Врие од кучиња скитници на новите градски гробишта во Прилеп, се жалат прилепчани на социјалните мрежи, кои изминатиот викенд ги посетиле вечните почивалишта на своите најблиски.

Граѓаните велат дека често на гробните места наоѓаат кучешки измет, а кучињата се хранат и со она што се остава на гробовите.

Сликата велат е иста при секоја посета, само бројката на кучиња постојано се зголемува….

Животните се невини суштества, но крајно време е проблемот со бездомните животни системски да се решава…

Жителите на прилепското Кадино Село веќе три до четири месеци се соочуваат со сериозен проблем, немаат редовно и нормално водоснабдување. Во 21 век, кога пристапот до вода е едно од основните човекови права и предуслов за нормален живот, жителите секојдневно се принудени да се снаоѓаат без најосновниот ресурс.

Недостигот на вода не е само непријатност, тој директно влијае врз секојдневниот живот на семејствата. Без вода е невозможно нормално да се одржува лична и домашна хигиена, да се подготвува храна, да се грижи за децата, постарите лица и болните. Во екот на летните горештини, кога потребата од вода е најголема, состојбата станува уште потешка и дополнително го отежнува животот на жителите.

И покрај бројните реакции, поплаки и барања упатени од мештаните, проблемот сè уште нема трајно решение. Разочарувачки е што по неколку месеци граѓаните сè уште чекаат конкретни чекори, додека неизвесноста продолжува.

Затоа, жителите јавно апелираат до Општина Прилеп и ЈКП „Водовод и канализација“ – Прилеп што е можно поскоро да излезат на терен, да ја утврдат причината за проблемот и да преземат конкретни мерки за негово целосно решавање. Жителите очекуваат навремена информација за тоа што се презема и кога може да се очекува нормализирање на водоснабдувањето.

Кадино Село не смее да биде заборавено. Секое населено место заслужува еднаков пристап до основните комунални услуги, а водата не е привилегија или луксуз – таа е неопходна за достоинствен живот.

Овој апел е повик до надлежните институции да покажат одговорност и со конкретни активности да го решат проблемот што ги погодува жителите на Кадино Село веќе со месеци.

Општина Прилеп ги известува граѓаните дека водата од мерно место:
Локален водоснабдителен систем – Ореовец – јавна чешма сред село, не е здравствено исправна заради наод на бактерии од цревно потекло, како и зголемен број колонии бактерии на 37 степени, и не смее да се користи за пиење без претходно вриење од 10 минути.

Неопходно е соодветно техничко решение за објектот со можност за редовна дезинфекција на водата.

Село Леништа – јавна чешма сред село – водата не е здрвствено исправна, заради наод на бактерии од цревно потекло, како и зголемен број на колонии бактерии на 22 и 37 степени, и не смее да се користи за пиење. Неопходно е соодветно техничко решение за објектот со можност за редовна дезинфекција на водата.

Вечерва свечено беше отворен 56-от Републички фестивал на народни игри и песни „Илинденски денови“ во Битола. Како увертира на свеченото отворање се одржа највпечатливиот настан на овој фестивал фолклорното дефиле-со песна и игра низ битолските улици.

Стотици учесници од земјата и светот продефилираа низ Широк Сокак, носејќи ја убавината на фолклорот, музиката и културното наследство. На фестивалската сцена во преубавиот амбиент на платото пред Офицерскиот дом, КУД „Илинден“ од Битола ја изведе Комитската легенда со што започнаа фестивалските вечери.

Пред присутните се обрати директорот на Центарот за култура Сашо Илковски, кој рече дека повеќе од половина век „Илинденски денови“ е местото каде што традицијата не е спомен од минатото, туку таа е жива вредност, вредност што се пее, се игра, се раскажува и се пренесува од генерација на генерација.

Во своето обраќање градоначалникот на Битола Тони Кoњановски рече дека веќе две недели Битола живее во ритамот на фолклорот, традицијата, играта, песната, филмот, едукацијата. Градот и организаторот на фестивалот ги пречекаа гостите од земјава и светот на најдолгите „Илинденски денови“, фестивал кој со право годинава го има мотото,
односно темата „Точка на поврзување“.

