На 18.08.2026 во 01:00 часот во Прилеп, полициски службеници од ОВР Прилеп го лишија од слобода И.Ѓ.(47) од Прилеп.
-При претрес во неговиот дом во Прилеп, извршен со наредба од Основен суд Прилеп, биле пронајдени 85 стебла марихуана, две дигитални ваги, две ќеси со семки од канабис и повеќе различни пакувања со марихуана.
Тој е задржан во полициска станица и по целосно документирање на настанот ќе следува соодветна пријава.
Прилеп повторно живее со ракомет! Во четврток (20.08.) започнува XI Меморијалниот ракометен турнир „Миле Нешкоски“, традиционалната спортска манифестација посветена на една од најзначајните личности во прилепскиот и македонскиот ракомет.
Од 20 до 23 август, спортската сала „Ристе Ристески – Ричко“ ќе биде местото каде шест екипи ќе се борат за престижниот трофеј, но и каде низ спортот повторно ќе се оживее споменот на Миле Нешкоски – човекот чие име со години е нераскинливо поврзано со ракометот во Прилеп.
Турнирот ќе започне со традиционалното положување цвеќе пред споменикот на Миле Нешкоски, како чин на почит кон ракометарот и спортскиот работник кој остави длабока трага во спортската историја на градот.
На теренот, пак, следуваат четири денови исполнети со квалитетен ракомет и голема борба. Екипите се поделени во две групи:
Група 1:
РК Прилеп
РК Мулти Есенс
РК Младост 1997 Богданци
Група 2:
РК Бутел Скопје
ГРК Тиквеш 2014
РК Еурофарм Пелистер 2
Првиот ден на програмата се два натпревари. Од 18:00 часот силите ќе ги одмерат РК Бутел Скопје и ГРК Тиквеш 2014, додека од 20:00 часот домаќинот РК Прилеп ќе го одигра првиот натпревар на турнирот против РК Мулти Есенс.
Домашниот терен секогаш носи посебна енергија, а кога се игра во чест на човек кој оставил неизбришлива трага во ракометот, таа атмосфера е уште посилна.
Следуваат четири дена ракомет, спортска борба, дружење и емоции, а љубителите на ракометот од Прилеп ќе имаат можност да уживаат во натпревари на квалитетни екипи и да бидат дел од уште едно издание на турнирот кој прерасна во вистинска прилепска ракометна традиција.
Се гледаме во сала – затоа што легендата живее!
Од 18 до 25 август 2026 година ЦК „Марко Цепенков“ ќе ја реализира 18 -та ликовна колонија „Марко Цепенков – Дрен 2026“. На колонијата годинава ќе творат Дамјан Ѓуров, Никола Пијанманов, Марјан Стојаноски, Слободан Милошески, Озбек Ајваз, Славчо Павлески и Емил Солески, кои ќе работат монументални скулптури за во јавен простор.
Колонијата е дел од годишната програма на Центарот за култура „Марко Цепенков“ за 2026 година во визуелни дејности поддржана од Министерството за култура и туризам.
Со особено задоволство информираме дека 18-та ликовна колонија „Марко Цепенков – Дрен 2026“ годинава за првпат ја поддржува и Општина Прилеп.
Колонијата годинава става посебен акцент на монументалната скулптура и нејзината улога во јавниот простор.
„Колонијата е значајна средба на уметници, идеи и современи скулпторски изрази, со една јасна цел, уметноста да излезе од галерискиот простор и да стане дел од секојдневниот живот на заедницата. Создавањето монументални скулптури отвора можност за трајни уметнички интервенции кои го збогатуваат просторот, го градат неговиот идентитет и стануваат дел од колективното сеќавање. Преку непосредната работа и размената на идеи, уметниците го истражуваат односот меѓу материјалот, формата, просторот и времето. Особено ни значи што Ликовната колонија „Марко Цепенков“ е добитник на наградата „3-ти Ноември“ на Општина Прилеп, признание кое го потврдува нејзиното значење и долгогодишниот придонес кон културниот и уметничкиот живот на градот”, вели Марјан Стојаноски, координатор на колонијата.
Во кино-салата „Мис Стон“ при Домот на културата „Марко Цепенков“ вчера започна првото издание на меѓународниот шаховски турнир „ПРИЛЕП ЈУНИОР 2026“, настан кој на едно место собра млади шахисти од Македонија, Србија и Австрија.
