-На 09.11.2026 во 23:10 часот во с.Беровци, прилепско, полициски службеници од Полициската станица за граничен надзор Старавина при РЦ за ГР Југ го лишија од слобода К.С.(30) од Скопје.

При контрола на патничко возило „киа“ со скопски регистарски ознаки, кое го управувал, биле пронајдени и одземени 61 парче минерален камен во различна големина, 59 парчиња македонски рубин, едно парче амазонит, едно парче титаниум оксид, марихуана, 489720 денари во различни апоени и 10 банкноти по 200 евра.

Лицето е задржано во ОВР Прилеп и по целосно документирање на случајот против него ќе биде поднесена соодветна пријава – информираат од МВР.

Регионалната иницијатива на Европската комисија, Cassa Depositi e Prestiti (CDP) и Banca Etica со кредитно портфолио од 30 милиони евра отвора можности за нови извори на финансирање, посилни партнерства и поголема финансиска инклузија во Западен Балкан

По повеќегодишна меѓународна соработка на Групацијата на небанкарски финансиски институции при Стопанската комора на Сверна Македонија и контактите остварени за време на МикроБалканс 2026, се отвора нова можност за конкретна финансиска поддршка на небанкарските финансиски и микрофинансиски институции, како и на малите бизниси во Северна Македонија.

На 11 ноември 2026 година, во Сараево, официјално ќе биде претставена регионалната иницијатива SAFE – Sustainable Access to Finance for Entrepreneurship, односно „Одржлив пристап до финансии за претприемачи“. Поддржана од Европската комисија и Cassa Depositi e Prestiti (CDP), а имплементирана од Banca Etica, иницијативата има за цел да ја унапреди финансиската инклузија и да го олесни пристапот до финансии за микро, малите и средните претпријатија во Западен Балкан. Проектот опфаќа шест земји – Албанија, Босна и Херцеговина, Косово, Северна Македонија, Црна Гора и Србија – со посебен фокус на социјалните претпријатија и бизнисите управувани од жени и млади.

Во Сарево на регионалниот панел посветен на одржливиот пристап до финансии ќе учествува Никола Јошевски, претседател на Групацијата на небанкарски финансиски институции при Стопанската комора на Северна Македонија, заедно со претставници на микрофинансискиот сектор од Албанија, Црна Гора, Босна и Херцеговина и Србија.

Како функционира SAFE?

Cassa Depositi e Prestiti (CDP) е водечки партнер и обезбедува кредитна линија за Banca Etica, како и гарантен механизам за покривање на дел од потенцијалните загуби. Европската комисија, преку Генералниот директорат за проширување и Источно соседство (DG ENEST), обезбедува поддршка преку гарантен фонд за првични загуби, субвенционирање на каматните стапки и техничка помош. Banca Etica, како партнер за имплементација, ги пласира средствата до локалните микрофинансиски институции.

Предвидено е во првите 36 месеци да се формира и пласира кредитно портфолио од 30 милиони евра, наменето за микрофинансиските институции во шесте земји. На овој начин ќе се зајакнат нивните финансиски капацитети и можностите за кредитирање на локалните микро и мали бизниси.

Покрај финансиската поддршка и механизмите за споделување на ризикот, SAFE вклучува и техничка помош за подобро управување со ризиците и интегрирање на ESG-принципите, како и обуки во областите на дигиталната едукација и зелените работни места. Проектот е предвиден да трае седум години, со почетен тригодишен период за пласирање на средствата кон микрофинансиските институции.

Значењето за Северна Македонија

За Северна Македонија, SAFE отвора можност за вклучување и зајакнување на небанкарскиот финансиски и микрофинансиски сектор и проширување на пристапот до финансии за бизниси кои често потешко ги исполнуваат условите на традиционалното банкарско кредитирање.

