На 54-годишна возраст почина легендата на прилепска Победа и миленик на фудбалските вљубеници од Прилеп, Николче Здравески.

Цела плеада на спортски работници, негови соиграчи во најблескавите години на Победа, роднини и пријатели се простуваат од голгетерот на црвено-белите чиј темперамент, спортски дух и борбеност за секогаш ќе се паметат.

Здравески беше дел од легендарниот состав на Победа кој играше против Перуџа во 1999, а година подоцна и против ѕвездената екипа на Парма.

Со Победа го освои Купот на Македонија во сезоната 2001/02, а беше прогласен најдобар играч и за најдобар спортист на Прилеп за 2004 година, сезона во која црвено-белите ја освоија првата шампионска титула во Македонската Прва лига.

Во сезоната 2006/2007 ја предводеше Победа до втората шампионска титула во лигата и до трето финале во Купот, овојпат како тренер, за што беше прогласен за најдобар тренер во Македонија за таа година.

Здравески живееше за фудбалот и до последниот момент се бореше за фудбалот. Низ неговите раце поминаа голем број талентирани деца, кои преку пренесеното знаење и искуство, со сигурност ќе прераснат во врвни спортисти.

Беше сопруг и татко на две деца.

Нека почива во мир!

На 22 март 2025 година, на Факултетот за информатички науки и компјутерско инженерство (ФИНКИ), се одржа Државниот натпревар по информатика за ученици од средните училишта во Македонија.

Ученикот во трета година oд гимназијата “Мирче Ацев” Прилеп, Благој Рујаноски Стојановски, го освои ПРВОТО МЕСТО.

Ментор на Благој му беше професорката по информатика Анета Стојческа.

Исто така, на 16. и 17. април 2025, на ФИНКИ, се одржа Македонската Олимпијада по Информатика. На Олимпијадата учествуваа 20-те најдобри средношколци информатичари од цела Македонија меѓу кои беше и Благој. Натпреварот се одвиваше во 2 натпреварувачки дена. Првиот ден се состоеше од 3 задачи со дадени 4h за решавање, додека вториот ден повторно 3 задачи со 4.5h време за решавање. Крајниот резултат претставува збир од двата дена.

Со постигнатиот резултат, Благој го освои ЗЛАТНИОТ МЕДАЛ.

Овој успех на Благој му овозможи да влезе во тесниот круг на ученици кои по селекционите натпревари ќе го сочинуваат тимот кој ќе ја претставува Македонија на Балканската и Светската Олимпијада по Информатика.

Со освоени први места на двата натпревари, Благој Рујаноски Стојановски го потврди својот талент и посветеност и претставува голем потенцијал во полето на компјутерските науки.

Благој веќе три години наназад постигнува високи резултати собирајќи ги наградите и медалите на натпреварите по информатика. Му посакуваме успех на престојните натпревари.

СЕКОЈА ЧЕСТ!

Денес, повеќе од кога било, станува сè појасно дека менталното здравје е исто толку важно како и физичкото. Во свет кој постојано се менува, полн со предизвици, стрес и неизвесност, грижата за сопствениот ум и емоции станува неопходна. Оваа кампања има за цел да ја подигне свеста за значењето на менталното здравје, да ги разбие табу темите поврзани со него и да понуди алатки за подобро справување со секојдневниот стрес и емоционални тешкотии. Зашто грижата за себе не е слабост – таа е храброст.Овој месец ќе бидиме присутни во сите средни училишта во град Скопје и заедно со психологот м-р Емилија Бошкоска ќе градиме заеднички мостови со нашите млади.

