Игор Стефановски Иџе овој викенд со нова трка од ФИА Европскиот шампионат на ридски патеки (еHC). Ќе ја вози патеката Рампа Да Фалпера во Португалија

Летечкиот Македонец, Игор Стефановски Иџе во ФИА Европскиот шампионат на ридски патеки (еHC), овој викенд ќе ја вози третата трка. Ќе вози на патеката Рампа Да Фалепра во португалската Брага. За него оваа патека е добро позната, шампионски освојувана.

Стефановски по првите две трки во ФИА Европскиот шампионат на ридски патеки е трето место во генерален пласман од сите натпреварувачи.

„Со силна возбуда, сакам да најавам дека очекувам добра трка. Посакувам да постигнеме одличен резултат. Патеката Рампа Да Фалпера добро ја познавам. Двапати бев на подиум и тоа на првата позиција. Моите очекувања и овојпат се слични, да триумфираме. Би сакал да истакнам дека ова е патека на која брзината на некои делови надминува и повеќе од 240 км, што е голем и силен предизвик за сите натпреварувачи. И пред оваа трка, би сакал да се заблагодарам на мојот неверојатен тим, тимот на Ферари, моите спонзори, и секако, до сите Вас кои ни давате безрезервна поддршка, вели Иџе.

Стефановски и годинава се трка со автомобилскиот ѕвер од Ферари 488 B8, специјално дизајниран за овие патеки.

Видеолотарија Касинос Австрија и во оваа трка од ФИА Европскиот шампионат на ридски патеки (еHC), ќе биде дел од неговиот тим. Ние сме горди што повеќе од една деценија заедно навиваме за Иџе и Македонија.

Лидерот на СДСМ, Венко Филипче, синоќа на средбата со општинската организација во Неготино ги повика незадоволните партиски членови кои пребегаа во ЗНАМ да се вратат во партијата.

„Во 2021 година, некои луѓе се одвоија од СДСМ и отидоа во ЗНАМ. Тогаш, тогашниот претседател на ЗНАМ и градоначалник на Куманово продаде еден лажен патриотизам. Излегуваше на бугарска телевизија, кажуваше „јас сум патриот“, го спомнуваше Гоце Делчев, ја спомнуваше НОБ. Му успеа манипулацијата – да се претстави како патриот и да ги привлече и излаже нашите членови, нашите симпатизери, па и други граѓани. И што излезе? За што се борел? За бизнис интереси. Што му била целта? Само бизнис да прави, пари да прави од позиција на градоначалник,“ изјави Филипче.

При тоа, Филипче повика на враќање на разочараните членови во СДСМ.

„Упатувам апел до нашите членови кои се излажаа и гласаа за ЗНАМ, да се вратат дома. Тука им е домот, во СДСМ. Да не се лажеме дека една мала група луѓе ќе манипулира само за сопствени финансиски интереси“, рече Филипче.

Тој го искритикува и претседателот на ЗНАМ, Максим Димитриевски,занеговите односи со ДУИ.

„Нели ДУИ беа предавници и криминалци, а со кого го изгласал Димитриевски ДУП-от во Куманово? Гледајте ги и двојните стандарди на премиерот, вика не може Таравари во Владата ако соработува со ДУИ, а Максим Димитриевски може да соработува со ДУИ, дополнително, за негови финансиски интереси. Какво лицемерие е ова?“ , потенцираше Филипче.

Сакаш да слабееш, да се вратиш во форма, да стекнеш сила и самодоверба? Ова лето имаш можност да тренираш со Матеј Чатлески, двократен државен шампион и најмладиот професионален боксер во историјата на Македонија.

-Започнувам со персонални тренинзи за рекреативци и боксери – динамични боксерски сесии со вистинска техника и удари, каде ќе се испотиш, ќе се почувствуваш жив и ќе направиш нешто добро за себе. Без потреба од натпреварување, без притисок – само вистински тренинг со професионален пристап, вели Матеј.