„Дозволете ми на организаторите да им честитам за нивниот труд и напори да направат одлично издание на фестивалот. Исто така ме радува визуелниот идентитет на 56-то издание, каде фокусот е македонската народна носија, интернационалната носија и глуварчето како централен симбол. Како што беше кажано неговите семиња, кои патуваат со ветерот, ја симболизираат идејата за движење, размена и поврзување, исто како што и овој фестивал ги поврзува културите, традициите и луѓето од сите страни на светот. Вкупно 77 настани со преку 1300 учесници во претпрограмата и официјалната програма со петте фестивалски вечери, како и 7 концерти на македонски уметници. Со ова Битола повторно станува центар на домашниот и светскиот фолклор, простор за дијалог меѓу културите, за научната мисла, креативноста и негување на традицијата која го добива своето заслужено место и е водилка на овој фестивал,
промотор на македонската традиција“ рече градоначалникот Коњановски.

Фестивалот за отворен го прогласи попретседателката на Собранието на Македонија Весна Бендевска која рече дека Битола пред светот ќе го промовира автентичниот, автохтон македонски фолклор, со звуците на зурлите и тапаните, кавалите и гајдите, во единствениот седумосмински такт кој е оригинална македонска особеност, презентирајќи ги
македонските неповторливи ора.

И годинава „Илинденските денови“ имаат богата фестивалска програма со настап на 34 фолклорни групи и ансамбли од Македонија, САД, Венецуела, Порторико, Кина, Грузија, Холандија, Унгарија, Словачка, Грција и Шведска.

18 фестивалски денови на 56-то издание на Републичкиот, но и интернационален фестивал на народни игри и песни „Илинденски денови“, исполнети со богата уметничка, научна и едукативна програма, го прават најдолгото издание во својата историја.

Во Битола продолжуваат активностите за подобрување на спортската инфраструктура во основните училишта. Градоначалникот Тони Коњановски денеска изврши увид во градежните работи на спортските терени во основните училишта „Гоце Делчев“ и „Даме Груев“, каде проектите се реализираат со забрзана динамика.

Во ОУ „Гоце Делчев“ во тек е асфалтирање на површина од 2.700 квадратни метри, по што ќе следува поставување на современа тартан подлога на двата спортски терени.

Проектот предвидува изградба на две повеќенаменски игралишта – едното наменето за мал фудбал и ракомет, а другото за кошарка. Покрај спортските терени, ќе бидат поставени и ограда, современо осветлување, спортски реквизити и урбана опрема, со што учениците ќе добијат безбедни и современи услови за спорт и рекреација.

Вредноста на инвестицијата изнесува 14.280.422 денари.

Градоначалникот Коњановски изврши увид и во работите во ОУ „Даме Груев“, каде асфалтирањето е веќе завршено, а во наредниот период ќе продолжат активностите за комплетно уредување на спортските терени и просторот околу нив.

Со реализацијата на овие проекти, Општина Битола продолжува да инвестира во подобрување на условите за образование, спорт и здрав развој на младите, создавајќи современи и функционални училишни спортски комплекси.

Проектот „Од 0 до КултурА“ продолжува да носи квалитетни културни содржини во Прилеп, а овој пат на сцената ќе се искачи еден од најавтентичните и најкултни македонски алтернативни бендови – „Паркети“ од Битола.

Концертот ќе се одржи во четврток, 30 јули, со почеток во 21:00 часот, на Камената бина во центарот на Прилеп, каде љубителите на добрата музика ќе имаат можност повторно да ги слушнат безвременските хитови на бендот што остави силен белег на македонската алтернативна сцена.

„Ќе направам бал, ќе те поканам тебе… ти нема да дојдеш, а месечината свети…“ – стихови кои и денес ги пеат генерации љубители на македонскиот рок и панк, а токму тие ќе одекнат и во срцето на Прилеп.

„Паркети“ се формирани кон крајот на осумдесеттите години во Битола, во период кога домашната алтернативна сцена почнуваше да го гради својот препознатлив идентитет. Иако се појавија по првиот голем панк-бран, бендот успеа да создаде оригинален музички израз и препознатлив стил кој и денес е лесно препознатлив.

