Во среда, на 21 октомври, со почеток во 20:00 часот, на сцената „105“ при НУЦК „Марко Цепенков“ во Прилеп ќе биде изведена театарската претстава „Саатот“ од Лидија Митоска-Ѓорѓиевска, во режија на Кристина Димитрова.

Претставата ја отвора темата за желбата на човекот за кариерно и професионално издигнување, прикажувајќи ги амбициите, личните односи и времето што неуморно минува. Преку брачната приказна на Јован и Вера и симболиката на нивниот часовник, кој ја отчукува секоја секунда од животот, се отвора прашањето за цената што човекот ја плаќа во трката по успехот и остварувањето на своите амбиции.

Автор и драматург на претставата е Лидија Митоска-Ѓорѓиевска, режијата е на Кристина Димитрова, сценографијата и костимите се на Благој Мицевски, а музиката е на Филип Јездиќ и Томе Темелкоски.

Во претставата настапуваат:

– Саатот – Филип Јездиќ
– Јован – Димитар Ѓорѓиевски
– Вера – Наташа Ачански
– Вокална појава – Ана Митоска

Публиката ќе има можност да погледне театарска приказна што преку секојдневните односи и симболиката на времето го поставува прашањето колку навистина ни останува додека се обидуваме да стигнеме до она што го посакуваме.

Билети може да се резервираат на телефонскиот број 076-442-378.

Еден од Дванаесетте големи апостоли. Со неговиот сомнеж во воскресението на Господ Исус Христос беше придобиена нова потврда за тој чудесен и спасоносен настан. Имено, воскреснатиот Господ повторно им се јави на учениците за да го увери Тома. И му рече Господ на Тома: „..дај ја раката своја и стави ја во ребрата Мои; и не биди неверлив, но верлив!“ И Тома возвикна: „Господ мој и Бог мој!“ (Јован 20). По слегувањето на Светиот Дух, кога апостолите ги мешаа жрепките каде кој ќе оди на проповед, на Тома му падна жрепка да оди во Индија.

Тој малку се нажали што мора да оди во толку далечен крај, но Господ му се јави и го охрабри. Во Индија, свети Тома многумина, големци и сиромашни, ги обрати во верата Христова и ја заснова таму Црквата и постави свештеници и епископи. Меѓу останатите, Тома ги обрати кон Христа и две жени на двајца индиски кнезови, Тертијана и Мигдонија, коишто беа сестри.

Овие сестри беа од своите мажи намачени заради верата, затоа што не сакаа да живеат со нив откако примија Крштение, а потоа мажите ги отпуштија. Откако се ослободија од бракот тие поживеаја богоугодно до смртта. Дионисиј и Пелагија, претходно беа вереници, но кога ја слушнаа апостолската проповед не влегоа во соживот, туку се посветија на подвиг. Пелагија заврши како маченичка за верата, а Дионисиј беше поставен од апостолот за епископ.

Кнезот Муздиј, маж на Тертијана, кому што Тома му ги крсти жената и синот, го осуди апостолот на смрт и испрати петмина војници коишто го прободоа со пет копја.

Така си ја предаде душата во рацете на Христа светиот апостол Тома. Пред својата смрт и тој, како и другите апостоли, беше чудесно пренесен на погребот на Пресвета Богородица. Но бидејќи пристигна доцна, горко зажали, па на негова молба го отворија гробот на Пресветата, но внатре не го најдоа Нејзиното тело.

На таинствен начин Господ Ја беше зел Својата Мајка во Неговите небесни живеалишта. И така Свети Тома, којшто со своето неверување ја утврди верата во Христовото воскресение, во овој случај задоцнувајќи ни го откри чудесното прославување на Богородица.

Прилеп добива ново место за кафе, вкусна храна и пријатни моменти со најблиските! Во населбата Точила, зад Тобако Маркет, во среда (21 октомври) своите врати ги отвора Noma Brunch Cafe, нов локал кој носи свеж, урбан лик и простор создаден за уживање.

Просторот каде што претходно функционираа угостителски објекти сега добива сосема нова приказна. Со внимателно уреден ентериер, модерен мебел и амбиент кој плени уште на прв поглед, Noma Brunch Cafe ветува пријатна атмосфера во која секое кафе, секој оброк и секоја средба ќе добијат посебен шарм.

Замислете место каде што денот започнува со добро кафе, продолжува со вкусен оброк, а попладнето е резервирано за дружење и релаксација. Токму такво катче најавува Noma Brunch Cafe, со понуда во која ќе има место за топли напитоци, вкусна храна, мезиња, даски и уште многу поводи за да се соберете со луѓето што ви значат.

