После настанатиот дефект во текот на денешниот ден, односно поради пропаѓање на веќе постоечкиот стар подземен канал, на кружниот тек кај Поштата во централното градско подрачје, сакаме да ве известиме дека екипите на ЈКП„Водовод и канализација“Прилеп, се на терен и работат во координација со надлежните лица од Општина Прилеп за што побрзо санирање на настанатиот проблем и овозможување на непречено одвивање на сообраќајот, за што известено е и Министерството за внатрешни работи, ПС Прилеп – информираат од општина Прилеп.

Од општината бараат трпение поради сообраќајните пренасочувања и метежот кој настана поради оваа непредвидена ситуација.

На 01.05.2023 на Граничен премин Делчево, полициски службеници од Полициската станица за граничен премин и граничен надзор Делчево ги привеле Г.С.Т.(63) и Н.К.(43), двајцата од Република Бугарија.

Тие се сомничат дека претходно физички нападнале женско лице во прилепско.

По целосно документирање на случајот ќе следува соодветен поднесок – информираат од МВР.

Денес започнаа работните активности за реконструкција на 10 улици во населбата „Недопирливи“. Проектот вклучува реконструкција на водоводната, канализационата мрежа и нов коловоз во должина над 2 километри.

Градоначалникот на општина Битола, Тони Коњановски и стручните екипи од општинската администрација, заедно со директорот на КЈП „Никоградба“, Зоран Талевски, извршија увид на активностите кои започнаа со реконструкција на мешовитата канализација од улица „Студентска“, профил 1.

Градоначалникот Коњановски, информираше дека, наскоро се очекува да започне и реконструкцијата на водоводната мрежа во овој дел, за да може реализацијата на проектот да се одвива со предвидената динамика и обезбедените средства од општинскиот буџет за реконструкција на водоводната и канализационата мрежа во износ од 37.000.000 денари. По завршувањето на овие фази, продолжува реконструкцијата на коловозот, за што од Светска банка обезбедени се 28.725.287 денари.

Покрај големите инфраструктурни активности кои се во тек на 6 други локации во општината, паралелно се врши и партерно уредување на помали улици, а во селото Кременица, со цел времено санирање на проблемите со патната инфраструктура, екипите на КЈП Нискоградба вршат вградување на гребен асфалт на местата каде што тоа е неопходно.

Регулаторната комисија за енергетика и водни услуги на Република Македонија донесе Одлука со која се врши намалување на малопродажните цени на нафтените деривати во просек за 1,34% во однос на одлуката од 28.4.2023 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 2,834%, кај дизелот за 3,930%, кај екстра лесното масло за 0,58% и кај мазутот намалувањето е за 0,63%.

Курсот на денарот во однос на доларот во изминатиот период по кој беа формирани цените со претходната пресметка е понизок за 0,193%

Малопродажната цена на ЕУРОДИЗЕЛ (Д-Е V) се намалува за 2,00 ден/лит.

Малопродажната цена на бензинот ЕУРОСУПЕР БС-95 се намалува за 1,00 ден/лит, додека малопродажната цена на бензинот ЕУРОСУПЕР БС-98 се намалува за 1,50 ден/лит.

Малопродажната цена на Екстра лесното масло за домаќинство на (ЕЛ-1) не се менува.

Малопродажната цена на Мазутот М-1 НС се намалува за 0,362 ден/кг и сега ќе изнесува 41,075 ден/кг.

Од 3.5.2023 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 80,00 (денари/литар)

Моторен бензин ЕУРОСУПЕР БС – 98 82,00 (денари/литар)

Дизел гориво ЕУРОДИЗЕЛ БС (Д-Е V) 69,00 (денари/литар)

Масло за горење Екстра лесно 1 (ЕЛ-1) 68,00 (денари/литар)

Мазут М-1 НС 41,075 (денари/килограм)

Проектот ,,ОБРОК ЗА СЕКОЕ ДЕТЕ” од денес за сите ученици од прво до петто одделение во основните училишта во Кавадарци!

-Од денес официјално започна со реализација проектот “Оброк за секое дете” кој беше дел од предизборната програма на градоначалникот Митко Јанчев, и е наменет за учениците од основно образование од прво до петто одделение. Проектот ќе трае до крајот на учебната година и ќе се реализира согласно претходно регулираните законски постапки за заштита на безбедноста и здравјето на учениците – напиша на ФБ градоначалникот на општината Митко Јанчев.

