УХМР за утре најавува стабилно и ралативно топло време. Во среда, како што информира, ќе биде претежно облачно со врнежи од дожд кои наместа ќе бидат пообилни. Поради продор на постудена воздушна маса од север, кон крајот на денот и во текот на ноќта врнежите на планините и на повисоките места ќе преминуваат во снег.

Според УХМР, во четврток ќе дува засилен до силен ветер од северен правец, наместа и над 70 километри на час, а дневната температура значително ќе се намали.

Од петок и во деновите од викендот времето ќе биде стабилно и потопло.

Клубот по естетско ритмичка гимнастика “АВАНТГАРД” од Прилеп се закити со грст медали на Меѓународниот куп “ЕВИТА КУП”- Свилајнца во Србија.

На турнирот учество зедоја над 500 учесници од соседните држави, меѓу кои и натпреварувачи од повеќе успешни клубови од Србија.

Поединечно, гимнастичарките од Прилеп ги постигнаа следните резултати:

Марија Тошеска категорија 2010 реквизит обрач (второ место), Јована Везенкоска категорија 2013 реквизит обрач – (трето место), Илина Кузманоска категорија 2014 топка – (прво место), Теa Петреска категорија 2011 јаже – (прво место), Јана Димоска категорија 2012 обрач-(четврто место), Галена Ацеска категорија 2013 без реквизит – (седмо место), Мелани Ристеска категорија 2014 без реквизит – (15 место), Анастасија Нешкоска категорија 2010 реквизити лента и обрач (20 место).

Со овие резултати од клубот “АВАНТГАРД” од Прилеп, по којзнае кој пат покажаа дека упорноста, трудољубивоста и посветеноста даваат успех. Честитки за нивните девојки и желби за уште поголеми успеси во иднина.

Казнените дејствија на официјален Киев против огранок на Православната црква во земјата која историски е поврзана со Москва, се дел од настојувањето да се постигне „духовна независност“ изјави викендов претседателот на Украина Володимир Зеленски. Како што посочи тој, одамна воспоставената Украинска православна црква (УОЦ) го поткопува украинското единство и соработува со Москва, јави „Јерусалим пост“.

Ваквите пораки на Зеленски доаѓаат откако претходно властите од Киев наредија на огранок на УОЦ да ја напушти својата стара 980 годишна престолнина во манастирски комплекс Печерск Лавра, што го натера рускиот православен патријарх Кирил да побара од папата Франциск и другите верски водачи да помогнат да се прекине репресијата.

„Оваа недела беше направен уште еден чекор кон зајакнување на нашата духовна независност“, рече Зеленски во своето ноќно видео обраќање, без директно да се повика на наредбата и додаде дека Украинците реагирале позитивно на одлуката на Киев.

„Ќе продолжиме со ова движење“, рече тој. „Нема да ѝ дозволиме на терористичката држава никаква можност да манипулира со духовниот живот на нашиот народ, да ги уништува украинските светилишта – нашите Лаври или да ги краде вредностите од нив.

Инаку, рускиот патријарх Кирил предходно силно ја поддржа руската инвазија на Украина. Во својот апел, тој ги повика верските водачи и меѓународните организации „да ги вложат сите напори за да го спречат принудното затворање на манастирот“.

Службата за безбедност на Украина од октомври изврши претреси во црквите на УОК, воведе санкции за нејзините епископи и финансиски поддржувачи и отвори кривични случаи против десетици свештеници.

Денеска во касарната „Илинден“ се одбележува 42 година од формирањето на специјалната антитерористичка единица „ТИГАР“.

На 13 март 1981 година за првпат во Министерството за внатрешни работи беше формирана во рамките на тогашниот републички секретаријат за внатрешни работи на СР Македонија Единицата за специјални задачи под името „Тигар“.

Нејзина примарна цел при формирањето била посебни задачи, обезбедување на јавни личности, справување со кризи, специјални задачи за кои не била подготвена тогашната милиција, а подоцна за антитероризам, специјални задачи како на пример диверзантски акции, инфилтрирање позади линијата на непријателот, обезбедување на терен, подготовка на терен за воени дејствија на останати воени државни структури, приведување и апсење на криминалци или личности барани од законот, нуркање, извлекување на давеници, затрупани во лавини, експлозиви, и кучиња трагачи, обезбедување на лица од витално значење. Во поново време единицата беше надградена со воена метода за решавање на воени конфликти надвор од урбана средина.

По повод денешниот ден во 11:00 часот во касарна „Илинден“- Скопје (базата на „САЕ- ТИГАР“), ќе се оддржи свечена церемонија по повод Денот на Специјалната антитерористичка единица ТИГАР, на која свое обраќање ќе имаат претседателот на Владата на Република Македонија, Димитар Ковачевски, министерот за внатрешни работи, Оливер Спасовски, и Командантот на САЕ ТИГАР Драган Прокоповски.

Делегации на МВР и Владата ќе положат свежо цвеќе и оддадат почит на спомен плочата на загинатите припадници на „САЕ- ТИГАР“.

