Од среда, 2 септември, официјално започнува да функционира проектот „Градски воз“, со кој треба да се овозможи побрз, поефикасен и подостапен јавен превоз за жителите на Скопје и приградските населени места.

Првата од предвидените три линии ќе сообраќа на релација Зелениково – Ново Зелениково – Орешани – Јане Сандански – Драчево – Лисиче – Нова железничка станица Скопје.

Сообраќајот ќе се реализира со три возови според утврден ред на возење од страна на МЖ Транспорт. За потребите на проектот, ЈП МЖ Инфраструктура изврши целосна реконструкција на пругата на оваа релација, со цел да се подигнат нивото на безбедност и капацитетот на брзина.

Официјалната промоција на проектот е закажана за в среда, 2 септември, во 11 часот. На настанот се очекува да присуствуваат премиерот Христијан Мицкоски, заменик-претседателот на Владата и министер за транспорт Александар Николоски, директорот на ЈП МЖ Инфраструктура Синиша Ивановски, директорот на МЖ Транспорт Дејан Кошутиќ, како и градоначалниците на Скопје, Зелениково, Кисела Вода и Аеродром.

Предвидено е присутните симболично да го означат стартот на проектот со патување со воз од железничката станица во Зелениково до Новата железничка станица Скопје.

Од Министерството за транспорт посочуваат дека „Градски воз“ има за цел периферните делови на Скопје и приградските населени места подобро да се поврзат со централното градско подрачје, што треба да значи пократко и поевтино патување, помалку чекање и побрз јавен транспорт.

Проектот предвидува интеграција со сообраќајниот ред на ЈСП, со што, според најавите, граѓаните, студентите и учениците ќе добијат поефикасен и интегриран систем на јавен превоз.

Во тек се и активностите за проектирање на втората и третата линија. Втората е предвидено да се протега од Новата железничка станица преку Бутел и Скопје-Север до Ѓорче Петров, додека третата линија би сообраќала од Новата железничка станица преку Автокоманда и Маџари до Илинден.

Регулаторната комисија за енергетика, водни услуги и услуги за управување со комунален отпад (РКЕ) донесе одлука со која малопродажните цени на нафтените деривати во просек се намалуваат за 2,06% во однос на претходната пресметка.

Од 1 септември од 00:01 часот, дизелот и екстра лесното масло за домаќинство бележат значително поевтинување, додека цените на бензините се зголемуваат.

Малопродажната цена на ЕУРОДИЗЕЛ (Д-Е V) се намалува за 6,50 денари по литар и ќе изнесува 95,00 денари.

Малопродажната цена на Екстра лесното масло за домаќинство (ЕЛ-1) се намалува за 3,50 денари и ќе изнесува 97,00 денари по литар.

Цените на бензините ЕУРОСУПЕР БС-95 и ЕУРОСУПЕР БС-98 се зголемуваат за 1,00 денар по литар. Новата цена на ЕУРОСУПЕР БС-95 ќе изнесува 94,00 денари/литар, додека ЕУРОСУПЕР БС-98 ќе се продава по цена од 96,00 денари/литар.

Малопродажната цена на Мазутот М-1 НС се намалува за 1,166 ден/кг и ќе изнесува 44,410 ден/кг.

Од РКЕ информираат дека референтните цени на светскиот пазар бележат зголемување кај бензините за 2,212%, додека кај дизелот има намалување за 8,237%, кај екстра лесното масло за 4,389% и кај мазутот за 2,793%. Курсот на денарот во однос на доларот е понизок за 0,5477%.

Од регулаторната комисија напоменуваат дека ова се максималните утврдени цени, а трговците на големо и мало можат да ги формираат цените и пониско од највисоките утврдени износи.

Битола повторно беше центар на спортот, младоста и адреналинот со одржувањето на 14-тото издание на „Pelister Downhill Cup“, традиционалниот натпревар во планински велосипедизам на падините на Пелистер.

На годинешното издание учествуваа 63 натпреварувачи од Македонија, Србија, Бугарија, Грција, Кипар и Албанија, кои пред публиката и љубителите на овој спорт демонстрираа врвни вештини, брзина и спортски дух.