Додека управата на нашиот храм упорно се труди да ги разубави, некој упорно се труди да го нагрди храмот и дворот околу него. Додека вработените при храмот садат цвеќиња за облагородување на дворот, некој ги корне и крши – пишуваат од храмот Св. Петка во населбата Точила во Прилеп

Од црквата додаваат дека нареден пат ќе ги објават сторителите.

-Еве стигнавме дотаму да бидат откорнати и украдени пресно насадени цвеќиња. Најинтересно е што вредноста на овие цвеќиња не надминува 300 денари. Ете дотука стигнавме! Сите прилепчани се обидуваат да придонесат нешто во полза на храмот, а неколкумина ја погазуваат нивната несебичност.

Срамота! Во иднина, ако некому од овие што крадат цвеќиња имаат потреба од цвеќиња, слободно нека кажат какви цвеќиња сакаат, и која боја, пред да ги насадиме и ќе им ги подариме.

Ги поздравуваме “љубителите” на цвеќиња, дека иако моментално не ги виделе камерите, сепак нека знаат дека Бог ги гледа, а за многу кратко време, од само неколку дена, и камерите ќе ги гледаат, а тогаш управата на храмот воопшто нема да се двоуми јавно да ги објави па да бидат видени од целата прилепска јавност и пошироко – стои во објавата на храмот Св. Петка.

Во текот на изминатата вечер (01.05.2023)во периодот од 17.00-22.00 часот на територија на СВР Битола спроведена е засилена акциска контрола за санкционирање на возачи кои управуваат возило под дејство на алкохол.

При контролата санкционирани се 34 возачи. Од нив 14 на територија на Битола, 6 во Прилеп, 5 во Демир Хисар по 3 во Македонски Брод и Ресен и 2 во Крушево. За време на контролата биле санкционирани и 21 други видови прекршоци.

Акциски контроли продолжуваат и во наредните денови. Апелираме до граѓаните да ги почитуваат сообраќајните правила.

Овој период од годината не може да помине без уникатните бели патики

Ова се совети за чистење кои ќе ви помогнат секогаш да изгледаат како нови.

Совет број еден:

Многу е важно за кој модел на патики станува збор, па ако зборуваме за култните старки (Convers), тогаш сѐ што треба да направиме е да нанесеме малку сапун на четката за заби и кружни движења да триеме додека не исчезне нечистотијата.

Совет број два:

Растворете сода бикарбона во млака вода и тријте ја со кружни движења, а потоа оставете ја содата да отстои најмалку десет минути, а потоа исплакнете.

Совет број три:

Ако имате кожени патики, најдобро би било млекото за тело да го користите и со четка или крпа. Никогаш не користете грубо сунѓерче кога станува збор за овој тип на патики.

Колку и да се валкани патиките, избегнувајте да ги перете во машина за перење. Експертите велат дека ова е најголемата грешка што ја прават луѓето, бидејќи ѓонот лесно може да се откачи.

Совет број четири:

Направете паста за чистење од сода бикарбона, вода и оцет. Истурете во еднакви количини, но внимавајте да има доволно сода за да се згусне пастата. Користете стара четка за заби и исчистете со неа доколку е потребно. Кога ќе завршите, задолжително исплакнете со топла вода и оставете да се исуши.

Времето денеска ќе биде претежно облачно, во источните делови со сончеви периоди. Кон крајот на денот и во текот на ноќта почнувајќи од запад ќе има врнежи од дожд. Ќе дува умерен, а долж Повардарието повремено засилен ветер од јужен и југоисточен правец.

Во Скопје претежно облачно, во текот на ноќта со повремен дожд. Ќе дува умерен ветер од јужен правец.

Во среда и четврток ќе биде променливо облачно и нестабилно со повремен пороен дожд, на места поинтензивен и проследен со грмежи. Дневната температура ќе се намали. Од петок се очекува посончево и потопло време, со услови за локален краткотраен дожд во попладневните часови.

Со трката “Апхил Сопиште” започна сезоната во планински велосипедизам, а Велосипедскиот клуб “Илинден” од Прилеп стартуваше со победа.

Андреј Маџоски ја забележа својата прва победа во јуниори, Константин Костоски беше трет во кадети, Никола Ристески го освои четвртото место, а Младен Петрески беше седмопласиран во истата категорија.

Тренерот Драган Димитријоски не го криеше задоволството за првата јуниорска победа на Маџоски и истакна дека и покрај тоа што оваа дисциплина не ја практикуваат, трката ќе им дојде како одлично загревање за престојните во роад дисциплина.