14 февруари – ден кога љубовта се слави насекаде. За некого Св. Валентин, за некого Св. Трифун. За едни ден на романтиката, за други празник на љубовта и виното. Но, без разлика како го нарекуваме – ова е ден кога срцето зборува погласно од зборовите.

Овој викенд, цвеќарница Лизијан – Прилеп ви подготвува вистинска магија за сите вљубени. Прекрасно аранжирани букети, внимателно спакувани подароци, романтични комбинации од цвеќе, вино и слатки изненадувања – создадени да измамат насмевка и да разбудат емоции на прв поглед.

Лизијан е повеќе од цвеќара, тоа е едно уникатно атеље, каде двете сестри Снежана Цветковска и Јулка Николоски, со многу љубов внесуваат посебност во секој детал, во секоја креација, а крајниот епилог од тоа се задоволни и среќни муштерии и клиенти.

Секоја декорација раскажува приказна. Секој букет носи порака: „Те сакам“.

Без разлика дали сакате да изненадите сакана личност, да запалите нова искра или да ја зацврстите постоечката љубов – во Лизијан ќе го пронајдете совршениот подарок.

Посетете ја цвеќарница Лизијан во старата катна гаража, веднаш до “НЕПТУН” и дозволете љубовта да зборува преку најубавите цветови.

Овој викенд не подарувајте само цвеќе, подарете чувство, подарете спомен, подарете љубов.

Следете ја цвеќарница Лизијан на социјалните мрежи / ФЕЈСБУК / ИНСТАГРАМ

Марко Бислимоски поднесе оставка од функцијата претседател на Регулаторна комисија за енергетика. Тој во писменото известување упатено до Собранието, наведува дека се повлекува од функцијата на која бил именуван, односно реизбран, на 26 јули 2023 година, и бара согласно Законот за енергетика да се утврди престанокот на мандатот.

Оставката на Бислимоски следи две недели откако Финансиската полиција поднесе кривична пријава против него. На 29 јануари, Финансиската полиција до Основното јавно обвинителство (ОЈО) Скопје поднесе пријавата за постоење основи на сомнение за сторено кривично дело Злоупотреба на службена положба и овластување, односно оти не била одземена лиценца за вршење енергетска дејност на фирмата „Тритерол Петрол ДООЕЛ“ Скопје.

-Пријавениот М. Б. во својство на претседател на Регулаторната комисија за енергетика, водни услуги и услуги за управување со комунален отпад ја злоупотребил својата службена положба и овластување, на начин што, спротивно на Законот за енергетика и Правилникот за лиценци иако бил должен да отпочне постапка за одземање на лиценца за вршење на енергетска дејност, трговија на големо со сурова нафта, нафтени деривати, биогорива и горива за транспорт-трговија на големо со еуродизел, биодизел, еуросупер, екстра лесно 1 и течен нафтен гас на правното лице ‘Тритерол Петрол ДООЕЛ‘ Скопје, поради неисполнување на законски пропишаните услови, донел незаконско Решение за прекин на постапката и наместо лиценцата да биде одземена на 15.01.2024 година, истата е одземена дури на 14.04.2025 година. Со тоа ѝ овозможил на компанијата противзаконски да продолжи со вршење на енергетска дејност 15 месеци по истекот на законските услови и да учествува и да склучува договори по однос на јавни набавки, соопштија тогаш од Финансиската полиција.

Бислимоски ги отфрли обвинувањата и изјави дека не чувствува вина во врска со постапувањето. Надлежните институции треба да утврдат дали има основ за кривична одговорност и дали во случајот биле прекршени законските обврски.

Заменик-министерот за економија и труд, Марјан Ристески во гостувањето на „Тема на денот“ на Сител телевизија, изјави дека Владата со последниот постигнат договор за зголемување на платите во администрацијата покажа висок демократски капацитет и транспарентност во работата, како и дека овој договор е доказ дека социјалниот дијалог во државата функционира.

