Засилените акциски сообраќајни контроли продолжуваат и во наредните денови.

Денеска (23.04.2023) во периодот од 11.00 до 17.00 часот на територијата на СВР Битола спроведена e засилена акциска контрола за санкционирање на возачи кои управуваaт возило со брзина поголема од пропишаната, при што санкционирани се 127 возачи.

Од нив, 88 возачи ја пречекориле брзината во населено место, а 39 надвор од населено место. На сите прекршители изготвени им се соодветни поднесоци.

-Апелираме до граѓаните да ги почитуваат сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта, информира МВР.

Кошаркарите од прилепски Мега баскет синоќа против Младинец од Скопје го започнаа плеј-оф разигрувањето за влез во Втората кошаркарска лига, и буквално го растурија противникот.

Во преполната спортска сала на ООУ “Добре Јованоски”, вљубениците во кошарката беа сведоци на победа од 70 поени разлика – 109:39.

Со оваа убедлива победа, прилепчани уште еднаш најавија дека се главни играчи за пласман во повисок ранг на натпреварување, а сега ќе треба да триумфираат и во Скопје, за да ја поминат првата пречка на тој пат.

Кај прилепчани најразиграни беа: Стевананџија со 19 поени, Митрески со 20, Здравевски со 16 и Јаневски со 13 поени.

Вториот натпревар со Младинец се игра за 3 дена.

Денеска е Томина Недела или Нова Недела, Антипасха, во западното христијанство позната како Бела Недела или Мал Велигден. Ова е значаен христијански празник кој се прославува во првата недела по Велигден и е посветен на светиот апостол Тома.

Кога Исус Христос се јавил на апостолите, Тома не бил со нив, а кога тие му кажале дека го виделе учителот тој не поверувал и им одговорил: „Дури не ги видам клинците на рацете Негови, и не го ставам прстот свој во раните од клинците, и не ја ставам раката своја во ребрата Негови, нема да поверувам“.

Поради тоа, апостолот Тома е наречен Неверен Тома. По осум дена кога и Тома бил со другите апостоли Христос пак им се јавил при што посебно му се обратил на Тома:

„Дај го прстот свој овде и види ги рацете Мои; дај ја раката своја и стави ја во ребрата Мои; и не биди неверлив но верлив!“

На тоа Тома одговорил и рекол: „Господ мој и Бог мој!“ Исус му рече: „Тома, ти поверува, оти ме виде; блажени се оние, кои не виделе, а поверувале“.

Во с. Дебреште, Општина Долнени, во моментов се одржува традиционалниот турнир за пеливани – традиционално борење, кое се негува и одржува пет века на овие простори.

На турнирот учествуваат над стотина пеливани од Македонија, Турција, Албанија и Бугарија. Турнирот е во организација на “Младинското здружение Дебреште„, а ќе се одржува под покровителство на Општина Долнени.

Турнирот во пеливанство започна во 10 часот на стадионот во селото, а за најдобрите пеливани ќе следуваат вредни награди.

Пратениците во канадскиот парламент носеа розови потпетици како дел од настанот „Надеж на високи потпетици“, спонзориран од засолниште за жени во Онтарио, за да се подигне свеста за насилството врз жените.

„Насилството врз жените сè уште преовладува во нашето општество. Надеж во потпетици е настан кој ја подигнува свеста за насилството врз жените, истовремено охрабрувајќи ги мажите и момчињата да бидат дел од решението. Ги носевме нивните препознатливи розови потпетици за да го поддржиме тоа“, твитна во четвртокот канадскиот министер за транспорт Омар Алгабра, заедно со видеото од настанот.

?????? Kanadische Politiker haben beschlossen, "gegen geschlechtsspezifische Gewalt" zu kämpfen, indem sie rosa High Heels tragen……? pic.twitter.com/TWYxgxf1Hw

— Deutsch365 (@deutsch365) April 21, 2023

Во текот на изминатата вечер (22/23.04.2023)во периодот од 22.00 до 04.00 часот на територија на СВР Битола спроведена е засилена акциска контрола за санкционирање на возачи кои управуваат возило под дејство на алкохол.

При контролата санкционирани се 30 возачи.Од нив 15 на територија на Битола, 11 во Прилеп ,по 1 во Ресен и Демир Хисар и 2 Македонски Брод.

За време на контролата биле санкционирани и 20 други видови прекршоци. Акциски контроли продолжуваат и во наредните денови. Апелираме до граѓаните да ги почитуваат сообраќајните правила.

Денес во 19 часот во фоајето на НУЦК “Марко Цепенков” ќе се одржи “Пијано вечер” во изведба на двајца врвни професионалци, пијанисти и наставници во музичкото училиште, Денис Најдоски и Илија Иваноски.