Микро и малите претпријатија, самовработените лица, стартапите, семејните и руралните бизниси имаат реални развојни потреби, но често се соочуваат со ограничувања поради недостиг од обезбедување, кратка кредитна историја или недоволен финансиски капацитет. Токму тука небанкарските финансиски институции имаат важна улога – преку поблискиот пристап до претприемачите и пофлексибилните финансиски решенија.

За еден мал семеен производител, на пример, пристапот до средства за нова опрема може да значи зголемување на производството и отворање нови работни места. За млада претприемачка, соодветно финансирање може да биде клучно за проширување на веќе започнат бизнис.

Преку SAFE, домашните микрофинансиски институции добиваат можност да пристапат до дополнителни финансиски ресурси и техничка поддршка, со што би можеле да го прошират опфатот на кредитирање и да допрат до претприемачи кои имаат ограничен пристап до финансии. Посебно значајна е можноста за поддршка на женското и младинското претприемништво, руралните бизниси, како и инвестициите во дигитализација и зелена транзиција.

Вистинскиот успех на SAFE иницијативата ќе се мери не само преку обезбедените финансиски средства, туку и преку конкретните можности што ќе ги создаде за малите бизниси – повеќе инвестиции, нови работни места и подобри услови за претприемачите кои имаат потенцијал за раст, но сè уште се соочуваат со ограничен пристап до финансии.

Љубовта, храброста, пријателството и емпатијата ќе оживеат на сцената во НУЦК „Марко Цепенков“ во Прилеп, каде што во петок, 13 ноември, со почеток во 19 часот, танцовото студио и портал за современи изведувачки уметности „Зодијак“ премиерно ќе ја изведе новата претстава за деца и млади „Снежното кралство“.

Инспирирана од добро познатата магична приказна, претставата носи низа случки, емоции и пораки кои ги надминуваат генерациските граници. Преку авантурите на сестрите Ана и Елза, најмладата публика ќе има можност да ги открие вистинските вредности на љубовта, пожртвуваноста, храброста и сочувството, но и да научи дека нашите постапки влијаат врз луѓето околу нас.

Публиката ја очекува вистинска сценска магија, исполнета со певливи песни на македонски јазик, разиграни кореографии, впечатливи сценски решенија, колоритни костими и сценографија, кои заедно создаваат незаборавно театарско доживување за децата и младите.

Преводот, драматизацијата и адаптацијата на македонски јазик се на Благојче Николоски, режијата, песните и сценските движења се на Кире Миладиноски, музиката е на Кристоф Бек и Томе Темелкоски, костимографијата на Анѓа Миладиноска, а сценографијата и куклите се дело на Јордан Миладиноски.

Во претставата играат Бисера Гаралоска, Петар Јошески, Марта Шаркоска, Калина Стојаноска, Софија Иваноска, Сара Камческа, Кристина Миноска, Љубица Ангелеска, Лана Спиркоска, Милана Здравеска, Јована Ангелеска, Јана Чучуроска, Сара Иваноска, Исидора Митревска, Анисија Тренеска и Марија Стојаноски.

Продукцијата е поддржана од Министерството за култура и туризам на Република Северна Македонија, во рамките на Националната програма за 2026 година – драмска дејност, како и од Општина Прилеп. Копродуцентски партнер е НУЦК „Марко Цепенков“, матичната сцена на која танцовото студио „Зодијак“ работи веќе 27 години.

Прилепските најмлади љубители на театарот ги очекува средба со една од најубавите приказни за сестринската љубов, храброста и добрината, овојпат раскажана преку македонска сценска изведба.

Од 15 ноември започнува законската обврска за задолжително поседување зимска опрема во возилата, која ќе трае до 15 март 2027 година. Несовесните возачи кои нема да ги исполнуваат пропишаните услови ќе се соочат со парична казна од 45 евра во денарска противвредност.

За патничките возила со најголема дозволена маса до 3.500 килограми предвидени се две можности за исполнување на обврската

Првата е користење зимски пневматици на сите четири тркала, со длабочина на шарата од најмалку четири милиметри.

