-На 10.10.2026 во 19:10 часот полициски службеници од ОВР Прилеп, на патот Прилеп-с.Селце,прилепско лишија од слобода двајца малолетници на возраст од 16 и 17 години затоа што при преглед кај истите била пронајдена марихуана. По документирање на настанот ќе следува соодветен поднесок, информираат од МВР.
По 10 години од проектирањето денеска официјално почна изградбата на автопатската делница од Букојчани до Кичево. Таа е дел од Коридорот 8 и ќе ги поврзува автопатот од Кичево до Охрид и од Тетово преку Гостивар до Букојчани.
Автопатот ќе има две сообраќајни ленти и една лента за застанување во двете насоки, а брзината на движење ќе биде од 110 до 130 километри на час. На автопатската делница ќе има пет мостови, еден тунел, два вијадукти и две клучки. Планирано е да се изгради за четири години.
Финансиските средства се обезбедени преку ЕБОР во висина од 119 милиони евра, а дополнително 20 милиони евра се грант од Европската унија и 300 илјади евра се обезбедени преку Фондот на Европската унија за Западен Балкан.
Премиерот Христијан Мицкоски, кој се обрати на официјалниот почеток на изградбата, рече дека со оваа автопатска делница целиот проект добива смисла затоа што автопатски Скопје се поврзува со Охрид.
– Политиката на оваа Влада кога беше избрана во 2024 година беше да ја направи земјата раскрсница која што ќе се темели на четири столба. Тогаш почнавме со три столба но некако како одминуваше времето таа наша цел и тој предизвик го проширивме и денеска зборуваме за четири столба. Тоа е да бидеме раскрсница на два паневропски коридори – Коридорот 8 и Коридорот 10 во смисла на патна инфраструктура, железничката инфраструктура, енергетската инфраструктура и гасната инфраструктура.
На тој начин, геостратешкото значење на земјата станува навистина нешто кое што претставува поголема моќност за сите граѓани, но претставува и предуслов да се развиваат современи индустрии, а државата добива навистина нешто поголемо, голема додадена вредност кога станува збор со споредбата и компарацијата со годините во во минатото, рече Мицкоски во обраќањето.
По 27 месеци од доаѓањето на Владата, рече Мицкоски, се појавуваат и првите индикатори кои покажуваат дека државата се движи во вистинска насока.
– Првите индикатори за работата на оваа Влада по 27-28 месеци посветена работа резултира со бројни проекти и консолидирање во услови кога ја затекнавме државата која што беше упатена директно кон амбисот и во услови кога светот се соочува со епски најголема енергетска криза што човештвото ја памети, нагласи Мицкоски.
Био Ентерпрајз, компанија од групацијата ФЕРО ИНВЕСТ / ЦЕНТРАЛ ИНВЕСТ, доби плакета за благодарност од „Макпрогрес“ за помошта што ја обезбеди при големиот пожар кој пред една година зафати дел од фабриката на македонскиот бренд „Винчини“ во Виница.
Веднаш по избувнувањето на пожарот, од биогасната електрана Био Ентерпрајз, лоцирана близу Свети Николе, самоиницијативно беа испратени цистерни со вода кон Виница за да помогнат во гаснењето на огнот.
На настан одржан една година по пожарот и по обновувањето на оштетените производствени капацитети, „Макпрогрес“ им оддаде признание на сите што помогнале во тие тешки моменти, потсетувајќи на значењето на солидарноста и подадената рака кога е најпотребна.
За нас, ова признание има посебна вредност, не само како израз на благодарност, туку и како потврда за важноста на меѓусебната поддршка во деловната заедница.
Веруваме дека на бизнис-секторот му се потребни здрава конкуренција и успешни компании, но исто толку му се потребни солидарност, меѓусебна почит и подготвеност за помош.
Тие вредности се во интерес не само на поединечните компании, туку и на целокупната македонска економија и општеството.
