Пролетта во центарот на Прилеп е магична кога ќе расцветаат јапонските цреши.

Розевиот цвет на овие раскошни дрвца, му дава посебна убавина на градот од средината на април, па речиси до крајот на месец мај.

Глетката е висинско уживање…

Фото/илустрација

На 24.04.2023 во близина на Железничката станица Браилово, полициски службеници од СВР Битола – Полициско одделение Ропотово го лишиле од слобода Ц.М.(32) од Прилеп.

Тој бил затекнат како со патничко возило „фолксваген шаран“ без регистарски ознаки, превезувал нежигосани огревни дрва и без соодветна документација.

Возилото и дрвата биле одземени за понатамошна постапка, а лицето било задржано во полициска станица. По целосно документирање на случајот, против него ќе биде поднесена соодветна пријава.

Синодот на МПЦ-ОА, утре во полн состав, треба да донесе историска одлука за обединување на МПЦ-ОА и ПОА, со што треба да се финализира договорот меѓу МПЦ-ОА и СПЦ со кој беше обезбедена согласноста на Српската црква за автокефалност на МПЦ-ОА, дознава религија.мк.

Според Уставот на МПЦ-ОА, во Синодот во полн состав членуваат сите епархиски архиереи и викарните архиереи избрани во МПЦ-ОА.

Според информациите на верскиот портал, постигнат е начелен договор со СПЦ околу тоа како да бидат интегрирани владиците на ПОА во МПЦ-ОА и кои епархии ќе им бидат дадени.

Заокружувањето на тој процес ќе значи и формално згаснување на ПОА и нејзина итеграција во МПЦ-ОА, што ќе биде историски чин на обединување кон конечната цел полноправо признавање на МПЦ-ОА како автокефална црква, пишува религија.мк, додавајќи дека сите четворица владици на ПОА ќе добијат епархии, кои ќе бидат создадени со прераспределба на постоечките што ги има МПЦ-ОА.

Повеќе тука

Отворање на 333 канцеларии за „Една точна за сите услуги“ е одговорот на катастрофалниот учинок на петте пункта кои за една година издале само 1062 документи. Новиот министер за администрација вели дека главниот проблем што сите пет пункта дневно издавале по 4 документи во просек, е неинформираноста на граѓаните дека на едно место можат да добијат услуги од 7 институции.

333 канцеларии ќе значат поврзување со Македонски Пошти. Во секоја Пошта ќе има посебен шалтер каде граѓаните ќе можат да добиваат услуги од другите институции. Вработените во Пошти ќе бидат обучувани и ќе ја преземат работата. На оние места кадешто фалат луѓе, ќе бидат поставени вработени од МИОА.

На тој начин, Алиу смета дека МИОА ќе заштеди на кирија и режиски трошоци, а од друга страна, државата ќе ѝ помогне на Пошта која со години тоне во долгови, иако бизнисот цвета за приватните компании кои се занимаваат со поштенски услуги. Алиу вели дека дел од процентот за издадените услуги ќе се вбризгуваат директно во Пошта и на тој начин ќе му се помогне на Акционерското друштво.

-Нема да креираме нова инфраструктура, значи, ќе ја користиме инфраструктура на АД Пошти, и човечка и физичка. Во која ќе бидат опслужени сите граѓани на ниво на земјата со услугите коишто ЕТУ ги нуди досега, вели Алиу.

За шест месеци отсега треба да профункционира Агенцијата за дигитализација. Според Алиу, Агенцијата ќе биде централно место на сите дигитални процеси во државата. Сите државни службеници од ИТ секторите ќе бидат ќе бидат вработени во неа, а ќе работат за институциите во кои работат сега. Преку оваа Агенција тие ќе можат да добиваат поконкурентни плати, со оглед на тоа што јавниот сектор мака мачи да најде работници, бидејќи просечната плата, според Државната статистика во ИТ секторот е над 90.000 денари, а државата засега не може да се носи со приватниот сектор.

До крајот на годината државата ќе мора да донесе неколку клучни закони на предлог на МИОА, а доколку ги пробие роковите Македонија ќе загуби пристап до милионски суми од европските фондови.

Прашан за алатката „Балансер“, Алиу вели дека лично смета оти треба да се укине и да се постави мерит систем, но бидејќи правото му била слаба страна, последниот збор ќе го имале експертите.

Алиу има поприлично амбициозна агенда која треба да ја реализира за една година. Такви беа и на претходните министри, но МИОА е постојано прва во политичкиот пазар, па за 4 години во министерската фотелја седнаа четворица функционери.

Синдикалната организација на Државниот испитен центар (СОДИЦ-СФДМ) од денеска стапи во Генерален штрајк, поради недобивање на согласност на Барањето за изменување и дополнување на колективниот договор од страна на Министерството за финансии, a со цел заштита на економските и социјални права на своите членови, соопштија оттаму.

-Сите процеси кои се во надлежност на Државниот испитен центар (Државна матура, државно тестирање, обука и испит за директори, приправнички испити, меѓународно тестирање ТИМС итн.) ќе бидат запрени до добивање на согласност од Министерството за финансии. Сите 29 вработени се членови на синдикатот и состојбата на штрајк која би траела подолго од една недела би значела невозможност да се спроведе државната матура, стои во соопштението на СОДИЦ-СФДМ.

