На 15.05. и 17.05.2026 на подрачјето на СВР Битола спроведена е акциска контрола за санкционирање на прекршоци што ги прават возачите на мотоцикл, при што констатирани 104 прекршоци во сообраќајот од страна на мотоциклистите. На подрачјето на Битола санкционирани се 53 возачи, а на подрачје на Прилеп санкционирани се 47 мотоциклисти, додека четири на подрачје на Македонски Брод. Од нив, вкупно 47 прекршоци биле констатирани за некористење на заштитен шлем-кацига, 28 санкции за управување без возачка дозвола, девет прекршоци за нерегистрирани мотоцикли, мопеди. Притоа, констатирани биле четири прекршоци за измината важност на осигурителна полиса, изречени се две мерки за управување под дејство на алкохол, како и 12 останати прекршоци.

Сообраќајните контроли продолжуваат и во наредните денови. Апелираме до граѓаните да ги почитуваат сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта.

На 17 мај, се одржа 14. издание на една од најпрепознатливите спортско-рекреативни манифестации во Македонија — „Прв до врв“. Настанот и оваа година ја оправда својата репутација, собирајќи повеќе од 4.500 учесници од Македонија и од странство, со што уште еднаш потврди дека станува збор за најмасовното организирано планинско искачување во регионот.

Низ падините на Водно, во одлична спортска атмосфера, учесниците се натпреваруваа во пет дисциплини: планинско трчање, планински велосипедизам, друмски велосипедизам, e-bike трка и тим-билдинг трка за компании.

Особено внимание привлече друмската велосипедска трка, која годинава се бодуваше и за ранг-листата на Велосипедската федерација, што дополнително го зголеми нивото на конкуренција и квалитетот на учесниците. На стартот се појавија повеќе од 140 велосипедисти од различни возрасни категории и од неколку држави, а темпото уште од самиот почеток беше исклучително силно.

Прилеп на оваа манифестација беше претставен од ВК Херој — единствениот велосипедски клуб од градот што настапи на трката.

Андреј Маџоски и Стефан Маџоски, кои, иако не важат за типични возачи за брдски патеки, прикажаа одлични возења и голема борбеност на патеката.

Според неофицијалните резултати, Андреј Маџоски трката ја заврши на 8. место во својата категорија, додека Стефан Маџоски беше 4-топласиран, резултати што претставуваат сериозен успех ако се земе предвид профилот и тежината на патеката.

Апсолутен победник на друмската трка беше Константин Костоски, кој со импресивно време од само 36 минути успеа прв да стигне до целта. Тој со само 17 години е најмладиот победник на оваа трка. Константин со победата ја потврди својата одлична форма и квалитет.

„Прв до врв“ уште еднаш покажа дека спортот има моќ да обединува луѓе од различни генерации, градови и држави. Покрај резултатите и пласманите, најголемата вредност на настанот останува позитивната енергија, дружењето и промоцијата на активен и здрав начин на живот.

Како дополнителна точка на дневниот ред на денешната 12-та седница на Советот на Општина Битола, претседателот на Советот Бојан Бојкоски ја предложи одлуката за давање согласност за продолжување на периодот на времетраење на Договорот за уредување на капиталната и управувачка структура помеѓу РК „Еурофарм Работник“ АД Битола и РК „Пелистер“ АД Битола, односно продолжување на ракометната платформа чекор кој значи континуитет, стабилност и понатамошен развој на ракометната платформа која донесе резултати, успеси и гордост за градот на “конзулите”.

„Битола живее за ракометот. Оваа платформа покажа дека со визија, партнерство и посветеност може да се создаде силен и конкурентен клуб, препознатлив и дома и на европска сцена. Очекувам поддршка од сите советнички групи, затоа што кога станува збор за интересот на Битола, спортот и младите генерации треба да бидеме обединети. Ракометот не смее да биде тема на поделби, туку заедничка инвестиција во иднината на Битола. Ракометот е гордост на Битола, заеднички да продолжиме да го градиме успехот“ , рече Бојкоски во објаснувањето на предлог точката.

Советот едногласно го усвои овој предлог за продолжување на ракометната платформа.

Стопанственикот и независен кандидат за градоначалник на Прилеп на минатогодишните локални избори, Борче Чупетрески, преку објава на социјалните мрежи упати низа критики, предлози и идеи до локалната власт во Прилеп. Во статусот, Чупетрески посочува дека е подготвен бесплатно да ги сподели своите проекти, решенија и бизнис-предлози, кои, според него, би придонеле за подобар развој на градот.

Во продолжение, интегрално ви го пренесуваме неговиот Фејсбук статус:

„Не можам повеќе да молчам. Молчењето е оправдување.

Абе, не го даваме нашето без пари и крај! Ова ни е од Бога дадено за нас! Наредни предлози и точки – само по ваше барање.“

-На 17.05.2026 во 12:15 часот на ул.„Александар Македонски“ во Прилеп, во круг на браварска работилница, полициски службеници од ОВР Прилеп го лишиле од слобода В.Ј.(26) од Прилеп. Тој бил затекнат при извршување на кражба од објектот. Украденото било вратено на сопственикот, а по документирање на настанот против него ќе следува соодветна пријава, информираат од МВР.