Горди сме што можевме да подадеме рака и да помогнеме во момент кога помошта беше најпотребна и им посакуваме понатамошни големи деловни успеси на нашите пријатели ,,Винчини”.
Во просториите на СОУ “Орде Чопела” во Прилеп, а по повод 11.Октомври-Денот на народното востание, се одржа шаховскиот Рапид турнир „МАТ 2026“. Турнирот беше во чест на прилепските шаховски легенди, а годинашното издание привлече рекордни 174 шахисти од осум држави и два континента – Европа и Америка.
На шаховските табли се натпреваруваа играчи од Македонија, Мексико, Србија, Косово, Грција, Црна Гора, Албанија и Бугарија, што дополнително го потврди меѓународниот карактер на турнирот.
Сосема заслужено, со смирена и зрела игра, победник на турнирот и освојувач на златната статуетка стана македонскиот велемајстор Звонко Станојоски, кој освои одлични 7,5 поени.
Второто место му припадна на репрезентативецот на Косово, Мухамет Аслани, со 7 поени, кој благодарение на најдобриот бухолц го освои сребрениот медал. Бронзата ја освои македонскиот репрезентативец Никола Николовски.
Со ист број поени како освојувачот на бронзата, турнирот го завршија и Сулејман Суљовиќ од Србија на четвртото место, Дејан Стојановски на петтото, мексиканскиот шахист Фого Ескувел на шестото и Зимбери Астрит од Косово на седмото место.
Осми со 6,5 поени беше македонскиот репрезентативец Андреј Велјаноски, а со истиот број поени турнирот го завршија и Абдурахман Ахмет Селим и Енес Ѓаковац од Србија, кои ги освоија деветтото и десеттото место, со што се заокружи листата на десетте најуспешни шахисти.
Покрај главните награди, беа доделени и признанија во повеќе категории. Роберт Велески беше прогласен за најдобар играч од Општина Прилеп, Никола Павлески за најдобар млад играч, Теодора Ѓорѓиеска за најдобра шахистка, а Миле Трајковски за најдобар ветеран.
Посебно изненадување приреди Јован Дулев, синот на шаховскиот тренер Тане Дулев, кој на крајот од турнирот додели уште две дополнителни стокови награди – за најдобриот шахист под 18 години и за најдобриот шахист над 65 години.
Организаторите и учесниците имаа пофални зборови и за условите за игра, благодарение на љубезноста на домаќините, кои ги обезбедија сите потребни услови за реализација на еден меѓународен шаховски настан. За време на турнирот, шахистите имаа обезбедено ручек, вода, слатки производи, чај и кафе.
Од турнирот, учесниците си заминаа со убави спомени, нови познанства и желба повторно да се сретнат на шаховските табли. Организацијата и квалитетот на натпреварувањето се уште една потврда дека „МАТ“ прераснува во препознатлив шаховски бренд.
Честитки до сите наградени шахисти, а на останатите учесници им се посакуваат уште поголеми успеси на следните натпреварувања.
Почнува изградбата на автопатот Букојчани – Кичево. За денеска е закажан официјалниот почеток на изградбата на кој ќе присуствуваат премиерот Христијан Мицкоски, вицепремиерот и министер за транспорт Александар Николоски и директорот на Јавното претпријатие за државни патишта Коце Трајановски.
Оваа автопатска делница е дел од Коридорот 8 која ги поврзува превојот Стража со Кичево.
Проектот треба да се реализира во две фази – првата ја опфаќа трасата од селото Црвевци до Кичево, а втората од Долно Строгомиште до Црвевци.
Средствата се обезбедени преку заем од Европската банка за обнова и развој (ЕБОР) и грантови од Инвестициската рамка за Западен Балкан.
Спортската сала на СОУ „Ристе Ристески – Ричко“ беше домаќин на 16. Меѓународен традиционален турнир во џудо „Прилеп Град Херој – 2026“ – Цевитана куп. На турнирот настапија над 360 натпреварувачи од 40 клубови, од кои 25 странски и 15 од Македонија, претставувајќи девет држави: Србија, Бугарија, Грција, Косово, Албанија, Турција, Црна Гора, Словенија и Македонија.
