Градоначалникот на Битола Тони Коњановски, денеска оствари средба со претседателот на Стопанската комора на Македонија Бранко Азески, придружуван од претседателот на Регионалната стопанска комора Мирко
Велковски и членови на Управниот одбор на Регионалната комора во Битола.

На средбата се разговараше за активности кои треба да се преземат на локално ниво, за развој на стопанството во битолскиот регион. Беше спомената патната и гасна инфраструктура, како клучни приоритети во интерес на бизнисите во регионот и коридорот 10, патната и железничката инфраструктура во регионот кои се од суштинско значење, односно реализација на автопат Прилеп – Битола 40 километри и обиколница Битола – Меџитлија 19 километри.

Посебен акцент беше ставен на потребите од кадар за бизнисот како врни прашања за кои секојдневно се разговара и се иницираат активности од страна на бизнис заедницата.

Битолскиот регион има околу 5000 правни субјекти и придонесува со 9 до 10% во Бруто домашниот производ на нашата држава.

На 02.04.2026 г. во ОУ „Елпида Караманди“ – Битола, се одржа едукативна работилница посветена на значењето на водата, во организација на Инервил клуб Битола, со поддршка на ЈКП Водовод Битола.

Настанот е дел од интернационалниот проект „Водата е живот – чувај ја водата, чувај ја иднината“, во кои учествуваат клубови од Турција, С.Кипар и Бугарија.

Учениците блеснаа со креативност преку рецитали, драматизации и интересни презентации, испраќајќи силна порака за заштита на водните ресурси.

Особен акцент беше ставен на стручните презентации, при што вработените од ЈКП Водовод Битола: технолог Лела Ацевска и инженер Александар Велјановски, ги презентираа процесите на преработка и контрола на водата за пиење, како и новите инвестициски проекти на претпријатието.

Благодарност до сите учесници за инспиративниот настан и прекрасната енергија.

Од Регионалниот центар за управување со кризи по информација од ЕВН известуваат за планирани прекини во снабдувањето со електрична енергија во повеќе населени места и локации со економска активност:

ПЛАНИРАНИ ПРЕКИНИ на ЕЛЕКТРИЧНА ЕНЕРГИЈА на 06.04.2026 год. (Понеделник) и 07.04.2026 година (Вторник) од 09.00 ч. до 16.00 часот во следните населени места во Општина Прилеп:с. Зовиќ 1 , с. Будимирци , с. Старавина , с. Градешница , Манастир Св. Илија , с. Градешница и АРМ – Старавина.

ПЛАНИРАНИ ПРЕКИНИ на ЕЛЕКТРИЧНА ЕНЕРГИЈА на 08.04.2026 год. (Среда) и 09.04.2026 год. (Четврток) од 09.00 ч. до 16.00 часот во следните населени места во Општина Прилеп: с. Кокре , с. Кален с. Пештани , с. Две стени , с. Дуње , с. Вепрчани , с. Крушевица , с. Чаниште , ,,Погонска ветеринарна” и Рудник ,,Крин”.

Викендот кој е пред нас ќе донесе и потврда како ќе изгледаат полуфиналните двојки преку кои ќе стартува третата и одлучувачка фаза во Првата македонска лига – плеј-офот.

Пред одигрувањето на последното осмо коло од ТОП 8 фазата, познати се четирите екипи кои ќе играат во доигрувањето за место кое догодина води во елитната суперлигашка конкуренција.

За жал прилепски Мега Баскет не е помеѓу овие екипи, а во последното коло прилепчани ќе играат на домашен терен против Борец од Велес.

Натпреварот се игра со почеток од 17:00 часот во спортската сала на ООУ “Добре Јованоски”, па максимална поддршка во ова последно коло ќе значи премногу за прилепската екипа.

Три часа порано, со почеток од 14:00 часот, младата екипа на Мега Баскет ќе се соочи со Тетекс, па доколку немате обврски, можете едно цело попладне да уживате во кошаркарски натпревари.

Прилеп доби нова, модерна дестинација за сите љубители на мотори, адреналин и авантура. Со отворањето на салонот на CFMOTO Прилеп, градот се позиционира на мапата на современи мото центри кои нудат целосно искуство – од избор на возило, па сè до врвна заштитна и дополнителна опрема.

Салонот располага со богат асортиман на мотори, ATV возила и опрема, наменет и за почетници и за искусни возачи кои не прават компромис кога станува збор за квалитет и сигурност.

Централно место заземаат моделите од CFMOTO – бренд кој бележи силен подем на глобално ниво. Во понудата се наоѓа урбаниот и практичен NK 125, идеален за секојдневно градско возење, како и моќниот NK 675, наменет за оние кои бараат повеќе динамика и перформанси. За љубителите на спортски дизајн, тука е и 450SR – модерен, агресивен и впечатлив модел кој не остава никого рамнодушен.

