На 31 мај 2025 – од 20.00 часот на сцената од ЦК „Марко Цепенков“, театарот „Војдан Чернодрински“ премиерно ќе ја прикаже претставата „Чиста куќа“ од Сара Рул, во режија на Тамара Стојаноска.

По повод премиерата денеска во ЦК „Марко Цепенков“ се одржа прес конференција.

ЧИСТА КУЌА

Автор: Сара Рул
Режисер: Тамара Стојаноска

Превeдувач: Тамара Стојаноска
Драматургија: Лидија Митоска-Ѓорѓиевска
Сценографија, дизајн на плакат и рекламен материјал: Филип Коруновски
Музички соработник на режисерката: Ана Митоска
Избор на костими: Тамара Стојаноска во консултација со актерската екипа

Продукција: НУЦК „Марко Цепенков“ Нaроден Театар „Војдан Чернодрински“ – Прилеп
Фотографија и видео: Fun Production

Актерска екипа:
ЛЕЈН – Даниела Иваноска
МАТИЛДА – Наташа Ачански
ВИРЏИНИЈА – Катерина Чакмакоска-Клинческа
АНА – Јасмина Мицовска Станкоска
ЧАРЛС – Димитар Ѓорѓиевски
Техничка екипа:
Инспициент: Елена Иваноска
Тон-мајстор: Томе Темелкоски
Светло: Ристе Гркоски
Шеф на сцена: Сашо Смоквоски
Реквизитер: Гоце Наумоски
Сликар исполнител: Пеце Ристески
Гардеробер: Снежана Ѓорѓиоска
Фризер-перикер: Даринка Богоеска
Декоратери: Роберт Стојкоски, Владимир Владимировски, Јане Јанкулоски
Раководител: Михајло Миленкоски
Директор: Марија Попова Јованоска

За претставата:

„Чиста куќа“ по текстот на Сара Рул е претстава што раскажува длабока човечка приказна за животот и смртта, преку пет различни, но меѓусебно испреплетени ликови. Зборуваме за непредвидливите пресврти во животот и начинот на кој се соочуваме со нив, за болката што е неизбежна, за големината на простувањето, но и за љубовта и губењето на истата. Претставата го истражува ширењето на емпатија и начинот на кој се справуваме со траумите од детството — во нашиот случај, преку вицови, како средство за преживување, бегство и поврзување.

Секој лик носи во себе различна тежина, нерешени болки, кои ги гледаме преку односите на две сестри, двајца партнери или родители и деца. Во нашата приказна, вицовите стануваат филтер, еден вид „фасада“ и начин да се преживее она што не може да се издржи. Траумите од детството често се заматени, а спомените се искривени или недовршени, а родителите ги штитат децата од вистинската болна реалност. Ликовите не се обидуваат само да не насмеат, тие се обидуваат да преживеат, да ја пронајдат смислата во свет кој понекогаш е премногу болен за да се прифати таков каков што е.

Чистењето во оваа претстава не е само физичка активност, тоа е метафора. Додека домовите ни блескаат, внатре во нас често владее неред, несредени емоции, потиснати чувства, нерешени болки и осаменост. Куќата може да биде уредна и тивка, додека душата е немирна, полна со тишина што вришти. Чистењето овде станува чин на грижа, на бегство, на обид за враќање контрола, но и чин на љубов, особено кога се прави за некој друг.

Претставата се движи на границата меѓу реалноста и имагинацијата, користејќи елементи на магичен реализам за да ги прикаже емотивните состојби на ликовите, каде вицовите можат да лекуваат и убиваат, а љубовта може да живее и по смртта. Сара Рул, со својот препознатлив поетичен стил ја претвора секојдневната болка во нешто магично, духовито и лековито.
„Чиста куќа“ не е само приказна за чистење простор, туку за чистење на внатрешниот емотивен хаос. Авторката нè потсетува дека не сме совршени, но и дека токму во таа несовршеност се крие нашата човечност.

– Тамара Стојаноска

Викендов на Рудина, Долнени ќе одекнат гајдите, зурлите, тапаните, кавалите. По 51. пат ќе се одржи Фестивалот на народни инструменти и песни „Пеце Атанасовски“. Богатиот изворен мелос ќе го претстават околу 300 учесници од сите делови на државата, а на Фестивалот и на Семинарот за изучување на народните инструменти, што е во рамките на манифестацијата, гостуваат членовите на оркестарот „Александар“ од Австрија кои го негуваат македонскиот изворен мелос.