-Со договорот со двата репрезентативни синдикати САДУ и УПОЗ со кој ќе се зголемат платите за над 40 проценти за 11.000 вработени во администрацијата со 2028 година, како и со претходни договори за зголемување на платите на вработените во образованието, здравството, социјалните работници, армијата, полицијата и други сектори, Владата го заокружи процесот таму каде што таа е работодавач, кажа заменик-министерот Ристески.

Ристески додаде дека со овој договор овие над 11.000 вработени во државната управа ќе добијат повисоки плати и ќе се приближат до другите државни институции, а со ова се исправа неправдата нанесена од штетните политики на минатата власт.

-За жал, наследивме една хаотична состојба со платите во јавниот сектор, каде платите се регулираат со разни колективни договори, правилници и одлуки, а тоа допринесе во исти ресори или институции, вработени на исти позиции да имаат различни плати. Во наредниот период со двата репрезентативни синдикати треба повторно, во еден транспарентен процес, да преговараме за нов Општиот колективен договор за јавниот сектор кој е истечен. Овој нов договор треба да даде квалитетни и системски решенија за пресметките и растот на платите во јавниот сектор. Со ова ќе имаме јасен систем за пресметка на платите и можност за поквалитетно и поодговорно планирање на буџетските средства потребни за оваа намена, додаде Ристески.

Околу минималната плата Ристески повтори дека разговорите мора да продолжат помеѓу синдикатите со најголемите работодавачи, а тоа се претставниците на приватниот сектор, како и дека Владата ќе го прифати било кое решение кое тие ќе го договорат, а доколку нема договор тогаш минималната плата ќе се зголеми согласно постоечкото законско решение.

Во најавата за најновата колумна, во која ги отсликува минатонеделните случувања во Прилеп, новинарот Зоран Момироски се осврна и на долгогодишните очекувања на прилепчани да добијат нов театар.

,,Ново-старата престава,, НОВ ПРИЛЕПСКИ ТЕАТАР иако подготвувана скоро 8 години, дефинитивно нема да се гледа.А и стариот за кој се планира реконструирање и возобновување нема да стигне до 5 јуни кога треба да започне годинашниов јубилејен 60 –ти театарски фестивал ,,Војдан Чернодрински,, – напиша Момироски.

Какви детали има бардот на новинарството во Прилеп, останува да видиме во утрешната колумна на неговиот Фејсбук профил

Ракометарите на РК Прилеп во рамки на второто коло од пролетниот дел во Супер машката ракометна лига забележаа важна и голема победа над РК Тиквеш 2014 со 33:26, откако на полувремето имаа предност од 16:11.

Ова беше првиот настап на прилепчани пред домашната публика во вториот дел од сезоната, а избраниците на тренерот возвратија со борбена, дисциплинирана и ефикасна игра. Од самиот почеток наметнаа силно темпо, со цврста одбрана и разигран напад, не дозволувајќи му на противникот да го доведе во прашање победникот.

Најефикасен во редовите на РК Прилеп беше капитенот Димитар Димитриоски со девет постигнати голови, додека значаен придонес даде и Никола Шипинкоски со седум погодоци.

Ова беше деветта победа за прилепчани кои сега имаат 18 бода на табелата, само два помалку од петто и шесто пласираните Тиквеш и Бутел.

До почетокот на плеј-оф/плеј-аут разигрувањата, РК Прилеп ќе се соочи со Еурофарм Пелистер на гости и Радовиш на домашен терен. Прилепчани ќе се надеваат на кикс на Тиквеш, кој игра на домашен терен со Куманово и на гостински терен токму со Бутел во последното коло. Од друга страна пак Бутел пред решавачкиот дуел со Тиквеш, ќе се соочи и со Охрид на гостински терен.

Овој ден на вљубените, подарете практична љубов.

Наместо класичен подарок што ќе трае кратко, изберете нешто што носи вистинска вредност, можност за заеднички финансиски раст и посигурна иднина. Со P2P инвестирањето, љубовта добива ново значење: грижа, доверба и поддршка за целите на личноста што ви значи.

