Претседателот на државата Стево Пендаровски денеска на прес конференција се заблагодари на соседна Србија за имунизацијата на македонските граѓани, но порача дека тоа што викендов го видовме таму е срам за нашата држава.

-Toa што гo видовме изминатиот викенд во Србија не треба да се повторува. Благодарам на Србија, но ова беше срам за нашата земја, вели Пендаровски.

Пред еден час на Фејсбук се јави и министерот за здравство, Венко Филипче, кој напиша дека не се согласува со Пендаровски:

– Изненаден сум од изјавата на претседателот Пендаровски, сликите од Србија не се срам, тоа е одраз на солидарност во услови на криза. Покрај нашите граѓани се вакцинираа и граѓани на соседните земји, но ниеден претседател не рече дека е тоа срам за неговата земја. Владата прави максимални напори да обезбеди вакцини, а вакцинацијата започнува веќе од утре. Претседателот на државата како институција исто така би требало да игра значајна улога во сите овие процеси на набавки. За жал, конкретна поддршка од Пендаровски изостана.

Најпознатиот шоумен во Македонија, Игор Џамбазов, на неговиот Фејсбук профил упати порака кон “оние лошите” како што вели, кои деновиве го смешаа неговото име, дека како сопственик на фирма која зела кредит од “Еуростандард” банка, не вратил ниту денар.

“Ех, да се сите криминалци како мене, кај ќе ни беше крајот…

Драг мој народе,
денес низ медиумите осамна соопштение од страна на оштетените штедачи од Еуростандард банка, во кое е спомнато и моето име. Во него се изнесени аргументи, кои во несебична помош на дел од медиумите, станаа невистини кои морам да ги демантирам.

1. Точно е дека Друштвото „Брачна игра“ на 31.07.2017 година, зема кредит од Еуростандард банка во висина од 700.000 денари. Повторувам… денари. Милионите, ама во евра, ги земаа некои други. Кредитот беше земен по најрегуларен пат, како и многу други фирми од областа на културата кои се обидуваа не само да преживеат, туку и да создадат некаква вредност на уметничкиот пазар, и беше наменет за два нови проекти во театарот.

2. НЕ Е ТОЧНО дека „Брачна игра“ не вратила ниту денар. Досега се вратени 324.736 денари. Значи, скоро половина. Тоа го кажуваат и документите што ни ги испрати банката. Треба да се врати остатокот, плус каматите.
3. НЕ Е ТОЧНО дека Друштвото „Брачна игра“ во време на земањето на кредитот немала приходи и пливала во долгови. Работевме и повеќе од солидно, Фирмата имаше само еден долг кон една скопска фирма вклучена во еден од проектите, кој навистина не беше голем. Можеби колку една плата. Вториот долг е долгот кон банката.

4. Друштвото „Брачна игра“ не е во стечај, за што постои и документ од Централниот регистар. Само што не функционира од веќе познатите причини, како и 90 проценти од фирмите.

Кредитот беше враќан сè до крајот на 2019 година. Идејата ни беше да направиме нов проект, и во 2020 година од приходот, да си го вратиме долгот. Потоа дојде короната, и сè како застана. Но никој, никогаш не помислил на можноста кредитот да не се врати. Еве, и сега чекаме на одговор од банката за начинот на враќање, бидејќи добивме опомена преку писмо, дека треба да си го подмириме долгот, што е нормално. Постојат две опции: Договор со банката за продолжување на плаќање на кредитот, или комплетна отплата преку некоја друга банка, за што постои законска можност. Се надевам дека ова набргу ќе се случи, и оваа тажна приказна ќе заврши.

И за крај. Јас, Игор Џамбазов, сум подготвен да ги сносам сите правни последици. Моралните веќе ги сносам, благодарјќи им на медиумите за кои сензационализмот е секогаш пред вистината. Такви биле такви и ќе останат.

За среќа, оние што ме сакаат и почитуваат (а само за нив и ми е гајле во животот) добро знаат дека јас сум чесен човек. За жал, животот ме натерал понекогаш да се дружам и со тие, нечесните. За среќа, повеќе не.

Да, и ќе заборавев. Сите медиуми што во своите наслови напишаа дека Игор Џамбазов не вратил ниту денар, а особено оние кои кажаа дека сум вмешан во криминалот на Еуростандард банка, ќе мораат да го докажат тоа на суд.
Таман да го вратиме кредитот.

