Борбата против корупцијата заедно со другите елементи на јакнење на владеењето на правото е во сржта на процесот на проширување на ЕУ и бара посветеност од земјата во целост. Владата, Парламентот, правосудството се главните протагонисти во таа борба и мора да служат како пример. Иако забележуваме одреден напредок, чекорот на реформите во областите на владеење на правото и борбата против корупцијата останува разочарувачки.

Ова го истакна шефот на делегацијата на ЕУ во земјава, Дејвид Гир на денешниот состанок на кој заедно со вицепремиерката задолжена за политики за добро владеење Славица Грковска, беше разгледан напредокот во исполнувањето на препораките на Европската комисија во борбата против корупцијата.

Гир нагласи дека Извештајот за земјава од минатиот октомври обезбедува јасни насоки што треба да се направи и кои се приоритетите, но досега, поред него, малку е постигнато на тој план.

– ДКСК и Државниот завод за ревизија вршат важна работа, но на препораките од овие тела во конкретни случаи често не се постапува. Исто така, и нивото на имплементација на Националната стратегија за борба против корупција останува незадоволителна и претставува само 10 проценти според минатогодишниот извештај на ДКСК. Во оваа Стратегија има јасни и прецизни задачи за секоја институција присутна на состанокот. Трансформирањето на добрите намери во дела бара напорна и заедничка работа и соработка. Можете да сметате на нашата поддршка. Заедно со силната политичка посветеност почнувајќи од највисокото ниво преку институциите, потребни се засилени напори на Владата, на министерствата, на општините и државните институции за постапување согласно тие препораки. Но, Парламентот исто така има своја улога. Фактот дека се уште не е разгледан Извештајот за имплементација на Националната стратегија за борба против корупција на ДКСК за 2021 година е обесхрабрувачки, рече Гир.

Според него, потребен е напредок во јакнење на антикорупциската законска рамка и пред се во нејзината имплементација. Во таа насока Владата, опозицијата и Парламентот, мора да работат заедно.

– Темелно спроведување на антикорупциската рамка е исто така важна. Консолидацијата на досието за проактивно истражување, гонење и конечни пресуди во борбата против корупцијата на сите нивоа и против сериозниот и организиран криминал мора да биде клучна цел на земјата на нејзиниот европски пат, особено сега кога некои важни судски предмети се соочуваат со застарување, рече евроамбасадорот Гир.

Тој нагласи дека судството има клучна улога во борбата против корупцијата и затоа треба да биде независно и професионално, а судиите и обвинителите да делуваат со интегритет ослободени од политички влијанија или финансиски стимулации.

– Тоа е судство што ќе ја поврати довербата на јавноста, порача шефот на Делегацијата на ЕУ.

Во Извештајот одреден напредок е нотиран и во однос на Основното јавно обвинителство за гонење организиран криминал и корупција, со јакнување на неговите ресурси и ангажирање финансиски експерти, што, според Гир, е нужно за да се зголеми бројот на конечни пресуди во случаите на висока корупција и заплена на незаконски стекнат имот.

Евроамбасадорот ја потенцира и клучната улога на граѓанското општество, невладините организации и медиумите во напорите да се повикуваат на одговорност јавните институции и функционери.

– ЕУ и нејзините земји членки инвестираа многу за поддршка на владеењето на правото и борбата против корупцијата во земјава. Навистина, сега е време Северна Македонија и нејзините институции да испорачаат понатамошни конкретни опипливи резултати, пред се заради граѓаните, но и заради напредок на патот кон ЕУ, порача евроамбасадорот Дејвид Гир.

Државната Дума, долниот дом на рускиот парламент, го поддржа нацрт-законот со кој се предвидува доживотен затвор за велепредавство, јавува руската државна новинска агенција ТАСС.

Во моментов максималната казна за велепредавство во Русија е 20 години затвор, а за споменатото кривично дело можат да бидат обвинети само руски државјани или оние со двојно државјанство.