Втората можност е возење со летни пневматици, исто така со минимална длабочина на шарата од четири милиметри, но во тој случај возачите задолжително мора да поседуваат синџири за снег со соодветна големина за погонските тркала.

Тоа значи дека зимските гуми не се единствен услов за исполнување на законската обврска, но возачите што користат летни мора да ги имаат и пропишаните синџири за снег.

Надлежните потсетуваат дека зимската опрема не е важна само за избегнување казни, туку пред сè за безбедноста на патиштата, особено во услови на ниски температури, дожд и снег.

Американскиот претседател Доналд Трамп ја номинираше Кристи Мекормик (Christy McCormick) од Калифорнија за нова амбасадорка на Соединетите Американски Држави во Република Северна Македонија. Номинацијата е официјално доставена до Сенатот на САД на 9 ноември 2026 година, соопшти Белата куќа. По испраќањето на официјалниот предлог од Белата куќа, на ред е сослушувањето и гласањето во Комитетот за надворешни работи на американскиот Сенат. Доколку биде потврдена од Сенатот, таа ќе стапи на чело на дипломатското претставништво на САД во Скопје.

Мекормик не доаѓа од Стејт департментот. Таа има повеќе од две децении искуство во федералните институции на САД, при што нејзина тесна специјалност е изборното законодавство, заштитата на гласачките права и унапредувањето на изборните системи.

Од декември 2014 до јули 2026 година, таа служела како членка (комесар) и претседателка на независната федерална институција – Комисија за изборна помош на САД (EAC). На оваа позиција првично била номинирана од претседателот Барак Обама, а нејзиното назначување било едногласно потврдено од Сенатот. За време на единаесетгодишниот мандат во EAC, Мекормик ја предводела комплетната реорганизација на Комисијата, иницирала национални самити за изборни податоци и пристапност на гласањето и лично набљудуваше изборни процеси во речиси сите американски сојузни држави, како и во странство.

Мекормик има искуство со работа во американски дипломатски мисии во кризни подрачја. Во периодот 2009–2010 година, во Амбасадата на САД во Багдад (Ирак) таа служела како виш правен советник и вршител на должност заменик-координатор за владеење на правото. Како изборен експерт на терен, таа директно го надгледувала спроведувањето на ирачките национални избори и процесот на повторно пребројување на гласовите.

На почетокот на својата кариера (од 1999 до 2006 година), извршувала правосудни и државни функции во сојузната држава Вирџинија.

Во моментов Никол Варнс е вршител на должноста амбасадор на САД во Македонија. Претходната амбасадорка Анџела Агелер беше отповикана од функцијата по три години поминати во Скопје. Новата амбасадорка ќе биде десетти амбасадор на САД во Македонија.

На веб-страницата на Белата куќа објавени се сите номинации на Трамп за американски амбасадори во повеќе држави во светот.

Од ЕВН информираат дека во среда и четврток (11 и 12 ноември 2026 година) се планирани прекини во снабдувањето со електрична енергија во Општина Прилеп, и тоа:

– Планиран прекин на електрична енергија на 11.11.2026 г. (Среда) ќе има на следните улици во Општина Прилеп од 09.00 ч. до 13.00 часот: “Скопска”, “Свети Наум Охридски” и дел од Ул. “Александар Македонски”.

– Планиран прекин на електрична енергија на 12.11.2026 г. (Четврток) ќе има во следните населени места во Општина Прилеп од 10.00 ч. до 15.00 часот: с. Канатларци, с. Марул, с. Подмол, с. Бонче и с. Лопатица.

На 12 ноември 2026 / четврток/ од 19.00 часот во фоајето од Центарот за култура ќе се одржи концертот „Од опера до безвремени македонски народни песни“. Kонцертoт ќе ги стопли срцата и ќе ве поведе во убаво музичко патување, публиката ќе има можност да чуе врвна вокална и инструментална музика. Вечер на уметничко доживување!