На турнирот учествуваат 12 шахисти, од кои 10 момчиња и две девојки. Она што ветува особено интересни партии е фактот што нема изразит фаворит, бидејќи квалитетот на учесниците е исклучително изедначен. Секоја партија носи борба за секој поен, а дополнителен мотив е и фактот што турнирот е регистриран и се рангира преку Светската шаховска федерација – ФИДЕ.
Организатор на „ПРИЛЕП ЈУНИОР 2026“ е Шаховскиот клуб „Прилеп“, еден од најуспешните шаховски клубови во земјава. За силата на клубот зборува и фактот што, заедно со ШК „Алкалоид“, е единствениот клуб во Македонија кој има по две прволигашки екипи во машка и женска конкуренција на претстојното Државно првенство во Струга.
Шаховскиот клуб „Прилеп“ има и посебно значајна страница во својата историја. На Купот на европските шампиони во 2021 година, за прилепскиот клуб настапуваше индискиот велемајстор Домарају Гукеш, денес актуелен светски првак. Гукеш тогаш, играјќи за ШК „Прилеп“, го освои златниот медал како најдобар играч на турнирот.
Од клубот најавуваат дека и годинава постои амбиција повторно да го претставуваат Прилеп на Купот на европски шампиони, кој ќе се одржи во Херцег Нови, Црна Гора. За реализација на оваа цел, како што велат, потребно е обезбедување на минимални финансиски средства.
Првото издание на „ПРИЛЕП ЈУНИОР 2026“ е уште еден чекор кон создавање традиција и популаризација на шахот меѓу младите во Прилеп. Квалитетни партии, борбеност и неизвесност до последниот потег се очекува да го одбележат турнирот, со надеж дека ова меѓународно шаховско дружење од година во година ќе расте и ќе прерасне во препознатлив спортски настан за градот.
Во Кампот за обука на вода во Охрид денеска ќе се одржи централната свеченост по повод 18 Август – Денот на Армијата на која ќе присуствува највисокиот воен и државен врв. Според протоколот, на свеченоста со пригоден говор ќе се обратат претседателката и врховен командант на Вооружените сили Гордана Сиљановска-Давкова, министерот за одбрана, Владо Мисајловски и началникот на Генералштабот на Армијата, генерал-мајор Сашко Лафчиски.
На свеченоста се очекува да присуствуваат претседателот на Владата, Христијан Мицкоски, претседателот на Собранието, Африм Гаши, министри во Владата, пратеници во Собранието, генерали во Армијата, поранешни министри за одбрана и началници на Генералштабот на Армијата, пензионирани генерали, претставници од локалната самоуправа, претставници на организации со кои соработува Армијата и други гости.
По повод одбележувањето на Денот на Армијата денеска на Гробиштата Бутел во Скопје собраниска делегација во состав: Емилија Ангелова, Оливер Спасовски и Павле Арсоски, ќе положи цвеќе на Споменикот на паднатите борци од НОБ во Алејата на великаните и на вечните почивалишта на претседателот Борис Трајковски, генералот Михаило Апостолски и претседателот Киро Глигоров.
Официјалното одбележување на Денот на Армијата започна вчера во Скопје и Штип. На свеченоста во касарната „Јане Сандански“ во Штип беше истакнато историското значење на 18 август 1943 година, кога на падините на Славеј Планина бил формиран баталјонот „Мирче Ацев“, првата организирана воена единица на македонската војска.
Свечен собир на припадниците на Армијата и вработените во одбраната вчера се одржа во Министерството за одбрана на кој се обратија министерот за одбрана, Владо Мисајловски, и началникот на Генералштабот, генерал-мајор Сашко Лафчиски. При тоа министерот Мисајловски упати благодарност до сите вработени нагласувајќи дека нивниот труд, посветеноста и професионалноста што секојдневно ги покажуваат „ни овозможуваат да бидеме една од најорганизираните институции во државата“.
Во касарната „Илинден“ во Скопје, пак, вчера во 19 часот се изврши почесна артилериска стрелба со истрелување на 10 плотуни од 6 артилериски орудија од страна на единица на артилерискиот баталјон на Армијата.