Професорката м-р Билјана Проеска , проект координатор на Универзитет Скопје, на прашањето која е главната мотивација за отпочнување на ваков важен проект, рече: ,,Главната мотивација за покренување на ваков проект за подигнување свесност за менталното здравје кај младите произлегува од неколку длабоки причини:

1. Растечки проблеми со менталното здравје

Статистиките глобално покажуваат драматично зголемување на анксиозноста, депресијата, самоповредувањето и мислите за самоубиство кај младите. Промените во општеството, притисокот од социјалните медиуми, економската несигурност и глобалните кризи (како климатски промени, пандемии) го влошуваат ова.

2. Недоволна поддршка и едукација

Во многу заедници, особено помали и традиционални, менталното здравје сè уште е табу тема. Младите немаат пристап до информации, психолошка поддршка или безбедни простори каде што можат да зборуваат за своите проблеми без осуда.

3. Превенција на поголеми општествени последици

Нелекуваните проблеми со менталното здравје во младоста водат кон пад во образованието, зависности, семејно насилство, бездомништво, криминал и ран почеток на хронични болести. Вложувањето во менталното здравје на младите денес е вложување во поздрава и постабилна иднина.

4. Охрабрување на самопомош и градење отпорност

Преку ваков проект, младите би учеле како да се справуваат со емоциите, да градат самодоверба, да бараат помош навреме и да развиваат здрави механизми за соочување со стресот.

5. Создавање генерација која ќе ја нормализира грижата за психичкото здравје

Ако младите од рана возраст научат дека менталното здравје е исто важно како и физичкото, тие ќе создадат општество каде грижата за себе и за другите е вредност, а не срам.

Токму затоа, Универзитет Скопје, како докажана општественоодговорна институција, ја започна оваа кампања ,,Гласно за тивките мисли” , бидејќи сите ние заедно сме сигурна иднина !

Во изминатите десетина години, крајбрежјето на Албанија полека прерасна во супер примамлива туристичка дестинација, особено за македонските туристи. Кристално чистата вода на Јадранското и Јонското Море, прифатливите цени, добрата храна, прекрасните плажи и сместувања, направија од нашиот сосед посакувана дестинација за летување.

За Македонците и туристите од регионот и ова лето вистински хит ќе биде скриениот бисер на Јонското Море, секогаш шармантниот Ксамил.

А како да го направите најдобриот избор за таму? Па се разбира во Туристичка агенција “OРБИТА” во Прилеп – вашиот најголем партнер за сите патувања во изминатите 26 години, од каде и за оваа летна сезона ги имаат закупено едни од најдобрите вили во песочниот Ксамил.

Цените за рано резервирање се повеќе од прифатливи и се движат од 89 до 129 евра. Во продолжение ви ги претставуваме овие три прекрасни вили на брегот на Јонското море, па на вас останува само да побрзате и навреме да се одлучите каде ќе уживате во сонцето и белите песочни плажи.

ВИЛА ЛАНДИ на само 200 метри од прекрасната плажа Bora Bora и на околу 100 метри од центарот на Ксамил

Вилата располага со двокреветни, трикреветни, четирикреветни студија и четирикреветни дуплекс апартмани на приземје и на прв спрат, опремени со сопствена кујна, купатило, балкон, клима, WI-FI. Патниците имаат можност за доплата за лежалки на плажата Blue Diamond Beach по цена од 8 евра за две лежалки и чадор на ден.

ВИЛА УЈВАРА на само 200 метри од прекрасната плажа Bora Bora и на околу 100 метри од центарот на Ксамил:

Вилата располага со двокреветни, трокреветни и четирикреветни студиа на спрат, опремени со сопствена кујна, купатило, балкон, клима (вклучена во цената), WI-FI. Вилата поседува и базен кој што можите да го користите и бесплатен паркинг.

ВИЛА АЛЕКС на само 50 метри од прекрасната плажа Bella Vista и на околу 150 метри од центарот на Ксамил

Вилата располага со трокреветни соби на приземје и на прв кат, опремени со сопствена кујна, купатило, балкон, клима, WI-FI.