Натпреварите се одржаа во машка и женска конкуренција во категориите деца У12, помлади пионери У14 и пионери У16, на четири борилишта. За регуларното одвивање на борбите се погрижија судии од Македонија и од странство.
Турнирот го организираше Џудо клубот „Сеишин“ – Прилеп, традиционално во чест на националниот празник 11 Октомври. Настанот е дел од програмата на Општина Прилеп за одбележување на празникот.
Свеченото отворање започна со обраќање на потпретседателот на Џудо федерацијата, Миодраг Стојановиќ, по кого се обрати џудо-експертот на Интернационалната џудо федерација, Георге Дани. Градоначалникот на Општина Прилеп, Дејан Проданоски, го прогласи турнирот за отворен, по што беше интонирана химната и започнаа борбите.
Посебен дел од настанот им беше посветен на џудо ветераните, кои одбележуваат десет години од формирањето на Иницијативниот одбор на џудо ветерани. Претседателот на Одборот и селектор на ветеранската репрезентација на Македонија, Киро Здравески, им додели признанија.
Најуспешни клубови по возрасни категории:
У12 – момчиња: ЏК „Панионис“, Атина, Грција
У12 – девојчиња: ЏК „Кастриоти“, Урошевац, Косово
У14 – момчиња: „Џудо Тим“, Турција
У14 – девојчиња: ЏК „Гњилане“, Гњилане, Косово
У16 – момчиња: ЏК „Тигар Академија“, Грција
У16 – девојчиња: ЏК „Сеишин“, Прилеп
Со големиот број учесници, меѓународниот карактер и силната конкуренција, Цевитана куп уште еднаш го потврди своето место меѓу препознатливите традиционални џудо настани во регионот и придонесе за достојно одбележување на 11 Октомври во Прилеп.
Kaко дел од програмата за одбележување на 11-ти Октомври – Денот на народното востание, традиционално во Прилеп и оваа година се одржа популарното Tunning Car Show.
Ова беше 18-то издание на оваа адреналинска изложба на автомобили, која како и секогаш предизвика огромно внимание кај прилепчани и посетителите во Прилеп денеска.
Голем број автомобили, меѓу кои најразлични луксузни лимузини, олдтајмери, џипови… беа изложени во централното градско подрачје и ги пленеја погледите на илјадниците граѓани кои денеска ја посетија оваа возбудлива изложба.
Ако пропуштивте, уживајте во фотографиите во продолжение:
Во рамки на настанот Car Show, кој денеска се одржа во Прилеп, „Авто Контрол“, заедно со учениците од сообраќајната струка при СОУ „Ристе Ристески – Ричко“, претставници на Министерството за внатрешни работи (МВР), Општинскиот совет за безбедност на сообраќајот на патиштата (ОСБСП) и најмладите, учествуваше во активности за подигнување на свеста за безбедноста во сообраќајот.
Преку дружење, едукација и заеднички активности, беше испратена важна порака дека сообраќајната култура се гради од најрана возраст, а почитувањето на правилата и одговорното однесување се клучни за поголема безбедност на сите учесници во сообраќајот.
Особено значајно е вклучувањето на најмладите во ваквите иницијативи, бидејќи токму преку навремена едукација се создаваат навики за безбедно однесување на патиштата.
Од „Авто Контрол“ порачаа дека соработката меѓу институциите, образовните установи и граѓаните е важен чекор кон унапредување на сообраќајната култура и создавање побезбедна иднина.
Почитувај ги сообраќајните правила, биди одговорен учесник во сообраќајот и едуцирај ги најмладите – за побезбедни патишта за сите!