Пелистер и годинава беше вистинска сцена за адреналински спустови, а натпреварот уште еднаш покажа дека „Pelister Downhill Cup“ прераснува во препознатлив спортски настан кој ги поврзува љубителите на планинскиот велосипедизам од регионот.

На доделувањето на признанијата присуствуваше претседателот на Советот на Општина Битола, Бојан Бојкоски, кој им ги врачи наградите на дел од најуспешните учесници.

„Општина Битола продолжува да стои зад спортските настани и иницијативите кои ја промовираат нашата општина“, истакна Бојкоски, нагласувајќи ја поддршката за спортот и организирањето настани кои ја збогатуваат понудата и ја промовираат Битола како спортски центар.

Со учеството на натпреварувачи од шест земји и со уште едно успешно издание, „Pelister Downhill Cup“ ја продолжува својата традиција и го потврдува Пелистер како атрактивна дестинација за развој и промоција на планинскиот велосипедизам.

Битола одбележа 121 година од погубувањето на Александар Турунџев македонски револуционер, учесник во македонското револуционерно движење, член и војвода на Македонската револуционерна организација.

Во име на Општина Битола пред споменикот кај „Ат Пазар“ и на неговиот гроб во Светонеделските гробишта положи цвеќе и се поклони советникот Александар Јаневски. Се поклонија и оддадоа почит и граѓани, здруженија како и членови на коњаницата Костурска чета Битола.

Александар Турунџев беше повеќе од борец, беше симбол на храброст, на жртва и на визија.

Ланската година со свечена церемонија и своевидна поворка која го симболизираше погибието на војводата Александар Турунџев, беше откриен споменикот на оваа значајна личност од македонската револуционерна борба под „Ат Пазар“ во Битола.

Кога станува збор за осигурување, не постои едно решение што одговара на сите. Секој има различни потреби, различни приоритети и различни планови. Затоа што осигурувањето не е само уште една обврска на листата.

Тоа е избор кој треба да одговара на вашиот живот, вашите потреби и на она што сакате да го заштитите.

Наместо да ја земете првата понуда што ќе ви се најде, разгледајте ги можностите, информирајте се и одберете го решението што најмногу ви одговара.

ОБД Минт Инс – Осигурување по ваша мерка

Во ОБД Минт Инс можете да добиете пристап до различни осигурителни опции од сите активни осигурителни компании, за полесно да го пронајдете решението според вашите потреби и приоритети.

Без разлика дали станува збор за:

• Животно осигурување

• Патничко осигурување

• Авто-одговорност осигурување

• КАСКО осигурување

• Зелен картон

• Имотно осигурување

• Осигурување од Општа и Професионална Одговорност

• Осигурување од последици од несреќен случај

• ЦМР осигурување

• Дополнително Здравствено Осигурување

• Осигурување ДОМ

• И сите останати видови на осигурувања

Изборот не мора да биде комплициран. Напротив, кога ги имате информациите и различните можности пред себе, одлуката станува многу полесна.

Кога имате избор, одлуката е полесна 

Секој човек има различни потреби, различни приоритети и различни планови. Затоа не постои едно осигурување што е идеално за сите.

Преку ОБД Минт Инс целиот процес може да започне многу едноставно:

1. Разгледајте – Информирајте се за достапните осигурителни опции.
2. Споредете – Погледнете ги различните понуди и услови.
3. Одберете – Изберете го осигурувањето што најмногу одговара на твоите потреби.

Толкуедноставно.

Бидејќи кога имате повеќе информации и повеќе опции пред себе, многу полесно е да донесете одлука во која ќе бидеш сигурен.

Ваш живот, ваши потреби и ваша одлука – ОБД Минт Инс

Преку ОБД Минт Инс, добивате поддршка при изборот и можност да ги разгледате осигурителните опции што одговараат на она што навистина ви е потребно.

Затоа, следниот пат кога ќе размислувате за осигурување, не брзајте веднаш да кажете „да“. Бидејќи доброто осигурување не е само полиса. Тоа е избор што треба да одговара на вас.