Ако Ксамил е вашата дестинација за ова лето, наш совет е да не чекате ни миг повеќе, затоа што оние кои уживале во летниот одмор со ОРБИТА во минатите години, веќе букираат сместување и за оваа година.

Не заборавајте дека покрај на албанското крајбрежје, ОРБИТА оваа сезона ве носи и во: ГРЦИЈА, ЦРНА ГОРА, ТУРЦИЈА, ШПАНИЈА, ТУНИС, ЕГИПЕТ и КИПАР.

Посетете ги на ул. “Александар Македонски” бр. 453, веднаш до црквата Св. Благовештение – Стара црква, а за да бидете во тек со сите новости, попусти и изненадувања, следете на ОРБИТА на социјалните мрежи: ФЕЈСБУК и ИНСТАГРАМ, а сите подетални информации за туристичките аранжмани дознајте ги на веб страната: www.taorbita.com.mk

Уживајте во летото заедно со ОРБИТА – бренд на Прилеп кога во прашање е организација на патувања и летувања и до најдалечните светски дестинации.

Северна Македонија е „тажна приказна“ со оглед на тоа колку долго таа земја чека на процесот на преговори… Црна Гора останува најверојатниот кандидат од регионот на Западен Балкан што може да стане нова членка на Европската Унија за време на мандатот на сегашната Европска комисија, по што следува Албанија. Ова го изјави комесарката за проширување Марта Кос во интервју за Радио Слободна Европа (РСЕ).

„Доаѓам од Словенија, која порано беше дел од оваа територија во поширока смисла. Значи, во некои аспекти, регионот беше подобар пред 20 години отколку што е денес. И има две или три многу тажни приказни. Една од нив е дека Косово не може да оди напред. Друга тажна приказна е Северна Македонија. Знаете, ако требаше да чекаме со Украина додека Северна Македонија чека почеток на преговори, Украина би ги започнала преговорите во 2045 година. И, секако, тука е и Босна и Херцеговина. Можеме да го направиме тоа со Црна Гора. Сите поглавја се отворени, па затоа ги затвораме за да можеме да го завршиме процесот на крајот на 2026 година од техничка гледна точка“, рече Кос.

Кос упати предупредување до Србија, нагласувајќи дека властите во земјата сега мора да докажат дека навистина се за европскиот пат.

Во однос на Косово, Европската комисија сега очекува формирање нова влада за да знае со кого ќе преговара.

-На 28.04.2025 во 15.47 часот полициски службеници од ОВР Прилеп, додека постапувале по наредба од Основен суд Прилеп за приведување на С.Ќ. на ул.„Дебарца” во населба Тризла во Прилеп, биле физички нападнати од С.Ќ., кој му го одзел службениот пиштол на еден од полициските службеници, и се дал во бегство.

Во исто време, се собрала поголема група на луѓе кои на полициските службеници им упатувале закани и навреди.

Се преземаат мерки за расчистување на настанот – информираат од МВР.

Со одлична динамика се градат автопатите на коридор 8 и 10 д, истакна вицепремиерот Александар Николоски во емисијата “360 степени”. Според него има доста работа, но очекува работите да се одвиваат согласно планираното.

“Делницата Гостивар-Букојчани, популарната Стража има одлична динамика, Битола-Прилеп, исто така оди со одлична динамика. Тетово -Гостивар имаме подготвителни работи, за скоро време ќе одиме и на почеток на работите, а автопатот Требениште- Ќафасан е блокиран од страна на УНЕСКО. Ако го тргнеме Требениште-Ќафасан тогаш напредокот е одличен. Во овој момент имаме отворен фронт за работа од 68 км автопат имајќи предвид дека вкупната бројка заедно со четврата делница е 115 км и ако одземеме дека таа делница е 25 км, значи дека од вкупно 90 на 68 километри веќе се работи. Мислам дека Битола -Прилеп ќе биде прв завршен, колку и да звучи чудно, втората делница од Гостивар до Букојчани иако е најтешка ќе биде втора, а Тетово – Гостивар иако изгледа најлесен ќе се заврши на крај имајќи предид дека имаме население на двете страни од автопатот и доста внимателно одиме таму”– потенцираше вицепремиерот Николоски.

