Владата по информацијата за високите температури од портокалова фаза што се очекуваат во следните четири денови усвои соодветни препораки.

Сите региони во државата: скопскиот, осоговско-малешевскиот, пелагонискиот и охридско-преспанскиот ќе влезат во портокалова фаза.

Поради тоа, почнувајќи од утре, 13 јули 2023 година (четврток) почнуваат да важат препораките за намалување на ризиците од високите температури, согласно Акцискиот план на Министерството за здравство за превенирање на последиците од топлотните бранови врз здравјето на населението.

Согласно усвоеното, Владата препорачува: Ослободување од работни обврски на најранливите групи население, како што се: бремените жени и лица на возраст над 60 години; Во установите за згрижување на децата (градинки), да не се практикува физичка активност и да не се изнесуваат децата на отворено во периодот од 11 до 17 часот; Единиците на локалната самоуправа, Црвениот крст и Центрите за социјални работи, во регионите зафатени со топлотниот бран да пружаат помош на осамени, стари, изнемоштени лица и бездомници.

Со оглед дека одредени ризични производствени и технолошки процеси може да претставуваат дополнителен ризик по здравјето на изложените работници, се потсетуваат работодавците на обврската за почитување на законските прописи од оваа област.

Согласно добиените информации, Владата одлучи: Државните органи и јавните претпријатија и установи да ги почитуваат препораките; Владата препорачува на приватниот сектор да го организира работното време со цел заштита од директна сончева изложеност на работниците, пред сѐ избегнување престој на отворено во периодот од 11 до 17 часот; Сите правни субјекти кои вршат активности на отворено, да ги запрат активностите во периодот од 11 до 17 часот, а ова особено се однесува на работата на градежните работници; Градинките треба да го организираат работното време во периодот од 7:00 до 17:00 часот, со тоа што не треба да практикуваат физичка активност и да не се изнесуваат децата на отворено по 11 часот.

Владата одлучи овие мерки да бидат со времетраење од четири дена, од 13 – 16 јули, односно во текот на следните два работни дена, четврток и петок, како и за двата дена од претстојниот викенд, сабота и недела, до натамошно одлучување.

Апел до сите граѓани од Територијалната противпожарна единица Прилеп

-Почитувани Граѓани на општина Прилеп и соседните општини Кривогаштани и Долнени. Со најава на портокалова фаза – зголемени високи температури се зголемува и опасноста од пожари на отворен простор. Aпелираме до сите граѓани да се однесуваат одговорно и при своето движење во природа да внимаваат да не предизвикаaт пожар. Доколку забележите пожар, веднаш пријавете на броевите 193 и 112 и на службите да им дадете точни информации за локацијата на пожарот и неговата големина за полесно итервенирање на ТППЕ. Загубите од пожарите на отворен простор се многу големи и многу тешко надоместливи, да ја сочуваме природата да го сочуваме нашето шумско богатство – нашите бели дробови.

Со почит ТППЕ Прилеп.

62-годишниот прилепчанец Ристе Трајкоски, кој до јануари бил работник во ЈКП „Комуналец“, веќе седум месеци живее во вистинска агонија. По операцијата на колкот, наместо неговата здравствена состојба да се подобрува, тој останува врзан за кревет и во силни болки. Вели, сега биле останати и без пари, и без здравје, особено што и неговата сопруга има сличен здравствен проблем како неговиот, па ни таа не може да работи и да заработува. Во моментов, единствен приход на ова семејство со две малолетни деца им биле средствата во висина од 4.000 денари која ја земаат како нега за Ристе, а која на неколкупати им била и прекинувана – oбјави “АЛФА ТВ”.

„Не ми е заздравен колкот. Ми течи вода тука колкот. 40 дена лежев на болница. И докторот рече – доста ти е лежење, ќе полежиш дома. Болки имам големи, отечени ми се двете нозе. Од јануар месец немам плата. Сопругава нема плата, и таа е инвалид на двете нозе. Едната и’ е оперирана во Скопје, другата, и таа и’ е за оперирање, ама колку-толку се движи. На работа не може да оди, со патерици не може да оди“, – со голем напор ја раскажува својата животна голгота, Ристе Трајкоски.

Откако се разболел, Ристе пробал да дојде до пензија. Меѓутоа, и тука се појавил проблем. Му недостасувале околу 34 дена стаж за да го оствари тоа право. „Фала му на Бога што еден приватник ми излезе во пресрет, па ме осигура за да можам и да се лекувам, а и да дојдам до пензија, па сега постапката е во тек. Ама во меѓувреме ни се трупаат неплатените давачки. Парите ни се малку дури и за храна“, вознемирено вели Ристе.

„Трудова инспекција рече – „Ристе, ете вети директорот да ти пиши бенифициран стаж“. За тој стаж, три месеци прашував преку телефон, не можев да се движам таму да одам, а таа ме одбиваше. Дома нас ни фали се’. Јас дури одев на работа си ги подмирував и сметките. За седум месеци заостанаа некои сметки, само струја што плаќаме некако и ова интернетот што им треба на децата. Децана бараат за на школо да јадат. Велат, ние не можеме да јадеме, што ќе купи со 10 денари?! Ни треба помош“, – вели овој загрижен и очаен, a и тешко болен родител.

Дека животот им е неподносливо тежок ни потврди и сопругата на Ристе, Вера која е од Албанија. Таа не сакаше до говори пред камера, но зад камерата, со солзи во очите ни кажа дека освен што и’ e преболно да се грижи за сопругот кај кого не забележува подобрување, срцето ја боли и за двете деца од кои едното е и врвен спортист и постојано им носи и многу награди. „Децата ми заслужуваат многу подобар живот, а ние не сме во состојба да им го дадеме, а згора на се’ и болни сме, тоа ме загрижува најмногу“, ни рече Вера на испраќање.