Разгледајте ги осигурителните можности преку ОБД Минт Инс и направете избор според вашите потреби.

За повеќе информации околу различните видови осигурувуања, контактирајте нѐ денес на 15 107, [email protected] или во една од нашите филијали.

Љубовта кон месeњето, печењето и создавањето вкусни производи може да стане и професија. Токму тоа го нуди Винчини Академија во Виница, која на сите заинтересирани им овозможува да стекнат професионални знаења и практични вештини од областа на пекарството, слаткарството и кондиторството.

Станува збор за сертифицирана програма „Изработувач на кондиторски и пекарски производи“, структурирана во осум модули, преку кои учесниците се запознаваат со производството на пекарски, слаткарски и кондиторски производи, организацијата на работата, пакувањето, управувањето со опрема, како и контролата на квалитет и сензорната анализа.

Она што ја издвојува програмата е нејзиниот силен практичен карактер. Од вкупно 120 часа настава, дури 92 часа се практична работа, додека 28 часа се посветени на теоретска настава. Практичниот дел се реализира во современо опремен Винчини Развоен центар, кој располага со пилот-постројка, производен погон и лабораторија со професионална опрема за производство и тестирање на различни производи.

Учесниците ќе имаат можност да учат од искусни технолози и професионалци, а програмата опфаќа теми од производство на леб, бели печива, бурек и лиснати теста, преку чоколадни и какао производи, бонбони, карамели, локум и алва, па сè до торти, колачи, десертни порции и сладолед. Дел од наставата е посветен и на хигиената, безбедноста на храната и НАССР принципите, како и контролата на квалитетот.

Винчини Академија е дел од Фондацијата „Прогресив“, основана од Макпрогрес ДОО Виница, со цел развој на едукативни програми, унапредување на професионалните знаења, поддршка на бизнисот и создавање можности за развој на нови кадри.

Програмата е наменета за оние кои сакаат да изградат нова кариера, да ги надградат постојните знаења или да се подготват за сопствен бизнис во областа на пекарството, слаткарството и кондиторството. Особено значајно е што не е потребно претходно искуство во овие области, а за упис е потребно најмалку завршено основно образование и возраст над 17 години.

Новата програма започнува на 18 септември, а цената за целата програма изнесува 690 евра.

Сите заинтересирани кои сакаат својата вештина и љубов кон пекарството, слаткарството или кондиторството да ја претворат во професија, можат да се пријават преку следниот ФОРМУЛАР:

ПРИЈАВИ СЕ НА ПРОГРАМАТА

Не е доволно само да сакаш да месиш, печеш и создаваш – научи како тоа да го правиш професионално!

Европската тркачка приказна на Игор Стефановски – Иџе со новиот прототип започна одлично. Македонскиот автомобилист го освои одличното трето место во генералниот пласман на трката во Илирска Бистрица, во рамките на FIA Европскиот шампионат на ридски патеки.

Претпоследниот викенд од Европскиот шампионат на ридски патеки донесе и прво сериозно мерење на новиот болид на европската сцена. Стефановски настапи во Категорија 2 – категоријата на болиди и прототипи, во која се натпреваруваат најбрзите машини на ридските патеки.

Иџе веднаш се соочи со најсилната европска конкуренција, во трка на која стартуваа 242 автомобилисти од цела Европа, меѓу кои и искусни имиња како Кевин и Себастиен Пети, Хосеба Ираола Ланзагорта и Петр Трнка.

Резултатот е трето место во генералниот пласман на неговото деби со новиот прототип, што е силна потврда за потенцијалот на новиот болид и тимот.

„Многу сум задоволен од постигнатиот резултат. Трето место во генералниот пласман во Словенија, во конкуренција на 242 автомобилисти од цела Европа, и тоа на моето прво деби со новиот прототип е резултат што навистина дава тежина на целата моја кариера. Покажавме дека имаме потенцијал и дека можеме да им се спротивставиме на најдобрите европски возачи во оваа категорија“, вели Стефановски.

Иџе упатува благодарност и до своите поддржувачи и до тимот кој стои зад новиот спортски предизвик.