На 20 август, со почеток во 21 часот, на сцената на Долни Сарај во Охрид, свечено ќе биде затворено 66. издание на фестивалот „Охридско лето“. За завршницата на фестивалот публиката ќе има можност да го проследи мјузиклот „Како какао“, по текст на Венко Андоновски, во режија на Дејан Пројковски и со музика на Влатко Стефановски.
Со завршниот настан, Охрид ќе стави точка на уште едно богато фестивалско лето исполнето со уметност, музика, театар и врвни уметнички достигнувања.
Од 12 јули до 20 август, Охрид беше вистински културен центар, во кој на 48 фестивалски настани настапија повеќе од 700 уметници од 24 земји. Со својата програма, „Охридско лето“ и годинава ја потврди својата позиција како еден од најзначајните културни настани во земјата и фестивал со препознатливо место на европската културна мапа.
И годинава, Касинос Австрија Интернешанал Македонија со гордост го поддржа фестивалот, кој повеќе од шест децении ги обединува врвните уметнички имиња и ја чува и промовира културната традиција.
За Касинос Австрија Интернешанал Македонија, поддршката на „Охридско лето“ е многу повеќе од спонзорство. Таа е вложување во вредностите што го обликуваат едно општество, уметноста, културата, образованието и, секако, зачувувањето на традицијата.
„Охридско лето“ е пример дека културата создава трајни вредности, поврзува генерации и гради мостови меѓу различни култури. Токму затоа, поддршката на вакви настани е дел од определбата на Касинос Австрија Интернешанал Македонија да придонесува кон развојот и унапредувањето на културниот и општествениот живот.
На 20 август, под ѕвезденото охридско небо и на сцената на Долни Сарај, фестивалот ќе го заокружи своето 66. издание со „Како какао“ – спектакл кој ги обединува театарот, музиката и моќта на македонската уметничка мисла. Охридско лето продолжува да живее како традиција, како сцена и како вредност која ги поврзува Охрид, Македонија и светот.
PR текст
Има работи што ги купуваме затоа што ни се допаѓаат. Има работи што ги планираме затоа што ни се потребни. А има и одлуки што ги носиме затоа што некој ни значи повеќе од сè.
Животното осигурување е токму таква одлука. Затоа што грижата за семејството не е само во тоа кој ќе подготви појадок, кој ќе ги земе децата од училиште или каде ќе одиме на следниот одмор. Грижата е и во тоа да размислиме што им обезбедуваме за утре.
Животот е полн со убави промени, но носи и ситуации што не можеме однапред да ги предвидиме. Животното осигурување е финансиска заштита за вас и вашите најблиски во случај на неочекувани животни настани, како смрт, трајна инвалидност или сериозно заболување, зависно од избраното покритие.
Тоа значи дека, наместо да ја оставиме иднината на случајноста, можеме да направиме чекор денес за нашето семејство да има дополнителна финансиска поддршка кога најмногу би му била потребна.
Бидејќи не можеме да знаеме што носи утрешниот ден. Но, можеме да направиме нешто денес за да го дочекаме поспокојно.
Со животно осигурување преку ОБД Минт Инс, можете да изберете решение според вашите потреби.
Тоа ти овозможува да не бараш „едно решение за сите“, туку да разговараш со стручни лица и да избереш опција која одговара на твоите потреби, планови и финансиски можности.
Кога имате деца, иднината добива сосема поинакво значење. Сакате да им обезбедите најдобро образование. Да имаат можности. Да ги поддржите кога ќе ги изберат своите патишта. Да знаат дека секогаш имаат на кого да се потпрат.
Не можеме да знаеме што ќе донесе секој следен ден. Но можеме да планираме. Можеме да избереме да бидеме подготвени. Можеме да размислуваме за луѓето што ни значат и да направиме нешто конкретно за нивната финансиска сигурност.
И токму тука животното осигурување добива поинакво значење. Тоа е план за иднината,начин да ја претворите грижата во конкретна одлука.
Семејната фотографија можеби ќе стои на полицата со години. Детските насмевки ќе се менуваат. Ќе дојдат нови одмори, нови домови, нови цели и нови поглавја.
Но едно нешто останува истом желбата луѓето што ги сакаме да бидат заштитени и безбедни. Со животно осигурување добиваш можност уште денес да направиш чекор кон поголема финансиска сигурност за нивното утре.