Со нашата акција 1+1, добивате 1% бонус за вас + 1% бонус за личноста што ја препорачувате. Регистрирајте се, препорачајте ја својата сакана личност и заработете бонус заедно.

Така, не само што правите подарок, туку ја мотивирате вашата сакана личност да го направи првиот чекор кон паметно инвестирање и финансиска сигурност.

Бидејќи вистинската љубов не се мери само во моменти, туку во сигурноста и можностите што ги создавате заедно.

Подарете нешто што носи вредност денес, но и утре – подарок што работи за вас. Започнете на P2P.mk и направете инвестиција што расте, исто како љубовта.

МПЦ-ОА и православните христијани во земјава денеска го слават празникот на тројцата светители: св. Василиј Велики, св. Григориј Богослов и св. Јован Златоуст – значајни личности што страдале за Христовата вера.

Покрај тоа што си имаат и посебни празници светите Василиј Велики, Григориј Богослов и Јован Златоуст имаат и еден заеднички празник.

Овој заеднички празник е востановен во 11 век за време на царот Алексиј Комнен. Еднаш однекаде настана расправа меѓу народот околу тоа кој од овие тројца светители е најголем. Едни го величаа светиот Василиј заради неговата чистота и храброст, други светиот Григориј за недостижната длабочина и висина на умот во богословието; трети воздивнуваа по светиот Јован, заради неговата чудесна благоглаголивост и јасност во изложувањето на верата. И така едни се нарекуваа василијани, други григоријани, а трети јованити.

По Божја Промисла овој спор беше решен во корист на Црквата и на уште поголема слава на овие тројца светители. Евхаитскиот епископ Јован (под 14 јуни) имаше едно видение во сон, имено: прво му се јави секој од овие светители во голема слава и неискажлива чудесност, а потоа сите тројца заедно. Тогаш му рекоа: „Ние сме едно во Бога, како што гледаш, и кај нас нема ништо противречно… ниту има меѓу нас некој кој е прв или втор“. Светителите го посоветуваа епископот да им напише една заедничка служба и да им се одреди еден заеднички ден за празнување. Со ова прекрасно видение спорот се реши на тој начин што 30 јануари се одреди како заеднички празник за тројцата свети архијереи.

Од друга страна, секој од нив имал некои специфични карактеристики: Свети Василиј Велики бил голем во книжевната мудрост, реториката и филозофијата. Свети Григориј Богослов ја изразил својата величина во теологијата и светоста на добродетелниот живот, додека Свети Јован Златоуст се одликувал со прекрасни проповеди и толкување на Светото Писмо. Свети Василиј Велики и Свети Јован Златоуст имаат улога и во составувањето на Светите Литургии што ги носат нивните имиња, а кои уште се служат во Светата Црква и денес. Секој од овие три светила на Црквата, покрај овој заеднички, има и свој посебен празник: Свети Василиј Велики (1 јануари/14 јануари), Свети Григориј Богослов (25 јануари/7 февруари), Свети Јован Златоуст (13 ноември/26 и 27 јануари/9 февруари).

Кои биле тројцата светители и со што заслужиле да влезат во календарот на Светата Христова црква?

Свети Василиј наречен Велики бил најславниот владика во градот Кесарија Кападокиска. Роден е во Неокесарија околу 330 година (според некои 329 г.) од побожни родители. Татко му, кој исто така се викал Василиј, бил учител по беседништво – оратор и адвокат, а мајка му се викала Емилија. Во 345 година заминал на школување во Кесарија Кападокиска, а во 352 година во Атина. Овде соученици и другари му биле Григориј, подоцна наречен Богослов и Јулијан внукот на Константин Велики, кој најпрвин бил христијанин, а подоцна го напуштил христијанството, станал цар и ги прогонувал христијаните поради што е познат по прекарот Отстапник.

