата половина од месецот се очекува пад на температурите – утринските ќе се спуштат благо под нулата, а дневните ќе се движат до околу десеттиот степен.

Втората половина од декември ќе донесе облачно и нестабилно време со врнежи од дожд. Температурите дополнително ќе опаѓаат.

Околу 24 декември се очекува и првиот снег, кога утринските температури може да достигнат и до минус пет степени.

Неделата пред Нова година ќе биде ладна и променлива, со повремени врнежи од дожд. Утринските температури ќе бидат под нулата, а дневните ќе достигнуваат до околу 7 степени.

Новогодишната ноќ ќе биде облачна и студена, а 2026 година ќе започне со врнежи од дожд.