Владата денеска ја замрзна цената на јајцата и оризот и го ограничи извозот на јајцата. Највисоките цени на оризот и јајцата ќе останат на нивото од 15-ти овој месец и ќе важат до 30-ти следниот месец. Со владината одлука најмалку 70 проценти од домашното производство на јајца треба да се пласира на домашниот пазар, а трговците на мало се обврзани да продолжат да ја набавуваат вообичаената количина што ја набавувале во јануари и февруари годинава.

Премиерот Димитар Ковачевски на прес-конференција рече дека во изминатиот период е утврден значаен пораст на цените на ориз и јајца, како резултат на движењата во однос на извоз и увоз на овие производи.

-За таа цел, а во пресрет на претстојните празници Велигден и Бајрам, со цел да се спречи евентуален дисбаланс на домашниот пазар и недостаток на јајца од кокошка, производителите, најмалку 70 проценти од домашното производство на јајца ќе го пласираат на домашниот пазар, а трговците на мало да продолжат да ја набавуваат вообичаената количина на јајца што ја набавувале во јануари и февруари 2023 година, рече Ковачевски на прес-конференција по владината седница.

Овие мерки, укажа, не ги носиме произволно, туку се базирани врз аргументирани факти и анализи, кои се реализирани во изминатиот период.

Ковачевски порача дека ќе продолжат да ги следат случувањата на домашниот и на светските пазари и оти соодветно на тоа ќе реагираат со владините механизми.

Целта, нагласи, е да не дозволиме дисбаланс на домашниот пазар, што би се одразило и врз семејниот буџет на граѓаните.

Замрзнувањето на цената на јајцата и оризот, потсети премиерот, е продолжение на мерките со кои беа замрзнати цените на белиот и полубелиот леб, на дел од тестенините и на дел од млечните производи. И овие одлуки, како и денешната, посочи, беа донесени врз основа на претходно направени анализи, а се во правец на заштита на интересите на граѓаните и заштита на домашниот пазар од нарушувања во однос на понудата и побарувачката.

Како што нагласи Ковачевски, Владата продолжува со трендот да излезе во пресрет на потребите на граѓаните, со цел полесно справување на последиците од актуелната светска економска и енергетска криза. Ќе делуваат, најави, согласно потребите и интересите на граѓаните.

-Нема да дозволиме личен профит врз грбот на граѓаните. Затоа и ги носиме сите овие мерки, за да олесниме на граѓаните и да го подобриме квалитетот на животот на сите, рече Ковачевски.

Од 16 март се замрзнати цените на тестенините и млечните производи, а од 28 февруари е замрзната и цената на лебот. Тогаш се укинаа и субвенциите за електричната енергија што ги добиваа компаниите од прехранбената индустрија.

Младенци – еден од поголемите христијански празници од пролетниот циклус каде што се слави споменот на четириесетте војници од Севастија кои маченички загинале за христовата вера.

Младенци ги слават сопружниците во првата година од бракот, оние кои се венчале после 22 март претходната година.

На тој ден младенците во својот дом примаат гости, кои им донесуваат подароци. Тој ден младите домаќинки ги покажуваат своите уметности и знаење.

Младенци се посветени на спомените на страдањето на Светите четириесет војници кои во 230 година, за време на цар Ликиниј преминале во христијанството и покрај исклучителната забрана на царот.

Овој празник во црквениот календар е обележан со црвени букви. Младенци е празник со многу обичаи во Македонскиот народ. На овој ден жените стануваат рано и месат четириесет колачиња, кои се нарекуваат младенчиња, и симболизираат долг, среќен и сладок живот. Младенчињата се премачкуваат со мед, домаќинките ги нудат на децата и на сите кои дојдат во куќата пред пладне.

Посетувањето на младенците и донесувањето на подароците, е обичај од модерните денови, кој настанал во градот, но и секое село многу брзо го прифатило. Се смета дека на Младенци треба да дојдат сите оние кои биле на свадба, но во пракса сепак е поинаку. На Младенците тој ден на гости им доаѓа само најблиското семејство и пријатели.

Треба да се напомене дека Младенци секогаш паѓаат во време на постот, така што и гозбата која се подготвува тој ден треба да биде посна поради здравје и напредок на децата на младите сопружници.

Постои и верување дека „Какво е времето на тој ден, такво ќе биде цела пролет“. Како и да е, ова нека остане само верување, а ние пролетта ја сакаме каква што треба да биде вистинска пролет со сонце и расцветани дрвја.

