Вистинска драма денеска се одвивала на плажата во Олимпијада, Грција, откако силните бранови однеле тричлено семејство од Бугарија.
Во моментите кога ситуацијата станала критична, а жената панично повикувала за помош, без да размислува за сопствената безбедност, во разбрануваното море влегол битолчанецот Михаил Николовски.
Според сведоштвото на неговото семејство, Михаил најпрво успеал да ја извлече жената, потоа детето, а на крајот и таткото. Со огромна храброст и пожртвуваност, тој успеал да го спаси целото тричлено семејство.
По спасувањето, присутните на плажата го поздравиле Михаил со силен аплауз, во знак на благодарност и восхит за неговата храброст.
Особено силна е симболиката што овој хуман и храбар чин се случил токму на 8 Септември – Денот на независноста на Македонија.
Затоа што човечноста не познава граници, националност или јазик.
Битола денес може да биде горда на својот сограѓанин Михаил Николовски – човек кој во најкритичниот момент не се двоумел да помогне и со својата храброст покажал дека понекогаш еден човек може да направи огромна разлика.
И понатаму се уништува зеленилото во Прилеп, овојпат кај новата автобуска станица, целосно се уништени крошните на две дрвца. Граѓаните упорно реагираат на секоја ваква појава на социјалните мрежи, а за најновите уништени дрвца не е познато дали се “кастрени” од надлежните, или некој самоиницијативно одлучил да ги осакати….
Во Охрид денеска ќе биде пуштен во употреба реконструираниот дел на Охридскиот аеродром.
На отворањето ќе присуствуваат Серкан Каптан, извршен директор на ТАВ Аеродроми, премиерот Христијан Мицкоски и вицепремиерот и министер за транспорт Александар Николоски.
Реконструкцијата опфати проширување на патничкиот терминал за 30 до 40 проценти, проширување на капацитетот на шалтерите за патници и багаж за 100 метри квадратни, проширување на зоната за безбедносна контрола на патници и багаж, проширување на административната зграда од 290 м2 на 700 м2, нов ресторан-кафетерија за вработените, нови канцеларии за Граничната полиција, Царинската управа и паркинг за вработените.
На 8 септември 1991 година, граѓаните на Македонија на историскиот референдум со убедливо „за“ ја потврдија волјата за суверена и самостојна држава. Референдумското изјаснување претставуваше пресвртница со која започна процесот на создавање независна македонска држава и воспоставување сопствени институции, дипломатска мрежа, безбедносен систем и економски политики.
Три и пол децении подоцна, 35 години независност сведочат за долг и турбулентен пат исполнет со политички пресврти, безбедносни предизвици, тешки компромиси и борба за меѓународна афирмација. Од мирното осамостојување и членството во Обединетите нации, преку конфликтот во 2001 година и Преспанскиот договор, до членството во НАТО, историјата на независната држава е приказна за градење институции, зачувување на стабилноста и остварување на стратешките цели.
Повеќе активности се предвидени денеска за одбележување на 35-годишнината од осамостојувањето.
Претседателката Гордана Сиљановска-Давкова во 8:30 ќе положи цвеќе на вечното почивалиште на првиот претседател на Република Македонија, Киро Глигоров, на вечното почивалиште на претседателот Борис Трајковски и на вечното почивалиште на првиот претседател на Владата, Никола Кљусев. Предвидено е цвеќе да положат и делегации на Собранието, Владата, Генералштабот на Армијата, верските заедници, како и претставници на институции, дипломатскиот кор и на политичките партии.
Во 11:00 часот во Вила Водно ќе се одржи церемонија на доделување Орден „8 Септември“, на која претседателката Сиљановска Давкова ќе им додели ордени на Јордан Плевнеш и Раде Сиљан и постхумно на Џеват Гега, Мето Јовановски и Глигор Чемерски.
Премиерот Христијан Мицкоски по повод одбележувањето на 35-годишнината од независноста ќе биде домаќин и ќе има свое обраќање на свеченоста под мотото „Силно светнал ден!“. Свеченоста ќе се одржи на платото пред Владата со почеток во 14:00 часот.
