Министерот за економија Крешник Бектеши денеска соошти дека од утре ќе се замрзнат цените на тестенините и млечните производи. Со одлуката ќе бидат опфатени макароните, шпагетите, белото сирење, млекото, урдата, пренесува Прес24.

Според Бектеши, тестенините ќе поевтинат за најмалку десет проценти, додека во однос на млечните производи ќе се причека производителите до утре да се подготват зашто, како што рече, некои веќе и самите ги намалуваат цените.

Министерот најави дека за овие одлуки тој и премиерот Димитар Ковачевски најверојатно утре ќе одржат брифинг со новинарите.

-Најверојатно утре изутрина ќе има одлука за тестенините и млечните производи, со премиерот веројатно ќе одржиме брифинг со новинарите. Граѓаните да бидат спокојни, цените ќе бидат намалени не само на овие производи, ние во континуитет ќе продолжиме со сите производи каде анализите ќе покажат дека има поголеми профити или маржи од она што е редовно, истакна министерот, одговорајќи на новинарски прашања по владиниот настан за грантот од ЕУ вреден 80 милиони евра.

Тој дополни и дека е во постојана комуникација со производителите на млечни производи, но и со производителите на тестенини.

Претходно, Владата ја замрзна цената на белиот и полубелиот леб на 33 денари.

Градоначалникот на Кавадарци, Митко Јанчев на својот официјален Фејсбук информираше за пожар кој го зафатил магацинскиот дел од фабриката за канабис во село Дебриште.

Јанчев сподели дека повеќе од 10 возила и над 25 пожарникари брзо интервенирале во гаснењето на пожарот и сега е веќе под контрола.

„ТППЕ Кавадарци и Неготино, ЈП Комуналец Кавадарци и ЕуроНикел, со повеќе од 10 возила и над 25 пожарникари брзо интервенираа во гаснењето на пожарот, кој го зафати магацинскиот дел од фабриката за канабис во село Дебриште.
Благодарение на брзата интервенција на службите, пожарот е под контрола и е спасен поголемиот дел од објектот.“-стои во објавата на Митко Јанчев.

Со вчерашното потпишување на Договорот со конзорциумот Бехтел и Енка, започнува реализација на историска инвестиција во патната инфраструктура.

Вкупната вредност на овој проект со кој ќе се изградат 110 километри автопатски делници на Коридорот 8 и Коридорот 10 д изнесува 1,3 милијарди евра, со рок на реализација од пет години.

Пратеникот од СДСМ, Миле Талески, објави дека со оваа историска инвестиција ќе се градат патните правци Тетово- Гостивар во должина од над 17 километри, Гостивар – Букојчани во должина од 30,3 километри, делницата Требениште – Струга – Ќафасан која е близу 22 километри и патниот правец односно автопатот Прилеп – Битола е во должина од речиси 40 километри.

„За цели 32 години во нашата држава се изградени 186 километри автопати, а со овој договор, за само пет години, градиме 110 километри, модерни, европски, автопати. Во меѓувреме, се градат и рехабилитираат експресни, магистрални и регионални делници низ целата држава, а во тек е и изградбата и реконструкцијата на дополнителни автопати во должина од 59 километри“, рече Талески.

Реализацијата на автопатот Скопје –Блаце, кој чини 12,18 милиони евра исто така е во тек, а се забрза и процесот на железничкото поврзување и доизградба на Коридорот 8.

Според Талески, сето тоа е показател за посветеноста на Владата и парламентарното мнозинство предводени од СДСМ на унапредување на патната инфраструктура за подобро поврзување на градовите во државата, но и на државата со соседите.

Инаку според она што беше изнесено при склучувањето на договорот вчера, целата изградба треба да трае до 2027 година. Предложениот динамички план предвидува рок од 33 месеци за изградба на Тетово-Гостивар, 49 месеци за Требеништа – Струга – Ќафасан и 57 месеци за Гостивар – Букојчани и за Прилеп – Битола.

Македонската ракометна репрезентација вечер од 19 часот ја пречекува Португалија во Спортскиот центар „Борис Трајковски“ во Скопје.

Ова ќе биде квалификацискиот натпревар од Групата-1 за пласман на Европското првенство 2024.

Двете репрезентации во мечот влегуваат по двете победи во почетни две кола. Селекторот на „црвено-жолтите“ Кирил Лазаров се соочува со проблеми поради неколкуте отсуства на играчи поради повреди или други причини.