Ќе настапат:
Тенор : Илија Белистојаноски
Пијано: Дарко Мариновски
Труба: Љупчо Коскаров / гостин/

Програма на концертот:
ПРВ ДЕЛ
1. Non ti scordar di me — Ернесто Де Куртис
Текст: Доменико Фурно
2. Dicitencello vuje — Родолфо Фалво
Текст: Енцо Фуско
3. Dein ist mein ganzes Herz — Франц Лехар
Од оперетата „Земјата на насмевките“ (Das Land des Lächelns)
4. Un’aura amorosa — Волфганг Амадеус Моцарт
Од операта „Така прават сите“ (Così fan tutte)
5. Salut! demeure chaste et pure — Шарл Гуно
Од операта „Фауст“ (Faust)
ВТОР ДЕЛ
6. Tombe degli avi miei — Гаетано Доницети
Од операта „Лучија ди Ламермур“ (Lucia di Lammermoor)
7. Rachel, quand du Seigneur — Фромантал Алеви
Од операта „Еврејката“ (La Juive)
8. Полонеза cis-moll оп.26 бр.1 — Ф.Шопен
9. No puede ser — Пабло Соросабал
Од сарсуелата „Крчмарката од пристаништето“ (La tabernera del puerto)
10. My Way — Клод Франсоа и Жак Рево
Англиски текст: Пол Анка
11. ‘O sole mio — Едуардо ди Капуа
Текст: Џовани Капуро
12. Core ‘ngrato — Салваторе Кардиљо
Текст: Рикардо Кордиферо
Љ.Коскаров-Д.Мариновски – Фантазија бр.1(Деспина)
ТРЕТ ДЕЛ
13. Болен ми лежи — македонска народна песна
14. Калино моме — македонска народна песна
Свита бр.5 (Тиквешки марш)
ЧЕТВРТ ДЕЛ – ФИНАЛЕ
15. Nessun dorma — Џакомо Пучини
Од операта „Турандот“ (Turandot)
БИС
16. Dein ist mein ganzes Herz — Франц Лехар
Од оперетата „Земјата на насмевките“ (Das Land des Lächelns)

Податоци за музичарите:

Илија Белистојаноски, тенор – роден во Прилеп. Основното образование го завршил во својот роден град. Потоа се запишал во Државното музичко училиште во Битола, на насоката музичка теорија. За време на образованието, бил препознаен како исклучително талентиран пејач и го претставувал училиштето на натпревар по камерна музика во Скопје, каде што освоил првото место. Откако ги открил своите вокални способности, Илија одлучил да ги продолжи студиите на Музичката академија во Штип, во класата на реномираниот оперски пејач, проф. Борис Трајанов. Во рамките на академијата изучувал правилно пеење и сценско однесување (актерство, движење и држење). Редовно учествувал на сите концерти во чест на проф. Коста Трпков, заедно со оркестарот на Националната опера и балет. Дебитирал на сцената на Националната опера и балет во операта Макбет од Џ. Верди, во улогата на Малком, заедно со италијански ансамбл. Редовно одржува концерти во градови низ целата земја.Кратко по дипломирањето, ја освоил првата награда од стручното жири на натпреварот „Лазар Јовановиќ“ во Белград, Србија. Потоа го освоил Гран При на натпреварот „Руска романсијада“ во Софија, Бугарија, со што се вброил меѓу дванаесетте финалисти и на големото финале во Москва ја освоил втората награда од стручното жири. По ова следувала покана за концертен настап во една од најголемите сали во светот – Кремљскиот дворец во Москва.Учествувал на натпреварот за „Руска вокална музика“ во Скопје, каде го освоил второто место. Во жирито, меѓу другите, бил и еден од најзначајните басови во Русија, Народниот уметник на СССР, проф. Леонид Сметаников. Стигнал до финалните рунди на престижниот меѓународен натпревар „Белведере“ во Рига, Летонија. Учествува на меѓународниот натпревар по пеење „Бјулбјул“ во Баку, Азербејџан во јуни 2024 година Илија соработувал со познати педагози од музичкиот свет, како: Михаел Пабст и Линда Плех (Виена, Австрија), Дануса Лукнисова и Мигел Гомез Паез (Пезаро, Италија), Елда Ларо (диригентка, Германија), Паола Мариоти (Италија) – последната лична пијанистка на Лучано Павароти, Николас Клаптон (Англија) и други. Тој е редовен учесник на мајсторските курсеви кај една од најголемите примадони на Италија, проф. Капучине Кјаудани.