Без разлика дали планирате семејна средба, кафе со пријателите, разговор со колегите или едноставно сакате да си посветите малку време на себе, новиот локал во Точила ќе биде место каде што ќе можете да уживате во пријатен амбиент, подалеку од секојдневната градска гужва.

Особено во периодот што доаѓа, кога студените денови нè привлекуваат кон топли и удобни простори, ваквото место може да стане омилена дестинација за оние кои сакаат добар вкус, убаво уреден простор и опуштена атмосфера.

Noma Brunch Cafe ги отвора вратите во среда, 21 октомври, во населбата Точила, зад Тобако Маркет во Прилеп.

Ново место, нов амбиент и нова причина да се соберете со вашите најблиски. Понекогаш, за убаво поминат ден, доволно е само да го пронајдете вистинското место!

Кога се собираат семејството, пријателите или колегите, добрата храна е задолжителен дел од секоја дружба. А кога сакате трпезата да изгледа богато, разновидно и примамливо уште на прв поглед, даските од МЕНЗА се избор со кој нема да погрешите!

Родендени, семејни прослави, слави, свечености, корпоративни настани или едноставно дружење дома со најблиските, секоја пригода е поубава кога на масата има вкусна храна во која сите ќе уживаат.

Токму затоа, МЕНЗА ви нуди богати даски со внимателно подготвена разновидна храна, одлични за споделување и создадени за моменти кога сакате да ги почестите гостите со нешто навистина вкусно и убаво послужено.

Во понудата се даски со разновидни сувомеснати производи, поховани специјалитети и други вкусни залаци кои одлично се надополнуваат и создаваат богата трпеза за сечиј вкус. Комбинацијата од различни вкусови, примамливиот изглед и богатите порции ги прават овие даски одличен избор кога сакате да послужите повеќе видови храна на едно место.

А најдобриот дел? Не мора да поминувате часови во кујна, да подготвувате повеќе различни јадења и да размислувате дали храната ќе биде доволна за сите гости. Со нарачка од МЕНЗА, добивате практично и вкусно решение кое ќе ви го олесни организирањето на прославата, а вам ќе ви остави повеќе време за дружење и уживање.

Богата трпеза не мора да значи и голем трошок! Даските од МЕНЗА се подготвуваат со разновидна храна и пристапни цени, па можете да изберете соодветна опција за вашата пригода, бројот на гости и буџетот.

Без разлика дали организирате поголема свеченост, сакате да ги изненадите колегите на работното место или ви доаѓаат гости дома, вкусната храна секогаш е добредојдена. А кога е убаво послужена и има по нешто за секого, задоволството е уште поголемо!

За следната прослава не ја оставајте трпезата на случајноста. Нарачајте богата даска од МЕНЗА и подгответе се за дружење исполнето со вкус, без непотребна брзаница и грижи околу храната.**

Нарачки и информации на 076 231 075

ПОБРЗАЈТЕ, ВЕЌЕ СЕ ПРАВАТ РЕЗЕРВАЦИИ И ЗА СЛЕДНАТА ГОДИНА!

МЕНЗА – лоцирани на ул. “Егејска” наспроти “Универзална сала” во Прилеп!

Ротаракт клубот Прилеп ги повикува граѓаните да се приклучат на еко акцијата „Есенска сликовница“, која ќе се одржи на 1 ноември 2026 година, со цел подигнување на еколошката свест и поттикнување на поголема грижа за животната средина.

Акцијата ќе опфати планинарска прошетка на релацијата од селото Селце до манастирот „Св. Димитриј“, при што учесниците ќе собираат отпад долж патеката и со конкретни активности ќе придонесат за почиста и поздрава животна средина.

Од Ротаракт клубот Прилеп посочуваат дека целта на иницијативата е да се поттикне личната одговорност кон природата и заедницата, испраќајќи порака дека грижата за животната средина не треба да биде само повремена активност, туку дел од секојдневното однесување на секој поединец.

„Есенска сликовница“ е првиот проект на клубот во оваа ротаријанска година и претставува дел од поширока иницијатива посветена на заштитата и унапредувањето на животната средина.

Следната активност е најавена за 15 ноември 2026 година, под наслов „100 дрва, 100 приказни“, кога ќе се организира акција за садење дрвја. Со оваа иницијатива, клубот има за цел да придонесе за создавање позелена околина и да поттикне долгорочна грижа за природата.

Од Ротаракт клубот Прилеп упатуваат покана до сите заинтересирани граѓани да се приклучат на активностите и заеднички да покажат дека позитивните промени во заедницата започнуваат со лична иницијатива и конкретни дела.