Сепак, од таборот на македонскиот национален тим ветуваат мексимална борбеност и пожртвуваност во обид да се дојде до победа и со тоа да се направи можеби и најважниот чекор на патот кон Еуро 2024.

Двете репрезентации по вечерашниот натпревар во Скопје, за три дена ги чека реваншот во Порто.

На првиот дуел од 3.коло во оваа група, Турција вчера го победи Луксембург на гости со 30:29 и ги освои првите два бода, додека домаќините останаа со празни раци и по три одиграни средби.

(Фејсбук статус на Отец Димитар Арсовски)

Како што преку жена дојде гревот, така преку жена дојде спасението. Лага и клевета е дека Црквата ја гледа жената како пониско и потчинето битие на мажот.

Црквата од Жената над жените секојдневно проси молитвено застапништво пред Бога преку ликот на Богородица која треба да е идеал на современата жена.

Да се биде жена денес е крст, распнување помеѓу семејните и работните обврски, распнување помеѓу тоа да се биде мајка и деловно успешна.

Токму поради таа причина кај нас православните жената не може да биде свештеник, зашто го има дарот на свештенството во црквата во мало (семејството), а тоа е преубавиот дар на мајчинството.

Немаме никаква потреба од феминизам или од патријархат доколку ги послушаме зборовите на апостолот Павле кој советува: вие мажите сакајте ги жените свои како што ги сакате своите тела.

Таков треба да односот на едни кон други, љубовен во вистинска смисла на зборот, сето она што е надвор од Бога е чист хуманизам и непотребен активизам кој е со краток рок на употреба.

Мажи сакајте си ги жените; жени бидете им потпора и утеха на мажите…

Компанијата ДСА ТЕАМ ДООЕЛ повеќе од 8 години е лидер во регионот за автомобилска контрола на квалитетот. Се работи за тим од професионалци фокусирани на помагање на компаниите во областа на управување со целокупниот квалитет, континуирано подобрување, управување и решавање на проблеми со речиси една деценија искуство на мултинационалните пазари.

Поради зголемениот обем на работа, имаме потреба од вработување на кандидати за работната позиција: ОПЕРАТОР ЗА КОНТРОЛА НА КВАЛИТЕТ

Опис на работните обврски и задачи:

• Сортирање и селекција на делови • Доработка на делови • Тестирање на производи на локацијата на купувачот;

• Следење на инструкции за работа и работни упатства • Почитување на инструкциите за безбедност и заштита при работа

Компанијата нуди: • Едукација и тренинг во секторот за контрола на квалитет • Можност за работа на проекти во странство • Работа во динамично работно опкружување во брзорастечка компанија • Атрактивна заработка и дополнителни бонуси за посебно залагање во работата • Обезбеден превоз и платен топол оброк.

Услови кои треба да ги исполнуваат кандидатите: • Тимска работа • Одговорна и детална личност •Посветеност и прецизност во работата

Сите заинтересирани канидати до 40 годишна возраст, кои ги исполнуваат горенаведените услови потребно е да ги достават своите биографии на следната е – маил адреса: [email protected], со задолжителна назнака за позицијата за која аплицираат.

Зајакнување на правосудството во земјава, на сите нивоа, е главен приоритет за амбасада на САД, за мене лично и за Вашингтон, изјави американската амбасадорка во земјава Анџела Агелер.

По посетата на Истражниот центар при Основното јавно обвинителство Скопје, каде амбасадата на САД донираше компјутерска и техничка опрема, Агелер порача дека ова е добар систем и изрази уверување дека интероперабилноста ќе ја подобри ефикасноста.

„Тука сум од ноември и корупцијата во земјава е присутна подолго време. Тоа не е проблем што може да се реши за неколку месеци и постојат веќе системи, кои бараат проверка. Затоа е добра денешната посета, за да видам како се водат истрагите“, порача Агелер.

Сакаме да бидеме партнери со оваа земја, нагласи Агелер, така што ќе покажеме дека овој систем е тука за вашите граѓани.

„За тоа е потребно време. Не е нешто што еден компјутерски систем ќе го реши, но е приоритет и ако имам една цел како амбасадор во земјава, тоа е да се осигурам дека ќе направам се што можам, заедно со мојот тим, за зајакнување на вербата на граѓаните на Северна Македонија во правосудството“, порача Агелер.