На 20.03.2023 на ул„Николче Ѓеорѓиевски Никлец“ во Битола, полициски службеници од Полициската станица од општа надлежност Битола ги лишиле од слобода Џ.А.(31) и М.К.(28), двајцата од Битола, затоа што кај нив била пронајдена и одземена прашкаста материја.

По документирање на случајот ќе следува соодветна пријава.

Стефан Трпковски, лице со Даунов синдром, од денес ќе работи во општина и ќе биде дел од мојот тим! Од денес, Стефан ќе запознае нови колеги во општина Кисела Вода, ќе извршува работни обврски, ќе почувствува дека општеството и нему му пружа еднакви можности како на останатите – напиша на ФБ, градоначалникот на општина Кисела Вода, Орце Ѓорѓиевски.

-Видно возбуден, ми раскажа за своите таленти, за кошарката која е негова прва љубов, за модерните танци и освоеното второ место на Специјалната олимпијада за танцови игри, за пливањето кое веќе 10 години е негово хоби.
Се подготвува да плива на Параолимпијада во Берлин, каде заедно со уште три други деца ќе ги брани боите на Македонија.

За жал, Дауновиот синдром, кој светот денес го одбележува, во Македонија сѐ уште е табу тема. На овие простори преовладуваат стереотипи, кои овие лица ги држат на маргините на општеството. Интересно и крајно полезно е да ги запознаеме, да видиме каква е желбата кај нив, со каква трудољубивост настапуваат кога треба да совладаат некаква вештина. Како локална самоуправа, која прави сериозни чекори во овозможувањето на еднакви услови за сите, општина Кисела Вода презема крупни чекори во надминувањето на предрасудите и препознавањето на способностите на луѓето со Даунов синдром.

За Стефан, ова е шанса да се афирмира како рамноправен член на заедницата. За останатите наши вработени и за нас како институција, ова е можност да се надминат евентуалните заблуди и самите да дадеме свој придонес во изградба на општество во кое е обезбедено подеднакво уживање на човековите слободи и права, општество во кое се почитува и уважува човековото достоинство.

Воедно како претседател на #ЗЕЛС, сакам да упатам апел до сите останати единици на локалната самоуправа, но и до институциите од централната власт, да го следат нашиот чекор и да овозможат вработување на лица со Даунов синдром.
Заложбите за еднаков третман на различностите не смеат да бидат само декларативни.Со дела да покажеме дека сме подготвени да го менуваме светот на подобро – напиша Ѓорѓиевски.

Фудбалската федерација на Македонија и техничкиот партнер ЈАКО го претставуваат новиот дрес на македонската фудбалска репрезентација.

Препознатливото сонце истакнато на градите на фудбалерите на модерен начин ја отсликува енергијата и гордоста на Македонија. Дизајнот на новиот дрес останува верен на македонското фудбалско наследство, додека резервниот дрес во бело-жолта боја е уште една интерпретација на македонскиот дизајн за фудбалерите и навивачите, велат од ФФМ.

Нашата репрезентација добива уште една, трета варијанта на дресови и шорцеви во темна боја која дополнително го нагласува сонцето и националната гордост.

Стилските букви на презимињата и броевите на дресовите се во духот на нашата историја и традиција, со оглед на тоа што се инспирирани од кирилицата.

– Исклучително сум горд што имам привилегија да го носам прекрасниот македонски дрес. Со нетрпение очекувам да го облечеме новиот дрес кој ја следи препознатливата традиција. Нашиот дрес со сонце е еден од најпрепознатливите и сигурен сум дека ќе биде многу популарен меѓу нашите навивачи, изјави капитенот македонската репрезентација, Стефан Ристовски.

Македонија бр.104/19, 146/19, 275/19, 311/20, 163/21, 294/21 и 99/22) а во врска со член 20-г од Закон за вработените во јавниот сектор (Службен Весник на Република Македонија бр. 27/14, 199/14, 27/16, 35/18, 198/18 и 143/19) и Правилникот за задолжителните елементи на јавниот оглас за пополнување на работно место во јавниот сектор преку вработување и пријавата за вработување, како и формата, содржината и начинот на водење на регистарот на лица кои дале лажни податоци при вработување во јавен сектор (Службен Весник на Република Македонија бр.34/15) и Одлуката на В.Д.Директорот бр. 04-305/1 ЈУ Меѓуопштински центар за социјална работа Прилеп објавува

ЈАВЕН ОГЛАС БРОЈ – 1/2023

За вработување на неопределено работно време на 2 даватели на јавни услуги од кои 1 од категоријата А самостојни стручни (Дефектолог) i 1 давател на јавни услуги од категоријата Б помошно-стручни (систем оператор за внес) во ЈУ Меѓуопштински центар за социјална работа Прилеп за следните работни места:

1. СОЗ0303А04013 Дефектолог/специјален едукатор и рехабилитатор – Самостоен стручен службеник во УСЗ од четврто ниво: еден (1) извршител:

Служба за услуги од социјална заштита – Оддел-Дневни центри , Дел-Дневен центар за лица со телесна или ментална попреченост – еден (1) извршител.

