Во заврша фаза се активностите околу чистењето на собирниот канал на потегот од населбата „Варош“ до населбата “Тризла“ во должина од 1,3 километри кој околу две до три децении не бил исчистен, истакна градоначалникот Ристески при посетата на населбата „Тризла“.
Со реализацијата на овој проект ќе се исчисти собирниот канал при што ќе се зголеми неговиот капацитет за прием на атмосверските води од обилните врнежи. Градоначалникот Ристески во својата изјава пред медиумите додаде дека како нареден проект кој ќе започне да се реализира во оваа населба е втората фаза од изградбата на каналализационата мрежа.
Директорот на ЈКП „Водовод и канализација“, Сашко Николоски истакна дека ова е партнерски проект на UNDP, Општина Прилеп и ЈКП „Водовод и канализација“ а со негова реализација ќе се овозможи дождовните води кои паѓаат на Маркови Кули да бидат собрани и одведени до Дабничка Река, со што ќе биде решен еден голем проблем при надоаѓањето на поголеми количини на вода.

Најплатениот фудбалер доаѓа од Примера, а тоа е Кристијано Роналдо кој за една сезона добива 21 милион евра од Реал Мадрид.

Примањата на фудбалерите се зголемиле за 33 проценти. Просечната годишна плата на играчите во светот изнесува 361.000 евра.

Според извештајот на ФИФА, најдобро плаќаат Шпанците. Кај нив фудбалерите годишно во просек добиваат по 780.000 евра. Најплатен играч е Кристијано Роналдо кој за една сезона добива 21 милион евра. Податоците на ФИФА откриваат дека клубовите повеќе трошат за плати, отколку за трансфери.

Во 2014-та година клубовите во светот потрошиле неверојатни 5,5 милијарди евра за плати, додека за трансфери потрошиле 4,1 милијарда евра.

При трансферите за само 13 проценти од играчите било платено обештетување, а дури 70 проценти од нив го смениле клубот без компензација.

Фудбалските менаџери можат да се пофалат дека добро заработуваат. Од провизиите при трансферите менаџерите за една година заработиле 212 милиони евра. Најдобриот договор во кариерата фудбалерите го потпишуваа на 28-годишна возраст, а потоа нивните примања обично паѓаат.

Со преселбата на Марио Балотели во Милан, фудбалерот продолжи со инцидентите и во Италија, бидејќи остана без возачката дозвола поради прекумерна брзина.

Како што наведува „Газета ди Бреша“ искусниот Балотели на патот во близина на својот дом во Бреша и стадионот „Ригамонти“ возел 90 км на час, каде дозволени се 50.

Иако со враќањето во Милан се чинеше дека италијанскиот напаѓач зад себе ги оставил лудориите, ова е интересно, бидејќи има клаузула во договорот за пристојно однесување.

Од летото Балотели пристигна во Милан на позајмица од Ливерпул каде што не нудеше партиии какви се очекуваа од него.

Во текот на кариерата Балотели досега играше за Лумацено, Интер и Манчестер Сити.

Бугарија го отфрли руското барање за користење на бугарскиот воздушен простор за летови со кои Русија ќе ѝ доставува помош на Сирија, соопшти денеска бугарското Министерство за надворешни работи.

Барањето е отфрлено поради сериозната загриженост околу содржината што се превезува со овие авиони.

-Бугарското Министерство за надворешни работи не дозволи летови над Бугарија за руските воени транспортни авиони на патот кон Сирија. Имаме доволно информации што нè наведуваат на сериозна загриженост околу товарот што се превезува со овие авиони, што е доволна причина зошто на Русија ѝ е забрането користење на бугарскиот воздушен простор – изјави портпаролот на бугарското МНР.

Според заменик-претседателот на Комисијата за надворешни работи при Советот на Руската Федерација, Горниот дом на рускиот Парламент, Владимир Џабаров „одбивањето на Бугарија да го отстапи својот воздушен коридор за руски авиони, кои превезуваат хуманитарни товари за Сирија, нема големо значење, бидејќи Русија користи главно други маршрути“.

Првиот заменик-претседател на Комисијата за надворешни работи во руската Дума, Леонид Калашников смета дека одлуката на Софија да го „затвори небото“ за прелетување на руски авиони со хуманитарна помош за Сирија ги поткопува руско-бугарските односи.

Претходно, Грција, која е дел од НАТО, била замолена од Москва да им овозможи на два руски авиони со испораки да поминат низ воздушниот простор во насока на Сирија меѓу 1 и 24 септември, но САД побарале Атина да не го прави тоа.

