Вечерва во Офицерскиот дом во Битола се одржа настан „Розов пулс за Битола“ со цел подигнување на свеста за значењето на навремената превенција и раното откривање на ракот на дојка, преку позитивен, интерактивен и охрабрувачки пристап, а во организација на Советот за социјална заштита и Советот за женско претприемништво на Општина Битола.

Настанот ги обедини граѓаните, здравствените работници, психолозите, здруженијата и локалната заедница во заедничка порака за грижа, поддршка и солидарност со жените што се соочуваат со болеста.

Битола вечерва има заеднички пулс. Пулс на грижа, поддршка, надеж и живот. Пред присутните свое обраќање имаше градоначалникот на Битола Тони Коњановски.

„Ви благодарам за можноста да се обратам на овој важен настан и да ја искажам личната и благодарноста од име на Општина Битола што на еден ваков начин зборуваме за важноста на превенцијата, но не и за стравот, туку за животот, женската сила, надежта и заедништвото, потсетувајќи се дека грижата за сопственото здравје е чин на љубов кон себе. Советот за социјална заштита и Советот за женско претприемништво и ние воопшто како локална самоуправа ја даваме безрезервната поддршка на ваквите настани“, истакна градоначалникот Коњановски.

На делницата Прилеп – Кавадарци, меѓу Беловодица и Тројаци, од денеска од 10 часот е воведен привремен режим на сообраќај поради градежни работи.

Возилата на овој дел од патот ќе се пропуштаат наизменично, во зависност од текот на работите. Од ЈП „Македонија пат“ информираат дека изменетиот режим ќе важи до завршувањето на градежните активности.

На возачите им се препорачува да возат внимателно, да ја приспособат брзината и да ја почитуваат поставената сообраќајна сигнализација.

Во вечерните часови и во текот на ноќта ќе има повремени локални врнежи од дожд. Наместа врнежите ќе бидат поројни и пообилни.

Најниска температура до 17 и 30 часот беше измерена на Попова Шапка четири степени, во Крушево и Маврови Анови пет, во Берово и во Прилеп 9, во Претор, Крива Паланка и во Битола – 10, во Охрид – 11, во Тетово, Зајчев Рид, Виница, Кавадарци и Штип – 12, во Демир Капија, Струмица, Велес и Скопје Петровец – 13 и во Гевгелија 15 степени.

Најмногу дожд наврна во Кавадарци осум литри на метар квадратен, во Берово и во Прилеп шест, во Битола и Демир Капија пет л/м2.

Утре времето ќе биде променливо облачно и постудено. Ќе дува засилен до силен ветер од северен правец, кој наместа ќе надминува брзина од 60 km/h. Минималната температура ќе биде во интервал од 4 до 11, а максималната ќе достигне од 11 до 18 степени.

Во Скопје времето ќе биде променливо облачно и постудено. Ќе дува умерен, во делови од котлината повремено засилен ветер од северен правец. Минималната температура ќе се спушти до 10, а максималната ќе достигне до 15 степени.

До петок ќе преовладува променливо облачно и постудено време. Денес и во петок ќе има повремени локални врнежи од дожд, кои на некои од повисоките планини ќе преминат во снег. Ќе дува засилен ветер од северен правец, кој наместа ќе биде силен со брзина над 60 km/h. За време на викендот ќе биде сончево со мала до умерена облачност.

По повод Денот на Хрватскиот Парламент, во Битола во Центарот за култура на 16.10 со почеток од 19.00 ќе биде изведена претставата „Не се врткај наоколу гола“, режисер Силвио Стилиновиќ, на Младинскиот Сатиричен театар од Славонски Брод, Хрватска.

Гостувањето на овој театар е во организација на МХД.Хрватски културен центар „Марко Марулиќ“, Битола, во соработка со Општина Битола и Центарот за култура.

Претставата е базирана по текстот на еден од најголемите француски комичари, Жорж Фејдо, напишан пред 100 години.
Програмата на Хрватскиот културен центар е направена да ја поттикне меѓународната јавност да се запознае со хрватското културно наследство, хрватскиот јазичен идентитет. Културните посети и соработки траат повеќе од 30 години, од кои дел беа бројни изложби, концерти, театарски претстави, промоции на книги, предавања, се со цел да се претстави и запознае македонската јавност со богатата хрватска култура и традиција.

Во претставата играат: Фабијан Тадиќ, Петра Ковачевиќ, Славко Радовановиќ, Петар Опачак, Антониот Јуричиќ. Костимографијата е на Тајана Балаж Јуришиќ, сценографијата на Златко Орешковиќ и Саша Кариќ. Претставата од својата премиера минатата година ги полни салите низ театарите и културните центри во Хрватска каде и да гостува. Иако текстот е стар повеќе од еден век, режисерот Силвио Стилиновиќ и младата екипа го сместија дејството во денешна Хрватска.Тие на најдобар можен начин покажаа дека дури ни вековите не ја промениле самата суштина на човечкиот карактер, во сите негови доблести и недостатоци.