Двата постојани мобилни оператори и понатаму дејствуваат како дуопол, не нудат поквалитетни услуги кон корисниците и време е да се направи конкуренција на пазарот. АЕК веќе ја започна процедурата за тендер за лиценца за трет оператор, потенцираше вицепремиерот Николоски во емисијата “360 степени”

“За жал во овие 8-9 месеци откако ние сме Влада, направија се да докажат на цела јавност дека има потреба од трет оператор. Го држат дуополот помеѓу себе, нема никаков натпревар помеѓу себе, не понудија никакви подобри услуги. Патувајте низ државата, половина држава мрежа нема или ви се губи мрежата. Да не зборувам за потценувачкиот однос кој што го имаат кон петте национални приватни телевизии и кон регионалните телевизии, каде што од граѓаните наплаќаат за кабелска телевизија, а на овие телевизии, иако имаат законска обврска, не им исплаќаат ништо. Така што направија се, за да веќе никој нема дилема дали треба или не треба да има трет оператор и АЕК веќе започна процедура за тендер за лиценца за трет оператор. Тоа е добро од повеќе причини. Прво ќе добие пари државата, некаде лиценцата е помеѓу 8 и 12 милиони евра. Второ ќе добие директна инвестиција државата, ќе се отвараат работни места и трето според мене најважно, ќе добие конкуренција затоа што во моментов конкуренција нема, двата оператори дејствуваат како еден”– истакна вицепремиерот Николоски.

Тој истакна дека покрај “4IG”, веќе имало заинтересираност од уште еден мобилен оператор од Романија.

Во текот на вчерашниот ден, градоначалникот на општина Битола Тони Коњановски, секретарот Борче Димитровски и дел од вработените во
општинската администрација, остварија средба со граѓаните на урбаната заедница „Гоце Делчев“, во населбата Стрелиште.

На средбата со граѓаните, кои ги имаше во голем број, им беше претставено сообраќајно-техничкото решение за времен режим на сообраќај
до реализација на трајниот режим на сообраќај, кој ќе следи со комплетната реконструкција на целокупната инфраструктура на ул. „8
Септември“, од кружен тек Дулие до границите со ГУП на Битола.

Сообраќајното решение содржи поставување на помошен импровизиран кружен тек кај бензинската пумпа Лук Оил, со цел граѓаните безбедно да можат да влегуваат и излегуваат од населбата, а истовремено, безбедноста во сообраќајот да биде на повисоко ниво, бидејќи на оваа делница се изведуваат градежни активности.

Да го подигнеме текстилниот смер на повисоко ниво-велат професорките Анита Стефановска, Ема Ќука и Живка Танушевска за Креативниот ден

32 екипи од 11 градови, 9 стручни училишта се дел од годинешниот Креативен ден во Битола. Оваа година ќе се одржи на 28.мај во Битолскиот театар. И овојпат македонски дизајнери ќе дизајнираат заедно со младите од тесктилниот отсек во средните училишта низ Македонија. „Креативен ден“ е настан по иницијатива и идеја на Весна Божиловиќ, продуцент и дизајнер од продукција “Божиловиќ“, на која од првиот настан се приклучија професорките Анита Стефановска, Ема Ќука и Живка Танушевска од текстилната струка на СОУ “Таки Даскало“, Битола.

Кој е предизвикот да се биде дел од овој настан?