Националниот археолошки музеј – Скопје организира свечен музејски настан „35 години – 35 предмети – 35 приказни“ по повод 35 години независност.
-Преку 35 внимателно одбрани предмети и нивните приказни, заедно ќе се потсетиме на богатото културно и историско наследство што сведочи за илјадници години историја на овие простори – стои во најавата за настанот, кој ќе се одржи во 15:00 часот во Националниот археолошки музеј – Скопје.
Концертот на светски познатиот диџеј и продуцент на хаус-музика Давид Гета што ќе се одржи вечерва во Скопје е финале на сите настани во рамки на манфестацијата „35 години незавосност на Македонија“, исполента со повеќе активностите и културните манифестации под мотото за 35 години независност во периодот од август до септември низ повеќе општини во државата, вклучувајќи го спектаклот „Силно светнал ден“ и ликовни колони.
Концертот на Давид Гета ќе се одржи на Националната арена „Тоше Проески“ во Скопје. Според најавите, Гета ќе настапи со продукцијата The Monolith Stadium Show.
Во рамки на прославата за 35 години независност на Македонија, на 1 септември во Скопје концерт одржа и светски познатиот тенор Хосе Карерас заедно со македонски музички ѕвезди и Македонската филхармонија, а на 4 септември се одржа мултимедијалниот сценски спектакл „Силно светнал ден“, кој го заокружи своето патување во државата со настап на повеќе од 120 артисти. Карванот „Силно светнал ден“ почна од Охрид на 9 август и посети 12 града во земјата. Во неговата реализација учествуваа познати македонски музички изведувачи и актери.
Музичката програма во чест на 35 години независност на Македонија е подготвена од „Авалон продукција“ во соработка со Владата.
Универзитетот „Св. Климент Охридски“-Битола во вториот уписен рок кој почнува на 9 септември ќе може да запише 1288 бруцоши, од нив 523 редовни, 424 студенти со партиципација во студирањето и 341 кандидат кои ќе се определат за категоријата вонредно студирање.
Најмногу слободни места има на Техничкиот факултет каде се огласени 269 места за сите насоки, а најмалку за насоките мехатроника и инженерство за заштита на животната и работната средина, каде во првиот уписен рок беше евидентиран забележителен интерес за студирање.
Втор уписен рок ќе биде организиран во сите универзитетски единици со седиште во Битола.
Од УКЛО, воедно, потврдуваат дека на Факултетот за информатички комуникациски технологии ФИКТ слободни се 174 места, на Педагошки факултет 190, на Факултетот за биотехнички науки слободни се 66 и на Ветеринарен факултет има најмалку слободни места, вкупно 15.
На 9, 10 и 11 септември втор уписен рок ќе се реализира и на факултетите, членки на УКЛО, лоцирани во Скопје, Кичево, Велес, Прилеп и во Охрид. На Факултетот за безбедност во Скопје слободни се уште 66 места, на Правен факултет во Кичево 59, Технолошко-технички факултет во Велес 92, Економски факултет во Прилеп 121 и на Факултетот за туризам и угостителство во Охрид може да се запишат уште 148 студенти во сите категории за студирање.
Втор уписен рок ќе биде организиран и на Високата медицинска школа во Битола каде има уште 88 индекси за студенти кои во новата академска година ќе студираат на прв циклус студии.
Традицијата, домашните вкусови, локалните производители и приказните на руралните жени, ќе се сретнат во срцето на Прилеп, кај Градскиот Саат.
На 12 септември, платото кај Градскиот Саат во Прилеп ќе се претвори во вистинска мала ризница на домашни вкусови, традиција и производи од цела Македонија. Станува збор за традиционалниот настан „МЛЕКО 2026“, во организација на “Slow Food”, кој се одржува по осми пат, а по петти пат Прилеп е домаќин на истиот.
Оваа година настанот се одржува под мотото „Корени и трпеза – Руралната жена денес“, ставајќи го во центарот вниманието на жената од руралните средини, нејзиниот труд, знаење и огромниот придонес во зачувувањето на традиционалното производство и домашната храна.
Руралната жена е еден од столбовите на животот на село. Таа е дел од секојдневната грижа за семејството, но и активен учесник во земјоделството, сточарството и производството на храна. Со своите раце и знаење таа ги зачувува старите рецепти, традиционалните начини на производство и вредностите кои со генерации се пренесуваат од едно на друго поколение.
