Србинка сподели едно пријатно искуство, кое таа и нејзиното семејство го дожвеале во Прилеп на враќање од одмор од Грција.

Надежда Чортановиќ и семејството преку граничниот премин Меџитлија се упатиле кон дома, но на пат решиле да застанат и да го посетат нашиот град и да, единствено за да си купат вкусен прилепски бурек за доручек.

Но биле изненадени кога на каса не можеле да платат со картичка, па луѓето се почувствувале непријатно, но потоа следувало ново пријатно изненадување.

Во буркџилницата чекале на ред едно младо момче и еден по возрасен прилепчанец. Тие извадиле пари и им го платиле доручекот. Притоа српските туристи инсистирале кога ќе обезбедат денари да им ги вратат, но нивниот предлог бил одбиен од овие наши добранемерни соѓраѓани, со желба да им биде на здравје доручекот и среќен патот.

Објавата на Надежда на социјалните мрежи наиде на илјадници лајкови и стотици коментари од целиот Балкан.

Секоја чест за непознатите херои кои во оваа ситуација ја спасиле честа на Прилеп и прилепчани и успеале всушност да не’ претстават онакви какви што сме, гостопримливи и луѓе со големи срца.

Високите температури и животот без клима е речиси незамислив. Меѓутоа, штом ќе го земете далечинскиот управувач, се поставува друго прашање, колку ќе биде сметката за струја.

Дали навистина штедите струја со исклучување на климата кога не сте дома или подобро е да ја оставите климата да работи на иста температура цел ден?

Експертите велат дека системот за ладење на просторот најдобро функционира кога работи со полна брзина, а не кога работи во пократки интервали со помала брзина.

Поточно, подобро е да ја оставите климата да работи со полна моќност, кратко време, а потоа да ја исклучите кога ќе ја излади просторијата, отколку да ја оставите да работи цел ден на иста температура.

Во овој, полн интензитет на работа, клима уредот не само што ќе ви заштеди пари, туку и ќе ја избрка влагата од просторијата.

Исто така, кога се зборува за заштеди и клима, не можеме да го заобиколиме термостатот. Ако го поставите термостатот на клима уредот на повисока температура, да речеме дека разликата помеѓу температурата во просторијата и надворешната не е повеќе од седум степени, ќе заштедите многу.

Според некои податоци, клима уредите трошат три до пет проценти помалку енергија со секој степен повисок на термостатот.

Општина Ѓорче Петров направи нов, значаен чекор во унапредувањето на социјалната заштита и инклузијата на локално ниво. Денес е потпишан договор за грант со Министерството за социјална политика, демографија и млади и Светска банка, како дел од Третиот јавен повик за развој на социјални услуги, се вели во соопштението од општина Ѓорче Петров.

Партнер во реализацијата на проектот е Здружението за поддршка и третман на лица со аутистичен спектар и атипичен развој „Во мојот свет“ – Скопје, давател на лиценцирана социјална услуга со долгогодишно искуство.

Во рамки на овој проект, ќе се воспостави Центар за дневен престој и индивидуален третман на лица со попреченост, кој ќе овозможи стручна, персонализирана и континуирана поддршка за две целни групи: деца од 1 до 14 години, кои ќе добиваат рана интервенција и стручна поддршка за говорен, моторен и когнитивен развој и млади лица од 14 до 26 години, за кои ќе се реализираат индивидуални и групни програми за развој на социјални и животни вештини, самозастапување, физичка активност, вклучување во заедницата и подготовка за пазарот на труд.

Центарот ќе биде сместен во простории во сопственост на општината, кои ќе се адаптираат и опремат со современа опрема – вклучително и пристапен лифт, специјализиран мебел и технолошки помагала за пристапност и комуникација. Услугата ќе ја реализира стручен мултидисциплинарен тим составен од дефектолози, логопеди, психолози и други професионалци, под раководство на здружението.

-Со овој центар не само што создаваме пристап до стручна поддршка, туку градиме општина по мерка на сите – општина на солидарност, човечност и инклузија,- изјави градоначалникот Александар Стојкоски.

Општината ќе обезбеди координација, инфраструктурна поддршка и видливост на активностите. Со воспоставувањето на овој центар, Општина Ѓорче Петров демонстрира силна определба за градба на инклузивно и хумано општество, кое ги препознава и поддржува потребите на сите свои жители, особено најранливите категории.

Општината уште еднаш покажува дека е општина која препознава, разбира и дејствува во интерес на сите граѓани. Иницијативноста, заложбата и вредната работа на локалната самоуправа се клучен двигател за создавање подостоинствен живот за лицата со попреченост и нивните семејства.

Во просториите на Видеолотарија Касинос Австрија денес беше потпишан нов спонзорски договор со Кошаркарската федерација.