View this post on Instagram

A post shared by 𝑴𝒂𝒕𝒆𝒋 𝑪𝒂𝒕𝒍𝒆𝒔𝒌𝒊 (@catleskim)

Инаку Матеј е:

– двократен национален шампион во аматерски бокс (-80 кг)
– поранешен член на Амaтерската репрезентација на Македонија, со освоени медали
– најмладиот професионален боксер во историјата на Македонија (дебитантски настап на 17 години)
– Победник во својот прв професионален меч во Скадар, Албанија, каде доминирав и дојдов до нокдаун во втората рунда
Непоразен во професионалниот ринг со скор 1-0-0

View this post on Instagram

A post shared by 𝑴𝒂𝒕𝒆𝒋 𝑪𝒂𝒕𝒍𝒆𝒔𝒌𝒊 (@catleskim)

-Во мојот нов влог објавен на TikTok и Instagram Reels ќе видиш како изгледа еден ден од професионален спаринг тренинг – атмосфера, фокус и искуство од прва рака, додава Матеј.

Сите заинтересирани можат да се пријават преку:

Instagram / TikTok: @catleskim

Термините се ограничени – резервирај навреме!

Денеска (08.05.2025), со почеток во 20:00 часот, во живо на поткастот “ВМРО-ДПМНЕ Зборува”, гостин ќе биде шефот на кабинет на министерот за спорт, Илија Ристески.

Поткастот ќе се емитува на Јутјуб каналот на ВМРО-ДПМНЕ и Фејсбук страната на партијата.

Ристески кој е прилепчанец, се очекува во разговорот да објасни до каде е процедурата за реконструкција и ставање во функција на Универзалната сала во Прилеп.

Спортските клубови, спортистите и спортските работници во градот под Марковите Кули, со нетрпение очекуваат да се реализира ова ветување на Министерството за спорт, и конечно да се врати во функција спортскиот храм.

Прилеп во моментов е град без спортска сала. Спортските клубови функционираат во школски сали, каде условите за работа и напредок се на ниско ниво.

Најспортскиот град во едно време очекува многу од новото министерство, а Ристески е можеби најповикан од своите сограѓани, да застане прв во таа борба за враќање на спортот во Прилеп на пиедесталот.

„Булки“ е изложбата на фотографии од Милан Темелкоски, што ќе биде отворена на 9 мај/ петок/ во 18.00 часот во Ликовната галерија од ЦК „Марко Цепенков“.

Изложбата на Милан Темелкоски носи едноставен наслов — Булки, но зад него се крие подлабока, лична приказна. Во говорот на неговата мајка Панде Темелкоска, булките биле нарекувани „божуриги“ — збор што авторот со љубов го задржува како дел од мајчиниот јазик и детските сеќавања. Тоа име, всадено во говорното и емоционалното ткиво, денес живее во ново светло — пред неговиот објектив. Поттик за изложбата е една пејзажна слика на сликарот Кирил Гегоски, долгогодишен пријател на Темелкоски, на која булките се прикажани во прилепската околина, уловени од неговото набљудувачко око. Тоа сликарско доживување остава силен впечаток кај Темелкоски, кој чувствува потреба да ги забележи овие цветови и во својот медиум — фотографијата. Така, божуригите стануваат повеќе од мотив, тие се сеќавање, симбол и визуелна медитација. Најголем дел од фотографиите се направени на Плаошник. Булките не се осамени, туку се дел од поширок пејзаж, во дијалог со старите камени ѕидини, зелените падини и бескрајното охридско синило. Црвенилото на булките и синилото — небесно или езерско — се присутни речиси на секој кадар, како визуелна порака за нужното единство меѓу човекот и природата. На сликите е присутна и успокојувачката питомина на планината Галичица и зелените прегратки на шумичките околу Плаошник и Самоиловата тврдина.

Темелкоски снима од различни ракурси, со изразена смисла за композиција и длабока почит кон мотивот. Нему му се туѓи технолошки егзибиции што би ја нарушиле автентичноста на пејзажната глетка. Секоја фотографија дише тивко, но присутно — како сведоштво за нешто што вреди да се забележи, но и да се почувствува.