На 16 октомври во 18:00 часот, Народниот театар Битола гостува со „Кориолан“ од Вилијам Шекспир на јубилејното 10. издание на меѓународниот театарски фестивал „Direction East“ во Бјалисток, Полска. Секое гостување надвор од границите на нашата земја е повеќе од сценски настап – тоа е можност македонската култура да биде видена, слушната и препознаена. Учеството на фестивал од меѓународен карактер отвора простор за размена на уметнички искуства, нови професионални контакти и идни соработки, а воедно го потврдува местото на Народниот театар Битола во современиот европски театарски простор.
Токму преку ваквите гостувања, театарот станува културен амбасадор на својата земја – носејќи ги со себе јазикот на уметноста, креативноста на нашите уметници и приказните што ги поврзуваат различните култури. По гостувањата на „Охридско лето“, Shakespeare Fringe Festival во Верона и „Magical Nights in Butrint“ во Саранда, „Кориолан“ продолжува да ја шири својата приказна пред меѓународната публика.
Претставата е во режија и адаптација на Џон Блондел. Современата адаптација на безвременската трагедија на Вилијам Шекспир отвора актуелни прашања за власта, политичката одговорност и односот меѓу поединецот и општеството. Во претставата играат: Васко Мавровски, Петар Горко, Марјан Георгиевски, Борче Ѓаковски, Петар Спировски, Јулијана Мирчевска и Сандра Грибовска Илиевска. Асистент на режија е младиот уметник и режисер Дамјан Димовски, сценографијата и костимите се на Благој Мицевски, дизајн на светло: Џонатан Хикс, светло мајстор: Горан Петровски, музика: Александар Димовски, видео: Владимир Переловски, инспициент: Оливер Петровски. Суфлер: Мирјана Христовска. Од Битола кон европските сцени – со гордост НТБ го претставува македонскиот театар и продолжува да гради мостови преку уметноста.
Против кого пукнала првата пушка на 11 Октомври 1941 година и како е можно СДСМ да организира марш против антифашизмот? – прашаа на прес конференција денеска од Движењето ЗНАМ за наша Македонија од Прилеп, по вчерашниот марш низ улииците на Прилеп, кој го органзираше Социјалдемократскиот сојуз.
Прес конференцијата на претседателот на огранокот на ЗНАМ од Прилеп, Емил Јанески, ја пренесуваме во продолжение:
“Вчера, на 10 октомври, СДСМ организираше марш низ улиците на Прилеп, во пресрет на 11 Октомври – Денот на народното востание, еден од најсветлите датуми во македонската историја.
По тој повод, ОО на Движењето ЗНАМ – За наша Македонија од Прилеп упатува две прашања до СДСМ.
Прво, против кого пукнала првата пушка на 11 Октомври 1941 година?
Против бугарските администратори или против бугарските фашистички окупатори?
Дали СДСМ ќе покаже одговорност и ќе се извини пред македонскиот народ за бришењето на зборовите „бугарски фашистички окупатор“ од спомен-плочите и спомен-обележјата на борците кои ги положија своите животи за слободата на Македонија?
Второ, како е можно СДСМ да организира марш против антифашизмот?
Дали станува збор за политичка грешка или за свесно напуштање на вредностите врз кои се темели македонската антифашистичка традиција?
Овие прашања се особено значајни кога ќе се има предвид и континуираното инсистирање на СДСМ за безусловно внесување на Бугарите во Уставот, без притоа да се обезбедат јасни гаранции за заштита на македонските национални интереси.
СДСМ мора да одговори дали сè уште ги почитува идеалите на партизаните, борците за слобода и градителите на современата македонска држава или антифашизмот денес го користи само како политичка реторика.
Антифашизмот не е партиска сопственост, ниту историска декорација.
Тој е темел на македонската државност и аманет од генерациите што се бореа за слободна Македонија.
Тие вредности не смеат да се релативизираат, ниту да се приспособуваат според дневнополитичките интереси.
Почитувани граѓани,
Нека ни е честит 11 Октомври – Денот на народното востание, денот кога македонскиот народ го крена оружјето против фашистичките окупатори и го започна патот кон слободата и сопствената државност.
Да живее Народноослободителната борба! Да живее Прилеп! Да живее Македонија!”