По повод Денот на Хрватскиот Парламент, во Битола во Центарот за култура беше изведена претставата „Не се врткај наоколу гола“, во режија на Силвио Стилиновиќ, и изведба на Младинскиот Сатиричен театар од Славонски Брод, Хрватска.

Гостувањето на овој театар беше во организација на МХД.Хрватски културен центар „Марко Марулиќ“, Битола, во соработка со Општина Битола и Центарот за култура, со поддршка на Централната канцеларија за Хрватите кои живеат надвор од Хрватска.

„Навистина се чувствувам како дома. Секогаш ни е драго да се сретнеме со луѓето овде, а особено со нашите Хрвати што доаѓаат тука. Навистина сме благодарни што на некој начин го запознавме господинот Маретиќ и што ни овозможи да се сретнеме со овие луѓе овде. Македонците и Хрватите, можам слободно да кажам дека станавме пријатели, благодарение на таа соработка и на соработката со Хрватскиот културен центар. Во Славонски Брод има еден фестивал на аматерски театри, веќе неколку години и театарските аматери од оваа околина, од Битола, од Ресен, доаѓаат таму и учествуваат на фестивалот. Така што се разви еден убав мост на пријателство меѓу Битола и Славонски Брод. Разговаравме за некои идни соработки, па можеби сега е време да направиме чекор повеќе. Мојот предлог е да се обидеме да се поврземе на ниво на нашите градови“, изјави режисерот Стилиновиќ.

Гостувањето на театарот од Славонски Брод во Битола стана традиција.

„Веруваме дека таа традиција ќе продолжи. Во преговори сме за некои идни соработки на повисоко ниво. Инаку ние ги одбележуваме сите позначајни празници на Хрватска. Освен тоа, оваа година Хрватскиот културен центар беше организатор на повеќе значајни манифестации, иницијатор на потпишување на Меморандум за соработка помеѓу НУУБ. „Св. Климент Охридски“ Битола и Градската библиотека „Марко Марулиќ“ Сплит, организатор на неодамнешната турнеја на КУД Илинден во Хрватска, учесник на меѓународни конференции и семинари и сл“, истакна Бранко Маретиќ, претседателот на Хрватскиот културен центар.

Претставата која беше изведена во Битола е работена по текстот на еден од најголемите француски комичари, Жорж Фејдо, напишан пред 100 години. Програмата на Хрватскиот културен центар е направена со цел на презентација и запознавање на публиката со хрватското културно наследство, традиција, чување на хрватскиот јазичен идентитет. Културните посети и соработки траат повеќе од 30 години, од кои дел беа бројни изложби, концерти, театарски претстави, промоции на книги, предавања, а следуваат и концерти на хорот „Стив Наумов“ во Хрватска, концерти во соработка со Општина Битола, традиционалниот Божиќен концерт и сл.

Во претставата играат: Славко Радовановиќ, Петра Ковачевиќ, Антонио Јуричиќ, Ноа Маринац, Јан Битуњац.

Костимографијата е на Тајана Балаж Јуришиќ. Претставата од својата премиера минатата година ги полни салите низ театрите и културните центри во Хрватска каде и да гостува. Иако текстот е стар повеќе од еден век, режисерот Силвио Стилиновиќ и младата екипа го сместија дејството во денешна Хрватска. Тие на најдобар можен начин покажаа дека дури ни вековите не ја промениле самата суштина на човечкиот карактер, во сите негови доблести и недостатоци. Режисерската работа на Стилиновиќ успева во она што е тешко дури и за професионалните ансамбли – да извлече од младите актери спонтаност, автентичност и одлично темпо на претставата, што ја држи публиката будна од првата до последната сцена. Заедно со асистентот-режисер Саша Кариќ, тој создаде претстава која го нуди она што публиката најмногу го сака – вистинска смеа. Додека културната сцена често се жали на недостаток на млади луѓе, овој пример од Славонски Брод покажува колку е важно да се инвестира во аматерски театри. Тука се младите луѓе кои избираат глума, креативност и соработка и се вистинска реткост, но и капитал на заедницата во кој треба да се инвестира.

Инаку, овој театар постои од 2006 година, добитници се на многубројни награди во Хрватска, но и на фестивали надвор од неа. Сатиричниот театар со право може да каже дека со своите претстави, културното значење и просторот што го отвора за младите и љубителите на театарот е еден од столбовите на општествениот живот на градот Славонски Брод.

Претставата после Битола беше изведена во Ресен.

По поразот во минатото коло од КК Тиквеш на домашен терен, младите кошаркари на прилепски Мега баскет брзо се освестија и денеска приредија големо изненадување. Совладана е екипата на Пелистер, и тоа на гости.