Оттаму апелираат Министерството за финансии, како што велат, итно да даде согласност на веќе потпишаните измени на колективниот договор со кои вработените би добиле достоинствени плати. Како што посочуваат, во овој момент 11 од вкупно 29 вработени на различни позиции се изедначени и имаат минимална плата од 20.000 денари.

Претставници на СОДИЦ-СФДМ најавија повеќе детали утре во изјава за медиумите.

Регулаторната комисија за енергетика и водни услуги на Република Северна Македонија донесе Одлука со која се врши намалување на малопродажните цени на нафтените деривати во просек за 2,20% во однос на одлуката од 20.4.2023 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 3,666%, кај дизелот за 6,122%, кај екстра лесното масло за 6,120% и кај мазутот има зголемување за 0,865%.

Курсот на денарот во однос на доларот во изминатиот период по кој беа формирани цените со претходната пресметка е повисок за 0,064%

Малопродажната цена на бензините ЕУРОСУПЕР БС-95 и ЕУРОСУПЕР БС-98 се намалува за 1,50 ден/лит.

Малопродажните цени на ЕУРОДИЗЕЛ (Д-Е V) се намалува за 3,00 ден/лит.

Малопродажната цена на Екстра лесното масло за домаќинство на (ЕЛ-1) се намалува за 2,50 ден/лит.

Малопродажната цена Мазутот М-1 НС се зголемува за 0,028 ден/кг.

Од 25.4.2023 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 81,00 (денари/литар)

Моторен бензин ЕУРОСУПЕР БС – 98 83,50 (денари/литар)

Дизел гориво ЕУРОДИЗЕЛ БС (Д-Е V) 71,00 (денари/литар)

Масло за горење Екстра лесно 1 (ЕЛ-1) 70,00 (денари/литар)

Мазут М-1 НС 41,437 (денари/килограм)

Управата на манастирот Св. Илија Писокал кај прилепското село Кален, секојдневно го разубавува и пожртвувано се вложува, ова светилиште да стане едно од главните дестинации за верниците и добронамерниците од околината, но и за секој гостин кој ќе го посети градот под Марковите Кули.

Ако ја отворите Фејсбук страната на манастирот, ќе видите дека речиси секојдневно овие луѓе неуморно работат, изнаоѓаат донатори, го средуваат секое ќоше, а резултатот од нивната работа е за секоја пофалба.

Последниве денови блесна и кругот на манастирот, а за тоа задолжен бил Гоце Јорданоски, кој тревните површини ги претворил во една мала рајска градина, во која ќе уживаат сите, и стари и млади.

Секоја чест!

И покрај апелите од храмот Св. Петка во пресрет на веста за Христовото воскресение, верниците да внимаваат со свеќите и да не ги оставаат каде ќе најдат, а со цел да се избегне неповратно уништување на плочките и калдрмата во дворот на храмот, сепак разумот не преовладеа кај секого.

-Храмот “Св. Петка” се заблагодарува на сите кои на воскресенската ноќ со свеќите “помогнаа” да се “фрескоживописа” оградниот ѕид, фонтаните, плочките и калдрмата во дворот на храмот со што оставија неизбришливи траги – напишаа од црквата на Фејсбук.

Како резултат на оваа неразумост, ѕидовите од дворот на црквата и патеките неповратно се уништуваат, а трагите од саѓи и восок ќе бидат видливи засекогаш.

Во чест на градителот на планинарскиот дом на Селечка Планина, Томе Темелкоски, “Прилепски Планинари Авантуристи” по втор пат организираа планинарска дружба на која присуствуваа над 200 вљубеници во природата од сите краишта на Македонија.

Турата започна од манастирот Св. Димитрија кај село Селце, па преку Домаќинско Чешмуре, Дина Нива, Стогот, Врапчето, врвот Устрелец, споменикот Карпалак и врвот Чуле, планинарите стигнаа до планинарскиот дом “Томе Темелкоски”.

Eдна одлична рута на која имаше многу дружење, а убавото време го олесна искачувањето до крајната дестинација.

Витаминка и овој пат својот асортиман го претставува на саемот ISM Келн во Германија, еден од најважните настани за кондиторски производи и закуски. За најголемиот македонски производител во прехранбената индустрија, присуството во Келн е можност за стекнување нови пазари, но и за следење на новите трендови во индустријата.

„ISM Келн претставува собир на најголемите и најзначајните компании од секторот и тука се презентираат трендовите, иновациите и перспективите во оваа индустрија. Освен иницијалните контакти, воспоставување релации и партнери за нови пазари, ова е главниот фокус на нашето присуство тука и очекувани придобивки. Дополнително како компанија од Македонија со претставувањето на производите на Витаминка го промовираме и македонското производство и прехранбената индустрија во земјава, што е дополнителна предност. И оваа година нашето претставување помина успешно и ја исполнивме целта“, изјави Љупчо Велески, директор на извоз во Витаминка.

Саемот ISM ги спојува сите релевантни целни групи, како малите, средните компании но и лидерите на пазарот со меѓународни деловни групи заинтересирани за соработка. Присутни се повеќе од 1200 изложувачи од повеќе од 70 земји од целиот свет.