Мермерниот Комбинат Прилеп реализираше уште една општествено одговорна мисија, донирајќи неопходна опрема за детските градинки “Наша иднина”.

Донацијата вклучува шест клима-уреди, печатачи, сушална, ламинат подови и шкафчиња, а е со цел да се подобрат условите за работа и за престој на најмалите во општина Прилеп.

Од компанијата посочија дека вложувањето во детските градинки е директно вложување во иднината на целата заедница. Во рамки на настанот беше изразена благодарност до директорката Христина Трпческа за нејзината посветеност и ангажман.

Од Мермерен комбинат истакнаа дека оваа донација е дел од нивната континуирана поддршка на локалната заедница и најавија дека и во иднина ќе продолжат со активности кои носат конкретни придобивки за граѓаните на Прилеп.

Очекувањата се дека донираната опрема ќе им служи на децата и на воспитно-образовниот кадар уште многу години, придонесувајќи за создавање потопла, побезбедна и поквалитетна средина во градинките „Наша иднина“.

Настанот беше заокружен со убава приредба и рачно изработен мозаик, со кои дечињата им се заблагодарија на донаторите.

Сојузот на Ротари клубови на Македонија ја реализираше големата еколошка акција за пошумување, во рамки на која беа засадени над 6000 медоносни садници во сите градови каде што функционираат ротари клубовите. Акцијата се одржа истовремено низ целата држава, со учество на повеќе од 500 волонтери – акцијаши, извидници, здруженија, семејства и граѓани/граѓанки.

Во Скопје, акцијата се реализираше во Парк шумата Гази Баба, на терен кој ова лето беше сериозно погоден од пожарите. Таму беа засадени 1500 садници од багрем, јавор и јасен, дрвја од особено значење за пчеларството, биодиверзитетот и подобрувањето на квалитетот на воздухот.

На настанот активно учество земаа градоначалникот на Град Скопје, Орце Ѓорѓиевски како и градоначалникот на Општина Гази Баба, Бобан Стефковски, кои заедно со волонтерите и ротаријанците придонесоа за обновување на зеленилото и создавање нова еко-зона.

Иницијатор на проектот е Сојузот на Ротари клубови на Македонија, со поддршка и координација од Елена Панова (координатор 2024/25), Милош Радуловиќ (сегашен координатор) и Митко Демировски (идниот координатор на Сојузот).

„Со оваа акција ротари клубовите ја потврдија својата посветеност кон заштитата на природата и заедницата. Засадувањето медоносни дрвја е инвестиција во иднината – за пчелите, за биодиверзитетот и за здравјето на граѓаните,“ изјавија претставниците на Сојузот.

Акцијата беше спроведена во соработка со општините каде што постојат ротари клубови, кои обезбедија логистичка поддршка и алати за садење.

Со оваа иницијатива, Сојузот на Ротари клубови на Македонија ја испраќа пораката дека грижата за природата е грижа за иднината на нашите деца, а заедничките акции се клучни за создавање позелена, почиста и поубава Македонија.

На 15 декември 2025,понеделник, од 14.00 ч.во Ликовната галерија од ЦК”Марко Цепенков” ќе биде отворена изложба од Петра Јованоска и Рафаел Ристовски. Изложбата е поддржана од Министерството за култура и туризам.

Централниот мотив во делата на Петра Јовановска е кругот, кој не е случаен избор, туку симбол на креативната и животната филозофија, како и на сознанието дека совршената форма нема почеток и крај.

Кругот ја симболизира вечноста, животниот циклус, движењето на планетите околу Сонцето, космосот и совршенството. Во историјата на уметноста, овој геометриски облик има своја важна улога, особено во средновековната црковна архитектура, како и во ренесансата и модерната западна уметност. За разлика од неговото толкување во западната цивилизација, кругот има посебно значење и во источните култури. Уметницата го користи овој симбол за да ги претстави своите мисли, емоции и философски погледи на светот. Во нејзините уметнички композиции, круговите често се множат и повторуваат, создавајќи моќна визуелна порака која се постигнува со различни медиуми и графички техники.

Рафаел Ристовски се фокусира на визуелните дела изработени преку новите медиуми, особено дигиталната фотографија со манипулација. Ристовски ја истражува убавината на природата и урбаната околина, како и врската меѓу нив, и го одразува својот однос кон светот преку жанрот на градскиот пејзаж. Урбаниот пејзаж, според него, не е само приказ на градот и природата, туку и начин на кој сите ние, како дел од оваа околина, го разбираме и доживуваме светот околу нас.

Градскиот пејзаж за Ристовски не е само визуелна претстава, туку и перцепција на неговото лично расположение. Често, тој создава брзи скици односно фотографии кои прикажуваат фрагменти од пејзажот — игра на бои на небото и облаците, одразот на водата, или зраци на Сонце што го осветлуваат тревата. Се обидува да ја пренесе емоцијата на живеењето користејќи дигитална манипулација за да го даде моменталното чувство на сопствената стварност. Рафаел се обидува да создаде нова димензија во фотографијата, додавајќи виртуелен и визуелен свет кој го нагласува човечкиот однос кон природата и околината.

