Денес во 20.30 часот на стадионот во Охрид е првиот од серијата концерти од блокот „Силно светнал ден“ по повод 35 години независност.
Завршницата ќе биде на 8 септември со настап на Давид Гета на градскиот стадион.
„Силно светнал ден! 35 години независност!“ напиша во објавата на Фејсбук претседателот на Владата , Христијан Мицкоски.
Во преполната Ликовна галерија од ЦК”Марко Цепенков” во Прилеп, во петокот вечерта беше отворена изложбата на фотографии и дигитални дела “Дома” од прилепските уметници Александра Ацеска и Илија Ацески.
Изложбата ја отвори Филип Димкоски, кој посочи дека станува збор за поставка на фотографии и фотоманипулации, кои носат спој на две различни уметнички перцепции.
“Илија Ацески е конкретен, прецизен и рационален. Ја застапува аристотеловата теорија дека објектот постои само во онаква форма каква што ја гледа набљудувачот. Спротивно на таа прагматичност, за Александра Ацеска, водата не е само вода, ниту пак планината е само планина. Таа во водата ја бара длабочината, а по планинските височини трага до врвот на мудроста. Овде имаме спротивставеност на машката и женската енергија, на визијата на таткото и визијата на ќерката, на мудроста на искуството и на полетноста на младоста, на цврстината на коренот и на силата на крилјата…Слободата со која се создавани делата, им дава слобода и на посетителите делата индивидуално да ги толкуваат и да извлечат свои пораки, поенти и заклучоци, но упатува на тоа дека домот не е конкретен простор, туку специфична состојба на духот. Добредојдовте дома” – рече Димкоски на отворањето на изложбата.
Академската уметница Александра Ацеска живее и работи во Кина, има реализирано повеќе самостојни и групни изложби, а Илија Ацески долги години се занимава со фотографија.
Изложбата е поддржана од Министерството за култура и туризам.
Изминатата недела во Битола се реализираа повеќе значајни инфраструктурни активности, со фокус на подобрување на уличната мрежа и зголемување на бројот на паркинг места во градот.
Општина Битола продолжува со реализација на проекти насочени кон подобрување на сообраќајната инфраструктура, а само во изминатата недела беа реализирани активности на повеќе локации низ градот.
Во поранешната касарна е изграден нов паркинг простор на површина од 1.550 квадратни метри, со што се обезбедени 73 нови паркинг места. Вредноста на инвестицијата изнесува 6.256.014,18 денари.
Паралелно, се реализираше и проектот за реконструкција на улицата „Козара“, кој опфати асфалтирање на коловозот, како и реконструкција на водоводната и канализационата мрежа во должина од 230 метри. Вкупната вредност на инвестицијата е 4 милиони денари.
Дополнително, централното градско подрачје доби нов паркинг простор. Успешно е реализиран проектот за изградба на паркинг и уредување на просторот на улицата „Браќа Џаферови“. На површина од 1.100 квадратни метри обезбедени се 25 нови паркинг места, а вредноста на проектот изнесува 2.752.772 денари.
Интензивните активности продолжија и во близина на Здравствениот дом, каде покрај улицата „Козара“, се асфалтираа и улиците „11-ти Март“ и „Панде Николов“. Проектот опфаќа вкупна должина од 220 метри, а неговата вредност изнесува 6.073.392 денари.
Со реализацијата на овие проекти, во изминатиот период се вложуваат значителни средства во подобрување на условите за движење и паркирање во повеќе делови од Битола.
Инфраструктурните активности продолжуваат и понатаму. Од утре започнуваат градежните активности за изградба на уште еден нов паркинг простор во Битола, на локацијата позната како „Ат Пазар“, со што дополнително ќе се зголеми бројот на расположливи паркинг места во градот.
Од Општина Битола посочуваат дека посветено и со внимание се работи на подобрување на сообраќајната инфраструктура и создавање подобри услови за граѓаните.
Со новите паркинг простори, реконструираните улици и тековните инфраструктурни зафати, Битола продолжува со унапредување на градската инфраструктура и решавање на дел од сообраќајните предизвици со кои се соочуваат граѓаните.
Свети Пантелејмон се родил во Никомидија од татко незнабожец, Евсторгиј, и мајка христијанка, Евула. Во младоста ја изучи лекарската вештина. Подоцна поверува во Христа и се крсти. Господ му имаше дадено голема благодат да лечи од секакви болести, не само користејќи ја лекарската вештина, туку и со силна молитва.
Така излечи и еден слепец од кого сите лекари веќе беа дигнале раце. А тоа ги побуди истиве, поради нивната завист, да го обвинат пред властите како христијанин. Свети Пантелејмон беше ставен на маки, а откако стана јасно дека ништо не може да го поколеба во верата во преслаткиот Господ го испратија на губилиште, под некое маслиново дрво. Тој клекна на колена, се помоли на Бога, а потоа му беше отсечена главата. Пострада во 304 година. Чудотворец во текот на животот, тој продолжи да исцелува и преку неговите свети мошти кои се зачуваа.
