Екипата на Абердин каде настапува нашиот репрезентативец Бојан Миовски синоќа прокоцка водство од 2:0 против грчки ПАОК и загуби со 2:3 во третото коло од Лигата на конференции на УЕФА.

Миовски постигна гол за водство на Шкотлаѓаните, а запиша и асистенција за 2:0.

Македонскиот голгетер потоа ги пецна Грците со начинот на прославата.

Ова е втор погодок за нашиот репрезентативец во ова натпреварување на УЕФА, откако во минатото коло стрелаше прецизно и против фински Хелсинки, но за жал неговиот Абердин досега освои само еден бод.

Според календарот на МПЦ (Јулијанскиот календар) денеска е 14 октомври.

Денеска е Преподобна Параскева-Петковден.

Во народот позната како света Петка. Неа и е посветена црквата во долниот дел на скопската населба Црниче. Била од словенско потекло, од градот Епиват, меѓу Салинаврија и Цариград. Родителите и биле имотни и побожни христијани.

Таа живела со нив до нивната смрт, а потоа заминала за Цариград, а оттаму во Јорданската пустина, во денешен Израел, каде се подвизавала во пост и молитва до својата старост.

Во староста се вратила во Епиват, каде проживеала уште две години. Се успокоила во Господа во единаесеттиот век. Нејзините чудотворни мошти биле пренесувани од место во место, а денес се наоѓаат во Романија, во градот Јаши.

Минатиов викенд во Штип се одржа 38-мото по ред издание на македонскиот музички бренд “МАКФЕСТ”, на кој учество како дебитант зеде и нашата прилепчанка Александра Трајческа.

Aлександра настапи со својата песна „НЕ САКАМ“, на музика, текст и аранжман на композиторката Ана Пандевска.

На првата вечер на овој фестивал резервирана за дебитантите, Александра доби најголем број на гласови од публиката и со тоа се пласира во следната, ревијална вечер, која беше обезбедена за настапот на ѕвездени имиња од македонската музичка сцена.

„Прекрасна публика, совршена организација и преубава сценографија. Задоволна сум од тоа како ја изнесов песната и благодарна на штипската публика која како публика со изграден музички вкус ме награди со своите гласови, и се разбира на директорот на фестивалот Роберт Саздов за пружената можност. Слушнете ја мојата песна и пишете ги вашите впечатоци. Вашата поддршка за мене значи непроценлив поттик .Ви благодарам од срце.“ , порача Александра.

Талентираната девојка од Прилеп по којзнае кој пат покажа со какви вокални способности располага и дека и’ претстои блескава музичка кариера. Уживајте во продолжение со нејзиниот настап:

СВР Битола поднесе кривична пријава против М.К.(20) од Прилеп, поради постоење основано сомнение за сторено кривично дело „тешка телесна повреда“.

На 05.10.2023 во семејниот дом пријавениот физички го нападнал неговиот татко – информираат од ОВР Прилеп.

Според календарот на МПЦ (Јулијанскиот календар) денеска е 13 октомври.

Денеска е Света великомаченичка Злата Мегленска. Именден празнуваат: Злата, Златка, Златица, Злате…

Родена е во селото Слатина, во Мегленската област, од сиромашни селски родители, коишто имаа уште три ќерки. Света Злата беше кротка и побожна девојка, мудра со Христовата мудрост и златна не само по име туку и по богобојазливото срце. Еднаш, кога излезе по вода, ја фатија некои бесрамни Турци и ја одвлекоа во својата куќа.

Кога еден од нив ѝ нудеше да се потурчи и да му биде жена, таа храбро му одговори: „Јас во Христа верувам, само за Него знам и Он ми е Женик. Од Него нема да се откажам никогаш, макар и на илјада маки да ме ставите и на парчиња да ме исечете.“ Тогаш дојдоа нејзините родители и ѝ рекоа: „Смилувај се на себе и на нас, откажи се привидно од Христа и ќе бидеш среќна и ти и ние, а Господ е милостив, ќе ти прости за гревот ако го правиш по цена на животот.“ И плачеа горко родителите, сестрите и роднините.

Но, витешката душа на света Злата не даде да биде победена од ѓаволските стапици. На своите родители им одговори: „Штом ми советувате да се одречам од Христа Кој е вистински Бог, не сте ми повеќе родители ни сестри; татко ми е Господ Исус Христос, мајка – Богородица, а браќа и сестри – светителите и светителките.“ Тогаш Турците ја фрлија во затвор, каде што лежеше три месеци и секој ден ја биеја додека нејзината крв не ја натопи земјата.

Најпосле ја обесија главечки и ја подложија на оган за да се загуши од чадот. Но Господ беше со неа и ѝ даваше сила во страдањето. На крајот, ја обесија на дрво и целата ја исекоа на парчиња. Така, оваа мажествена девица Му го предаде својот дух на Бога и се пресели во рајските живеалишта, во 1796 година. Парчиња од нејзините мошти христијаните разнесоа за благослов по своите домови.

Во Прилеп празникот најмасовно се празнува пред параклисот посветен на светицата на ул. “Петта прилепска бригада”, свето место кое го изгради прерано починатиот прилепчанец Ристо Тошески.

Кај параклисот и денеска се собраа голем број прилепчани кои палеа свеќи и се помолија за здравје. Една убава традиција, на уште поубаво место која со сигурност ќе продолжи и во наредните години.