Нивните песни се карактеризираат со необични, духовити и често апстрактни текстови, но и со искрени љубовни теми кои со години останаа омилени кај публиката. Во својата богата дискографија ги имаат албумите „Гриза на совеста“ (1996) и „Газирана хармонија“ (1998), а зад себе оставија десетици песни кои станаа дел од македонската музичка историја.

Публиката ќе има можност да ужива во добро познатите композиции како „Топка“, „Најмногу на целиот свет“, „Мала пролет“, „Барбара“, „На месечината те заборавив“, „Портокалови“, „Оси“, „Муви“, „Едно млеко и едно кафе“, како и многу други песни кои со години имаат култен статус.

Концертот на „Паркети“ е уште една можност прилепската публика да биде дел од проектот „Од 0 до КултурА“, кој преку музика, театар и различни културни настани создава нова енергија и го збогатува културниот живот во градот.

Доколку сте љубител на добрата домашна алтернативна музика, ова е вечер што не треба да ја пропуштите.

15 години секој детски сон станува јаве.

Во традиционалниот термин од 3 до 7 август, Битола ќе биде центарот на театарот за деца во земјава и пошироко. Јубилејното 15. издание на Интернационалниот детски театарски фестивал „Битолино“ ќе се одржува на пет сцени во НУ Центар за култура – Битола и НУ Народен театар – Битола.

Во официјалната фестивалска програма од натпреварувачки карактер учествуваат седум театри од седум земји: Литванија, Романија, Словенија, Турција, Баскија, Србија и Црна Гора.

Најдобрата претстава ќе го добие фестивалското Гранд-при за најдобра претстава во целина, кое ќе го додели тричлено стручно жири, оваа година предводено од хрватскиот актер и режисер Ивица Шимиќ. Тој е основач на хрватскиот театар „Мала сцена“ од Загреб и поранешен генерален секретар на ASSITEJ – светската организација на детски театри.

Заедно со Шимиќ, за наградата ќе одлучуваат македонските театарски првенци: Ана Левајковиќ – Бошков, која минатата година одбележа 30 години на сцената на Театарот за деца и младинци во Скопје, и Петар Горко, кој во 2024 година одбележа 35 години кариера на сцената на Битолскиот театар.

„Годинава, интересот за учество беше исклучителен – пристигнаа повеќе од 70 пријави од театри од над 30 земји ширум светот. Од нив селектиравме разновидна и висококвалитетна театарска продукција од седум држави, која на публиката ќе ѝ понуди богато и инспиративно фестивалско искуство.

Од Литванија ни доаѓа сензорна претстава наменета за најмладата публика, од Романија пристигнува сценска интерпретација на легендарната приказна за Дракула. Претставата од Црна Гора на креативен и топол начин зборува за тоа како да се соочиме со тремата.

Во програмата се вклучени и куклена претстава со автентична баскиска музика, како и емотивна приказна за „изумрените предмети“ на нашите родители. Театарот од Турција ќе им помогне на децата да ги препознаат и разберат своите чувства, додека словенечките гости ќе нè потсетат на безвременската вредност на другарството“, вели директорот на фестивалот Филип Етмишовски.

Фестивалот ќе го отвори, на 3 август, Театарската школа „Бабец“ со претставата „Како се станува цар“, а ќе се затвори на 7 август со новата премиера на Бабец театар – „Мајка (Magna Mater)“.

Во придружната програма, на 4 август, ќе настапи училиштето за театар „Од игра до претстава“ од Скопје, а на 5 и 6 август децата во Битола за првпат ќе гледаат јапонски Камишибаи претстави, и тоа вкупно шест.

„Битолино“ и ова фестивалско издание, покрај претставите, нуди и едукативна програма. Професорката Јованка Улиќ од Нови Сад, Србија, три дена заедно со децата ќе подготвува јапонски Камишибаи претстави. Најмалите битолчани ќе ги цртаат и пишуваат своите претстави, кои ќе бидат изведени пред доделувањето на фестивалското Гранд-при.

Јубилејното издание ќе понуди врвна уметничка програма за деца и ќе отвори важни теми за најмладите, со што „Битолино“ ја потврдува својата позиција како еден од најзначајните фестивали за детски театар во регионот.

