-На 26.07 2025 во ОВР Прилеп било пријавено дека околку 19.00 часот на ул.„Архиепископ Доситеј“ во с.Крушеани, општина Кривогаштани, се случила сообраќајна незгода помеѓу патничко возило „фолксваген“ со прилепски регистарски ознаки, управувано од Н.Ѓ.(32) од с.Крушеани и патничко возило „шевролет“, сопственост на МВР. Во незгодата со телесни повреди се здобил Н.Ѓ., констатирани во Општа болница Прилеп. Извршен бил увид од увидна екипа од ОВР Прилеп – информираат од МВР.
Актуелниот заменик министер за економија и најуспешен градоначалник во историјата на Македонија, Марјан Ристески, објави фотографии од семејна дружба со своите братучеди – кои живеат во различни краишта во светот.
Македонија, Германија, Австралија, Холандија, Луксембург… различни нации, различни континети, но исти корени, но функционираме како еден тим – напиша Ристески на Фејсбук.
На фотографиите кои ги објави, тимот носи дресови на македонската фудбалска репрезентација, а Ристески е во улога на тренер.
-На 26.07 2025 во 12.00 часот во ОВР Прилеп било пријавено дека на излезот од Прилеп, патничко возило „мерцедес“ со прилепски регистарски ознаки, управувано од 18-годишната И.В. од Прилеп, излетало од патот. Во несреќата со тешки телесни повреди се здобила И.В., констатирани во Опшата болница Прилеп. Извршен бил увид од увидна екипа од ОВР Прилеп – информираат од МВР.
Регионалната дирекција на УЈП Прилеп само во последниве шест месеци направила преку 180 контроли во објекти каде што се вршеле готовински плаќања, пришто кај шеесетина даночни обврзници биле констатирани неправилности, а на двајца им е изречена и мерка за времена забрана за вршење на дејноста. „Битката“ со несовесните даночни обврзници е во врвот од приоритетите на оваа институција, уверуваат од УЈП Прилеп – oбјави “АЛФА ТВ”.
„УЈП има извршено 183 контроли на територијата на Регионална дирекција Прилеп, од кои што 66 се контроли со утврдени неправилности. Тоа значи – не издавање на фискални сметки и непоседување на фискални сметки. А од овие 66 даночни обврзници имаме за двајца даночни обврзници кои што се со времена мерка за забрана за вршење на дејноста во траење од 15 дена“, – изјави Александар Мирчески, управник на РД на УЈП – Прилеп.
Дека државата бескомпромисно се обидува да стави ред и во овој сектор, се и последните податоци од УЈП за направените контроли на ниво на држава од 14 до 20 јули. Контролите биле спроведени кај 353 субјкети. Кај 100 од нив биле утврдени неправилности при што изречени се 82 глоби за неиздавање на фискални сметки, 3 глоби за невоведување и некористење на фискален систем, 10 глоби за неводење на Книга за дневни финасиски извештаи, 3 глоби за фискална сметка без пропишани елементи, една глоба за невоведена резревна фискална апаратура и една глоба, согласно Закон за даночна постапка, заради одбивање да соработува.
Веќе од денеска пак, УЈП најави засилени контроли и на такси-превозниците во целата земја, а особено во туристичките места. „Овие даночни обврзници се должни да имаат фискален апарат, да издаваат фискална сметка за секоја услуга, да го евидентираат дневниот промет на трансакциска сметка кај носителот на Платен промет најдоцна до наредниот работен ден, но и да имаат јасно и видливо соопштетние за задолжително издавање, барање и добивање на фискална сметка“, – информираат од УЈП.
Истовремено, од УЈП упатавуваат апел и до граѓаните да ги пријавуваат сите забележани неправилности при било кое плаќање на бесплатниот телефонски број 198, по што УЈП ги разгледува добиените претставки и постапува согласно своите ингеренции.
Инаку, според Законот за ДДВ, секој даночен обврзник кој што остварува приходи и промет над 2 милиони денари, е регистриран како ДДВ-обврзник.
KAРОЛИНА ДУРЛО ЗА “АЛФА ТВ”
Центарот за управување со кризи информира за состојба со пожарите.