Денис Најдоски е роден на 05.02.1993 во Прилеп каде што го завршува основното музичко училиште во класата на наставник Михајло Стојкоски. Во 2006 година своето образование го продолжува во класата на м-г проф. Снежана Анастасова – Чадиковска во ДМБУЦ „ Илија Николовски – Луј “ Скопје. Во 2015 година со висок просек дипломира на факултетот за музичка уметност во Скопје во класата на м-г проф. Рита Трпчева-Поповиќ. За време на неговото школување како солист настапува на голем број државни и меѓународни натпревари каде што освојува значајни награди и признанија, концерти во земјава и надвор од неа, како и учество на семинари кај врвни пијанисти од Македонија, Србија, Швајцарија, Словенија, Русија. Покрај солистичките настапи редовно настапува и како член на камерни состави ( дуо Пијано ) од кои се издвојуваат – лауреат на државен натпревар по камерна музика, концерти на Скопско Лето, Есенски музички свечености и многу други. Од 2015 год работи како професор по пијано и корепетиција. Неговите ученици земаат редовно учество на голем број концерти и натпревари, каде што постигнуваат значајни резултати во земјава, но и надвор од неа.

Илија Иваноски, роден 1995г. во Прилеп. Основно музичко училиште завршува во ООМУ “Ордан Михајлоски-Оцка”- Прилеп, во класата по пијано кај Проф. Наде Стојкоска. Средно музичко училиште се запишува во “ДМУ”- Битола (2009), отсек пијано во класата на Проф. Маргарита Татарчевска и Проф. м-р Јана Четелева-Белевска. Своите студии по пијано ги продолжува на “ФМУ”- Скопје (2013), во класата на Проф. м-р Тодор Светиев, каде што се здобива со титулата Дипломиран пијанист. Учествувал на голем број натпревари по пијано и камерна музика (државни и меѓународни); семинари, од кои може да се издвои соработката со Јури Кот (Украина). Од 2017г. e Проф. по пијано во ООМУ “Ордан Михајлоски-Оцка”-Прилеп.

После вчерашниот пожap со кој пожapникapите неколку часа се бореа да го стават под контрола, со соопштение на социјалните мрежи се јавија и сопствениците на конфекцијата за детска облека “Тила”.

–Драги наши пријатели, за оние кои сеуште не се информирани, со многу тешко срце и голема болка во душата, Ве информираме дека вчера на 21.04.2023 г во фабриката Тила изби пожар во кој за жал изгоре се!

Воедно Ви се заблагодаруваме за Вашата безрезервна поддршка која ни ја дававте и во изминатите години, а која сега ќе ни значи најмногу од се. Тила живее преку Вашите најмили и се надеваме така и ќе продолжи и во иднина – стои во соопштението од фабриката.

Ако некогаш сте посакале да избегате од метежот и вревата на секојдневниот живот и да отидете на оддалечен остров без други жители, ова можеби е вашата шанса. Сместен веднаш до јужниот брег на Шкотска, се продава островот Барлоко, по цена од 190.000 долари или 170.000 евра.

„Сè уште постои многу романтично чувство поврзано со поседување на свој шкотски приватен остров, каде што можете да избегате од метежот и вревата на секојдневниот живот и да уживате во мирот и тишината во најубавите предели наоколу“, се вели во изјавата на агентот за продажба.

Клиентот веројатно нема да биде човек кој патува секој ден. Најблискиот град е оддалечен десет километри, а најблиската железничка станица е Дамфрис, на еден час возење со автобус од градот. Лондон и Единбург се оддалечени на 500, односно 160 километри.

Цената е релативно блиска со становите кои се продаваат во Скопје. Па оттука ќе си го поставите и прашањето: Дали цената на овој остров е прениска или цената на становите во Скопје е превисока?

Агентот очекува голем интерес за ова минијатурно кралство. „Сведоци сме на голема побарувачка од потенцијални домашни и меѓународни купувачи за приватни острови, а неколку од нив веќе продадовме во Шкотска“, тврди агентот за продажба, пишува CNN.

-Успешно реализирана акција под мотото ,,Предизвикај насмевка’’. Акцијата беше реализирана во Прилеп, Битола, Кавадарци и Куманово каде што како комисија за спорт дониравме спортска опрема на лица кои се занимаваат со спорт и кој ги негуваат спортските навики!
Комисијата за спорт секогаш е на страната на спортистите и се залага за сите млади спортисти – објавија од Републичката комисија за спорт при УМС ВМРО-ДПМНЕ.