Општи услови: Да е државјанин на Република Северна Македонија, Активно да го користи македонскиот јазик, Да е полнолетен, Да има општа здравствена способност за работното место, Со правосилна судска пресуда да не му е изречена казна забрана за вршење професија, дејност или должност .

Посебни услови: за ниво А4 стекнати 240 кредити според ЕКТС или завршен VII/1 степен (Дефектологија) и најмалку две години работно искуство, Активно познавање на комјутерски програми за канцелариско работење,

Општи работни компетенции на средно ниво: Учење и развој, Комуникација, Остварување резултати, Работење со други/тимска работа, Ориентираност кон странките/засегнати страни и Финансиско управување.

Распоред на работно време: Работни денови Понеделник – Петок / Работни часови неделно 40 / Работно време 08:00 до 16:00

Паричен нето износ на плата: 28,928 денари

2. СОЗ0303Б02013 Систем оператор за внес – Помошно стручен службеник од второ ниво: еден (1) извршител: Служба за права на парична помош – Оддел за права од парична помош на подрачјето на општина Долнени и општина Кривогаштани – еден (1) извршител.

Општи услови: Да е државјанин на Република Северна Македонија, Активно да го користи македонскиот јазик, Да е полнолетен, Да има општа здравствена способност за работното место, Со правосилна судска пресуда да не му е изречена казна забрана за вршење професија, дејност или должност.

Посебни услови: За ниво Б2 стекнати најмалку ниво на квалификации IV, 240 кредити според ЕЦВЕТ или МКСОО или четиригодишно средно образование (Гимназија или Средно стручно-хемиски, текстилен или технички смер)

Распоред на работно време: Работни денови Понеделник – Петок / Работни часови неделно 40 / Работно време 08:00 до 16:00

Паричен нето износ на плата: 19,674 денари
________________________________________________________________________________

Рокот за доставување на пријавите со потребните документи изнесува 5 (пет) работни дена сметано од наредниот ден од денот на објавувањето на огласот (не сметајќи го денот на објавување на огласот). Условите наведени во огласот, кандидатите треба да ги исполнуваат во моментот на пријавувањето.

Пријавата за огласот може да се подигне од архиватa на ЈУ Меѓуопштински центар за социјална работа Прилеп. Кандидатите се должни пријавата да ја пополнат во целост, прецизно и со точни податоци. Пријавените кандидати на јавниот оглас, ќе бидат известени за времето и местото на проверка на веродстојноста на доказите и спроведување на интервју.

Право на учество имаат сите граѓани на Република Северна Македонија кои ги исполнуваат условите за конкурирање. Кандидатите со пријавата треба да ги достават доказите за исполнување на условите, во оригинална форма или копија заверена на нотар.

Кандидатите заедно со пријавата треба да ги достават потребните документи за исполнување на општите и посебните услови: Уверение за државјанство; Уверение за општа здравствена способност за работното место; Потврда дека со правосилна судска пресуда да не му е изречена казна забрана за вршење професија, дејност или должност; Доказ за соодветното работно искуство; Доказ – Диплома за завршено образование; Доказ за познавање на комјутерски програми за канцелариско работење (за кандидатите за работно место од реден број 1)

Напомена: Согласно Годишниот план за вработување на институцијата за 2023 година вработувањата се предвидени за: четири (5) Македонци.

Пријавата со потребната документација кандидатите треба да ја достават до архивата на ЈУ Меѓуопштински центар за социјална работа Прилеп или по пошта на следната адреса: ул.,,Стеван Апостолоски ,, бр.17 – Прилеп (со назнака за ,,јавен оглас ,,)

Kомисија за селекција на кандидати за давател на јавни услуги врши проверка на веродостојноста на доказите и спроведува интервју, Комисијата изготвува ранг-листа на кандидати, врз основа на проверка на исполнетоста на условите од јавниот оглас и извршеното интервју и истата ја доставува до директорот во рок од пет дена од денот на завршување на интевјуто со сите кандидати.

Оддел за административни работи и управување со човечки ресурси – Комисија за селекција на кандидати за давател на јавна услуга. Контакт телефон : 048421702

Ненавремените, нецелосните и некомплетните пријави и документација нема да се разгледуваат.