Василиј, по завршувањето на школувањето, на околу 30 годишна возраст се вратил во родното место, станал учител, подоцна примил свештенички чин и бил проповедник во црквата. Бил многу популарен поради што тогашниот владика многу му завидувал. Тоа било причина Василиј да замине во пустина. За време на престојот во Александриската пустина се сретнал со свети Атанасиј Велики кој бил протеран од Ариевците. Во тоа време било силно ариевското движење и цариградскиот цар Валент, кој ги поддржувал овие еретици сакал да им ги предаде сите цркви.

Во Кесарија немало личност која со својот авторитет можела да му се спротивстави на ова движење, но и на царот Валент. Таква личност бил само свети Василиј, кој по смртта на кесарискиот владика се вратил од пустината и бил поставен за владика Кесариски. Бил многу популарен меѓу народот и многу лесно луѓето ги придобивал за христијанската вера, поради што бил наречен втор Павле. Особено успешно се борел против Ариевците поради што го навлекол врз себе гневот на царот Валент, кој се обидувал да го убеди да се откаже од архиепископскиот престол за да може да постави некој од Ариевците. Му се заканувал со протерување и смрт но и тоа не го исплашило и поколебало свети Василиј. Умрел на 1 јануари (според стариот календар) 379 година (според други 389 година) на 50 годишна возраст.

Свети Василиј Велики е значаен и како писател. За време на престојот во Понтиската пустина ги составил монашките правила. Кога бил архиепископ во Кесарија градел болници и училишта, а самиот живеел скромно поради што бил многу популарен. Поради тоа што свештениците литургијата ја служеле различно тој ја скратил литургијата на св. Јаков и напишал т.н. „Василева служба“ која до денес се служи во првите пет недели од Велигденските пости, потоа на Велики четврток, Велика сабота, на денот на Св. Василиј спроти Божик и Богојавление, а понекогаш и на Божик и Богојавление, што значи десет пати во годината.

Во времето кога живеел св. Василиј Велики живеел и св. Григориј Богослов. Бил негов другар, и исто така, бил многу популарен. Григориј на грчки јазик значи вреден, буден, бодар. Роден е во 329 година во градот Назајанз во југозападна Кападокија. Татко му бил владика (тогаш владиците се женеле) и во родниот дом ја стекнал првата љубов кон образованието. Учел во Кесарија, Александрија и Атина, каде што се запознал со св. Василиј Велики. Оттука дошол во градот Сосим каде што бил избран за епископ, а подоцна и во Цариград каде што во 379 година станал патријарх.

На оваа должност останал 12 години и многу придонесол за засилување на православието. Потоа дошол во селото Арианз во Кападокија, каде што ги напишал своите главни дела. Поради големото богословско образование бил наречен Богослов. Умрел на 25 јануари 390 година и на овој ден секоја година светата црква го празнува неговиот ден. Денес главата му се наоѓа во Москва, а другиот дел од телото во Рим.

Освен свети Григорије Богослов во Цариград бил познат и популарен и свети Јован Златоуст. Роден е во Антиохија во 374 година. Во раните денови од детството му умрел татко му и мајка му го дала на училиште. Сакал да се закалуѓери и тоа го направил по смртта на мајка му кога отишол во еден манастир во близината на Антиохија. Потоа бил избран за патријарх цариградски каде што се прославил со убави беседи поради што бил наречен Златоуст. Напишал многу дела меѓу кои е и литургијата што се служи преку целата година позната како „Златоустова литургија“.

Народот почнал да го моли, коските на Св. Јован Златоуст да бидат пренесени во Цариград. Познато е писмото што цар Теодосија II му го напишал на св. Јован Златоуст како да е жив, соопштувајќи му дека ќе го пренесат во Цариград, за што испратил и брод. Моштите на св. Јован Златоуст во Цариград се пренесени на 9.II/27 И 438 година и овој ден Светата Православна Црква го одбележува секоја година.

Свети Јован Златоуст умрел на 14 септември 408 година но бидејќи на овој ден се празнува Воздвижение на чесниот крст (Крстовден) празникот на Св. Јован Златоуст е пренесен на 26/13 ноември.

