По успешната сезона и освојувањето на четвртото место на табелата, кое води во Челинџ-купот следната сезона, ракометарите и стручниот штаб на машкиот РК Прилеп, денеска имаа средба со градоначалникот, кој го пофали нивниот успех. Тој при средбата нагласи дека ракометарите денеска се гордост на Прилеп, бидејќи тие, со нивните успеси го вратија епитетот на градот „ракометен Прилеп“ .
– Со оглед на условите во кои тренираат и ги одржуваат натпреварите, како и скромниот буџет со кој располага овој спортски клуб, четвртото место оваа ракометна сезона и излезот во европските купови, преставува навистина голем успех за респект, кој не враќа во врвните спортови како град. Уште позначајно е тоа што во овој клуб ракометната игра ја учат над 100 деца, активни во сите категории на клубот. Тоа говори за грижата на младите да спортуваат и да станат врвни спортисти. Локалната самоуправа и понатаму ќе се грижи да обезбеди услови за врвно спортување“-истакна градоначалникот при средбата со ракометарите на РК Прилеп.
Стручниот штаб и ракометарите ветија дека ќе дадат максимум Прилеп достојно да го престават во ракометна Европа, со надеж дека до есен ќе имаат можност за големите натпревари да ја користат салата на Тут-ком, со цел да им овозможат на што повеќе љубители на ракометот да ги бодрат и да ги следат нивните успеси .