Викендов, односно последниот викенд од месец март ќе започне летното сметање на времето.

Стрелките на часовникот треба да се поместат за еден час нанапред, односно времето во 2 часот, ќе се смета како да е 3 часот.

До крајот на март денот ќе се зголеми, а со поместувањето на стрелки, ден ќе имаме се до 19 часот, а на почетокот на летото и до 20 часот.

Преминувањето на времето од зимско кон летно и обратно првпат почнало во 1916 та година во државите на северот во Европа, а денес е практика во 70 земји од Светот.

Рано утрово затворската полиција во затворот во Идризово направила голема акција со цел да ги сузбие можните обиди за бегство на осудените лица. Во акцијата била вклучена и градежна механизација.

Неофицијално, во акцијата е откриен ископан тунел во должина од околу 60 метри. Недостасувале уште неколку метри за да се дојде до главниот преграден ѕид на затворот. Според првичните неофицијални информации, тунелот бил добро осмислен, а во кој имаше и потпорни греди. Осветлувањето било решено со пуштен кабел со светилки.

Според информациите тунелот се копал најмалку 4 до 5 месеци наназад.

Пред еден месец директорот на затворот Шпенд Тахири го смени комплетното раководство на затворската полиција и назначи лица со искуство во затворскиот систем, кои веќе почнаа да даваат резултати.

Дали директорот на Управата за извршување санкции ќе превземе нешто доколку се откријат сторителите?

Современ кружен тек „Табана“ над коритото од Градската река, пробивање и инфраструктурна реализација на улицата „Победа“, средување на влезот Прилеп – Македонски Брод и поставување фотоволтаци на сите објекти кои се во сопственост на општина Прилеп, а тоа се училиштата, се четирите капатални проекти кои општина Прилеп има намера да ги реализира со издавањето на обврзници во вредност од пет милиони евра. На оваа тема беше организирана и јавна расправа со цел добивање зелено светло и од самите граѓани.

„Со првите три проекти, тоа се чисто инфраструктурни проекти кои го означуваат развојот на Прилеп. Со фотоволтаичните панели – производство на електрична енергија и искористување на обновливите извори на енергија“, – рече Бранко Нешкоски од Секторот за ПУП при ЛС Прилеп.

Обврзницата ќе се издава за период од 7 години, со годишна камата од 4,75 до 5 посто, или од 237 – 240 илјади евра камата на пет милиони задолжување. Првите шест години ќе се плаќала само каматата, а додека во седмата година, со последната рата од каматата ќе се исплател и вкупниот износ на обврзницата.

Првиот од предвидените три проекти, кружниот тек на мостот “Табана”, беше еден од еден од поголемите капитални проекти кој го планираше уште локалната власт предводена од екс градоначалникот Марјан Ристески.

Проектот требаше да придонесе за да се зголеми безбедноста, проточноста и ефикасноста во сообраќајот, а беше откажан од општината и градоначалникот Илија Јованоски.

Ристески во 2017 година истакна дека средствата за овој проект биле обезбедени од Светската банка, а проектот требаше да биде со рок на реализација 2018-2019 година.

Проектот тогаш предвидуваше:

-реконструкција на дел од улицата “11-ти Октомври”, на потегот од кружниот тек Солидност до фурната Плетварец

-кружен тек со проширување на мостот Табана, со цел комплетно да се растерети сообраќајот во овој дел од градот.

-предвидени беа 4 ленти со зелен појас во средината, со ново енергетско ефикасно осветлување, нови тротоарни површини и велосипедски патеки

Владата апелира до пратениците да не го блокираат законот со којшто се овозможува намалување на цената на производите за менструална хигиена. Ако собраниската Комисија за финансирање и буџет го блокира законот со кој треба да се намали цената на хигиенските влошки, донесена ќе биде времена мерка, соопштија од Владата. Велат, законското решение е во Собрание и ги повика пратениците да го усвојат.

– Тоа ќе се направи со закон, директно. Министерството за економија е подготвено, ако случајно има недоразбирање во Собранието и се блокира законското решение во Комисијата за финансирање и буџет, да донесе времена мерка, но, сепак, сакаме трајно решение, вели министерот за економија.

Кон крајот на минатата година премиерот Димитар Ковачевски најави намалување на даночното оптоварување на производите за менструална хигиена, како дел од мерките за даночни реформи и праведност на даночниот систем во земјава. Ковачевски тогаш потенцираше дека со планираните измени ќе има намалување на ДДВ-то на производи за менструална хигиена од 18 на пет проценти.