„Сакавме да го подигнеме текстилниот смер на повисоко ниво. Текстилот не значи шиење на машина во некој погон, текстилот инспирира, мотивира. Модниот дизајн овозможува самоизразување,истакнување на уметнички и креативен дух. Организирањето на овој настан го промовира нашето работење со учениците, а воедно на градот му дава уште една манифестација на која битолчани можат да уживаат. Покрај тоа што ги реализираме наставните програми зададени од МОН и ЦССО, се залагаме да им пренесеме знаења и вештини на учениците со плетење, везење, ткаење, филцање, вештини кои се повеќе се забораваат и не се практикуваат кај младите генерации. Овие вештини во голема мера ќе им помогнат да бидат уникатни со своите креации кои ги презентираат на вакви модни настани. Покрај традиционалните вештини применуваме и нови методи и техники на пр. како што е 3 Д моделирањето“, истакнаа професорките.

Оваа година темата е Ориент

„Фокусот ни е на креативниот процес од почеток до крај -од истражување на ориенталната култура и модни влијанија, преку скицирање на модели, до изработка и стилизирање. Сите тимови работат на модели кои се инспирирани од ориентот- богатото културно наследство, декоративните елементи , традиционалните ткаени и колоритни мотиви од истокот. Покрај организацијата на модната ревија ќе има и средби и разговори околу дизајнирањето на облека со познати дизајнери од Македонија. Целта ни е не само да прикажеме облека , туку и целосно визуелно и културно искуство инспирирано од ориентот“.

Колку овој настан помогна и ги мотивира учениците во нивното образование?

„Овој ни е 4-ти настан по ред. Секоја година се забележува поголема мотивираност кај учениците. Исто им овозможува практично да ги применат знаењата што ги стекнуваат на час но и да ја изразат својата креативност, индивидуалност и тимска работа. Учениците добиваат чувство дека навистина можат да успеат во светот на модата“.

Што значи поврзаноста на теоретската настава со практичната и настани како овој?

„Поврзаноста на теоретската настава со практичната е клучна за вистинско разбирање и развој на вештини кај учениците. Настани како модната ревија ја претставуваат крајната цел на таа поврзаност- се што се учи во училницата, како што се дизајн, текстилни материјали, кроење, изработка и мода низ историјата се претвара во конкретен производ и перформанс. На тој начин учениците учат низ искуство, го гледаат резултатот од својот труд и добиваат самодоверба, сатисфакција и визија за својата иднина“.

Секоја година настанот станува се помасовен

„Оваа година, ќе бидеме домаќини на 32 тимови од 11 градови, 9 стручни училишта. Секој тим се состои од: талентиран ученик од стручно модно училиште, дизајнер-ментор, кој ги води низ креативните и техничките аспекти на процесот и успешна жена – Дама – која, претставувајќи ја финалната креација на модната писта, ја покажува својата општествено, социјална одговорност,јавно им го признава стекнатото знаење и вештини на младата генерација дизајнери и креативци“.

Како дизајнери ментори оваа година ќе учествуваат: Благој Мицевски, Андреј Папаз, Александар Ортаковски, Муамед Маликовски, Монсоло, Екатерина Петреска, Боркица, Христијана Голубовиќ,Сербез, Алшар Силвија Михајловска, Весна Божиловиќ,Бе.оне, Маја Петковска, Маја Андревска, Ирена Стојановска, Снежана Петровска, Анастасија Студио;
Училишта од Скопје, Струга, Прилеп, Богданци, Куманово, Штип, Виница и домаќинот Битола.

ВИП гости: Никола Ефтимовски, Ивана Кнез, Елена Лука, Татјана Алексиќ, Ивана Ангова, претставници од Текстилен Кластер.

Поврзаноста со бизнис секторот е во насоката на тоа што моделите ги носат успешни деловни жени од Битола, а собраните средства одат за подобрување на практичната настава. КРЕАТИВНИОТ ДЕН еволуира во нешто многу поголемо, тоа веќе не е само еднодневен настан, туку растечка заедница на иноватори, едукатори и претприемачи кои веруваат во моќта на модата како професионален пат и алатка за промени, се трансформира во вистинска Модна Зона.