Претседателот на Основното јавно обвинителство – Скопје, Гаврил Бубевски, изрази благодарноста за донацијата, која помага во секојдневната работа, а со крајна цел да овозможиме верба на граѓаните во институциите во системот и добивање на правда.

„Се работи за сериозна донација што ќе ни помогне во секојдневната работа и од технички и од суштински аспект, затоа што многу побрзо можеме да работиме на одредени докази и прибирање доказен материјал“, изјави Бубевски.

Се надеваме, посочи Бубевски, и на понатамошна соработка со американската амбасада преку обуки и друга помош.

Фудбалерите на Победа го претрпеа тринаесеттиот пораз сезонава, откако попладнево во рамките на дваесеттото коло во Првата фудбалска лига, загубија со 3:0 на гостувањето кај Академија Пандев во Струмица.

Струмичани уште во третата минута од натпреварот ја потврдија фаворитската улога и со погодокот на Ѓоргиевски поведоа со 1:0, а мрежите потоа мируваа до 70-та минута кога Велиновски зголеми на 2:0, а две минути подоцна Врдољак ги постави конечните 3:0.

Во прилог на прилепчани не беше ниту дуелот помеѓу Скопје и Македонија Ѓорче Петров, каде тимот од Автокоманда успеа да се избори за 1:1 во самиот финиш на натпреварот, и со тоа да добие бод предност пред Победа на табелата.

И Скопје и Победа ги чекаат нови тешки гостувања викендов, Победа кај Брегалница, а Скопје кај Силекс.

Едно е сигурно, со ваков пристап црвено-белите ги чека пеколен завршеток на сезоната и ништо засега не гарантира дека работите ќе тргнат во позитивна насока. Ако Победа отпадне во Втора лига, мислењето е дека клубот многу тешко би се консолидирал.

Директорот на Јавното претпријатие за државни патишта Ејуп Рустеми и вицепремиерот Артан Груби по потпишувањето на договорот соопштија дека годишно во просек ќе се градат по 23 километри автопат, а цената во просек, ќе биде 12 милиони евра по километар.

-Целосно е почитуван Законот за склучување на договорот со стратешкиот партнер. Експропријацијата уште не почната бидејќи ова е нов модел на градење на автопатишта. „Бехтел и Енка“ и ќе проектира и ќе гради, рече Рустеми.

Министерот за транспорт и врски Благој Бочварски посочи дека цените се поткрепени врз основа на физибилити студијата изготвена од Градежниот факултет и ревидирана од консултанската компанија Гранд Тортон.

-Договорот со изведувачот е изготвен согласно принципот на ФИДИК договорите, а тоа е принципот на измерени количини. Тоа подразбира дека плаќањата ќе се вршат според реализираните работи на терен и на тој начин ќе се има целосна транспрантност на извршените работи и потрошените средства, рече Бочварски.

Со цел да се забрза изградбата на коридорите, како што рече, од изведувачот ќе биде применет принципот на „проектирање и изградба”, а тоа подразбира дека со договорот, на изведувачот му се дава обврската сам или преку домашни проектански фирми и компании истовремено да проектира и да гради.

Целата изградба треба да трае до 2027 година. Предложениот динамички план предвидува рок од 33 месеци за изградба на Тетово-Гостивар, 49 месеци за Требеништа – Струга – Ќафасан и 57 месеци за Гостивар – Букојчани и за Прилеп – Битола.

Финансирањето на проектот е од Буџетот на државата, а во буџетот на Министерството за транспорт и врски годинава се предвидени 15 милијарди денари или 244 милиони евра. Се планира секоја година од Буџетот да се издвојуваат толку средства.

За проектот, „Бехтел и Енка“ се номинирани за стратешки партнер од државата. Надзорот ќе го врши ИРД инжинеринг, кој како консултант за финансиски трансакции во име на Владата изминатиот месец ги водеше преговорите со конзорциумот.

Денеска (08.03.2023) во 00.44 часот пред с.Долнени, прилепско, вработени во шумската полиција, додека извршувале службени дејствија, пронашле товарно возило „там“ без регистарски ознаки и го одзеле, при што биле физички нападнати од Р.М. од с.Црнилиште и уште три лица, кои со патничко возило „фолксваген пасат“ и со тврди предмети ги оштетиле службеното и одземеното возило.

Притоа, еден од вработените во шумска полиција испукал во воздух еден куршум од службениот пиштол, во знак на предупредување.

Се преземаат мерки за расчистување на случајот – информираат од СВР Битола.