– САД побараа од Грција да не дозволува прелет на два руски авиони со испораки за Сирија во грчкиот воздушен простор – потврди портпаролот на Кремљ Дмитриј Песков.

Грција одговори дека ќе размисли за барањето на САД, но во меѓувреме Русија решила да користи нова рута за авионите.

-Русија планира да користи воздушен коридор источно од Грција за превезување помош до Сирија, што значи дека прашањето за користење на грчкото воздушно пространство за вакви летови веќе не постои – изјави денеска портпаролот на грчката Влада.

Со приходи од 927,5 милиони евра лани, Џонсон Мети е единствената компанија од Македонија која ова година е рангирана на листата на 500 најголеми компании во Централна Европа на Deloitte.

Компанијата во однос на минатата година, забележува скок на листата од 159 места.

За една година компанијата ги зголеми приходите за 48,9% и ја заврши годината со добивка од 56 милиони евра.

Од останатите земји во регионот, најмногу компании меѓу ТОП 500 има од Словенија и тоа дури 20, од Хрватска 12, од Бугарија 8, од Србија 6 и од Босна и Херцеговина 4 компании.

Лидер на листата со најмногу компании меѓу најголемите е Полска, и тоа со дури 170. Исто како и лани, листата ја предводи полскиот енергетски гигант ПКН Орлен со приходи од 25,5 милијарди евра.

Кривична пријава е поднесена против 65 годишна жена која била ангажирана како дадилка за да чува девет месечно бебе, додека неговите родители биле на работа.

Наместо тоа, дадилката го тепала, штипела и малтретирала бебе за што сведочи и видео снимката во продолжение, која е објавена со согласност на родителите. Тие поставиле скриена камера во нивниот дом откако на бебето забележале модринки.

-Пријавеното лице било ангажирано за чување и негување на деветмесечното дете од родителите на детето. Наместо нега, осомниченото лице врз детето применувало различни облици на малтретирање и грубо однесување. По проучување на кривичната пријава и доказите, јавниот обвинител најде дека постои основано соменение за сторено кривично дело – Запуштање и малтретирање на дете од член 201 од Кривичниот законик, за кое е запретена казна затвор од една до десет години. При тоа, донесена е Наредба за спроведување истражна постапка и до Основниот суд Скопје 1 – Скопје поднесен е Предлог за определување на мерка – Притвор против осомниченото лице, поради постоење опасност од повторување на делото, соопштија денес од Јавното обвинителство.

Видеото е превземено од Телеграф.мк

Денешното лого на Гугл во Македонија го чествува празникот на Република Македонија, Денот на независноста.

Под покровителство на Општина Прилеп, а во организација на Велосипедски клуб „ИЛИНДЕН“ и Велосипедска Федерација на МК (ВФМ) денеска во Прилеп се оддржа велосипедска трка „Трофеј Македонија“ низ централните улици на градот. Градоначалникот Марјан Ристески ја отвори велосипедската трка која се состоеше во две категории У- 15 и У – 13. Со оваа трка Општина Прилеп и В.К. „ИЛИНДЕН“ ја продолжуваат традицијата на пригодно одбележување на 8 – ми Септември – Денот на Независноста на Р. Македонија со спортски натпревари.

Камен темелник за трговскиот центар „Сити центар“, беше поставен денеска во присуство на сопствениците на комапнијата „Тинекс“ и градоначалникот Марјан Ристески. Објектот се протега на парцела од 1.700 квадратни метри. Со вкупна инвестиција од пет милиони евра, а во него ќе бидат вработени стотина лица. Се предвидува паркирање за околу 150 возила во соодветен паркинг-простор со можност за дотур на стока до сите нивоа во објектот. Предвидени се дуќани, канцеларии, кафетерии и продавници на познати марки.
Со овој проект ќе се добијат нови естетски вредности во самиот центар на градот, со што градот ќе добие објект кој со своето надворешно обликување ќе наликува на типична современа и елитна архитектура.

Во бомбашкиот напад на полициски минибус во Турција убиени се најмалку 10 полицајци, а тројца се повредени.

Нападот се случил во Игдир, провинција на истокот на Турција, соопштија официјалните служби.

Нападот, за кој се претпоставува дека го извеле припадниците на Работничката партија на Курдистан (ПКК), изведен е врз минибус во кој се наоѓале полицајци кои работата на граничниот премин кој води од истокот на Турција кон Азербејџан, извести приватната турска телевизија НТВ, пренесоа агенциите.