Соработката со КФСМ е континуитет на нашата заложба за унапредување на спортот во Македонија. Веруваме дека со здружени сили – играчи, навивачи, институции и компании – можеме да стигнеме до победа“, истакнуваат од Видеолотарија Касинос Австрија.

Претседателот на Кошаркарската федерација на Македонија -Томе Главчев ја изрази својата благодарност нагласувајќи дека Видеолотарија Касинос Австрија е меѓу првите компании кои уште веднаш реагираа на нивното барање за поддршка на федерацијата.

И потпретседателот- Младен Ѓуроски, ја изрази својата благодарност за поддршката, нагласувајќи ја важноста од вакви партнерства за развојот на македонската кошарка и спортот воопшто. Тој пред медиумите го претстави и дресот со аплицираното лого на Видеолотарија.

Видеолотарија Касинос Австрија најави дека со гордост и задоволство ќе биде дел од спортските натпревари на федерацијата, навивајќи заедно со сите кои веруваат во црвено-жолтите. Натпревари за кошаркарите се шанса да се покаже тимскиот дух и борбеност, а за нас како општествено одговорна компанија и нова можност да ја докажеме нашата поддршка и верба во кошаркарските успеси.

Денес на стартот од подготовките за новата сезона, Градскиот фудбалски клуб „ТИКВЕШ 1930“ од Кавадарци го одржа првиот прес по правземањето на клубот од страна на германскиот инвеститор Осман Таш, кој заедно со Градоначалникот Митко Јанчев и Општина Кавадарци ќе го водат клубот во иднина.

Пред почетокот на подготовките за новата натпреварувачка сезона, новиот газда акцент става на модернизација на тренажниот процес, професионален пристап кон фудбалерите, со максимална посветеност и влог во младите категории, за остварување на што подобри резултати во иднина, гледајќи го клубот во европските натпреварувања.

Исто така најави отварање на голем фан-шоп во центарот на Кавадарци во соработка со навивачката група Лозари-Исток.

Претседателот на клубот Миле Масларков изрази големо задоволство што повеќемесечните преговори со новиот инвеститор завршија со договор за соработка и е оптимист дека клубот во новата сезона ќе биде стабилен прволигаш.

Новиот Директор на клубот – Емир Шабани најави нови фудбалски имиња и поголем ростер на играчи како и неколку меѓународни засилувања.

ГФК Тиквеш подготовките ги започнува денес 03.07.2025 година во 18:00 часот на Градскиот стадион во Кавадарци, а од 15 до 25 Јули заминуваат на подготовки во Турција.

Она што пред два месеци го најави при посетата на ТИРЗ Прилеп, актуелниот заменик министер за економија и труд, Марјан Ристески, денеска станува реалност.

Ристески заедно со директорот на Дирекцијата за Технолошки-индустриски развојни зони, Гоце Димоски, тогаш најавија инвестиции од постојните фабрики, но и интерес за инвестирање од други инвеститори за изградба на нови производствени капацитети.

Два месеци подоцна, американскиот гигант “Гентерм” ја објави својата нова инвестиција, односно проширување на постоечкото производство со дополнителни капацитети.

-Инвестицијата ќе изнесува повеќе од 30 милиони евра со 300 нови вработувања. Ова значително ќе го зголеми извозот и ова е високо технолошко производство кое докажува дека сме конкурентни и на тој пазар – објави на социјалните мрежи премиерот Христијан Мицкоски, кој денеска имаше средба со раководството на компанијата.

Токму американски “Гентерм” беше првата фабрика во ТИРЗ Прилеп. Фабриката ја отворија во време кога во градот под Марковите Кули имаше цела армија на невработени лица – или близу 18.000. Од тука својот леб денеска го заработуваат околу 2.000 наши сограѓани, а дополнително и голем број други помали фирми кои се добавувачи со различни репроматеријали, храна и сл.

Во ТИРЗ Прилеп успешно функционираат уште две странски компании – фабриката на “ВИК”, која веќе изгради дополнителни производствени капацитети, како и фабриката на “АКОМПЛАСТ”.

Oвие компании значеа залечување на девастираната прилепска економија и донесоа конкуренција во понудата за работна сила, а со тоа и раст на платите на работниците.

Прилепчани се сеќаваат на поставувањето камен темелници пред десетина години, но за жал во изминатите 8 години немаше нови инвеститори кои дополнително би придонеле за раст на побарувачката на работна сила, а со тоа и на платите.

-Gentherm со овој нов инвестициски циклус се потврдува она што сите го чувствуваме – дека Македонија станува сигурна дестинација за долгорочни, стратешки и технолошки напредни инвестиции – напиша Мицкоски на ФБ.