За нивното утре, почни од денес со животно осигурување преку ОБД Минт Инс.
Тимот на ОБД Минт Инс е достапен за консултација и помош при изборот на соодветното решение, на телефон 15 107, преку е-пошта [email protected] во една од нашите филијали.
-На 16.08.2026 во 20:30 часот во СВР Битола, А.С.С.(35), параглајдерист од Полска пријавил дека слетал на непознат терен над с.Стровија, долго пешачел, дека е изморен, но не и повреден. На 17.08.2026 околу 03.00 часот на непристапен терен на планината Даутица, полициски службеници од Полициското одделение Ропотово и од Полициската станица Прилеп го пронашле А.С.С. во добра здравствена состојба и е пренесен во местото каде престојува, информираат од МВР.
Археолошкиот локалитет Врбјанска Чука, едно од најзначајните неолитски наоѓалишта во Пелагонија, и годинава е предмет на археолошки истражувања, кои се одвиваат под раководство на д-р Гоце Наумов.
Локалитетот денес го посети градоначалникот на Општина Кривогаштани, Игор Каравилоски, кој во разговор со археолошкиот тим се запозна со тековните истражувања, како и со досегашните научни сознанија за ова исклучително вредно археолошко наоѓалиште.
Истражувањата ги спроведува македонски и меѓународен мултидисциплинарен тим, во соработка со НУ Завод за заштита на спомениците на културата и музеј – Прилеп. Благодарение на долгогодишната стручна и посветена работа, сознанијата за Врбјанска Чука се објавени во бројни научни трудови и презентирани на меѓународни конференции, со што локалитетот добива сè поголема афирмација и надвор од границите на нашата држава.
Врбјанска Чука сведочи за животот на првите земјоделски заедници на Балканот. Пред околу 8.000 години, на ова место постоела организирана неолитска населба чии жители се занимавале со земјоделство, сточарство, лов, риболов и различни занаети.
Досегашните археолошки истражувања откриваат остатоци од куќи, печки, огништа, амбари и платформи за обработка на житото, но и бројни керамички садови, фигурини, жртвеници и алатки. Пронајдените материјали овозможуваат подобро разбирање на секојдневието, исхраната и начинот на организација на заедниците кои ја населувале Пелагонија во далечното минато.
Градоначалникот Каравилоски упати благодарност до археолозите за нивната долгогодишна работа на истражување, документирање и зачувување на ова непроценливо културно наследство.
Од Општина Кривогаштани посочуваат дека и во иднина ќе продолжат да ги поддржуваат активностите поврзани со истражувањето, заштитата и промоцијата на Врбјанска Чука, со цел значењето на локалитетот да биде уште повеќе препознаено и тој да добие заслужено место во културната, образовната и туристичката понуда на општината.
Градоначалникот на Општина Прилеп, Дејан Проданоски, престојува во Тополчани, Словачка, по повод традиционалните „Денови на Тополчани“ и одбележувањето на 20-годишнината од соработката и збратимувањето меѓу Прилеп и Тополчани.
Проданоски, кој е во посета на покана на градоначалничката на Тополчани, Александра Гјециова, истакна дека две децении партнерство се исполнети со пријателства, културна размена, заеднички иницијативи и взаемна почит.
На средбите биле разгледани можностите за дополнително продлабочување на партнерството, особено преку заеднички европски проекти, заштита на животната средина, управување со отпадот, културата, туризмот и економското поврзување.
„Две децении не се само бројка, тоа се години исполнети со средби, пријателства, културна размена, заеднички иницијативи и взаемна почит“, порача Проданоски.
Како еден од важните сегменти во досегашната соработка беше посочена културната размена. Во тој контекст, тој ја истакна и неодамнешната посета на фолклорни ансамбли од Словачка, кои беа гости на фестивалот „Итар Пејо“ во Прилеп.
Од Тополчани беше упатена порака дека партнерството меѓу двата града продолжува да се развива, со амбиција во иднина да донесе нови заеднички проекти и активности.
„Прилеп и Тополчани остануваат пријатели, партнери и градови поврзани со трајни мостови на соработка“, истакна градоначалникот.
Јубилејот од 20 години партнерство, покрај можноста да се сумира досегашната соработка, претставува и нова можност за отворање перспективи за идни заеднички проекти, соработка во повеќе области и уште посилно поврзување на двата града.