За авантуристите и љубителите на долги патувања, MT серијата нуди совршена комбинација од удобност, издржливост и слобода на движење, без ограничувања.

Во понудата се вклучени и TAO Moto моделите, кои нудат одличен баланс помеѓу стабилност, безбедност и забава. Моделите како ATV 300 Outlander и TAO 250 се идеални за сите што сакаат да излезат од рутината и да доживеат вистинска off-road авантура.

За најмладите љубители на моторите, достапни се и mini ATV модели од 110 до 125 кубици – одличен и безбеден почеток во светот на возењето.

Кога станува збор за сериозно теренско возење, изборот на ATV возила од CFMOTO, со зафатнина од 450 до 1000 кубици, нуди врвна моќ, издржливост и сигурност во сите услови – од планински патеки до екстремни терени.

Покрај возилата, во салонот може да се најде и комплетна мото и крос опрема – кациги, заштитна облека, куфери и бројни додатоци од DONTI MOTO, кои гарантираат побезбедно и поудобно возење.

Салонот е лоциран во близина на бензинската пумпа „Лукоил“, на излезот од Прилеп кон Скопје, што го прави лесно достапен за сите љубители на мотори од градот и околината.

Со ова отворање, Прилеп добива ново место каде што се спојуваат адреналинот, квалитетот и современиот стил. За сите што сакаат вистинско возачко искуство – ова е дестинација која вреди да се посети.

Посетете ги уште денес и откријте го светот на две и четири тркала!

На 4 април, во Офицерскиот дом во Битола, за првпат ќе се одржи Bitola Whisky Fest, настан кој ја носи концепцијата на современите lifestyle фестивали надвор од Скопје.

Зад организацијата стои Bottega Eventi, тимот кој во изминатите години се позиционираше со истиот проект кој е веќе традиционален во Скопје, како и проекти како што е Gin Lane Festival, со цел да се третира културата на пијалоците како дел од пошироко искуство.

Bitola Whisky Fest е замислен како настан што го надминува класичниот формат на дегустација. Во фокусот не е само селекцијата на виски брендови, туку и амбиентот во кој тие се претставуваат.

„Настаните за пијалоци ги учевме низ процесот. Денес ги гледаме како културен медиум преку кој сесоздава атмосфера,“ велат од Bottega Eventi.

Изборот на Битола не е случаен. Градот со својата културна традиција, урбана естетика и препознатлив боемски карактер се наметнува како природен контекст за ваков тип на настан.

„Кога посакавме да го пренесеме Whisky Fest надвор од Скопје, Битола беше првиот избор. Поради вредностите што ги дели со самата виски култура…елеганција, романтика и градски дух,“ додаваат организаторите.

Во текот на вечерта, посетителите ќе имаат можност да дегустираат внимателно избрана понуда на виски, да следат музичка програма и да бидат дел од амбиент што се гради низ детали. Настанот е наменет за публика која препознава формат што не се сведува на забава, туку на искуство.

4 април 2026
Офицерски дом, Битола
18:00 – 00:00

Bitola Whisky Fest претставува покана за искуство во поинаков ритам, каде што настанот не завршува со последниот час, туку продолжува во импресиите што го остава.

Во Градската библиотека „Борка Талески“ в петок, на 3 ти април од 18 часот ќе се одржи промоција на новото дело од Венко Андоновски, “Александар јава на запад”.Промоторка на настанот ќе биде Габриела Стојаноска-Станоеска, позната поетеса, раскажувачка и критичарка од Прилеп, добитничка на наградата „Македонска книжевна авангарда“ и на повеќе награди за краток расказ, меѓу кои и на конкурсот на „Нова Македонија“. Како книжевен рецензент, уредник и промотор, но и како страстен читател, таа ќе ни го доближи „Александар јава на запад“ обелоденувајќи ги сите симболи и значења што се кријат зад хуморот.

Ова дело на Андоновски влезе во најтесниот избор за наградата „Роман на годината“, а во меѓувреме доживеа и второ издание.

Најавувајќи го својот роман, Венко Андоновски рече: „Ќе се смеете до солзи, ама нема секогаш да знаете и дали додека ви течат солзи од смеа, сепак плачете над бедата на историјата, над денес понижените херои и над паднатиот човек.“ Со тоа, пред да се впуштите во читање, ве поканува во оваа фарса да влезете подготвени. А секако подготвени и за разговор со него!

Проф. д-р Венко Андоновски е романсиер, драмски писател, филмски сценарист, книжевен критичар, теоретичар на литературата и културата е македонски писател (романописец, раскажувач, драмски автор, поет, есеист, критичар и книжевен теоретичар. Тој е дописен член на МАНУ.