Нејзината приказна е приказна за работа, истрајност, љубов кон земјата и почит кон традицијата, но и за современата жена која денес се обидува да создаде егзистенција, да го развива семејниот бизнис и да придонесува за локалната економија.
Од утро па сè до попладневните часови (10-16ч), платото кај Градскиот Саат ќе биде исполнето со мириси, вкусови и приказни.
На „МЛЕКО 2026“ ќе бидат присутни голем број изложувачи на органски и традиционални производи од цела Македонија, производители на млечни производи, мед и пчелни производи, вино, месо и месни производи, природна козметика, како и рачно изработени занаетчиски производи.
Посетителите ќе имаат можност да поразговараат со производители на млеко и млечни производи од цела Македонија. Ќе се дегустираат различни сирења и млечни специјалитети, подготвени од домашни производители. Ќе се претстават и бројни локални производи кои совршено се надополнуваат со млечните специјалитети.
Но, покрај вкусовите, посетителите ќе имаат можност да ги слушнат и вистинските приказни за животот во руралните средини, за предизвиците и радостите на сточарството и за луѓето кои секојдневно се борат да ја зачуваат традицијата и да создадат иднина од неа.
„МЛЕКО“ веќе е препознатливо како настан кој ги спојува вкусовите, приказните, традицијата и музиката, создавајќи атмосфера во која посетителите не се само публика, туку дел од целата приказна.
Во изминатите години, платото пред Саат кулата беше исполнето со стотици прилепчани кои доаѓаа да дегустираат, да се дружат, да уживаат во убавото време и староградската песна, но и да си понесат нешто од богатата понуда на домашните производители.
И оваа година пораката е едноставна: “Да ги чуваме корените. Да ја почитуваме трпезата. Да го вреднуваме трудот на руралната жена. И да ја поддржиме иднината на нашето сточарство и домашно производство”.
Во сабота (12.09.) дојдете кај Градскиот Саат и верувајте ќе има што да видите, пробате, почувствувате!
Околу 40 инспекциски тимови од 25 август наваму ги контролираат цените на училишниот прибор, кои со одлуката на Владата до 30 септември треба да бидат намалени за 10, односно 15 проценти од цените што важеле на 1 јуни, како дел од т.н. „училишна кошничка“. Досега не се констатирани некои посериозни отстапувања кај исконтролираните пунктови, чиј вкупен број изнесува 600, уверува заменик-министерот за економија и труд, Марјан Ристески.
„Редовно сме во дослух со Државниот пазарен инспекторат и, од она што го имаме како информација од директорот на ДПИ, укажува на тоа дека контроли се направени скоро насекаде, во сите пунктови каде што се продава училишен прибор. Не се пронајдени некои поголеми пропусти, освен што на почетокот со воблерите. Меѓутоа, после укажувањата и опомената, се исправени тие грешки, така што нема да оставиме простор да се изигрува оваа одлука… Онаму каде што ќе бидат пронајдени одредени пропусти, тогаш ќе следуваат и соодветни казни од страна на ДПИ“, изјави Марјан Ристески, заменик-министер за економија и труд.
Ваквите владини одлуки за заштита на стандардот на граѓаните, особено во овие есенски месеци кога и семејните трошоци се значително поголеми, позитивно се рефлектираат и врз инфлацијата во земјава.
„Со квартален раст на БДП од 4,3 проценти, кој е четврти по висина во Европа. Исто така, со ниска инфлација од 2,3 проценти, измерена во текот на минатиот месец во однос на јули од претходната година, со пораст на индустриското производство, со многу капитални инвестиции, со 18.000 нови отворени работни места во Македонија и со голем број други показатели… Македонија покажува и докажува дека оваа Влада има капацитет да се справува со вакви светски економски кризи и колку може повеќе да го штити животниот стандард и кревката економија во Македонија“, посочува Ристески.
Училишната кошничка е само еден мал дел во заштитата на животниот стандард. А одличните други параметри што ги имаме како држава во овој тежок период на светска економска и енергетска криза укажуваат на една исправна економска политика од страна на Владата на Р. Македонија, потенцира Ристески.