Нека е за многу години и напомош!

Денеска (26.10.2023) во 03.20 часот во СВР Битола било пријавено дека настанал пожар во куќа во Прилеп, сопственост на Љ.Ш. од Прилеп.

Пожарот бил изгаснат од екипа на Бригадата за противпожарна заштита.

Се преземаат мерки за расчистување на настанот – стои во соопштението од ОВР ПРилеп.

Новозапишаните студенти од прва година, кои аплицираа за стипендиите за академската 2023/2024 година, што ги доделува Општина Прилеп, ги потпишаа своите договори за доделување стипендија. Ова беше можност за поттик и на младите да креираат знаења и да творат тука во својата заедница.

Советот на Општина Прилеп од оваа година донесе Програма и Правилник за доделување стипендии на студенти од Општина Прилеп, така што за прв пат, во оваа академска година, беше одлучено на 20 најдобри студенти и студенти од социјално ранливи категории од Општина Прилеп да им бидат доделени стипендии.

Општина Прилеп и Економскиот факултет – Прилеп на почетокот од акедемската година за оваа цел склучија и меморандум за соработа.

-Им посакувам на студентите да имаат успешна академска година и да ја остварат својата цел, да ги развијат своите вештини и способности за економските науки и да останат да делуваат во својата заедница, во нашиот Прилеп – истакна градоначалникот Јовчески.

Во рамки на деветтото коло од ракометната Супер лига, РК Прилеп утре во спортската сала на СОУ “Ристе Ристески-Ричко”, ја пречекува екипата на Пролет 62.

После 8 одиграни кола, прилепчани забележаа само 2 победи, а на салдото имаат еден нерешен резултат и дури 5 порази, што е далеку од очекувањата на спортските вљубеници во градот под Марковите Кули.

Пролет од друга страна имаат 4 победи и 4 порази и со 12 бода се наоѓаат на четвртото место на табелата.

Ако прилепчани сакаат да се задржат во трката за место кое носи во плеј-оф разигрувањето, тогаш победа на утрешниот натпревар е императив.

Момците на Боби Мојсов ќе мораат да одиграат натпревар без грешки против стариот лисец Илија Темелковски, за кого ова ќе биде прв натпревар на клупата на Пролет.

Репертоар на Народниот театар “Војдан Чернодрински” Прилеп

Во сабота, 28.10, со почеток од 20:00часот, ќе се одигра претставата “Дупло дно”. Влезници и резервации на телефонскиот број: 076/442-378

Режисер, дизајн на сцена и костими: Наташа Поплавска
Композитор: Ристо Вртев
Драматург: Ивана Нелковска
Дизајнер на светло: Милчо Александров
Дизајн на плакат и програма: Бојана Артиновска – Трпческа

Играат:
МАРИЈА СПИРКОСКА ИЛИЈЕСКА – Кристина
ДАНИЕЛА ИВАНОСКА – Параскева
ДИМИТАР ЃОРЃИЕВСКИ – Божо
ИГОР ТРПЧЕСКИ – Јаков
ЗОРАН ИВАНОСКИ – Лудакот
МИХАЈЛО МИЛЕНКОСКИ – Нове

Дупло дно бенд:
Томе Темелкоски – гитара, звучни ефекти;
Методија Костоски -клавијатури, звучни ефекти , бас гитара;
Ана Митоска – пијано, ксилофон, вокал;
Филип Јездиќ – тапани, перкусии

Унгарскиот премиер Виктор Орбан го спореди членството на Унгарија во Европската унија со периодот на советската окупација на неговата земја, говорејќи пред гостите во Веспрем по повод годишнината од унгарското востание против советската репресија во 1956 година.

Орбан ја обвини ЕУ дека се обидува да ѝ го одземе идентитетот на Унгарија со наметнување модел на либерална демократија што, како што рече, Унгарците го отфрлаат, пренесува АП.

– Брисел, де факто главниот град на ЕУ, користи методи против Унгарија кои потсетуваат на деновите на советската доминација на Москва – рече тој.

– Се случуваат работи кои нѐ потсетуваат на советско време. Да, историјата се повторува – изјави Орбан на настанот од кој беа исклучени сите медиуми освен унгарската државна телевизија.

– За среќа, она што некогаш беше трагедија, сега е во најдобар случај комедија. За среќа, Брисел не е Москва. Москва беше трагедија. Брисел е само лоша современа пародија – оценува тој.

Орбан повлече паралели меѓу обидите на ЕУ да ја усогласи Унгарија со нејзините правила за корупција и демократија и повеќе од 40-годишната репресија на Унгарија под советска окупација во 20 век.

– Моравме да танцуваме на мелодијата што ја свиреше Москва. И Брисел свирка, но ние играме како сакаме, а ако не сакаме, тогаш не танцуваме! – коментира Орбан.

Во меѓувреме, унгарскиот министер за надворешни работи Петер Сијарто го обвини Брисел дека намерно сака да го забрза членството на Украина во Унијата и тврдеше дека блокот е заразен со „воена психоза“ поради новиот предложен пакет помош за Киев.

– Европската унија не е безбедносна организација, таа е политичко-економска интеграција, па затоа е целосно неприфатливо за нас да го оправдуваме идното членство на една земја исклучиво од безбедносни причини – рече Сијарто по состанокот на Советот за безбедност на ЕУ во Луксембург.