Творештвото на Андоновски е богато и се состои од поезија, раскази, романи, драми, есеи и книжевна критика. Тој е еден од најчитаните македонски писатели во 21 век: неговиот роман „Папокот на светот“ е продаден во повеќе од 12 000 примероци, а романот „Вештица“ го надминал тиражот од 7 000 примероци. Исто така, тој е еден од најпопуларните драмски писатели во Македонија. Неговите дела се преведени на десетина јазици.

Андоновски е добитник на многу меѓународни и национални награди и признанија.

Во извештајот кој го објави Државната комисија за спречување корупција се укажува дека редовното и проактивното информирање на јавноста претставува значаен инструмент за јакнење на институционалниот
интегритет и за промовирање на култура на нетолеранција кон корупцијата.

Извештајот од спроведеното следење на примената на системот за интегритет за 2025 година опфаќа институции на државно и локално ниво.

Во мониторираните општини е и Општина Битола со добро ниво на усогласеност. Таа е на трето место, а тоа значи дека нивоата добро и многу добро, односно резултат од над 60 проценти исполнетот на утврдените критериуми, се смета за индикатор дека општината има воспоставено и имплементирано функционален систем на интегритет, со основни механизми кои се применуваат во пракса. Процентот на исполнетост на критериумите за Општина Битола е 78,31 %.

Воспоставувањето на системот за интегритет ги опфаќа обврските што претставуваат основа за функционална имплементација: анализа на институционалните потреби, мапирање и проценка на ризици од корупција,
донесување интерни правила и уредување на клучните области ( судир на интереси, подароци, укажување, транспарентност, итн).

За потсетување, во последниот извештај Општина Битола беше најтранспарентна општина меѓу најголемите во државата според „Транспаренси интернешнл -Македонија“, претходно најтранспарентна општина според „Центарот за граѓански комуникации“, Битола на прво место според индексот на отвореност според истражувањето на фондацијата „Метармофозис“, со подобрена буџетска транспарентност и пример за отчетност кон граѓаните според „УСАИД“, а во 2022 на врвот на ранг листата од општините според активната транспарентност прогласена од „Центарот за граѓански комуникации“.

Државна Видеолотарија на Македонија – Касинос Австрија, преку проектот „Играј одговорно“, овозможи отворање и функционирање на уште едно советувалиште, како дел од пошироката иницијатива за превенција и психо-социјална поддршка на лица со проблематично играње игри на среќа.

Покрај веќе постоечките советувалишта во Скопје, Куманово, Битола и Прилеп, од април започна со работа и советувалиштето во Радовиш.

Советувалиштата функционираат во рамки на проектот „Играј одговорно“, кој се реализира од 2019 година, во соработка со Здружението на лекувани зависници на Република Македонија, со цел навремена поддршка и рехабилитација на лица погодени од проблематично играње.

Како општествено одговорна компанија, Државна Видеолотарија на Македонија – Касинос Австрија континуирано вложува во поставување и унапредување на стандардите за одговорно приредување игри на среќа. Преку едукација, советување и поддршка, компанијата активно придонесува кон намалување на ризиците, особено кај ранливите категории граѓани.

Со овие активности, ДВЛМ се позиционира како предводник во индустријата во делот на одговорното играње, со јасна цел – превенција на негативните последици од прекумерното играње и подигнување на свеста во јавноста.

Во Крушево отворена нова сала за фитнес и аеробик во рамките на спортската сала „Војвода Ѓорѓи Стојанов“, проект кој има за цел да ги подобри условите за спорт и рекреација, особено кај младите.

На отворањето присуствуваше градоначалникот на Општина Крушево, Нико Чонески, кој истакна дека станува збор за значаен проект реализиран во рамките на иницијативата „Младински политики по мерка на младите“, финансиран преку програмата Цивика мобилитас, со поддршка од Амбасадата на Швајцарија.

„Особено радува фактот што токму младите од Крушево беа иницијатори на оваа идеја и активно учествуваа во нејзината реализација“, посочи Чонески.

Новата сала ќе има двојна намена – во претпладневните часови ќе ја користат учениците од СОУ „Наум Наумовски – Борче“ за часови по физичко образование и спортски активности, додека попладне ќе биде достапна за сите граѓани кои сакаат да практикуваат фитнес и аеробик.

Проектот е предводен од „Про Локал“ Битола, а во Крушево го реализираше Здружението за млади „Емпауринг Крушево“, во соработка со училиштето и локалната заедница.

Од Општината посочуваат дека ваквите иницијативи се од клучно значење за создавање подобри услови за младите, како и за поттикнување здрави животни навики и активен начин на живот.