Крајниот резултат на семафорот 58-65, што докажува дека кога се остава срце на терен, ниту парите не можат ништо. Доказ за тоа е што, младиот прилепски тим доби скромни средства од локалната самоуправа, додека битолчани имаат огромна поддршка од општината.

Дечките ни испратија победничко селфи од соблекувалната во Битола, па нам ни останува да им честитаме и да им посакаме уште многу вакви партии во текот на сезоната.

Пушењето е штетна навика што не го загрозува само здравјето на пушачите, туку и здравјето на луѓето околу нив. Но, одлуката да се престане со пушење не мора да биде тешка и осамена борба. Центарот за јавно здравје Прилеп нуди стручна поддршка за сите што сакаат да направат важен чекор кон поздрав живот – да се откажат од цигарите.

Преку советувалиштето за откажување од пушење, граѓаните можат да добијат информации, совети и поддршка за полесно справување со предизвиците што ги носи процесот на откажување. Услугите се бесплатни, а разговорите со стручни лица можат да помогнат во подготовката, препознавањето на навиките што го поттикнуваат пушењето и пронаоѓањето соодветен пристап за негово надминување.

Не мора да го правите тоа сами. Направете го првиот чекор денес!

Никотинот создава зависност, поради што престанувањето со пушење понекогаш бара време, упорност и соодветна поддршка. Желбата за цигара, нервозата, раздразливоста и промените во расположението се дел од предизвиците со кои може да се соочат луѓето што се обидуваат да се откажат. Сепак, со добра подготовка, јасна одлука и стручна помош, полесно може да се помине низ овој процес.

Првиот чекор може да биде едноставен: одредете датум кога ќе престанете да пушите, препознајте ги ситуациите во кои најчесто посегнувате по цигара, отстранете ги цигарите и запалките од вашата околина и побарајте поддршка од семејството, пријателите или здравствените работници. Доколку се случи да запалите цигара за време на обидот, тоа не значи дека сте неуспешни. Важно е да продолжите со својата одлука и да не се откажувате од намерата да живеете поздраво.

Зошто е важно да се откажете од пушењето?

Со престанувањето со пушење правите значаен чекор за сопственото здравје, но и за здравјето на вашите најблиски. Пасивното пушење ги изложува и непушачите на штетни материи од тутунскиот чад, особено децата и другите чувствителни групи. Затоа, животот без цигари значи и поздрава домашна средина, почист воздух и поголема заштита на луѓето со кои секојдневно го делите просторот.

Важно е да се знае дека ниту електронските цигари, ниту загреаниот тутун, ниту никотинските кесички не се без ризик. Присуството на овошни и слатки ароми не ги прави овие производи безопасни, а никотинот може да предизвика зависност, особено кај младите. Најдобриот избор за оние што не користат тутунски и никотински производи е да не започнуваат.

Одлуката за откажување е лична, но поддршката од околината може да направи голема разлика. Ако некој од вашето семејство или од пријателите се обидува да престане да пуши, покажете разбирање, охрабрувајте го без осудување и помогнете му да истрае. Понекогаш, едноставната порака „Со тебе сум. Кажи ми како можам да ти помогнам“ значи многу.

Центарот за јавно здравје Прилеп ги повикува сите пушачи што размислуваат да се откажат од цигарите да го направат првиот чекор и да побараат стручна поддршка.

Каде да побарате помош?

Услуги: бесплатни.

Дополнителни информации за поддршката при откажување од пушење може да се добијат и преку QR-кодот објавен на информативните материјали на Центарот.

Не чекајте утре за одлука што може да го промени вашето здравје. Откажувањето од пушење е инвестиција во сопствениот живот, во здравјето на вашето семејство и во почиста и поздрава средина за сите. Побарајте помош, направете го првиот чекор и дајте си шанса за живот без цигари.

Кога ќе се спомене Александар Здравков, многумина во Прилеп го препознаваат по гитарата, вокалот и настапите со кои знае да создаде атмосфера во која публиката не останува рамнодушна. Но, музичката приказна на овој прилепски музичар денес има уште една важна страна, а тоа е работата со младите и создавањето на нови музички таленти преку неговото приватно музичко училиште Gitarino.

Александар е музичар кој иако многу млад, со години е присутен на прилепската музичка сцена. Неговата љубов кон музиката започнува уште од најмлади години, а со текот на времето гитарата и пеењето стануваат не само негов талент, туку и професионален пат.