На Меѓународниот Турнир „Скопје Опен 2026“ за деца, помлади пионери и кадети, во организација на џудо клубовите Ипон и Карпош Џудо Мастер од Скопје, учество зедоа околу 230 натпреварувачи од 26 клубови од 6 држави: Македонија, Албанија, Молдавија, Косово, Србија и Грција.

ЏК Сеишин Прилеп настапи во сите возрасни категории и оствари одличен резултат освојувајќи вкупно 12 медали 8 златни, 2 сребрени и 2 бронзени медали.

Со овие резултати ЏК Сеишин Прилеп беше прогласен за најуспешен клуб, односно севкупен победник на овој силен меѓународен турнир (освојувајќи пехар), уште еднаш потврдувајќи го квалитетот и посветената работа на клубот.

Резултати поединечно:

Кадети:

Дила Пупаловиќ – 1 место
Теодора Илиоска – 1 место
Тамара Илиоска – 2 место

Помлади пионери:

Елдина Пупаловиќ – 1 место
Бисера Јовеска – 1 место
Матеја Николоска – 1 место

Деца:

Бисера Цветкоска – 1 место
Иван Јошески – 1 место
Стефани Ристеска – 1 место
Христијан Бунески – 2 место
Владан Стрезоски – 3 место
Марко Андрејевски – 3 место

-Нашиот клуб е горд и на натпреварувачите кои овојпат не успеаја да освојат медал, но со своите борби покажаа борбеност, дисциплина и вистински спортски дух, придонесувајќи за овој голем успех. Посебни честитки и до нашите тренери Мартин Ристески и највозрасниот тренер на турнирот Киро Здравески, кои предводеа голем број наши членови и имаат голема заслуга за постигнатиот успех – стои во соопштението од ЏК СЕИШИН.

Од 21 до 24 мај 2026 година, спортскиот аеродром во Мало Коњари ќе стане центар на светскиот параглајдинг, каде ќе се одржи еден од трите Светски купови во дисциплината прецизно слетување.

Настанот е во организација на ПК „Скај Рајдерс“ – Прилеп, а се очекува учество на околу 70 врвни натпреварувачи од 21 држава ширум светот. Меѓу пријавените се и актуелни светски и европски шампиони, што дополнително го потврдува значењето и квалитетот на натпреварот.

Првиот ден, 21 мај, е предвиден за тренинг активности, додека официјалните натпреварувачки рунди ќе се реализираат на 22, 23 и 24 мај. Организаторите планираат одржување на максимум 12 рунди, во зависност од временските услови.

Одржувањето на ваков престижен спортски настан претставува големо признание за Прилеп и Македонија, но и значајна можност за промоција на државата како атрактивна светска параглајдинг дестинација.

Со ова, Прилеп уште еднаш се позиционира на мапата на големите меѓународни спортски случувања.

Women in Tech Macedonia со нова серија обуки ги зајакнува жените со вештини за вештачка интелигенција и благосостојба низ Македонија

AI4HerWellbeing е еднодневна работилница која ги поврзува вештачката интелигенција, гешталт-терапијата и арт-терапијата, а се одржува во пет општини оваа пролет и лето.

Отворена е регистрацијата за AI4HerWellbeing, серија бесплатни обуки наменети за девојки и жени на возраст од 22 до 55 години. Обуките имаат за цел да го поддржат личниот развој и благосостојбата на учесничките, преку комбинирање на практична примена на вештачката интелигенција со терапевтски пристапи од гешталт и арт-терапијата.

Овие обуки имаат за цел да ги опремат учесничките со алатки кои можат веднаш да ги применат во секојдневниот живот и на работното место, со цел поголема јасност, фокус и личен раст.

Распоред на обуки

20 мај 2026, 12:00–16:00ч – Општина Кавадарци

21 мај 2026, 14:00–18:00ч – Општина Кочани

2 јуни 2026, 11:00–15:00ч – Општина Битола

16 јуни 2026 – Општина Куманово

18 јуни 2026, 12:00–16:00ч – Општина Пехчево

Точните локации за секоја општина ќе бидат објавени дополнително.

Обуките ги водат два посветени експерти – М-р Моника Ризовска Таневска, Претседател на Women in Tech Macedonia, основач на AI Collective Скопје, говорник и тренер за AI модернизација, основач и извршен директор на Davleo Consulting и М-р Цветанка Штерјова Бурзевска, Лиценциран психолог, ЕАГТ гешталт психотерапевт и арт-терапевт.

Проектот е кофинансиран од Европската Унија, во рамките на мрежата Младински Хаб на Западен Балкан и Турција, и се реализира во тесна соработка со општините домаќини.