Сторија на Каролина Дурло/ТВ АЛФА

На 11.07.2023 полициски службеници од криминалистичката полиција во содејство со полициската станица од општа надлежност Битола ги лишиле од слобода М.Ј. и Ј.Б., двете лица од Битола.

Имено, при претрес извршен со наредба од Основен суд Битола во дом и помошни простории кај М.Ј. од Битола, биле пронајдени и одземени амфетамин, три дигитални ваги со остатоци од дрога, рамка од пиштол наполнет со 8 куршуми, 79 куршуми од непознат калибар, 35 маневарски куршуми, грутчеста материја, пакет со распрскувачки капси за сигнален пиштол. Малку подоцна, приведена е и Ј.Б.(34), бидејќи по преземени мерки и активности е утврдено дека е поврзана со пронајдената дрога при претресот.

Лицата се приведени во полициска станица Битола и по документирање на случајот против нив ќе бидат поднесени пријави по член 396 и по член 215 од Кривичниот законик.

Денеска е Петровден

Со овој празник завршува еден од четирите повеќедневни пости во годината, кој е врзан за празникот на Апостолите. Денес црквата ги слави двајцата врховни апостоли Петар и Павле. А и историски нивниот празник се утврди пред празникот посветен на 12-те, т.е. на сите апостоли.

Апостолот Петар се прославува како образец на цврстата и искрена вера, а Павле како оној кој најмогу се потрудил во проповедањето на распнатиот и воскреснат Исус Христос. Инаку тие, како и сите останати апостоли, имаат свои посебни празници во текот на богослужбеното годишно време.

По примањето на Светиот Дух апостолите се растуриле по светот за да ја проповедаат светата Христова вера. На тој план меѓу нив најповеќе се истакнале светите апостоли Петар и Павле. На иконите, светите апостоли Петар и Павле се претставени заедно, Петар со клучеви од рајот, а Павле со меч, симбол на сопствената смрт.

Именден празнуваат: Петар (Камен, Каменко), Петре, Петра, Петранка, Петруна.

Колку наплаќа еден фризер во Лос Анџелес

100 долари за патот да дојде до кај вас дома за 50 минути оддалеченост, плус по 350 долари за секој час работа, или за фризура за која е потребно 2 ипол до 3 часа работа, вкупно 1.150 долари.

Епа на здравје стрижење!

Barbers in LA are insane? pic.twitter.com/glpokP7mbb

— Myneuver (@DOLLABILLGATES) July 11, 2023

Поради асфалтирање, делницата Велес – Градско од денеска до 22 јули во периодот од 08:00 – 18:00 часот ќе биде затворена за сообраќај, извести АМСМ.

Поради вградување на асфалтен слој (асфалтирање), од 06.07 до 20.07.2023 година, делницата Демир Капија – Давидово ќе биде затворена во период од 10:00 – 16:00 часот.

На 11.07.2023 во рамки на „Безбедно лето 2023“, од страна на полициски службеници од криминалистичката полиција при СВР Битола, во содејство со полициската станица од општа надлежност Битола, како и во координација со инспектори од Државниот инспекторат за труд и Државниот пазарен инспекторат во Битола беше спроведена акциска контрола во субјекти кои се занимаваат со откуп на секундарни суровини.

При контролата во два објекти – отпади на ул.„Караорман“ беа констатирани неправилности. Исто така, при контролата на истата локација беа пронајдени и одземени околу 9м3 нелегално исечена дрвна маса. Дрвната маса е предадена на Шумска полиција за понатамошна постапка, а по документирање на случаите ќе бидат поднесени соодветни поднесоци.

Пронајдено е петнаесетгодишно девојче од долненско Пешталево за кое доцна синоќа беше објавено дека е исчезнато. Од МВР потврдуваат дека девојчето е со своите родители.

Цела работа започна синоќа кога роднините на девојчето на социјалните мрежи почнаа да пишуваат статуси со барање за помош во нејзино пронаоѓање.

„Нема ни траг ни глас од неа, од вчера вечерта околу 19 часот полициска екипа е во потрага по Ана Марија Ѓореска последен пат била видена на постојка Ропотово, чекала превоз. Не е видена со што возило е тргната и каде доколку некој ја препознае и види ве молиме известете не. Девојчето е од село Пешталево Ропотово однапред ќе ви се заблагодарам доколку примиме убави вести. 15 годишна возраст е, малолетничка, не комуницира со луѓе, во последно време е многу затворена“, стоeше во објавата.

По преземањето на кормилото од страна на тренерот Филип Мирчески, Победа започна да го гради тимот за наредната сезона во Втора лига.

Прво засилување е 20-годишниот голман Иван Николоски, инаку син на поранешниот репрезентативец Јане Николоски, кој ги бранеше боите на клубот од 1990 до 1993година, а беше и тренер на клубот во сезоната 2018/2019.

Иван доаѓа од екипата на Беласица каде се задржа само една полусезона. Тој е дете на Победа, а откако ги помина младинските категории на клубот, настапуваше уште и за младинските екипи на Брегалница и Работнички, а потоа и за Дрита, Влазрими, Воска и Силекс.

Покрај Николоски, Победа го досега го ангажираше и напаѓачот Беким Алимоски, кој доаѓа од третолигашот Питу Гули.