– Може да се пофалиме дека годинава имаме многу нови групи, многу млади учесници и тоа што ќе го понудат во двата фестивалски дена ќе биде атрактивно и многу убаво, затоа што сите од регионите ги претставуваат културата, традицијата и богатото изворно творештво, рече на прес-конференција уметничкиот директор на Фестивалот, професор д-р Родна Величковска.

Деновиве, во прилепскиот ученички дом „Орде Чопела“ се одржува Семинарот за изучување на народни инструменти и песни.

– Овие денови со 20-тина млади работиме на изучувањето на традиционалниот изворен мелос. Интересот кај младите е голем, рече етнокореологот Стојанче Костов кој заедно со уметничкиот директор Родна Величковска, со етномузикологот Горанчо Ангелов и фолклористот Горан Василевски работат со младите.

Во рамки на фестивалот е и симпозиумот „Фолклорот во минатото и денес“. Ќе се одржи утре напладне во Центарот за култура „Марко Цепенков“ кога ќе биде претставен и Зборникот на трудови за истражувањето во фолклористиката. Пред симпозиумот, составен дел на фестивалот е и Ден на гајдата, особено што од декември минатата година гајдата и нејзината изработка се на листата на УНЕСКО како заштитено нематеријално културно наследство. Гајдата е поврзана и со фестивалот кој неслучајно се одржува во Долнени што се смета за лулка на гајдаџиството во земјава.

– Фестивалот е најстар од овој карактер, конкретно ја негува гајдата како инструмент. И не случајно се одржува во Долнени каде своевремено имало дури и 150 гајдаџии, од каде потекнува и универзалниот уметник со светски глас Пеце Атанасовски, а Фестивалот, или поконкретно, општина Долнени ја доделува и најголемата фестивалска награда – „Гајдата на Пеце“ за најдобар гајдаџија, истакна Горан Василески, претседател на фестивалот.

Фестивалот ќе заврши в недела со доделување на наградите на најдобрите изведувачи на народни инструменти и песни.

Денеска, 30 мај 2025 г., во рамки на музичко-сценската дејност на НУЦК „Марко Цепенков“ – Прилеп, на летната сцена од центарот, со почеток во 20:00 часот, ќе имаме можност да уживаме во целовечерен концерт на етно оркестарот „Александар“ кои доаѓаат од Виена на нивна иницијатива.

Етно оркестарот „Александар“ е првиот оркестар во историјата на Виена кој нуди инклузивен пристап и простор за секој музички ентузијаст, без разлика на родова, национална и било каква друга припадност. Идејата и мотивот кои ги сплотуваат се изучувањето и искусувањето на македонската и балканската традиционална музика.

Оркестарот нуди можност за учество во истиот како на искусни и едуцирани музичари, така и на почетници и ентузијасти заинтересирани за проучување и промоција на традиционалните инструменти и музика.

Мисијата и визијата на ансамблот „Александар“ се посветени на истражување, зачувување и продолжување на богатата македонска, како и на останатата балканска традиционална музика и танц.

Музиката му припаѓа на секој, надвор од било какви ограничувања, е кредото на овој етно состав.

Граѓаните во центарот на Прилеп денеска беа сведоци на несекојдневна слика, кога пајак крена возило на МВР.

Не е познато која е причината поради која полициската шкода требало да се повози со пајакот, но глетката предизвика смеа и секако фаќање сеири.

Заменик министерот за економија и труд, Марјан Ристески, денеска оствари средба со претставници на менаџментот на реномираната германска компанија “ЛИДЛ”, на која се разговарало за новите инвестиции на трговскиот ланец во Македонија.

-На состанокот со Милена Драгиска-Денчева, главен извршен директор на „Лидл“ за Бугарија, Рубријан Хаџиев, главен оперативен директор на „Лидл“ за Македонија и Теодора Хаџи-Димова Танаскоска, директор за човечки ресурси во „Лидл“ – Македонија, дискутиравме за текот на работите на терен и изградбата на меркетите на повеќе локации во Македонија, како и изградбата на логистичкиот центар во индустриската зона во Куманово, кој ќе служи како центар за снабдување на синџирот маркети. Со отворањето на Лидл маркетите на македонскиот пазар би имале производи со европски стандарди и цени прифатливи за нашите граѓаните, но и ќе добиеме одлична платформа и пласман на македонските производи во маркетите на Лидл во Македонија и регионот – истакна Ристески, кој се надева дека после интензивните контакти со менаџментот на компанијата и локалните власт, една од наредните дестинации за инвестирање на “ЛИДЛ” во Македонија, ќе биде и Прилеп.