Советничката група на СДСМ во Советот на општина Прилеп, поднесе барање за вонредна седница до Претседателката на Советот, што следува по вчерашното соопштение од ФК Победа, со кое клубот ја информираше јавноста дека поради блокираната сметка и очајната финансиска состојба, сениорската екипа не е во можност да го продолжи натпреварувањето во Втората фудбалска лига.

Од тие причини, советничката група на СДСМ и Коалицијата до претседателката на Совет на општина Прилеп поднесе барање за свикување на вонредна седница на општинскиот Совет со единствена точка на дневниот ред:

1. Информација за актуелната состојба во ФК „Победа“ Прилеп и донесување на предлог заклучоци за изнаоѓање на соодветно решение за надминување на ваквата состојба.

Во образложението за поднесеното барање се вели:

„Фудбалскиот клуб “Победа“ од Прилеп како најзначаен и најпрепознатлив спортски бренд на градот, се наоѓа во состојба на целосно пропаѓање, што претставува сериозен удар врз спортот, младите и јавниот интерес на општината.

ФК Победа не е само спортски колектив, тук дел од идентитетот на Прилеп, клуб со децениска традиција, бројни успеси, европски настапи, клуб на генерации фудбалери кои го прославија името на клубот и градот низ државата како и надвор од неа. Денешната состојба и целосната неизвесност за иднината на ФК “Победа“, е резултат на
долгогодишната негрижа и отсуството на одговорност. Општина Прилеп, за жал, последниве неколку години не покажа желба за вистинска помош на клубот за излез од оваа криза и е директен соучесник во неговото уништување.

Како советничка група, сметаме дека е потребно свикување на вонредна седница на која Советот ќе добие целосна информација за фактичката состојба во клубот и ќе се донесат конкретни заклучоци и мерки за спас и реорганизација на ФК “Победа“.

Свикувањето на вонредна седница ќе покаже дека Советот на Општина Прилеп ја разбира својата улога и сериозно му приоѓа на проблемот, дека стои зад заштитата на јавниот интерес, спортот и иднината на младите во нашиот град. Ако Советот ја пропушти можноста навремено да реагира, ќе остане запаметен како Совет кој преќутно дозволи да згасне најголемиот спортски бренд на Прилеп“.

-На 10.02.2026 во 15:00 часот во с.Сенокос, општина Долнени, полициски службеници од Полициското одделение Ропотово го лишија од слобода Х.К.(34) од Прилеп.

При преглед во неговото патничко возило биле пронајдени предмети за кои постои сомнение дека ги украл од живинарска фарма во с.Долнени, а кои претходно биле пријавени за украдени.

Подоцна, од слобода бил лишен и неговиот брат Б.К.(32) затоа што на ул.„Орде Чопела“ во Прилеп застанал пред полициското возило, се обидел да го спречи транспортот до ОВР Прилеп и агресивно се однесувал кон полициските службеници кои вршеле службени дејствија.

По целосно документирање на случајот, против двајцата ќе следува соодветна пријава – информираат од МВР.

Веќе станува АЛАРМАНТНО! Проблемот со кучињата скитници во Прилеп сега е распространет во речиси сите населби во градот, а граѓаните редовно ни испраќаат фотографии и видеа од цели глутници пред нивните домови.

Најновата поплака од граѓани е од населбата Марино Маало, каде деноноќно е присутна глутница од десетина кучиња скитници. Граѓаните стравуваат за своите најмали, бидејќи кучињата се често присутни околу основното училиште “Гоце Делчев” и детската градинка.

Фотографијата е од утрово токму пред градинката “Наша иднина” во оваа населба.

Апел до новиот директор на ЈКП “Комуналец” Прилеп, ова да биде еден од приоритетите со кои ќе се занимава на стартот од својот мандат.

За потсетување, пред неколку дена во Битола, двегодишно дете беше испокасано од група кучиња скитници додека си играло пред својот дом.