-На 02.07.2025 во 15.22 часот во СВР Битола е пријавено дека на кружен тек од ул. „Булевар 1 Мај“, ул.„Марко Цепенков“ и ул.„Девеани“ во Битола се случила сообраќајна несреќа помеѓу патничко возило „бмв“ со тетовски регистарски ознаки, управувано од А.А.(41) од Кичево и мопед „лонгија“ со битолски регистарски ознаки, управуван од А.И.(22) од Битола. Во несреќата со тешки телесни повреди се здобиле возачот на мопедот и неговата сопатничка С.И.(50) од Битола, констатирани во Клиничка болница Битола. Извршен е увид од јавен обвинител и увидна екипа од СВР Битола – информираат од СВР Битола.

Македонскиот математички генијалец Македон Димитровски постигна извонреден успех на два престижни Меѓународни математички турнири што се одржаа во бугарскиот град Несебар.

Таму вчера завршија два престижни меѓународни математички турнири – „Математика без граници“ и турнирот по алгебра „Лодовико Ферари“, на кои учествуваа натпреварувачи од 42 земји, вкупно 875 учесници.

На натпреварот „Математика без граници“, Македон освои повеќе престижни награди:

*Математичка ѕвезда на турнирот

*Пехар III – Купот на „Математика без граници“

*Сребрен медал по алгебра

*Бронзен медал на основниот турнир

„Денес заврши интернационалниот турнир „Математика без граници“ и турнирот по алгебра Лобовико Ферари, каде учествуваа 42 земји со 875 учесници. Македон уште еднаш го прослави името на Македонија и го виореше македонското знаме во Бугарија. Браво Македон, горди сме на тебе!“ – напиша на Фејсбук таткото на малиот математички гениј, Владимир Димитровски.

-На 02.07.2025 во 01.30 часот полициски службеници од ОВР Прилеп од ул.”Кузман Јосифоски” во Прилеп ги лишиле од слобода А.М.(22), П.М.(33) и Ј.М(33), сите од Прилеп бидејќи истите го нарушувале јавниот ред и мир со меѓусебна тепачка.

Се преземаат мерки за расчистување на настанот и по документирање, против лицата ќе следуваат соодветни пријави  – информираат од ОВР Прилеп.

Битолското културно лето „БИТ ФЕСТ“, вечерва во Офицерскиот дом во Битола со почеток во 21:00 часот, ќе биде домаќин на прекрасна вечер во која музиката низ Проектот „Мевлем“ ќе зборува за љубовта, болката и надежта…

Проектот „Мевлем“, претставува уникатен спој на авторска музика и поезија од композиторот и поет Марко Виденовиќ, кој наиде на извонреден прием и сериозен одек меѓу публиката и културната јавност, како во земјава така и надвор од неа.

Со секој од досега реализираните концерти, „Мевлем“ не само што ја потврдува својата уметничка автентичност, туку и се етаблира како проект со исклучителен емотивен и социјален капацитет. Неговата досегашна реализација покажа дека публиката, без оглед на културниот контекст, препознава искреност, длабочина и убавина.

Музичкиот состав „Мевлем“ е составен од музичарите: Памела Велкова – виолина, Верица Ајтовска – виола, Енис Аљи – виолончело, и самиот автор Марко Виденовиќ – пијано и глас, кои досега концерти одржале во: Загреб, Белград, Скопје, Битола, Охрид, Гевгелија и Велес.

Во вечерашната програма се вбројуваат композиции кои се специјално создадени за проектот „Мевлем“ и претставуваат иновативен пристап кон камерната музика и современата поезија.

„Мевлем“ е повеќе од концерт – тој е уметничка исповед, место каде поетскиот збор не се чита туку се чувствува, каде што музиката не се слуша туку се доживува. Создаден од композиторот и поет Марко Виденовиќ, овој проект е интимен дијалог помеѓу музиката и зборот, меѓу солистите и тишината, меѓу публиката и нејзините најдлабоки емоции.

Композициите, инспирирани од лична и колективна болка, љубов, надеж и тишина, се изведуваат од музичари кои со секој тон ја раскажуваат таа внатрешна вистина. Влијанието што овој проект го има врз публиката е од оние ретки, длабоки уметнички впечатоци што долго остануваат со човекот.

„Мевлем“ во својата суштина има потреба – да се понуди лековитост преку уметноста, да се овозможи допир со нешто исконско, нешто што ги надминува жанровите и формите.

„Целта никогаш не беше само да се приреди концерт, туку да се отвори простор за уметнички дијалог, за разбирање и заедништво. Резултатите од тоа не се само мерливи преку број на публика, аплаузи или медиумски интерес – туку преку тишината меѓу две композиции, преку солзите по последниот акорд, преку луѓето што приоѓаат по концертот не за да честитаат, туку за да споделат своја приказна. А токму тоа, всушност, беше и крајната цел, “, вели Марко Виденовиќ, автор на Проектот „Мевлем“, кој вечерва ќе биде претставен пред публиката во Битола.