Пријавување:

Девојки и жени на возраст од 22 до 55 години кои се заинтересирани за учество можат да се пријават на:https://forms.gle/QtRXnG2xbWHbJpXn6

Women in Tech Macedonia со оваа серија обуки свесно избира децентрализиран пристап, носејќи ги дигиталните знаења директно, во Кавадарци, Кочани, Битола, Куманово и Пехчево. 

“Со овие дисперзирани обуки за Вештачка Интелигенција сакаме да придонесеме кон рамномерен дигитален развој на ниво на цела земја и да покажеме дека процесот на дигитализација не треба да биде привилегија на одредени средини, туку право достапно за секоја жена, каде и да живее.” – истакна Моника Ризовска Таневска, претседател на организацијата.

Учениците од СОУ „Ѓорче Петров“ – Прилеп успешно го претставија своето училиште на Државниот натпревар по биологија за средно образование, кој се одржа на 9 мај 2026 година, при што освоија значајни награди, пофалници и признанија за учество.

🔹 Прва година:
🏅 Ангела Наумоска – трета награда
🏅 Сара Петреска – трета награда
👏 Илина Китаноска – учество
👩‍🏫 Ментор: Татјана Шабаноска

🔹 Трета година:
🏅 Давид Стојановски – втора награда
🏅 Сергеј Димоски – трета награда
👏 Викторија Анѓелеска – учество
👏 Марио Кочоски – учество
👩‍🏫 Ментор: Жаклина Мирческа Нешкоска

🏅 Јована Пејовска – трета награда
🏅 Ивана Ангелеска – трета награда
📜 Марија Истинџиоска – пофалница
👩‍🏫 Ментор: Соње Николоска

🔹 Четврта година:
🏅 Даниел Главчев – трета награда
📜 Меланија Јованоска – пофалница
👏 Марија Котева – учество
👩‍🏫 Ментор: Татјана Шабаноска

Овие резултати се доказ за трудот, посветеноста и знаењето на учениците, како и за несебичната поддршка и работа на нивните ментори.

Честитки до сите ученици и професори за постигнатите успеси! Ви посакуваме уште многу награди, достигнувања и успеси во иднина!

Според календарот на МПЦ (Јулијанскиот календар) денеска е 5 мај.

Светата великомаченичка Ирина

Живееше во апостолските времиња на Балканот во некој град Магедон, каде што татко и Ликиниј беше малечок цар. Некои мислат дека таа е Словенка. Родена како незнабожка од родители незнабожци, Пенелопа (така и беше името пред да се крсти) на христијанската вера се поучи од нејзиниот учител Апелијан. Св. Тимотеј, учителот на апостол Павле, ја крсти заедно со уште неколку дворјанки и ги донесе да ги прочита Посланијата на Светиот апостол Павле.

Кога се одрече од мажачка го разгневи татко и и тој сакаше да ја мачи, ама таа на чудесен начин го обрати во христијанство. Освен татко и на маки ја подложуваа уште четворица други цареви, но Бог секогаш ја спасуваше преку ангели. Царот Седекија ја закопа до глава во ендек исполнет со отровни змии и скорпии. Но Божји ангел ги умртви отровните гадови и ја сочува Светата девица неповредена. Тогаш овој цар се обиде да ја истружи со бичкија, но бичкијата се одбиваше од нејзиното тело како од камен.

По ова ја врза за тркало под воденица и пушти вода за да ја убие. Водата не сакаше да тече, а стоеше – и девицата остана жива и здрава. Царот Савах, синот на Седекија, ја поткова со клинци, натовари врз неа вреќа со песок и ја впрегна, па нареди да ја водат како добиче далеку надвор од градот. „Навистина, како добиче сум пред Тебе, Господи!“, говореше Светата маченичка впрегната трчајќи по своите мачители.

Но Божји ангел ја затресе земјата и земјата се отвори, па ги проголта нејзините мачители. Откако ги преживеа сите маки, со што обрати во христијанство огромно мноштво незнабожци, Ирина премина во градот Калипол и во него ја проповедаше верата во Христа. Тамошниот цар Нумеријан сакаше да ја убие и ја фрлаше во три усвитени метални вола едно по друго. Но девицата беше спасена и остана жива. Мнозина видоа и поверуваа. Епархот Ваводин ја одведе во градот Константин, каде што намисли да ја убие ставајќи ја врз усвитени решетки.

Но тоа не и наштети на Света Ирина, а мнозина ги приведе кон верата на Вистината. Најпосле Ирина дојде во градот Месемвриј, каде што царот Савориј ја уби, но Бог ја оживеа. А кога го видоа тоа, царот и многубројниот народ поверуваа. И така со своите страдања Света Ирина приведе во Христовата вера околу сто илјади незнабожци. Најпосле самата легна во гроб и му нареди на Апелијан да го затвори гробот. Кога по четири дена го отворија, нејзе ја немаше внатре. Бог ја прослави занавек девицата и маченичката Ирина, која с ? жртвуваше и с ? претрпе за да Го прослави Него меѓу луѓето со сите сили што и ги подари.