Вратите на градскиот стадион во Скопје утре ќе бидат отворени во 17 часот за концерот на Дејвид Гета по повод 35 незавиност на Македонија.
Претставници од Министерството за внатрешни работи Авалон продукција денеска на прес-конференција апелираа до граѓаните да пристигнат навремено, да ги почитуваат насоките од полициските службеници.
-Безбедноста на сите присутни граѓани и самото непречено одвивање на настанот и одржувањето на поволен ред и мир се приоритет на МВР. Мерките се насочени кон превенцијата, односно создавање на услови за посетителите безбедно да пристигнат на самиот настан, да приссуствуваат на самиот настан и безбедно да се вратат во своите домови. Апелираме сите присустни да ги почитуваат насоките дадени од полициските службеници како и од редарската служба од агенциите за приватно обезбедување, изјави Билјана Сарагинова, началник на униформирана полиција при МВР.
Граѓаните кои ќе присуствуваат на утрешниот концерт да дојдат навремено и со себе да не носат предмети кои се забранети за внесување на вакви настани:
Од МВР апелираат да не се носат големи ранци или торби, бидејќи истите ќе бидат отстранети.
СВР Скопје за утрешниот концерт на Дејвид Гета има посебен план за физичко и сообраќајно обезбедување за музичкиот настан.
-Посебен режим на сообраќај ќе има кај приодите до арената „Тодор Проески“, на дел од булеварот „Илинден“ се со цел граѓаните непречено и навремено да пристигнат на настанот, истакна помошник началникот за општа безбедност при МВР, Љупчо Ѓурчевски.
Бобан Милошевски од Авалон продукција се надева дека без било какви проблеми ќе помине утрешниот настан како и сите претходни во рамки на одбележувањето на 35 години независност на Македонија.
Во однос на замената на картите за Дејвид Гета со алки, Милошевски вели дека тоа е неопходно бидејќи ако картите се чекираат ќе трае предолго.
-Замената на картите со алките треба да се сфати како една неминовност, за одржување на концертот во интерес на времето, појасни Милошевски.
Со концерот на Дејвид Гета на Градскиот стадион во Скопје се заокружува едномесечното одблежување на 35 години независност на Македонија.
Љубителите на театарот во Прилеп во четврток, 10 септември, ќе имаат можност да ја проследат претставата „Црнила“ од Коле Чашуле, во режија на Дејан Пројковски.
Претставата ќе се одигра со почеток во 20:00 часот на сцената „105“ во НУЦК „Марко Цепенков“ – Прилеп.
„Црнила“ го обработува периодот околу смртта на Ѓорче Петров и состојбите во Внатрешната македонска револуционерна организација (ВМРО), прикажувајќи време на длабоки политички поделби, измешани морални вредности и силни надворешни влијанија кои водат кон атентатот врз Ѓорче Петров.
Во претставата настапуваат Сара Спиркоска во улогата на Неда, Бобан Алексоски како Иван, Катерија Чакмакоска-Клинческа и Марија Спиркоска Илијеска како Милкa, Александар Степанулески како Луков, Александар Тодески како Христов, Димитар Ѓорѓиевски како Фезлиев, Михајло Миленкоски како Методи, Илија Волчески како Младичот, како и Иво Ачански, Ангелина Тодеска, Давид Кочоски и Ива Малинческа во улогите на децата.
Претставата е можност за прилепската публика повторно да се сретне со едно од значајните дела на македонската драматургија, поставено низ режисерскиот потпис на Дејан Пројковски.
„Црнила“ ќе се одигра на 10 септември 2026 година, со почеток во 20:00 часот, на сцена „105“ во НУЦК „Марко Цепенков“.
Битола продолжува со реализација на низа капитални и инфраструктурни проекти, а според градоначалникот Тони Коњановски, во првата година од актуелниот мандат се реализирани и започнати проекти кои носат конкретни и видливи промени во градот и руралните средини.
Коњановски на денешната прес-конференција истакна дека Битола има најголем број одобрени проекти од двата владини повици финансирани преку унгарскиот кредит, односно вкупно 81 проект.