Во булките е симболиката на животот и минливоста, на љубовта и смртта, на невиноста и отпорот. Нивната појава во нашите речници како „див афион“ или „тутенка“ сведочи за културна длабочина, распослана од антиката до денес. Во тој спектар, фотографиите на Темелкоски нè потсетуваат — на тишината на пејзажот, на вредноста на споменот, и на убавината што преживува. Изложба што носи возбуда и обврзува на паметење – вели Слободан Беличанец

За уметникот:

Милан Темелкоски е етаблирано фотографско име од Прилеп, роден во 1953 година.
Пензиониран е, но не и од фотографијата – страст што ја негува повеќе децении. Неговото име е длабоко врежано во македонската фотографска сцена, посебно преку неговата работа во Институтот за старословенска култура – Прилеп и преку долгорочната и плодна соработка со Народниот театар „Војдан Чернодрински“ и истоимениот фестивал.

Неговото творештво е особено препознаено во областа на археолошката, музејската и театарската фотографија, каде што умее да долови и документира културно-историски вредности со прецизност и емоција. Со текот на времето, Темелкоски поминува низ сите технолошко-естетски трансформации на фотографијата, но останува верен на автентичниот визуелен израз и на природната светлина.

Оваа изложба ја претставува неговата понова авторска фаза, инспирирана од природата и пејсажот – со посебен акцент на дивите цветови што мајка му Панде ги нарекувала божуриги, поим кој сега за него има силна сентиментална вредност.

Милан Темелкоски не фотографира само за окото – тој создава за да ги поврзе: човекот со природата, минатото со сегашноста, поетското со документарното.

Работиме на еден голем инвестициски циклус во делот на автопатиштата, на експресни и регионални патишта, железничката инфраструктура, болници, во секторот образование и други сектори кои ги развиваме. Се работи за тековни и нови проекти и проекти кои што треба да донесат нови вработувања, потенцираше вицепремиерот Николоски во интервјуто за ТВ Сител.

“Во моментов градиме паралелно четири автопати со амбиција да отвориме и петти. Го градиме Тетово-Гостивар, го градиме Гостивар -Букојчани, го градиме Гостивар-Кичево, Кичево-Охрид кој е во напредна фаза, го градиме Прилеп – Битола и дополнително на ова имаме активен тендер за Кичево-Букојчани. Се градат експресни патишта, втората фаза од експресниот пат Прилеп-Градско, делницата од Дреново до Фариш, таа е пред завршување ќе ја пуштиме за сообраќај. Тука е делницата од Богданци до Гевгелија, имаме и други регионални патишта“, истакна вицепремиерот Николоски.

Тој додаде дека за период до два месеци ќе излезе со детални информации за нови проекти. Исто така потенцираше дека за реализација на овие проекти, дел се обезбедени средства од буџетот, дел ќе се обезбедат во вид на заеми.

Му беше сопатник и помошник на апостолот Петар, којшто во своето Прво послание го нарекува син свој, не син по тело туку по дух. Кога Марко беше во Рим со Петар, верните го замолија да им ја запише спасоносната наука на Господ Исус, Неговите чуда и Неговиот живот. Така го напиша Светото Евангелие, коешто го виде и го посведочи за вистинито и самиот апостол Петар.

Тој го постави Марко за епископ и го испрати на проповед во Мисир. Така тој беше првиот проповедник на Евангелието и првиот епископ во Мисир. Мисир беше сиот притиснат од густиот мрак на незнабоштвото, гатањето и злобата. Со Божја помош Свети Марко успеа да го посее семето на Христовата наука низ Ливија, Амоникија и Пентапол. Од Пентапол, воден од Духот Божји, дојде во Александрија.

Таму успеа да ја заснова Црквата Божја, да постави епископ, свештеници и ѓакони и с ? добро да утврди во благочестивата вера. Својата проповед ја потврдуваше со големи и многубројни чуда. Кога незнабожците подигнаа обвиненија против него, како против разорувач на нивната идолопоклоничка вера, а градоначалникот почна да трага по него, тој побегна повторно во Пентапол и таму продолжи да го утврдува своето поранешно дело. После две години Свети Марко, на голема радост на верните чијшто број во меѓувреме се умножи, се врати во Александрија.