*******

Дарко Мариновски – пијанист

Дарко Мариновски е македонски пијанист, универзитетски професор, композитор и музички аранжер. Дипломирал и магистрирал на Факултетот за музичка уметност во Скопје, во класите на проф. Борис Романов и проф. Јасминка Чакар.Работел како професор по пијано и корепетиција во ДМБУЦ „Илија Николовски – Луј“ во Скопје, а бил и декан на Факултетот за применета музика при Универзитетот ЕСРА, каде што го добил звањето редовен професор. Своето педагошко искуство го надополнува со ангажман на Музичката академија при УГД во Штип, како пијано-соработник и соработник во оперското студио. Како пијано-соработник и уметнички соработник има настапувано со бројни истакнати македонски уметници на значајни концертни сцени и фестивали во земјата и странство, меѓу кои Охридско лето, УНЕСКО во Париз, Вашингтон, Њујорк, Рим и Истанбул. Остварил повеќегодишна соработка со оперските уметници Борис Трајанов и Илија Белистојаноски како и со бројни македонски вокални и инструментални уметници. Автор е на музика за краткометражни филмови и театарската претстава „Косара“, како и на оркестарски аранжмани на македонски народни и родољубиви песни. Активен е и во областа на камерната музика, пијано-дуото и музичката педагогија, со настапи и едукативни активности во земјата и странство.

Министерството за внатрешни работи планира да го прошири проектот „Безбеден град“ со мобилни камери за контрола на брзината, како и со уреди вградени во полициските возила, кои ќе можат да регистрираат сообраќајни прекршоци и додека се во движење – најави денеска на прес-конференција министерот за внатрешни работи Панче Тошковски.

Тој посочи дека досегашните анализи покажале оти поставувањето камери само на однапред утврдени локации нема да има доволно превентивен ефект. Целта е возачите да бидат свесни дека можат да бидат откриени доколку ги прекршат сообраќајните правила, без оглед на тоа каде се движат.

Според предлозите на експертите, постојните полициски возила треба да се опремат со камери што ќе ја мерат брзината на возилата во движење. Паралелно, планирана е и набавка на мобилни камери што ќе се поставуваат на таканаречените црни точки, односно на локациите каде што најчесто се случуваат сообраќајни несреќи со загинати и тешко повредени лица.

Тошковски рече дека ќе се работи на утврдување на сите критични сообраќајни точки низ државата, како во урбаните средини, така и на магистралните и експресните патишта.

Министерот за внатрешни работи најави и дека системот „Безбеден град“ во првата недела од декември официјално ќе започне да се применува и на подрачјето на СВР Струмица.

Следно на ред е СВР Штип, каде што активностите треба да завршат до крајот на годинава. По него останува уште подрачјето на СВР Битола, за чие опфаќање ќе бидат потребни најмногу месец до месец и половина.

Тошковски очекува до февруари системот „Безбеден град“ да биде воведен на територијата на цела Македонија.

Осврнувајќи се на критиките за проектот „Безбеден град“, министерот ги повика граѓаните да имаат предвид дека во изминатите 15 години во сообраќајни несреќи животот го загубиле повеќе од 2.000 луѓе.

Тој нагласи дека активностите за зголемување на безбедноста во сообраќајот нема да завршат со поставувањето на камерите, туку ќе продолжат и со други мерки насочени кон спречување на сообраќајните прекршоци и намалување на бројот на несреќи.