Во нацрт-законот се наведува дека руските државјани, вклучително и оние со двојно државјанство, може да бидат осудени за споделување државни тајни со странски држави, организации или нивни претставници, шпионажа и давање финансиска, логистичка, советодавна или друга помош во активности против безбедноста на Руската Федерација.

Нацртот беше предложен на 7 април, пред критичарот на Кремљ, Владимир Кара-Мурза, да биде осуден на 25 години затвор, откако судот во Москва го прогласи за виновен за предавство, дискредитација на војската и учество во активности на непожелни организации. Кара-Мурза, кој има руско и британско државјанство, јавно ја осуди руската војна против Украина.

Законот сè уште треба да го одобри Советот на Федерацијата како Горен дом на рускиот парламент. Тогаш рускиот претседател Владимир Путин ќе може да го потпише законот. Амандманите, исто така, ги заоструваат казните за обвиненијата за тероризам. Така, на пример, според членот, за терористички напади максималната казна ќе се зголеми од 15 на 20 години.

Поранешната специјална обвинителка Катица Јанева и годинава користела продолжен празничен викенд исто како и минатата година.

Новиот директор на затворот „Идризово“, Зоран Јовановски, за „Макфакс“ вели дека Јанева уредно се вратила во затворот и веќе ги извршува редовните затворски обврски.

„Не знам точно кога излезе, но постапи според она што ѝ беше дозволено и се врати во затворот. Од утрово веќе ги извршува тековните затворски обврски. Работи во библиотеката, библиотекарка е. Користи викенди и излези секогаш кога тоа го дозволува правилникот, работиме строго по него. Го добива она што ѝ следува во согласност со издржаниот дел од казната“, вели директорот Јовановски.

Репертоар на тетарот „Војдан Чернодрински“

Во сабота (22.04.2023) со почеток од 20.00ч. ќе се одигра претставата „ДУПЛО ДНО“

Влезници на телефонскиот број: 076 442 378

Продолжува целосната обнова на ООУ “Климент Охридски” во Прилеп. Секое ќоше и секој простор во училиштето добива нов современ изглед. На ваквиот начин на работа и пристап ќе позавидат сите останати училишта во Македонија.

Обележани кабинети, уредени ѕидови, подови, ходници… дури и хаус мајсторот има простор како што доликува. Со еден збор СОВРШЕНО!

Криминалистичката полиција при СВР Битола на 18.04.2023 го лиши од слобода Н.Д.(43)од Битола поради сомнение за извршени разбојништва на подрачјето на Битола.

Имено, на 11.04.2022 околу 08.00 часот, пријавениот со цел да се стекне со противправна имотна корист, во аптека на ул.„Солунска“ во Битола, со закана со пиштол кон вработената, од магацинскиот простор одзел пари.
На 16.05.2022 во 08.40 часот, пријавениот во обложувалница во комплекс Безистен во Битола, со закана со нож од вработената одзел пари.

На 18.04.2023 во 06.55 часот, Н.Д. од аптека на ул.„Димитар Илиевски Мурато“, со закана со нож кон вработената, од магацински простор на аптеката, одзел пликови со сметки.

Н.Д. е приведен и против него до ОЈО Битола е поднесена пријава, поради сомнение за сторено кривично дело „разбојништво“, предвидено и казниво по чл.237 ст.1 од Кривичниот законик, а од страна на судија на претходна постапка на лицето му е определена мерка притвор од 30 дена.

Јавното претпријатие за државни патишта објави оглас за вработување на работници до 2028 година за проектот за изградба на четирите автопати на изведувачот „Бехтел и Енка“ на коридорите 8 и 10д.

Според огласот, ЈПДП ќе ангажира работници според нивниот правилник, а тоа значи работна недела од 40 часа неделно, а не како што било договорено со „Бехтел и Енка“ за 60 часовна работна недела.

Рокот за пријавување е 25 април.