Доколку планирате да започнете некаков бизнис, денеска е вистинскиот ден за тоа. Се верува дека секое работење на Свети Пантелејмон е благословено и ќе ве направи успешни.
Исто така, доколку сте планирале патување, тргнете токму на овој ден.
Свети Пантелејмон бил голем патник, а денес е заштитник на сите оние на кои улицата им е втор дом.
Доколку на овој ден во црква се сретнат две непознати лица кои денешниот ден го слават како куќна слава, веднаш треба да си честитаат и прегрнат, бидејќи се верува дека се роднини.
Со големо задоволство споделуваме дека караванот со музичко-сценскиот спектакл „Силно светнал ден”, по повод 35 години независност на Македонија, на 11 август пристигнува во Битола, на платото на Офицерски дом, со почеток во 20:30 часот.
Преку музика, глума и танц, во форма на мултимедијален сценски спектакл, ќе биде раскажана приказната за 35 години независност на нашата татковина, истакнувајќи ги најзначајните историски моменти, подемите, предизвиците и достигнувањата од изминатите три и пол децении.
Во пресрет на 8 Септември, кој годинава го одбележува големиот јубилеј – 35 години независност, ќе се реализира музички караван со настапи на познати македонски изведувачи и актери во 11 градови низ државата.
Караванот започнува во недела (9 август) во Охрид, а потоа продолжува во Битола (11 август) и Велес (12 август). Во наредниот период ќе посети уште осум градови низ Македонија, носејќи ја празничната атмосфера поблиску до сите граѓани. Останатите градови ќе бидат дополнително објавени.
Се гледаме на „Силно светнал ден”, за заедно, на емотивен и спектакуларен начин да го започнеме одбележувањето на 35 години независност.
Продолжува уредувањето на уличната инфраструктура во делот кај Здравствениот дом во Битола. По завршувањето на асфалтирањето на улицата „Козара“, денеска градежната оператива работи на асфалтирање на уште две улици – „11-ти Март“ и „Панде Николов“.
Двете улици се со вкупна должина од 220 метри, а работите се дел од проектот за подобрување на патната и комуналната инфраструктура во овој дел од градот.
Пред асфалтирањето, на улиците беше извршена реконструкција на водоводната и канализационата мрежа, со средства обезбедени од Министерството за транспорт.
За асфалтирањето на коловозот се издвоени 4.487.000 денари од буџетот на Општина Битола, додека за поставувањето и подобрувањето на уличното осветлување се обезбедени дополнителни 1.586.392 денари.
Со реализацијата на овие активности се очекува жителите и корисниците на улиците „11-ти Март“ и „Панде Николов“ да добијат поквалитетни и побезбедни услови за одвивање на сообраќајот, како и подобрена комунална инфраструктура.
25 години од загинувањето на десетмината херои, 25 години непребол и солзи за прилепчаните кои 2001-та загинаа свирепо. Прилеп се сеќава…
На 8 август 2001 година на патот Скопје – Тетово во близина на селото Групчин кај месноста Карпалак од заседа беше нападнат конвој на Армијата на Република Македонија, при што загинаа десет армиски припадници:
Нане Наумоски (48), резервен капетан, Сашо Китановски (40), резервен поручник, Горан Миновски (29), воен обврзник, Ердоган Шабановски (21), воен обврзник, Љубе Грујоски (32), воен обврзник, Бранко Секулоски (43), воен обврзник, Дарко Велјановски (27), воен обврзник, Пеце Секуловски (31), воен обврзник, Веби Рушитовски (26), воен обврзник и Мирко Деспотовски (27), воен обврзник, сите од Прилеп и Прилепско.
Тој ужасен ден, кога мајките ги загубија своите синови, кога сопругите останаа без своите сопрузи, а децата плачеа по своите таткоци, ќе остане вечно во сеќавање на овој град и овој народ, како кобен ден, ден на болка и тага за Прилеп и Македонија.
Градот херој на своите храбри синови им се оддолжи со монументално дело во центарот на градот, спомен обележје кое вечно ќе потсеќа на нивните прерано згаснати животи.
Според календарот на МПЦ (Јулијанскиот календар) денеска е 26 јули, се празнува летна Света Петка Параскева.
Култот кон света Петка кај нашиот народ е многу раширен. Таа се смета за заштитничка од разни нecpeќи, но и од многу болecти, поради што народот ја нарекува уште и мајка Параскева. Многу лековити извори се поврзани со нејзиното име и се наречени Петочни води. Петковден како домашен празник со служби посветени на св. Петка, со чекање гости и со други обичаи и свечености го празнуваат голем број македонски семејства.