„Би сакал да им се заблагодарам на моите поддржувачи кои и овојпат без сомнеж застанаа зад мојот нов спортски предизвик. Горд сум и на мојот тим, ова е заеднички резултат и доказ дека работата и вербата во проектот даваат резултат.“

По одличниот старт со новиот прототип, фокусот веднаш се префрла кон Бузет, Хрватска, каде ќе се вози финалната трка од FIA Европскиот шампионат на ридски патеки.

„Сега се фокусираме на Бузет. Очекуваме добар резултат и од таму да ја продолжиме оваа убава европска приказна“, најавува гордо Иџе.

Токму Бузет има посебно место во кариерата на Стефановски. Минатата сезона, на истата патека, Иџе ја возеше својата 200-та трка во кариерата, а сезоната во FIA Европскиот шампионат на ридски патеки ја заврши со одлично трето место во Група 1.

Прилеп веќе еден месец има уште едно место каде што добрата храна, домашниот вкус и внимателната подготовка се претвораат во вистински оброк.

FIMIL Kitchen успешно работи веќе еден месец, а уште од самото отворање ја гради својата приказна врз едноставна, но важна идеја – квалитетни намирници, свежо подготвена храна и вкусови кои потсетуваат на домашната кујна.

Од традиционални јадења до различни месни специјалитети, пилешко подготвено на повеќе начини, свежи прилози и салати, понудата е креирана така што секој ден носи нешто ново.

А оваа работна недела FIMIL Kitchen повторно подготви богато и разновидно мени.

ПОНЕДЕЛНИК: 31.08.

Ребро во фурна 170
Отворен копан 150
Похован стек 150
Кременадла 160
Пилешко во кари сос 150
Шарска плескавица 160
Пилешко во сос со кулен 150
Пилешко во бел сос 150
Телешко во сос 170
Сарма 160
Грав 140
Крушевско грнe 160
Свинско каре 160
Пире
Компир салата
Ориз
Зелка салата
Мешана салата

ВТОРНИК: 01.09.

Пилешко во кари сос 150
Пилешко во бел сос 160
Свинско каре во фурна 160
Ребро во фурна 160
Похован стек 150
Гурманска плескавица 160
Телешко во рерна во сос 170
Бегова тава 160
Крушевско грнe 160
Телешка чорба 150
Гулаш 170
Мусака 160
Свинско каре во грилуван зеленчук 160
Колбас на скара 150
Пастрмка 150
Ќофте во доматен сос 160
Грав 140

СРЕДА: 02.09

Чорба пилешка 140
Пилешко во сос од печурки 150
Пилешко со кари 150
Пилешко во сос од кулен 150
Свинско со печурки 160
Унгарски гулаш 170
Колбаси на скара150
Ослич 150
Пилешко со ориз 150
Кременадла во сос 160
Ребро во рерна со печурки 160
Телешко во сос од печурки и праз 170
Похован стек 150
Јавнија 170
Тава „Ал де Мар“ 160

ЧЕТВРТОК: 03.09.

Телешка чорба 150
Телешки гулаш 170
Бегова тава 160
Селско месо 160
Свинско печено во сос 160
Свинско ребро во рерна 160
Пилешко на скара во сос 159
Пилешко со крем сос 150
Пилешко со кари сос 150
Пилешко со кулен и кашкавал 150
Пилешки похован стек 150
Мусака во тава 160
Мрсна сарма 160
Плескавица на скара 160
Тавче гравче 140
Посна тава со печурки и морков 140

Цените се движат од 140 до 170 денари, зависно од изборот, што FIMIL Kitchen го прави практична опција за сите кои сакаат вкусен и топол ручек без да поминуваат многу време во кујна.

За сите прилепчани кои сè уште не ја пробале понудата, оваа недела е одлична можност да го направат првиот избор.

Денеска, 31.08.2026, во 13.00 часот, во големата сала на Центарот за култура “Марко Цепенков”, ќе се одржи комеморација за прерано починатиот режисер и драматург од Прилеп, Кирил Петрески.