Во оваа заедничка изложба, Петра Јовановска и Рафаел Ристовски ќе создадат еден вид уметнички дијалог, каде двата различни пристапи — тој на Јовановска преку симболиката на геометриските форми и емоционалната порака, и тој на Ристовски преку урбаната фотографија со дигиталната манипулација — ќе се спојат во една уникатна уметничка приказна.

На 13.12.2025 во Подгорица, Црна Гора, се одржа 19. Меѓународен турнир во џудо “Куп на ослободувањето на Подгорица” – 2025, каде учество зедоа вкупно 485 натпреварувачи од 40 џудо клубови.

Џудо клубот Сеишин од Прилеп зеде учество со 7 натпреварувачи, при што освоени се 7 медали (2 златни, 2 сребрени и 3 бронзени медали).

Резултати поединечно:

1. Јована Цветкоска 1 место
2. Немања Џагадуроски 1 во место
3. Марко Марковски 2 ро место
4. Теодора Илиоска 2 ро место
5. Тамара Илиоска 3 то место
6. Матеја Николоска 3 то место
7. Ангел Стојовски 3 то место

Екипата ја водеа тренерите Мартин Ристески и Тони Бурнески, кои се задоволни од настапот на овој квалитетен и масовен турнир. Ова беше и последниот настап од натпреварувачки карактер за 2025 година на членовите на ЏК Сеишин – Прилеп.

Младите кошаркари на КК “МЕГА БАСКЕТ” Прилеп вечерва играа феноменално. Се докажа дека Прилеп има потенцијал и добра стратегија на кошаркарските ентузијасти од управата. Пред својата верна публика, младите кошаркари триумфираа над своите врсници од битолски Пелистер со високи 81:63.

Ова треба да е поттик за прилепските стопанственици да бидат општествено одговорни и да го помогнат клубот, кој макотрпно прави се’ за враќање на кошарката на пиедесталот во Прилеп.

Оваа победа на младите кошаркари нека биде поттик за утре (недела, 14.12.) да ги поддржиме и сениорите, кои со почеток од 19:00часот во спортската сала на ООУ “Добре Јованоски”, го пречекуваат Тетекс.

Oд полицискиот билтен на МВР:

-На 13.12.2025 во 03:48 часот, полициски службеници од СВР Битола на ул. „4-ти Ноември” во Битола, го лишија од слобода Б.Ш.(22) од Битола. При контрола на патниот сообраќај, полициските службеници сопреле патничко возило „ауди” со битолски регистарски ознаки, кое го управувал Б.Ш., и по преземени мерки било констатирано дека е под дејство на алкохол, односно му биле измерени 1.66 промили алкохол во крвта.

-На 12.12.2025 во 23:00 часот полициски службеници од СВР Битола на ул. „Орде Чопела” во Прилеп, го лишија од слобода Х. Г.(31) од Прилеп. При контрола на патниот сообраќај, полициските службеници сопреле патничко возило „опел” со прилепски регистарски ознаки, кое го управувал Х.Г., и при преземени мерки било констатирано дека е под дејство на алкохол, односно му биле измерени 1,78 промили.

По целосно документирање на настаните, ќе бидат поднесени пријави по член 297-а од Кривичниот законик – „безобѕирно управување со моторно возило“.

На Универзитетската клиника за трауматологија, ортопедски болести, анестезија, реанимација, интензивно лекување и ургентен центар (ТОАРИЛУЦ) за прв пат во Македонија е изведена комплексна хируршка интервенција кај 4-годишно дете со редок конгенитален Спренгелов деформитет (Sprengel deformity), во соработка со проф. д-р Уфук Ајдинли од Република Турција.

Интервенцијата претставува значаен чекор во јакнење на капацитетите на македонскиот здравствен систем за третман на ретки и сложени ортопедски состојби во детската возраст, преку тимска работа, пренос на знаење и примена на современи оперативни техники.

-Оваа интервенција е резултат на врвна мултидисциплинарна координација – ортопедски тим, анестезија, интензивна нега и ургентна поддршка – со јасен фокус на сигурноста и квалитетот на самата постапка. Благодарение на соработката со проф. д-р Уфук Ајдинли, направивме значаен исчекор во третманот на ретки конгенитални деформации кај деца. Нашата цел е овој тип процедури да станат стандарден дел од клиничката пракса во земјата, со континуирана едукација и развој на домашните тимови, вели директорот на ТОАРИЛУЦ, проф. д-р Игор Мерџаноски.

Според министерот за здравство, Азир Алиу градењето доверба во здравствениот систем се прави со ваков вид на резултати, со знаење, со тимска работа и со создавање услови најсложените интервенции да се изведуваат во државата.

