Прилепчани, веројатно најмногу од сите Македонци се емотивно поврзани со борбената химна на македонските партизани – А, бре Македонче, тоа е така и заради 11. Октомври и затоа што песната е создадена од тројца Прилепчани, првоборци партизани: Крсте Црвенковски, Коле Чашуле и Ордан Михајлоски – Оцката.
На 8 ноември – Митровден, пред точно 85 години, во 1941-та година, во прилепското село Царевиќ првпат е изведена познатата македонска борбена, патриотска песна „А бре Македонче“. Песната ја извеле партизаните од одредот „Гоце Делчев“ на територијата која се смета за прва слободна во почетокот на Народноослободителната борба и Народната револуција.
Песната веднаш била прифатена. И од борците и од населението. За брзо станала препознатлива не само во Прилепско, туку и низ цела Македонија. Станала химна, не само на Првиот прилепски партизански одред „Гоце Делчев“, туку и на другите партизански одреди, односно на целото партизанско и антифашистичко движење во Македонија
Песната „А бре Македонче!“ во форма на музика за филм се пее во првиот македонски игран филм „Фросина“ во 1952 година, по сценарио на Владо Малевски, а во режија на Воислав Нановиќ. Музиката во филмот му е доверена на македонскиот композитор Трајко Прокопиев, кој, воедно, е и диригент на Оркестарот на државната филхармонија.