На Економско-социјалниот совет денеска се очекува да биде донесена одлука за висината на минималната плата која секој март се усогласува на годишно ниво.

Министерката за труд и социјална политика Јованка Тренчевска во петокот во изјава за МИА објави дека денеска ќе се одржи седница на Економско-социјалниот совет на која ќе се разговара за висината на минималната плата.

Очекувањата на Владата се дека минималната плата ќе се зголеми и ќе изнесува околу 20.000 денари.

Со измените на Законот за минимална плата, се воведоа нови критериуми согласно кои минималната плата се усогласува со 50 отсто од трошоците за живот и 50 отсто со растот на просечната плата.

Регулаторната комисија за енергетика денеска ќе одлучува за новите цени на горивата.

Согласно последната одлука на РКЕ, за еден денар се зголемија цените не бензините и Екстра лесното масло
за домаќинство, додека дизелот поскапе за половина денар.

Малопродажната цена на Мазутот М-1 НС се зголемува за 0,722 ден/кг и сега ќе изнесува 41,988 ден/кг.

Ова се актуелните цени на горивата:

Моторен бензин ЕУРОСУПЕР БС – 95 82,50 (денари/литар)
Моторен бензин ЕУРОСУПЕР БС – 98 84,50 (денари/литар)
Дизел гориво ЕУРОДИЗЕЛ БС (Д-Е V) 78,50 (денари/литар)
Масло за горење Екстра лесно 1 (ЕЛ-1) 78,00 (денари/литар)
Мазут М-1 НС 41,988 (денари/килограм)

Maнастирот Св. Илија Писокал кај мариовското село Кален, во изминатите години прерасна од едно запоставено место во прекрасно светилиште каде се прават најмасовните празнични прослави во околината на Прилеп.

Благодарение на трудољубивоста, упорноста и снаодливоста на црковниот одбор, местото низ годините постојано се менуваше и разубавуваше.

Сега на ред дојде и манастирската црква, па така најавена е целосна нејзина обнова и реконструкција.

-Благодарение на вашите посети и помош ни се отвори можност и шанса, за да се отпочне со реконструкцијата. Сакаме да ви го прикажеме изгледот и планот за обнова на Манастирот. Ви благодариме за помошта,посетата и довербата – напишаа луѓето од одборот на социјалните мрежи.

Погледнете како ќе изгледа манастирот:

Нов пораз на прилепска Победа – овој пат на гостински терен во Штип.

Прилепчани повторно поразени, овој пат на гостински терен против Брегалница. Резулатот е разочарувачки, домаќинот славеше со 4-0, а победата ја заокржија уште во првите 10 минути од натпреварот.

Резултатот го отвори Додев во 3-тата минута, а Мојсов прецизно стрелаше во 10-та минута за 2-0. Николов ги руши сите надежи на прилепчани со головите во 61 и 67 минута, а со тоа го постави и конечниот резултат на натпреварот.

Победа руши негативни рекорди. Би рекле дека се работи за пад во формата, меѓутоа прилепскиот прволигаш нанижа 5 порази со ред и со само 13 бода се наоѓа на последното место од табелата. Секако, несметајќи ја Ренова која поради финансиски проблеми не е во состојба да се натпреварува во Првата македонска лига.

Победа е прилепска гордост и се надеваме дека ќе се издигне над овие проблеми. На прилепчани ќе им биде тешко да обезбедат опстанок, но секако поправен тест имаат веќе во сабота на домашен терен против Силекс.

Македонската ракометна репрезентација и гостува на Португалија во натпревар од 4. коло Група-1 во квалификациите за Европското првенство 2024.

Избраниците на селекторот Кирил Лазаров ќе се обидат да се реваншираат за поразот (23:29) во Скопје пред три дена.

Подмладената македонска репрезентации во „Борис Трајковски“ покажа дека има квалитет да се надигрува со Португалците.

-Физички се посилни од нас и не е срамота да се изгуби од ваков противник. Како што кажав и по натпреварот во Скопје незаслужено изгубивме со голема разлика. Ќе се обидеме во реваншот да не ги повториме грешките кои ги направивме на првиот меч. Имаме млада репрезентација и се надевам дека како што изминува времето и како што ќе собираат искуство, ќе дојде до израз квалитетот. Најважно е да се пласираме на ЕП, но сега треба да мислиме само на мечот со Португалија, изјави Лазаров.

Почетокот на натпреварот во Порто е закажан за 18:30 часот.

Во Брисел на конференцијата во организација на Friends of Europe како дел од највлијателните 40 под 40 години, имав можност да разговарам со политичари од цела Европа, бројни претприемачи, општествени активисти, новинари и голем број други влијателни граѓански активисти од Европа. Имавме можност да размениме погледи за политичката ситуација и правецот во кој се движи Европа и бројните предизвици со кои се соочува регионот.

Зборував за потенцијалот на Македонија, можните инвестиции и насоката во која ќе се движи Македонија после промената на власта. Во Македонија може да се подобри животот и промените ќе ги донесеме заедно, објави на својата Фејсбук страница потпретседателот и пратеник на ВМРО-ДПМНЕ Александар Николоски.