Како што велат, во текот на изминатото деноноќие евидентирани се вкупно 33 пожари на отворен простор, од кои:
АКТИВНИ ПОЖАРИ (12):
1. Василево / Радовиш / Берово – с. Нивичино, планина Голем Готен и Малешевските планини (нискостеблеста шума, смрека, грмушки и ниска вегетација);
2. Прилеп 1 – с. Бешиште, Бешишки Рид, кон с. Градешница (Новаци) и крак кон границата со Р. Грција (мешана шума);
3. Прилеп 2 – активен крак кон с. Дрен, проширен кон с. Галиште (Кавадарци); под контрола помеѓу Царевиќ и Смолани (мешана шума и нискостеблеста вегетација);
4. Македонски Брод – помеѓу Црешево, Локвица и Крапа (деградирана дабова шума, грмушки и ниска вегетација);
5. Желино – помеѓу с. Церово и с. Групчин (нискостеблеста и деградирана шума);
6. Петровец – с. Средно Коњаре, крај р. Пчиња (мешана шума);
7. Зелениково – с. Гумалево (ниска и мешана вегетација);
8. Крива Паланка – с. Нерав (висока борова шума);
9. Старо Нагоричане / Куманово – с. Облавце, Бељаковце, Довезенце, Јачинце (ниска вегетација);
10. Старо Нагоричане – с. Руѓинце (ниска вегетација);
11. Василево 1 – с. Сушево (грмушки и ниска вегетација);
12. Василево 2 – с. Добрашинци (грмушки и ниска вегетација).
Известување до граѓаните од општина Прилеп:
Општина Прилеп ги известува граѓаните дека водата во Лок. в.с. Канатларци (бензинска), Ерековци (Кочоски Пецо) и Тројкрсти (двор), не е здравствено исправна. Водата во овие населени места не смее да се користи без претходно вриење од 10 минути,информираат локалните власти.
Со традиционалното фолклорно дефиле насловено „Со песни и игри низ битолските улици“ од Плоштадот Магнолија, низ Широк Сокак, до
Офицерскиот дом, свечено беше означен почетокот на годинашниот Републички фестивал на народни песни и игри „Илинденски денови“.
Во дефилето учествуваа дел од домашните и странски фолклорни ансамбли, меѓу кои и гости од Хрватска, Мексико, Грузија, Индонезија, Полска,
Швајцарија и други земји, носејќи ја шареноликоста на своите традиции низ срцето на Битола.
Програмата продолжи на Платото пред Офицерски дом со изведбата на орото „Комитско“ од страна на членовите на КУД „Илинден“ од Битола и свечените обраќања и поздравни говори од страна на поддржувачите на Републичкиот фестивал кој го слави фолклорното богатство и културното наследство.
Градоначалникот на општина Битола, Тони Коњановски, посакувајќи им топло добредојде на гостите и учесниците на фестивалот, нагласи дека културата е најсилниот глас на Битола – тивка кога треба, понекогаш гласна, но секогаш горда и жива.
„Овие денови, почнувајќи од 18 јули, па се до 31 јули, Битола е претворена во сцена на звуци, бои, носии, ора и песни од целиот свет. Со над 70 фестивалски настани, повеќе од 1300 учесници, 30 ансамбли од Македонија и интернационални гости од Швајцарија, Индонезија, Мексико, Грузија, Полска и Хрватска, Битола овие денови повторно станува центар на светскиот фолклор, простор за дијалог меѓу културите, за научна мисла, за креативност и за нови начини на претставување на традицијата.
Од најпрепознатливиот белег на фестивалот, Дефилето со песни и игри низ битолските улици, кој го привлекува вниманието на битолчани и на сите посетители на Битола, преку неизбежниот звук на „Kомитското“ во изведба на КУД „Илинден“ кое ја отсликува македонската историја, традиција и болка, па се до семинарите во кои што сите учесници учат нешто ново за македонската традиционална музика и македонските ора, фестивалот „Илинденски денови“ никого не го остава рамнодушен.
Тоа што го правиме денес, е она што ќе остане утре за нас, нашите деца и внуци, генерациите кои доаѓаат. Да не заборавиме дека културното
наследство не е само сеќавање туку нешто што треба да се негува, споделува и осовременува.Токму затоа, овогодинешниот слоган „Денес за утре“, јасно ја отсликува идејата на фестивалот „Илинденски денови“, но ја претставува и нашата обврска како граѓани: да не заборавиме од каде сме и да им го пренесеме тоа знаење на оние после нас.