А сега вратете се на пописот, ковидот, името, племето, семето, знамето…а да, ќе заборавев…и мамето.

Добри луѓе, ве сака Ваш Игор. Ова беше наменето за лошите”, напиша Џамбазов.

Ковид-бурата во градот под Марковите Кули, не стивнува. Со безмалку 330 починати од почетокот на пандемијата и со секојдневен огромен број на новозаразени, Прилеп останува на врвот од црната скала. Прилепчани пак, како веќе да се навикнаа на ваквата состојба. Признаваат дека се вознемирени и испаничени, велат дека максимално ги редуцираат контактите, но причината за ова, сепак, главно ја гледаат во нив самите.

„Не се чуваме, не се вардиме, не почитуваме ни мерки….Тоа клопчето кога ќе се замота, после тешко се одмотува, знаете како оди..од еден, на друг, на трет и дури да се сузбие тоа –време треба…Оваа работа не е за туку-така да се гледа површно, навистина е сериозно..Во гужви никако влегување, по потреба појди, земи нешто што ти треба и бегај…“ – вели еден повозрасен прилепчанец.

„Прилеп е најоптоварен, затоа што сите се тутунари, бе…Сите се на грбот испотени. Сите што се на грбот испотени, сите се Корона…Во Прилеп овде, нема персонал, се гледа – малце се доктори..простор, што ако има простор, кога нема доктори..?!“ – констатираше наш друг сограѓанин.

„Јас ја прележав Короната и многу сум уплашена сум за тие што не ја прележале…Сите да си водат сметка за да не се доведат во позиција да бидат заразени, макар што не можеме да се дочуваме, не знаеме од која страна може да не нападне…“ – порачува следната наша соговорничка.

Според градоначалникот Илија Јованоски, со ваков драматичен подем на заразата, Прилеп најверојатно ќе бидел и првиот град кој ќе се стекнел со колективен имунитет.

Инаку, и денеска, Ковид-одделите во прилепската Болница се полни. Според директорката на Болницата, Кети Смилеска, во моментов, хоспитализирани се 116 пациенти, од нив 93 се на кислородна поддршка, а слободни се 14 кревети. Во Дневната болница се лекуваат 118 пацинети, а Модуларната болница се уште не е во функција. Денеска починале тројца пациенти.

Освен ова, во изминативе денови, бројни се реакциите на социјалните мрежи каде прилепчани се жалат на несоодветните услови за лекување на хоспитализираните пацинети и токму тоа го наведуваат како една од основните причини за загрижувачката смртност.

Каролина Дурло за “AЛФА ТВ”

Врз основа на Програмата за уредување на градежно земјиште на подрачјето на општина Прилеп за 2021 година број 09-3157/15 од 25.12.2020 година(Службен гласник на Општина Прилеп бр 16 од 25.12.2020)  а согласно Правилникот за користење на финансиски средства од буџетот на Општина Прилеп за субвенционирање /надоместување на дел од трошоците на граѓаните на подрачјето на Општина Прилеп за набавка на грејно тело со инвертор  број 09-595/33 од 15.03.2021 година (Службен гласник на Општина Прилеп бр.3 од 15.03.2021) и Одлуката за определување на максимален износ за доделување на поединечна субвенција/надомест на дел од трошоци на граѓани на подрачјето на Општина Прилеп за набавка на грејно тело со инвертор за 2021 година број 09-595/34 од 15.03.2021 година (Службен гласник на Општина Прилеп бр.3 од 15.03.2021) Општина Прилеп објавува

ЈАВЕН ПОВИК

за субвенционирање/надоместување на дел од трошоците на граѓаните на подрачјето на Општина Прилеп за набавка на грејни тела со инвертор за 2021 година

Опис на јавниот повик

1.1. Општина Прилеп со цел да ги стимулира жителите на Општина Прилеп за примена на грејни тела со инвертор за затоплување на своите домови, кои се поекономични, енергетски поефикасни и еколошки прифатливи за околината, на жителите кои имаат купено грејно тело со инвертор во период од денот објавувањето на јавниот повик, а најдоцна до денот на завршување на јавниот повик, односно до искористување на предвидените средства, ќе им надомести дел од трошоците:

– до 50% од вредноста на набавеното грејно тело со инвертор, но не повеќе од 10.000 денари во нето износ по лице/ домаќинство, за набавка на грејно тело со инвертор за барателите кои поднеселе комплетно барање и  ги исполниле критериумите согласно јавниот повик.