Случајот со Крушево не треба воопшто да се споредува со тоа што се случи со водоводниот систем во Гостивар, бидејќи таму имаше прекин во електричната енергија на еден час, по што состојбата се стабилизирала и во тој град нема граѓани, кои се жалат за здравствени проблеми, изјави денеска директорот на Дирекцијата за заштита и спасување, Стојанче Ангелов, кој е и раководител на Главниот штаб за управување со кризи.

Тој на прес-конференцијата во Центарот за управување со кризи во Скопје, посветена на состојбите со гостиварскиот водовод, одговарајќи на прашање за состојбата со водата во Крушево нагласи дека веднаш по информацијата дека и водата во крушевскиот водовод не е исправна, разговарал со крушевскиот градоначалник.

Притоа бил информиран дека, поради прекин на електричната енергија, околу еден час не работел уредот за хлорирање на водата.

-Затоа случајот во Крушево ни оддалеку не е сличен на она што се случуваше во Гостивар. Веднаш по тој еден час, тој уред што внесува хлор во градскиот водовод продолжил со работа и очекувам состојбата таму веќе да биде целосно стабилизирана. Сепак, повеќе информации треба да се побараат од локалната самоуправа. Повторувам, немаме појава на луѓе што се жалат на здравствени симптоми и воопшто не треба да се споредуваат овие два случаја – истакна Ангелов.

Регулаторната комисија за енергетика (РКЕ) донесе одлука за зголемување на малопродажните цени на нафтените деривати во просек за 4,55 проценти, така што од полноќ бензините ќе поскапат за три денари по литар, дизелот за 4,5 денари, а екстра лесното масло за домаќинство за пет денари по литар.

Според одлуката на РКЕ, од 28 јули во 00:01 часот, максималната цена на бензинот ЕУРОСУПЕР БС-95 ќе изнесува 93 денари за литар, додека ЕУРОСУПЕР БС-98 ќе се продава по 95 денари за литар.

Цената на ЕУРОДИЗЕЛ БС (Д-Е V) се зголемува на 98,50 денари за литар, а на екстра лесното масло за домаќинство (ЕЛ-1) на 98 денари за литар.

РКЕ ја зголеми и цената на мазутот М-1 НС за 2,726 денари за килограм, со што новата максимална цена ќе изнесува 48,099 денари за килограм.

Како причина за корекцијата на цените, од РКЕ посочуваат дека референтните цени на светските пазари бележат раст. Во однос на претходната пресметка, цените на бензините се повисоки за 6,229 проценти, на дизелот за 7,442 проценти, на екстра лесното масло за 8,051 процент, а на мазутот за 8,159 проценти.

Во соопштението се наведува дека курсот на денарот во однос на американскиот долар во периодот на пресметка бил понизок за 0,0397 проценти.

Од РКЕ нагласуваат дека станува збор за максимално утврдени цени и дека трговците на големо и мало можат да ги формираат цените на нафтените деривати и на пониско ниво од утврдените највисоки цени.

Министерството за внатрешни работи од август ќе започне со примена на брзи тестови за откривање присуство на наркотични средства кај возачите за време на сообраќајните контроли.

Според информациите објавени во медиумите, полициските службеници на терен ќе можат веднаш да направат проверка кај возачи кај кои ќе има сомнеж дека управуваат под дејство на дрога. Со земање брис од плунка, резултатот ќе биде достапен за три до десет минути.

МВР веќе набавило првична количина од 10.000 тестови, кои се очекува да пристигнат во почетокот на август. Еден тест чини 218 денари, а набавката е дел од двегодишна рамковна спогодба со максимална вредност до 80.000 евра.

Тестовите, според објавените податоци, имаат точност од 99 проценти и можат да ги користат полициски службеници без посебно медицинско знаење.

Со еден примерок од плунка ќе може да се провери присуство на седум видови психоактивни супстанции, меѓу кои кокаин, амфетамин, метамфетамин, опијати (морфин и хероин), екстази, седативи и ТХЦ – активната состојка на марихуаната.

Со новата мерка, полицијата ќе може побрзо да утврди дали возачите се под дејство на дрога, уште на самото место на контролата, без долго чекање за првични резултати.