Тогаш го фатија незнабожците, цврсто го врзаа и почнаа да го влечат по калдрмите викајќи: „Да го повлечеме волот во оборот!“ Сиот ранет и искрвавен го фрлија во затвор. Овде најнапред му се јави ангел небесен и го храбреше и го крепеше. Потоа му се јави Самиот Господ Исус и му рече: „Мир на тебе, евангелисту Мој!“ А Марко Му одговори: „И на тебе, Господи мој, Исусе Христе!“ Утредента злочестивите луѓе го извлекоа од затворот и повторно го влечеа по улиците, извикувајќи го истото: „Да го повлечеме волот во оборот!“ Сиот измачен и истоштен Свети Марко изусти: „Во Твоите раце, Господи, го предавам мојот дух!“ и издивна. Неговите свети мошти беа чесно погребани од христијаните. Со векови им даваат исцеленија на луѓето од маките и од болестите.

Тридневното примирје, прогласено од Русија, стапи на сила во четврток наутро, а небото над поголемите градови во Украина остана мирно по деновите на руски напади со беспилотни летала и балистички ракети.

Сепак, украинските воздухопловни сили објавија дека по почетокот на прекинот на огнот, руските авиони двапати фрлиле наведувани бомби врз Сумскиот регион, на север од Украина. Немаше извештаи за штети, а Ројтерс не можеше независно да ги потврди нападите.

Прекинот на огнот се совпаѓа со одбележувањето на 80-годишнината од поразот на нацистичка Германија во Втората светска војна и стапи на сила на полноќ по московско време (21:00 часот по Гринич). Како дел од комеморацијата, рускиот претседател Владимир Путин ќе ги угости кинескиот претседател Си Џинпинг и други светски лидери во Москва и ќе присуствува на воената парада на Црвениот плоштад на 9 мај.

Украина не се согласи да го почитува руското примирје, оценувајќи го како обид на Путин да создаде впечаток дека сака да ја заврши војната, која започна со целосната инвазија на Украина од страна на Русија во февруари 2022 година. Путин тврди дека „останува посветен на постигнување мир“.

Оваа недела, Украина изврши серија напади со беспилотни летала врз Москва, што доведе до затворање на аеродромот во руската престолнина и приземјување на авиони.

Освен извештајот на украинските воздухопловни сили за две наведувани бомби, немаше други извештаи за лансирање руски беспилотни летала или ракети кон украинските градови во четврток наутро. До 3:45 часот наутро по локално време (00:45 GMT), главниот град Киев беше мирен, за разлика од претходниот ден кога експлозии и украински противвоздушен оган го потресоа градот.

Не беше веднаш јасно дали имало затишје во борбите на фронтовската линија меѓу руските и украинските сили. Репортер на Ројтерс во источна Украина извести дека не слушнал никакви борбени активности рано утрово.

Украинскиот претседател Володимир Зеленски во средата изјави дека Украина стои зад предлогот за 30-дневен прекин на огнот со Русија.

Не го повлекуваме тој предлог, кој би можел да обезбеди можност за дипломатија“, рече Зеленски во своето вечерно обраќање. Тој додаде дека Русија не одговорила на овој предлог, освен со нови напади. „Ова јасно покажува кој е изворот на војната“, рече тој.

Тој, исто така, ги призна честите украински напади со беспилотни летала врз руски цели, вклучувајќи го и градот Москва, во пресрет на прославите на Денот на победата.

„Сосема е фер што дури ни руското небо, небото на агресорот, денес не е мирно“, рече Зеленски.

Градоначалникот на Москва, Сергеј Собјанин, изјави дека 14 дронови насочени кон главниот град биле одбиени или уништени, што се случило пред да стапи во сила тридневниот прекин на огнот.

САД предложија 30-дневен прекин на огнот во март, на што Украина се согласи. Русија изјави дека таква мерка може да се воведе само по постигнување договор за механизмите за нејзино спроведување и надзор.

Портпаролката на руското Министерство за надворешни работи, Марија Захарова, изрази изненадување од изјавите на американскиот претставник Кит Келог дека Путин можеби го попречува сеопфатниот прекин на огнот.

„Единствената пречка за прекин на огнот е Киев, кој ги крши договорите и не е подготвен сериозно да преговара за долгорочно примирје“, рече Захарова.

Видеолотарија Касинос Австрија е златен спонзор на ФК Аеродром 2018 Скопје, клуб кој со својата посветеност и амбиција успешно се позиционира на фудбалската сцена. Компанијата во континуитет поддржува спортски проекти и вложува во развојот на македонскиот спорт, во рамките на својата визија за модерна и општествено одговорна компанија.