Режисерската работа на Стилиновиќ успева во она што е тешко дури и за професионалните ансамбли – да извлече од младите актери спонтаност, автентичност и одлично темпо на претставата, што ја држи публиката будна од првата до последната сцена. Заедно со асистентот-режисер Саша Кариќ, тој создаде претстава која го нуди она што публиката најмногу го сака – вистинска смеа. Додека културната сцена често се жали на недостаток на млади луѓе, овој пример од Славонски Брод покажува колку е важно да се инвестира во аматерски театри. Тука се младите луѓе кои избираат глума, креативност и соработка и се вистинска реткост, но и капитал на заедницата во кој треба да се инвестира.

Инаку, овој театар постои од 2006 година, добитници се на многубројни награди во Хрватска, но и на фестивали надвор од неа. Како што велат самите актери- за нас наградите се доказ дека сме на вистинскиот пат за она што го работиме. Сатиричниот театар со право може да каже дека со своите претстави, културното значење и просторот што го отвора за младите и љубителите на театарот е еден од столбовите на општествениот живот на градот Славонски Брод.

СКМ често се нарекува театар на тркала. Голем број гостувања, од Битола, Витез, Крагујевац, Бјеловар, Сињ, е една од значајните карактеристики на работата на театарскиот ансамбл. Втората секако е Аматерскиот театарски фестивал во организација на СКМ., и трето, во своето долгогодишно постоење, СКМ е местото од каде што 11 млади луѓе ги пронашле своите повици во животот и студирале или дипломирале на уметничките и театарските академии од Осиек, Загреб, Сплит до британскиот Лидс.

Оваа година Хрватскиот културен центар беше организатор на повеќе значајни манифестации, иницијатор на потпишување на Меморандум за соработка помеѓу НУУБ. „Св. Климент Охридски“ Битола и Градската библиотека „Марко Марулиќ“ Сплит, организатор на неодамнешната турнеја на КУД Илинден во Хрватска, учесник на меѓународни конференции и семинари и сл.

Турнејата започнува на 15 октомври во Кавадарци, со нов материјал, препознатлив хумор и специјалниот гостин Модернизам и Ренесанса.

Секојдневието го пишува материјалот, а Син на мајка и 1Човек го носат на сцената. Овој четврток, на 15 октомври, во Кавадарци започнува „НА ТЕРАПИЈА СО АНАНАС“ – голема македонска стендап-турнеја која ќе ја однесе публиката на заедничка „сеанса“ исполнета со смеа, иронија и сатира.

Во десет градови низ Македонија, двајцата комичари ќе ги отворат темите што секојдневно нè нервираат, збунуваат и насмеваат: меѓучовечките односи, општествените навики, малите лични драми и големите апсурди со кои одамна научивме да живееме.

Син на мајка и 1Човек доаѓаат со нов материјал и со два различни погледи на истата реалност. Нивниот директен пристап и хуморот без влакна на јазикот ветуваат вечери во кои публиката лесно ќе се препознае – во некоја приказна, во некоја реакција или во ситуација за која била убедена дека ѝ се случува само нејзе.

Низ остри забелешки, комични пресврти и непосредна комуникација со публиката, „НА ТЕРАПИЈА СО АНАНАС“ ќе ги претвори секојдневните фрустрации во повод за добро смеење. На сцената ќе има место за сè што обично го коментираме дома, на кафе или во друштво, овојпат кажано гласно и без задршка.

Како специјален гостин, Модернизам и Ренесанса ќе придонесе со својот препознатлив хумор и енергија, додавајќи уште еден комичен поглед на темите што ги поврзуваат изведувачите и публиката.

Од Кавадарци до Скопје – десет термини за заедничка терапија

Првата средба со публиката е закажана за 15 октомври во Кавадарци, по што турнејата продолжува на 16 октомври во Прилеп, 17 октомври во Битола и 18 октомври во Гевгелија. Следните настапи се на 24 октомври во Охрид, 29 октомври во Куманово, 30 октомври во Велес, 31 октомври во Струмица и 1 ноември во Тетово. Големото финале ќе се одржи на 7 ноември во Скопје, во салата „Градски парк“. Сите настапи започнуваат во 20:00 часот.

Билетите се веќе достапни преку www.ticketplus.com.mk, по цена од 600 денари за настапите низ Македонија. За скопското шоу се предвидени повеќе категории билети, со цени од 600 до 1.200 денари.