„Битола се гради како никогаш досега, се обновува и развива“, порача Коњановски, посочувајќи дека во изминатиот период се обновени и изградени над 10 километри патна инфраструктура во урбаниот и руралниот дел на општината.
Инвестиции се реализираат и во водоводната и канализациската мрежа, во должина од над три километри, додека во делот на спортската инфраструктура се реконструираат и градат 24 спортски и училишни терени, како и четири типски спортски сали.
Во исто време, според Коњановски, досега се обезбедени 220 нови паркинг-места, дел на простори кои претходно биле узурпирани, а дел како составен дел од новоизградените улици.
Посебен акцент е ставен и на инвестициите во детската заштита. Со адаптацијата и отворањето на градинката „Пчеличка“ обезбеден е простор за згрижување на 76 деца, додека градинката во Нова Битола, која треба да започне со работа до крајот на годината, ќе има капацитет за 153 деца. Паралелно се работи и на градинката во комплексот АРМ, со која се очекува дополнително да се намали листата на чекање за 246 деца.
Во образованието, Општина Битола работи на изградба на ново училиште во населбата Буковски Ливади. Проектот е проценет на над 31 милион денари, а училиштето ќе биде целосно опремено за реализација на воспитно-образовниот процес.
Во спортот продолжува и реконструкцијата на Центарот за спорт и рекреативни активности, поранешната боксерска сала. Проектот, поддржан од Владата, е вреден над 40 милиони денари, а по завршувањето Битола треба да добие спортска сала со површина од над 1.000 квадратни метри.
Коњановски најави и целосна реконструкција на Ќумурното игралиште во соработка со Фудбалската федерација на Македонија, како и изградба на нов спортски терен меѓу игралиштето и спортската сала „Боро Чурлевски“.
Во делот на велосипедската инфраструктура, по повеќе од пет километри велопатишта изградени во претходниот мандат, Општина Битола подготвува проекти за дополнителни 2,7 километри велопатеки.
Значајна инвестиција е предвидена и за поранешното кино „Партизан“. За изградба на нов мултинаменски објект се обезбедени 96 милиони денари, а просторот ќе може да се користи за кино и театар, но и за изложби и други мултимедијални настани.
Коњановски посочи дека културниот живот во Битола бележи раст, при што во изминатите 10 месеци на општинските манифестации присуствувале над 100.000 посетители. За културната програма, Општината во 2026 година обезбедува околу 45 милиони денари.
Во социјалната заштита, пак, за 2026 година се предвидени вкупно 14,6 милиони денари. Од нив, 1,5 милиони денари се наменети за поддршка на лицата со ретки болести за патни и други трошоци, а дополнителни средства се обезбедени за рехабилитација и стручна поддршка за лицата со попреченост и децата со попреченост. Предвидени се и 500.000 денари за адаптација на домовите на лица со попреченост.
Како еден од капиталните проекти е издвоена и новата противпожарна зграда во поранешната касарна. За објектот досега се инвестирани над 52 милиони денари, на парцела од 3.300 квадратни метри, со корисна површина од 1.600 квадратни метри. Втората фаза ќе се реализира преку грант од Министерството за одбрана на САД, во вредност од околу еден милион американски долари, со кој објектот треба да биде целосно адаптиран и енергетски ефикасен.
Коњановски истакна и дека со поддршка на Владата продолжува изградбата на булеварскиот влез во Битола, оценувајќи дека градот одамна има потреба од ваква инфраструктура.
Според него, развојот на Битола не треба да се сведува на дневна политика, туку на долгорочна стратегија, проектна документација и работа на терен.
„Решението е во конкретни проекти и многу работа“, порача Коњановски, додавајќи дека пред Битола остануваат уште бројни предизвици поврзани со инфраструктурата, урбанистичкото планирање и повеќегодишното недоволно инвестирање.
Градоначалникот посочи дека Општина Битола продолжува со реализација на проектите со цел создавање поуреден и поквалитетен град за живеење, во период кога градот се подготвува и за одржувањето на фестивалот „Браќа Манаки“ и одбележувањето на 35-годишнината од независноста на Македонија.
Фото/Фејсбук/Бабам Битола / Babam Bitola