Именден празнуваат: Петко, Петкана, Параскева, Пенка…
Светата православна црква празнува три личности со исто име Параскева-Петка поради што кај народот често се мешаат и се мисли дека се работи за иста личност. Најчесто трите се идентификуваат со св. Петка Епиватска позната и како Трновска, чиј спомен се одбележува на 27 /14 октомври. Името го добиле поради тоа што се родени во петок, а петокот како ден пред сабота, бил ден за подготовки за празникот. Во претхристијанскиот период кај Евреите саботата бил празник, а не неделата. Оттука, Параскева значи подготовка.
Првата света Петка е преподобната маченица Параскева Римјанка. Се празнува на 26 јули /8 август и меѓу народот е позната како летна Света Петка. Во нејзиното житие се вели дека нејзините родители биле Римјани и дека и дека таа како единствена ќерка им се родила по долги и искрени молитви кон Бога. Рано се замонашила а подоцна како и многумина други настрадала за верата Христова за време на царувањето на Антонин. На нејзиното мачење присуствувал и самиот император, но кога била фрлена во котел со врело масло и катран таа останалаа неповредена, а од течноста му прснало во очите на императорот по што ослепел. Параскева се помолила на Бога и тој оздравел. Гледајќи ги нејзините страдања, но и чудата што се случувале со нејзино посредство, многумина ја примиле христијанската вера. Поради тоа била исечена со меч, а подоцна моштите ѝ биле пренесени во Цариград. На иконите света Петка Римјанка во рацете држи чинија во која има очи.
Оваа Параскева (Петка) беше родум од Рим. Родителите и беа христијани, така што од мали нозе ја воспитаа во Христовиот дух. Кога и умреа родителите го раздаде целиот свој имот на бедните и се замонаши. Со голема ревност го проповедаше словото Божјо, не криејќи се од никого.
Така и стигна до римскиот суд. Неколку пати беше предавана на маки, но Господ ја исцелуваше на чудесен начин. Најпосле, некој кнез Тарасиј и ја отсече главата. Моштите и беа зачувани, а подоцна пренесени во Цариград. Пострада за Христа во вториот век.
На тој ден се избегнува да се работат тешки работи на нива и дома.
Порано жените верувале дека на утрешниот ден не треба да се меси леб, да се пере, да се изнесува пепел или да се шие, за да не им трнат рацете преку цела година.
Македонската музичка сцена доби уште едно квалитетно авторско дело, а зад него стојат прилепските музичари од Connect Band, бенд кој долго време е препознатлив по врвните настапи, одличната енергија и професионалниот пристап.
Нивната најнова песна „Води ме со тебе“ е модерна љубовна нумера која уште на прво слушање го освојува слушателот. Со впечатлива мелодија, певлив рефрен и современа продукција, песната покажува дека и домашните музички групи можат да создадат композиции кои без проблем можат да застанат рамо до рамо со најдобрите регионални музички проекти.
Особено се издвојува емотивната интерпретација на Игор Чадамов, чиј препознатлив вокал ѝ дава дополнителна тежина и емоција на песната, додека останатите членови на бендот уште еднаш го потврдуваат својот висок музички квалитет.
Connect Band го сочинуваат: Игор Чадамов, Петар Цветаноски, Влатко Милески, Благојче Чиртоски и Мартин Јанкоски, или една одлична петорка и спој кој секогаш има нешто повеќе да покаже и понуди.
Покрај самата песна, големо внимание привлекува и видео спотот кој се снимаше во македонските бисери Охрид и Преспа, кој изобилува со прекрасни кадри покрај езеро и внимателно осмислена визуелна приказна што совршено ја следи атмосферата на композицијата. Секој детал е професионално изработен, а резултатот е видео кое остава силен впечаток уште при првото гледање.
Зад авторскиот тим стојат:
Музика: Петар Цветаноски
Текст: Весна Малинова
Аранжман: Петар Цветаноски и Јордан Манов
Продукција: Јордан Манов – Devil’s Eye Studio
Видео, продукција и сценарио: Epik Visuals – Љупчо Атанасоски
Камера 2: Димитар Долгоски
„Води ме со тебе“ е уште една потврда дека во Прилеп има исклучителни музичари кои со својата работа и креативност создаваат современа македонска музика со висок квалитет. Ова е песна која лесно се памети, се пее и заслужува да стигне до што поголем број љубители на добрата музика.
Поддржете ја домашната музика и уживајте во новото музичко парче на Connect Band – бенд кој одново покажува дека квалитетот секогаш го наоѓа својот пат до публиката.
-На 06.08.2026 во 21:50 часот на кеј „19 Септември“ во Прилеп, полициски службеници од ОВР Прилеп ги лишија од слобода Ј.Р.(27) и Д.Р.(26), двајцата од Прилеп, затоа што при преглед кај нив, кај Д.Р. била пронајдена прашкаста материја. По документирање на настанот ќе следува соодветен поднесок, информираат од МВР.