-Ова е пример како меѓународната соработка, размената на експертиза и знаење директно се претвораат во подобра грижа за пациентите. Министерството ќе продолжи да ја поддржува модернизацијата на клиниките, развојот на човечките ресурси и воведувањето современи медицински методи, со цел граѓаните да добијат модерен, функционален и одржлив здравствен систем, вели министерот Алиу.

Спренгеловиот деформитет е ретка конгенитална состојба при која лопатката е поставена ненормално високо и е недоволно развиена поради неуспешна надолна миграција за време на ембрионалниот развој. Ова најчесто предизвикува видлива „испакнатина“ и ограничување на движењето на рамото. Состојбата неретко е поврзана и со други придружни наоди, како синдромот Клипел-Фил, сколиоза, а понекогаш и дополнителна коскена/влакнеста врска со ’рбетот (омовертебрална лента), поради што за прецизна дијагностика и планирање се користат снимања како КТ и/или МРИ. Оперативниот третман најчесто се резервира за потешки случаи во возраст од 3 до 8 години, со цел подобрување на функцијата и изгледот.

Директор за влеча и одржување на возните средства и член на Управен одбор на „Македонски железници-Транспорт“ Игор Коруновски објави видео од тест возењето на целосно обновениот и модернизиран легендарен воз “Шпанец”.

-Легендарниот воз “Шпанец”, некогаш заборавен и речиси отпишан, се враќа на голема врата. Денес го тестиравме целосно обновениот и модернизиран воз со нов дизајн, телевизори, озвучување, алармни системи и видео надзор.

Подготовките за поудобно и побезбедно патување се во полн ек. Следуваат уште новости – останете со нас, објави на Фејсбук Игор Коруновски.

Наташа Тодоровска- наставник по одделенска настава во ОУ „Ѓорѓи Сугарев“ во Битола и Аница Б. Златевска- психолог во ОУ „Коле Канински“ во Битола, кои беа меѓу просветните работници кои добија признание од Министерството за образование и наука и Сојузот на просветни работници, имаа прием кај градоначалникот на Битола, Тони Коњановски.

Градоначалникот Коњановски им честиташе за признанијата „Просветен работник на годината“ за учебната 2024/2025 година, кои претставуваат чин на јавно признание, но и симбол на поширока заложба за градење општество кое активно ја поддржува и вреднува улогата на воспитувачите, наставниците и стручните соработници.

Инаку по повод 5 Октомври – Светскиот ден на учителите Министерството за образование и наука ја започна кампања за истакнување на нивната незаменлива улога во општеството и поголема почит од заедницата во рамките на кампањата „Магијата е во знаењето“.

Свети Андреј бил син на Јонин и брат на Петар, со потекло од Витсаида, по професија рибар.

Отпрвин бил ученик на свети Јован Крстител, но кога свети Јован покажал со прст кон Господ Исус велејќи: ете, јагнето Божјо!, тогаш свети Андреј го оставил својот прв учител и тргнал по Исус. Тогаш Андреј го донесе својот брат Петар кај Господа.

По слегувањето на Светиот Дух, му паднало на првиот Христов апостол, Свети Андреј, да го проповеда Евангелието во Византија и Тракија, потоа во дунавските земји, потоа во Русија и околу Црното Море и на крајот во Епир, Грција и Пелопонез, каде што пострада.

Во Византија го поставил за прв епископ во лицето на свети Стахион; во Киев го закова крстот на високо и пророкуваше голема христијанска иднина за рускиот народ; во Тракија, Епир, Грција и на Пелопонез применил многу народи во верата и им поставил епископи и свештеници. Во градот Патра, тој изврши многу чуда во името на Христос и придоби многу за Господа, меѓу кои беа братот и жената на царскиот управител Егеата. Разгневен од тоа, Егеат го мачеше свети Андреј, а потоа го распна на крстот.

Додека бил жив на крстот, апостол Христос им кажал корисни поуки на христијаните, кои се собрале околу неговиот крст. Народот сакаше да го симне од крстот, но тој се спротивстави. Конечно, апостолот почнал да се моли на Бога, а во исто време некоја необична светлина го осветли насекаде. Тоа просветлување траело половина час, а кога исчезнало, апостолот му ја предал својата света душа на Бога. Така го заврши својот земен живот првиот апостол, кој беше првиот од 12-те големи апостоли кој го спозна Господ и го следеше.

Мачеништвото на свети Андреј за својот Господ во 62 година. Неговите мошти биле пренесени во Константинопол. Подоцна, неговата глава била префрлена во Рим, а едната рака во Москва. Тој пострада на крстот, поради неговата посветеност на новозаветната вера. Се слави како слава. Според народните верувања, Свети Андреј разговара со големите животни и се смета за нивен заштитник, а тие му се покоруваат.

Во минатото, мечувалците го славеле празникот Свети Андреј, верувајќи дека овој светец ги скротува мечките како кучиња и дека патува низ светот јавајќи го овој ѕвер. Се верува дека на тој ден мечките не ги повредуваат и не ги допираат луѓето, па затоа не треба да одите во лов на нив.

Според обичајот на овој ден треба да се јаде пченка.