Доколку билетите не бидат распродадени онлајн, преостанатите ќе бидат достапни и на билетарниците на самите локации, на денот на одржувањето на настапите.

Оваа есен, сè што ви се насобрало преку неделата може да заврши како причина за смеа. Термините се закажани, комичарите се подготвени, а публиката треба да понесе само добро друштво и подготвеност да се насмее и на сопствените маки.

„НА ТЕРАПИЈА СО АНАНАС“ – терапијата започнува на 15 октомври!

Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ) донесе Одлука со која се врши зголемување на малопродажните цени на нафтените деривати во просек за 0,87% во однос на одлуката од 5.10.2026 година.

Малопродажните цени на бензините ЕУРОСУПЕР БС-95 и ЕУРОСУПЕР БС-98, како и на ЕУРОДИЗЕЛ (Д-Е V) и на Екстра лесното масло за домаќинство (ЕЛ-1) не се менуваат.

Малопродажната цена на Мазутот М-1 НС се зголемува за 2,145 ден/кг. и сега ќе изнесува 51,742 ден/кг.

Во Одлуката на РКЕ е применета владината одлука за намалениот износ на ДДВ за нафтениот дериват ЕУРОДИЗЕЛ (Д-Е V) во износ од 10% и е применет намален износ на акцизата од 4,00 ден/лит кај бензините ЕУРОСУПЕР БС-95 и ЕУРОСУПЕР БС-98 и кај ЕУРОДИЗЕЛ (Д-Е V).

Од 14.10.2026 година од 00:01 часот максималните цени на нафтените деривати ќе изнесуваат:
Моторен бензин ЕУРОСУПЕР БС – 95 98,50 (денари/литар)
Моторен бензин ЕУРОСУПЕР БС – 98 100,50 (денари/литар)
Дизел гориво ЕУРОДИЗЕЛ БС (Д-Е V) 97,00 (денари/литар)
Масло за горење Екстра лесно 1 (ЕЛ-1) 108,50 (денари/литар)
Мазут М-1 НС 51,742 (денари/килограм)

Напоменуваме дека ова се максималните цени на нафтените деривати од 00:01 часот на 14.10.2026 година.

-На 12.10.2026 во 16:15 часот во Полициското одделение Ропотово е пријавено дека во близина на с.Црнилиште, општина Долнени, Ф.С.(48) од с.Црнилиште, управувајќи трактор, паднал и се здобил со тешки телесни повреди, констатирани во Општа болница Прилеп, информираат од МВР.

Maкедонија со различна културна програма, иложби и настани, кои започнаа во петокот на 09.10., одбележува 80 години од пренесувањето на посмртните останки на Гоце Делчев во Скопје. Но, дали ги знаете историските податоци, како и кој го извршил пренесувањето на посмртните останки од Софија до Скопје?

По убиството на Делчев на 4 мај 1903 год, во нерамна битка против турскиот аскер во село Баница, според историските податоци, неговите посмртни останки прво се чувале во Баница до 1917 година, кога се пренесени во Ксанти, а потоа во Софија. До 1923 година, ковчежето со коските се чува во домот на Михаил Чаков, а на него пишувало:

„Ги заколнуваме поколенијата што доаѓаат светите коски да бидат погребани во главниот град на независна Македонија. Август 1923, Илинден”.

Заветот е исполнет и на 11 октомври 1946 година се пренесени во Скопје, во црквата Свети Спас. Но малкумина знаат дека во пренесувањето на моштите на револуционерот учествувал прилепчанецот Илија Јованоски – Белото како возач. Според него носењето на саркофагот од Бугарија во Македонија се случило на 31 јануари 1947 година, а не како што се трдело во октомври 1946 година.

Тој, за тогашниот локален прилепски весник Народен глас, раскажал дека секаде колоната со возилото била пречекана од многу народ во сите градови од Пиринска Македонија, а во Струмица, речиси целиот град бил на нозе.

Во текстот од весникот ,, Народен глас”, бр. 222, на стр. 2, издаден во Прилеп, во петок на 11 февруари 1972 година, а на кој в.д. главен и одговорен уредник е Благоја Глигороски, пишува дека заветот на Гоцевите следбеници, коските на овој голем македонски револуционер да бидат пренесени во Скопје, се оствари непосредно по ослободувањето на татковината од фашистичките окупатори.

По една случајност во пренесувањето на саркографот учествувал еден наш сограѓанин. По една исто така случајност деновиве беше пронајдена и една автенична фотографија од овој пренос, што е направена во пиринскиот град Петрич.

Еве што тој раскажува за овој настан:

– Повеќе од една година беше тоа во 1946/47, како возач бев на работа во нашата амбасада во Софија. Кон крајот на јануари 1947 година во Софија дојде другарот Борко Темелковски – Лилјак. Се сеќавам добро утрото на 31 јануари 1947 година ми беше речено дека со придружба треба да појдам на едно место. Во џипот што го возев, беше ставен еден сандак, и заедно со придружбата од Софија веднаш се упативме за Скопје.