Јавното претпријатие бара помошник на главниот и одговорен координатор на проектот, кој треба да биде градежен инженер за основна плата од 70.052 денари; координатор на единицата за подготовка на проектот со завршен фалкултет од општествените зането-плата од 60.005 денари; координатор на единицата за техничка изведба на проектот кој треба да биде градежен инженер за 65.029 денари…

Времето денеска ќе биде променливо облачно со сончеви периоди, попладне со локални врнежи од дожд, кои на места краткотрајно ќе бидат поројни и проследени со ретки грмежи. Ќе дува слаб до умерен ветер од северен правец. Минималната температура ќе биде во интервал од 3 до 8, а максималната ќе достигне од 13 до 20 степени.

Во Скопје променливо облачно, попладне со краткотраен дожд. Ќе дува умерен северен ветер. Минималната температура ќе се спушти до 5, а максималната ќе достигне 18 степени.

Во следните денови времето претпладне ќе биде претежно сончево, а попладне ќе биде променливо облачно со локални врнежи од дожд кои на места ќе бидат поројни и проследени со појава на грмежи.

Прилепчанец вечерва имаше повод за славје, откако двата четвртфинални натпревари од Лигата на шампиони ги погоди како да ги сонил.

Од двојка во икс на Наполи-Милан и од икс во двојка на Челси-Реал Мадрид, за 4 стотки, за одлична добика од 38.000 денари.

Алал вера!

На 12 април 2023 год, Гимназија „Мирче Ацев“ – Прилеп, беше посетена од италијанска делегација составена од заменик амбасадорот на Италијанската амбасада во Македонија, Марио Де Роза, претседателот на Конфедерацијата на работодавачи и стопанската комора на Италија (Confindustria) во нашава држава Рикардо Рајноне и Енрико Рајноне – директорот на Конфиндустрија во Македонија.

Делегацијата беше дочекана од професорката по италијански јазик Габриела Пацаноска, од в.д. директорката Весна Михаиловска, од претседателот на Училишниот одбор Николче Богданоски, како и од ученици од нашата Гимназија кои го изучуваат италијанскиот јазик.

На средбата, директорката им изрази благодарност на гостите, што го посетија училиштето и ги запозна со општите податоци за гимназијата како и со податоци за врвните постигнувања на учениците во сите области, кои ја прават прилепската гимназија едно од водечките училишта во државава.

Професорката по италијански јазик во нашата Гимназија Габриела Пацаноска, потенцираше дека нашето училиште е единственото во поширокиот регион во кое веќе 20 години се изучува италијанскиот јазик и дека од училишните клупи на нашата гимназија излегле многу сегашни професори и преведувачи кои продолжиле да ги шират италијанскиот јазик и култура.

Се разговараше и за можностите за соработка со амбасадата во полето на наставата по италијански јазик во основните училишта. Пет години откако со Уредбата од март 2018 година, италијанскиот јазик беше вклучен во наставната програма на основните и средните учлилишта во Македонија како втор задолжителен странски јазик, до денес над дваесет основни и исто толку средни училишта го вклучија овој предмет во наставната програма, а го изучуваат над две илјади ученици.

Италијанскиот не само што е јазик на културата, туку нуди и конкретни можности како на професионален, така и на општествен план, подвлече заменикот амбасадор Марио Де Роза и ја истакна потребата од уште поголема промоција на италијанскиот јазик во училиштата.

Професорката потврди дека неодамна беше усвоена новата наставна програма за 6-то одделение со можност да се изучува италијански јазик.

На средбата се зборуваше и за активностите по предметот италијански јазик, како и за напорите што ги преземаат раководството, училишниот одбор и наставниците насочени кон обезбедување на услови за уредно спроведување на наставната програма, проектните и воннаставните активности во училиштето.

Претседателот на училишниот одбор, Николче Богданоски, истакна дека во училиштето покрај италијански јазик се изучува и латинскиот јазик, а по предметот историја, значителен дел од наставните содржини се посветени на историјата и културата на Италија, поради што кај учениците се раѓа љубов и интерес за таа земја. Тоа придонесува учениците често да ја избираат Италија како релација за неколкудневната завршна екскурзија за трета година. Богданоски посочи дека потребно е да има поголема соработка помеѓу нашето училиште, италијанската амбасада во Македонија и бизнис заедницата на Италија, а тоа го потврдија и гостите.