Персоналниот данок на доход паѓа на товар на исплаќачот.

1.2.Јавниот повик трае од денот на објавувањето од 30.03.2021 година заклучно со 30.04.2021 година, односно до искористување на предвидените средства, до кога и ќе можат да се достават барањата.

1.3. Јавниот повик е објавен на ВЕБ страната на општина Прилеп www.prilep.gov.mk, во два печатени и електронски медиуми и на огласна табла во Општина Прилеп

1.4. Јавниот повик ќе се реализира по принципот „прв дојден, прв услужен“

1.5 При констатирање на целосна реализација на предвидениот буџет, Општина Прилеп веднаш ќе ја извести јавноста дека согласно принципот „прв дојден, прв услужен“ повеќе нема да прима барања по однос Јавниот повик, и известувањето ќе го објави на својата Веб страна www.prilep.gоv.mk, во електронските медиуми и огласна табла во Општина Прилеп.

Право на учество на јавниот повик

2.1. Право на учество на овој јавен повик имаат Жителите на Општина Прилеп/сопственици на станбен објект на подрачје на општина Прилеп кој набавил/ќе набави грејно тело  со инвертор во во периодот од денот на објавување на јавниот повик од 30.03.2021_година, најдоцна до денот на завршување на јавниот повик 30.04.2021 година_, односно до искористување на предвидените средства, и кои ќе достават навремено и комплетно барање согласно условите на јавниот повик

Само едно лице од семејството може да поднесе барање за добивање надоместок исклучиво за набавка на едно грејно тело со инвертор.

Услови кои треба да ги исполни барателот за надоместување на дел од трошоците за набавка на грејно тело со инвертор:

– Да е Жител на Општина Прилеп, сопственик на станбен објект на подрачје на општина Прилеп каде е инсталирана/ќе се инсталира грејното тело со инвертор, да има живеалиште на адресата каде е монтирано грејното тела со инвертор.

– Доколку посебно домаќинство/семејство живее во посебен функционален дел од ист станбен објект или во друг објект кој е во сопственост на друго лице носителот на посебното домаќинство  може да аплицира самостојно и независно од сопственикот на објектот, покрај документите кој треба да ги приложи кон барањето приложува и имотниот лист и потврда за платен данок на имот  за објектот, кој е впишан во имотниот лист каде е инсталирано грејното тело со инвертор заклучно со предходната година и кој ќе достави навремено  и комплетно барање согласно условите на јавниот повик.

– Грејно тело со инвертор да го купил по објавување на јавниот повик; Да е платен данок на имот за станбениот објект каде е/каде ќе се инсталира грејното тело со инвертор заклучно со предходната година; cамо еден член од семејството може да поднесе барање за добивање надоместок исклучиво за набавка на едено грејното тело со инвертор; до поднесувањето на барањето да биде корисник на печка на јаглен, дрва, нафта или мазут; да нема искористена субвенција за истата намена од било кој извор во Република Северна Македонија.

За докажување дека условите за учество се исполнети, барателот за надоместување на дел од трошоците до Општина Прилеп ги доставува следните документи:

Барање за надоместок(образецот на барањето може да се подигне од Веб страната на Општина Прилеп www.prilep.gov.mk

Фотокопија од важечка лична карта на барателот; имотен лист за станбениот објект со адреса на објектот во кој е инсталирано/ќе се инсталира грејното тело со инвертор на подрачје на Општина Прилеп; доказ дека е извршено купување на грејното тело со инвертор и тоа фотокопија од фискална сметка заверена на нотар или фактура со извод од деловна банка за извршената уплата со датум во период од денот на објавување на јавниот повик до денот на завршување на јавниот повик; фотокопија од трансакциска сметка; потврда за платен данок на имот за објектот, кој е впишан во имотниот лист каде е инсталирано грејното тело со инвертор заклучно со предходната година издадено од Одделение за администрирање на приходи Општина Прилеп

– Изјава заверена на нотар со која барателот под полна материјална и кривична одговорност ќе потврди дека:

-до поднесувањето на барањето бил корисник на печка на јаглен, дрва, нафта или мазут; друг член  од семејството нема поднесено барање за добивање на субвенции; дека не искористил субвенција/ надомест на дел од трошоци за истата намена од било кој извор во Република Северна Македонија