Кирил Петрески беше член на колективот на НУЦК „Марко Цепенков“ – Театар „Војдан Чернодрински“, каде од 2013 година работеше како драматург и режисер. Со својата долгогодишна и посветена работа, Кирил Петрески остави значајна трага во театарскиот живот и развојот на Театарот „Војдан Чернодрински“, но и свој препознатлив печат во македонскиот театар.

Петрески дипломирал на Катедрата за театарска режија при Факултетот за драмски уметности во Скопје, во класата на проф. Слободан Унковски, со претставата „Фарса за храбриот Науме“ од Русомир Богдановски.

Во Театарот „Војдан Чернодрински“ ги режираше претставите „Уште една за по пат“ од Харолд Пинтер, „На трета мајка“ од Петар Петрески, „Духот…“ според дела од Војдан Чернодрински и Горан Стефановски, „Сатирикон или големата гозба“ од Петрониј Арбитер, „ММЕ кој прв почна“ од Дејан Дуковски, „Роберто Зуко“ од Бернар-Мари Колтес, „Четвртата сестра“ од Јануш Гловацки, „Малиот принц“ од Антоан де Сент-Егзипери, „Маратонците го трчаат почесниот круг“ од Душан Ковачевиќ, „Сонот на Цепенков“ според Марко Цепенков, „Како се станува цар“ од Афродита Кирјаковска, „Хамлет од Горно Дупени“, според „Хамлет од селото Долна Мрдуша“ од Иво Брешан, „Демократија“ од Јосиф Бродски и „Ученикот“ од Мариус фон Мајербург. Со претставата „Четвртата сестра“ учествуваше на Македонскиот театарски фестивал „Војдан Чернодрински“.

Во НУЦК „Трајко Прокопиев“ – Театар Куманово ги постави „Варијации: диви пајки“ од Дејвид Мемет и „Не играј на Англичани“ од Владимир Ѓурѓевиќ, која беше дел и од официјалната програма на Македонскиот театарски фестивал „Војдан Чернодрински“ во 2010 година. Во НТ „Григор Прличев“ – Охрид ја режираше претставата „На дното“ според делото на Максим Горки.

„НУЦК „Марко Цепенков“ – Театар „Војдан Чернодрински“ упатува искрено сочувство до семејството, блиските, колегите и соработниците на Кирил Петрески. Неговото прерано заминување е голема загуба за Театарот „Војдан Чернодрински“ и за македонскиот театар воопшто. Нека почива во мир.

Со јубилејниот концерт по повод 30 години постоење на битолската група „Фолтин“ синоќа заврши годинашното битолски културно лето „Бит Фест“. Некои градови имаат публика, а Битола има соучесници, беше пораката на групата „Фолтин“, што синоќа само се потврди под отворено небо во „Хераклеја“.

„Од неколкумина љубопитни до генерации луѓе што ги знаат песните наизуст“ истакнаа од групата заблагодарувајќи се за како што велат, честа токму нивниот концерт да биде завршниот акорд на „Бит Фест 2026“.

„Бит Фест“ е фестивал кој ги обединува сите генерации, со програма креирана за секоја генерација од најмладите до највозрасните.

И оваа година на програмата беа традиционалните манифестации кои се дел од годишната програма за култура, како „ Битола отворен град“, „Илинденски денови“, „Солстис“, „Локум фест“, „Бела ноќ на Широк Сокак“, „Незаборав“, а од годинава за прв пат и фестивалот „Битолски чалгиски денови“ каде звукот на чалгијата и радоста одекнаа од Старата чаршија.

Интересот и присутноста на публиката на секој настан, големите аплаузи беа награда за уметниците, но и за Културниот и информативен центар кој за првпат годинава го реализираше овој фестивал со поддршка на Општина Битола.

Разиграно и распеано беше на повеќе локации, овде пред и во Офицерскиот дом, Хераклеја, Широк сокак, Старата чаршија, Пациото, Центарот за култура, театарот.

Освен битолчани, програмата беше привлечна и за туристите кои ја посетија Битола и за бројните иселеници кои летово беа дојдени во родниот крај.

Во изминатите два месеци се одржаа повеќе 70 настани, а бројот на посетители е над 25.000.