Партнерство беше официјализирано денеска на теренот на фудбалскиот клуб од Ново Лисиче во присуство на претставници на Видеолотарија Касинос Австрија и ФК Аеродром, при што беше истакнато значењето на соработката, која има за цел да придонесе кон подобрување на условите за тренинг и натпреварување на тимот.

„Со ова партнерство, Видеолотарија Касинос Австрија, уште еднаш ја потврдува сериозноста на нашата мисија за унапредување на спортската сцена во нашата земја. Нема спортски успеси без вложувања во инфраструктурата, како и поддршка на младите таленти за спорт. Токму затоа и го спроведуваме нашиот проект Играј со најдобрите, во чии рамки е и оваа поддршка. Конкретно со ова спонзорство, сакаме да придонесеме за развојот на фудбалот и да овозможиме подобри услови за играчите на ФК Аеродром. Средствата од ова спонзорство ќе бидат наменети за модернизација на инфраструктурата и подобрување на условите за тренинг и натпревари. Веруваме дека во иднина, заедно ќе се радуваме и ќе го славиме успехот на ФК Аеродром“ изјавија од Видеолотарија Касинос Австрија.

Претставниците на ФК Аеородром не го криеја задоволството од соработката со златниот спонзор, која за нив, како што истакнаа, претставува значајно признание и потврда за посветената работа на клубот во развојот на фудбалот.

„Поддршката ќе ни овозможи да создадеме уште подобри услови за тренинг, развој и напредок на нашите играчи. Нашите тренери, кои се вистински стручњаци во својата област, со својата неуморна посветеност, искуство и визија, ќе продолжат да работат на тоа да ги подготват нашите играчи за големи фудбалски успеси и да им помогнат да го развиваат и натаму својот потенцијал, како на теренот, така и надвор од него. Оваа соработка, за нас, претставува и голема обврска, но ние сме убедени дека ќе ја оправдаме довербата што ни ја укажа Видеолотарија Касинос Австрија. Нашиот прв тим ќе биде дополнително мотивиран да продолжи со посветеност да ги дава своите најдобри резултати на теренот, во сите натпревари што претстојат. Заедно, тимски, ќе продолжиме да постигнуваме значајни успеси и достигнувања, што ќе биде гордост за клубот и македонскиот фудбал“, изјави Ивица Аврамовиќ, претставник од ФК Аеродром, клуб кој низ годините се развива со јасна цел – создавање конкурентен тим и унапредување на фудбалската култура во регионот. Благодарение на стручниот тренерски кадар и одличните услови за работа, клубот успешно се натпреварува и гради стабилна основа за идните сезони. Со постојани вложувања во спортската инфраструктура и професионалниот развој на играчите, клубот има за цел да се етаблира како сериозен конкурент во македонскиот фудбал.

Видеолотарија Касинос Австрија останува посветена на вложувањата во спортот, со верување дека заедно можеме да создадеме подобра иднина за фудбалската сцена во Македонија.

Полициската станица во Прилеп и оваа година, традиционално, заедно со граѓаните го одбележа Денот на македонската полиција – 7 Мај. По тој повод, денеска голем број ученици со нивните наставници ја посетија полициската станица, каде полициски службеници им ја презентираа техниката и средствата со кои располага МВР.

Учениците имаа прилика одблиску да се запознаат со начинот на работа на полициските службеници, да слушнат корисни совети и да научат многу работи за функционирањето на различните полициски единици, за разоткривањето и превенцијата на кривични дела и за одржување на безбедноста.

Отворениот ден пред ПС Прилеп го посети и градоначалникот на општина Прилеп, Борче Јовчески, кој притоа порача:

-Денес им оддаваме почит на сите припадници на полицијата кои секојдневно, со посветеност, храброст и одговорност, стојат на браникот на безбедноста и редот во нашата држава. Вашата служба е повеќе од професија – таа е должност кон граѓаните и татковината. Ви благодариме за пожртвуваноста, трудот и секој чекор направен во служба на јавниот ред и мир. Нека ви е честит и достоинствен 7 мај, Денот на македонската полиција!