Да ја негуваме традицијата, но и да ја носиме храбро кон иднината – со љубов, енергија и отвореност за соработка и разбирање. Во мое лично име и во име на Општина Битола, им благодарам на сите организатори, уметници, волонтери и поддржувачи што овозможија ова издание да биде уште едно незаборавно поглавје во големата приказна што
ја пишува нашиот фестивал „Илинденски денови“, кој е дел од Битолското културно лето“, рече градоначалникот Коњановски во своето обраќање пред присутните.
Програмата на Републичкиот фестивал „Илинденски денови“, продолжува до 31 јули и се реализира како дел од програмските содржини на „БИТ ФЕСТ“.
На 27.07.2025 во 02.40 часот на ул.„Крушевска Република” во Битола, полициски службеници од СВР Битола го лишиле од слобода А.С.(34) од Битола. При контрола на патниот сообраќај, полициските службеници запреле возило „форд” со битолски регистарски ознаки, кое го управувал А.С., и по преземени мерки било констатирано дека е под дејство на алкохол, односно му биле измерени 1,80 промили алкохол во крвта.
На 27.07.2025 во 02.00 часот на ул.„Александар Македонски” во Прилеп, полициски службеници од СВР Битола-ОВР Прилеп ја лишиле од слобода Л.А.(32) од Прилеп. При контрола на патниот сообраќај, полициските службеници запреле возило „мерцедес” со прилепски регистарски ознаки, кое го управувала Л.А., и по преземени мерки било констатирано дека е под дејство на алкохол, односно ѝ биле измерени 1,91 промили алкохол во крвта.
Дариан Бутле, млад музички талент со потекло од Прилеп, кој живее во Скопје, претставува блескав пример за тоа што може да се постигне со искренa љубов кон музиката, многу посветеност и неуморна работа.
За само седум месеци активно учење, со секојдневно вежбање по два до три часа, Дариан настапи на голема сцена како најмладиот пијанист во рамки на културната манифестација „Египетски караван“ во Културно-информативниот центар во Скопје. Неговиот настап предизвика голем интерес и одушевување кај публиката и ја потврди неговата исклучителна музичка зрелост за неговата возраст.
Покрај класичната музика, Дариан ја проширува својата музичка авантура и на полето на поп музиката. Во моментов е дел од неколку младински музички состави, а веќе добива ангажмани во некои од најперспективните поп бендови за млади до 16 години.
Успесите на Дариан се само почеток. Со ваков талент, дисциплина и страст, увереноста дека неговото име ќе го слушаме сè почесто и на сè поголеми сцени е повеќе од оправдана.
Следиме со восхит и веруваме дека ова е само почеток на едно големо музичко патување.
Со финансиска стабилизација, нова медицинска опрема, кадровско зајакнување и расчистување на криминалот, Општата болница во Прилеп постигна огромен напредок за само една година. Тоа го соопшти директорот на Фондот за здравствено осигурување на Македонија, Сашо Клековски, по денешната посета на установата, каде оствари средба со директорот на болницата, д-р Кире Јоноски.
– Пред само една година, болницата беше меѓу најзадолжените во државата. Долгот изнесуваше над 200 милиони денари. Денес, со домаќинско работење и поддршка од Фондот, тој долг е намален на 109 милиони денари – изјави Клековски, оценувајќи го напредокот како резултат на тимска работа и решителен менаџмент.
Болницата во Прилеп е меѓу првите здравствени институции што поднесоа кривични пријави и добија судска пресуда во борбата против криминал и корупција.
Во меѓувреме, сериозни подобрувања се направени и на медицински план, набавена е нова опрема за одделенијата за урологија, ортопедија и стерилизација, обновено е одделението за интензивна нега на гинекологија, а повторно се вршат интервенции на колено, кои долго време беа во застој.
– Покрај медицинската грижа, отворивме и Школа за трудници, безбеден и топол простор каде идните мајки и татковци добиваат поддршка и знаење на патот до родителството – додаде директорот на Фондот.
Во болницата се вработени над 120 нови здравствени работници, од кои 21 доктор, а наскоро се очекуваат и нови вработувања за специјализанти. Се решава еден од најгорливите проблеми, недостигот од персонал.
Дополнително, позитивните промени ги мотивираа и локалните бизниси, сè повеќе општествено одговорни компании од Прилеп донираат инвентар и опрема за болницата.
– Болницата станува симбол на доверба и развој. Имаме уште многу планови, но ова е доказ дека кога има волја, има и резултати – заклучи Клековски.