Низ годините настапувал самостојно, но и во музички состави, а неговиот репертоар и пристап кон публиката му овозможуваат да биде дел од различни видови настани и атмосфери. Неговиот музички пат вклучува и настапи и проекти надвор од локалната сцена, како и учество во „Ѕвездите на Гранд“, а во текот на годините работел и на сопствена музика.

Денес, покрај настапите, Александар сака уште повеќе да ја развива својата музичка кариера и да биде присутен на местата каде што живата музика е важен дел од атмосферата. За рестораните, кафулињата и локалите кои сакаат својот простор да го збогатат со квалитетен вокално-инструментален настап, Александар е музичар кој може да понуди токму таква атмосфера, гитара, вокал и репертоар приспособен на публиката и карактерот на настанот.

Неговата љубов кон музиката, но и долгогодишното искуство, денес го носат и во една поинаква улога, а тоа е улогата на ментор.

Gitarino – место каде што децата ја откриваат љубовта кон музиката

Пред две години Александар го основа Gitarino, приватно музичко училиште во Прилеп кое постепено прераснува во место каде што младите имаат можност да го развиваат својот музички талент.

Училиштето започнало со неколку ученици и настава по гитара, пијано и соло пеење, а со текот на времето понудата се проширила и со бас-гитара, музичка теорија и солфеж.

Во Gitarino можат да се запишат деца од 6 години па нагоре, а наставата моментално се одвива индивидуално. Токму индивидуалниот пристап е една од главните карактеристики на училиштето, бидејќи секое дете има различни способности, интереси и начин на учење.

Целта не е само ученикот да научи да свири инструмент, туку да ја разбере музиката и постепено да изгради сопствен однос кон неа.

Часовите траат 40 минути, а покрај техничките вежби, голем дел од времето е посветен на практично свирење. Теоријата и техниката се применуваат преку песни, со што учениците уште од почеток можат да почувствуваат дека она што го учат има практична вредност.

За Александар, најважно е децата да не го доживуваат музичкото образование како обврска.

Gitarino треба да биде место каде што со задоволство ќе доаѓаат, ќе учат, ќе се развиваат и ќе ја градат својата љубов кон музиката.

Токму затоа, покрај техниката, во работата со учениците се става акцент и на креативноста, дисциплината, трпението и самодовербата.

Следната цел – уште повеќе музика и нови можности

Александар не сака Gitarino да застане тука. Плановите се училиштето да продолжи да расте, да добива нови ученици и постепено да воведува и други музички инструменти кои не се толку често застапени во понудата на музичките училишта.

Една од желбите за иднината е учениците да добијат можност и јавно да го покажат она што го научиле преку организирани настапи.

Но, паралелно со развојот на Gitarino, Александар продолжува да ја гради и сопствената музичка приказна.

За него, искуството е еден од најважните учители. Токму тоа искуство сака да им го пренесе на младите музичари – не само како правилно да се свири одреден инструмент, туку како да се развиваат, да работат на себе и да ја претворат љубовта кон музиката во нешто што ќе остане дел од нивниот живот.

А неговата порака е едноставна: “Tалентот е важен, но без работа и истрајност не е доволен”.

Можеби токму затоа неговата приказна денес се движи во две насоки кои природно се надополнуваат: од една страна сцената, настапите и средбата со публиката, а од друга страна работата со најмладите и создавањето на нови генерации музичари.

За сите оние кои бараат музичар за својот ресторан, кафуле, приватна прослава или друг настан, Александар Здравков останува достапен за нови музички ангажмани.

А за најмладите кои сакаат да научат да свират, пеат и да го запознаат светот на музиката, неговата приказна продолжува преку Gitarino.

Две љубови, една иста приказна – музиката како професија, но и како начин на живот.

Foto/Vitaliy Bunechko/Facebook

Компанијата „Кромберг и Шуберт Украина“, производител на автомобилски кабелски инсталации со германски инвестиции, официјално ги прекина оперативните активности по руските воздушни напади врз нејзините производствени капацитети, соопшти компанијата во саботата.

„Работата на компанијата е прекината! Наш апсолутен приоритет се безбедноста, животот и здравјето на секој вработен. Во моментов ја проценуваме ситуацијата и ги координираме сите понатамошни чекори“, се наведува во официјалното соопштение.

Раководството на компанијата изрази благодарност до Државната служба за вонредни состојби на Украина и до екипите за итни интервенции за нивната брза реакција и преземените мерки за заштита на локацијата.

Кромберг и Шуберт има производствен капацитет и во Битола, каде што компанијата е значаен работодавач. Минатата недела беше најавено проширување на производството со изработка на автомобилски делови за „Ауди“, како и отворање на нови 2.000 работни места.