Шоферот Илија Иваноски, добро се сеќава на многу детали, од патувањето. Џипот се движел во средината, а напред и назад биле по една кола. Иако зимно време џипот бил отворен во која се наоѓала и голема фотографија на Гоце Делчев.

– Во сите градови од Пиринска Македонија, истакнува Иваноски, побудувавме голем интерес. Маса граѓани се собираа околу нас во Благоевград, Петрич и други градови. Насекаде се собираа граѓани не поздравуваа. Во Благоевград, Градскиот комитет на БКП, организира мала свеченост. Во Струмица, чинам целиот град беше на нозе.

Веста дека низ овој град ќе помине колоната со коските на Гоце Делчев ги воодушеви и толку израдува граѓаните што едвам поминавме низ улиците.

По долго патување, колоната во Скопје пристигна во попладневните часови на 31 јануари.

Славниот резбар Нестор Алексиевски го изработил ковчегот во кој се пренесени коските на Гоце Делчев од Софија во Скопје во 1946 година. Го изработил дрвениот ковчег за 21 ден, во што му помагал и неговиот син Миле, пишува Данило Коцевски во колумната на “Слободен печат” на 29/06/2019. Копаничарот потекнувал од една од најпознатите мијачки резбарски тајфи.

Најпрвин изработил цртежи како ќе изгледаат деталите изрезбани на ковчегот, а потоа преминал на нивната реализација во ореово дрво.. Ковчегот бил со димензии 0,6 х 0,6 х 0,75 метри, и лежи на четири лавовски шепи. Изрезбани се разни мотиви од кои главниот е ликот на Гоце Делчев со ловоров венец.

Претставени се и тогашните грбови на Македонија и Југославија. На задната страна стои пораката: „Смрт или слобода – од Револуционерниот комитет”. Во саркофагот била вградена и лимена подлога односно кутија, набавена од лимар во Старата скопска чаршија. Според сведоштвата, коските во сандакот биле обвиткани со црвена свила како симбол на Илинденското востание.

Пренесувањето на моштите траело три дена, на 7, 8 и 9 октомври 1946 година, а тој чин бил проследен со огромна маса народ што му оддавал почит на великанот и на неговото испраќање од Софија и пристигањето во Скопје. Положувањето на коските во саркофагот во дворот на црквата „Св. Спас” било извршено на 10 октомври.

Две години доверба, соработка и заеднички успеси! По повод вториот роденден, Железарија КОМШИЈА подготвува нешто посебно за сите професионалци, мајстори и љубители на квалитетен алат!

На 16 и 17 октомври 2026, КОМШИЈА ве поканува на големиот Deli саем, каде што ќе имате можност да го разгледате целиот асортиман на брендот DELI, со богат избор на батериски и електрични алати, како и над 20 нови артикли што ќе бидат претставени на саемот!

А бидејќи роденден не се слави без подароци, за вас од КОМШИЈА подготвија:

20% ПОПУСТ НА ЦЕЛИОТ АСОРТИМАН ПРОИЗВОДИ!

-Две години вие ни ја подарувате вашата доверба, а сега е наш ред да ви се заблагодариме, велат од Железарија КОМШИЈА!

16 и 17 октомври – два дена посветени на квалитетниот алат, новитетите и одличните цени!

КОМШИЈА – Ваш партнер за секој проект!

Осум нови современи инфузиони пумпи се обезбедени за одделенијата за детски болести, анестезиологија и гинекологија со акушерство, со цел унапредување на квалитетот и безбедноста на здравствената грижа за пациентите.

Опремата е донација од хуманитарната организација Project HOPE, обезбедена благодарение на заложбите и ангажманот на директорот д-р Кире Јоноски и д-р Габриела Тавчиоска.

Новите инфузиони пумпи овозможуваат попрецизно и контролирано дозирање на терапијата, што е особено важно при третманот на најмладите и најранливите пациенти.

Како дел од донацијата, стручниот тим на Project HOPE спровел и сеопфатна обука за медицинскиот персонал, со цел правилно и безбедно користење на новата медицинска опрема и обезбедување максимална ефикасност при третманите.

Од здравствената установа упатија благодарност до Project HOPE за хуманоста, поддршката и придонесот во подобрувањето на условите за работа на медицинскиот персонал и унапредувањето на здравствената заштита.

Набавката на современа медицинска опрема претставува значаен чекор кон побезбедно лекување и поквалитетна грижа за пациентите, особено за оние на кои им е потребна најголема внимателност и посебен медицински третман.