Денот на народното востание – 11-ти Октомври, во Прилеп се одбележува со низа настани и свечености, а како дел од програмата, денеска на пладне, традиционално, 1.200 ученици од прилепските училишта го формираа државното македонско знаме на плоштадот “Методија Андонов – Ченто”.
Една прекрасна традиција која е препознатлив знак за Прилеп
Нека е честит Денот на народното востание, денот кога започнала Народноослободителната борба против фашистичките и нацистички окупатори!
Kaко дел од програмата за одбележување на Денот на народното востание – 11-ти Октомври, традиционално во Прилеп и оваа година ќе се одржи популарното Tunning Car Show.
Ова ќе биде 17-то издание на оваа адреналинска изложба на автомобили, која како и секогаш предизвика огромно внимание кај прилепчани и посетителите во Прилеп.
Според најавата, на изложбата со своите автомобили ќе учествуваат гости од соседните земји и од Турција, ќе биде возбудливо како и секоја година, а ќе бидат изложен голем број спортско-модификувани автомобили, луксузни лимузини, олдтајмери, џипови…
Настанот ќе започне во 10 часот и ќе трае до 19 часот.
Управата за хидролошки работи соопшти дека од вторник во земјава ќе преовладува стабилно време со дневни температури малку над просекот за овој период од годината.
Времето утре ќе биде променливо облачно со слаб до умерен, а вдолж Повардарието и во источните делови засилен северен ветер. Во североисточните делови ќе има услови за локален слаб дожд.
Времето денеска до крајот на денот ќе биде сончево со мала до умерена облачност. Ќе дува слаб до умерен ветер од северен правец. Максималните температури ќе се движат во интервал од 14 до 23 степени.
Во Скопје ќе преовладува сончево со умерена облачност. Ќе дува слаб до умерен северен ветер.
Продолжува предизборната кампања за локалните избори во Прилеп. Кандидатите за советници од Движењето ЗНАМ за наша Македонија, денеска ја претставија својата визија за чесно, отчетно и транспарентно управување со јавните средства.
Од ЗНАМ Прилеп во својата изборна програма ветуваат:
-Ефикасно трошење на јавните пари – секој денар под контрола и во служба на граѓаните.
-Редовни извештаи за реализација на буџетот – отвореност и транспарентност во секој чекор, со јасен увид во тоа каде и како се трошат средствата.
-Ревизија на сите јавни расходи – за да се обезбеди одговорно управување и целосна отчетност пред јавноста.
„Буџетот е на граѓаните – и граѓаните мора да знаат каде оди секој денар. Нашата цел е Прилеп со јасни сметки и чиста совест,“ порачуваат од Движењето ЗНАМ за Наша Македонија – Прилеп.
ОСТАВКА ВЕДНАШ! Го повикувам директорот на ЈКП Комуналец, Абрашоски, ВЕДНАШ ДЕНЕС да си поднесе оставка – напиша на ФБ носителот на независна советничка листа, Никола Трајкоски, кој објави видео и фотографии од депонија во населбата “Сточен пазар”, за која вели дека претставува еколошка катастрофа, а некој дозволил толку многу отпад да се создаде на 30 метри од станбените куќи во оваа населба.
-На само 2км. од центарот на градот и на само 30 метри од куќите во населбата “Сточен пазар” лежат повеќе од 5.000 тони мешан отпад. Ова е еколошка катастрофа, за која бараме објаснување и одговорност, не само од Абрашоски, туку и од сите кои го прикриваат ова со години – пишува во објавата Трајкоски.
Најдобрата македонска фудбалска репрезентација вечерва од 20:45 во Гент го игра дуелот против фаворитот во групата селекцијата на Белгија. По одработените мини-подготовки нашата репрезентација ја очекува тежок натпревар.
– Можам да кажам дека сум горд на моите фудбалери, и тоа не само во овие квалификации, туку и во претходните години. Со настапот во Лигата на нации, со овој циклус, со речиси загарантиран плејоф. Тоа е изворот на енергијата што ни е потребна за да се движиме напред. Белгија има неверојатен ростер, тие се и понатаму фаворити во групата, но ние продолжуваме да сонуваме и не очекуваат решавачки натпревари. Ќе сториме се за да ја оствариме нашата цел. Имаме прекрасни момци, кои секогаш го даваат максимумот и се тука за Македонија“, изјави селекторот Благоја Милевски.
На првиот натпревар во групата меѓу двете репрезентации одигран во јуни во Скопје немаше победник и дуелот заврши 1:1.
Во фоајето од Центарот за култура „Марко Цепенков“ во Прилеп, денеска беше отворена изложбата „Вечно“ посветена на академик Богдан Богдановиќ, архитект, уметник, мислител, автор на Могилата на непобедените. Изложбата, по повод 100 години од раѓањеето на Богдановиќ, ја реализираа ЦК „Марко Цепенков“, Завод и музеј – Прилеп и Центарот ВАМ од Белград и Уметничката галерија од БИХ. Изложбата ги претставува резултатите од најновите истражувања на спомениците на Богдан Богдановиќ, не само во Македонија, заедно со богата ретроспективна поставка на целиот опус на овој автор.
Присутните на отворањето ги поздрави градоначалникот Борче Јовчески, кој посочи дека „Могилата на непобедените“ од Богдановиќ, не е само архитектонски бисер, туку жив споменик на нашата историја и идентитет.
– Проектот создава културен мост што ги поврзува народите и потсетува дека уметноста и меморијата немаат граници – рече градоначалникот Јовчески.
Марија Попова Јованоска, директор на ЦК „Марко Цепенков“ поздравувајќи ги присутните, изрази задоволство од заедничката соработка меѓу двете културни институции Центарот за култура и Заводот и музеј.
Мимоза Христоска, директор на Завод и музеј – Прилеп, истакна дека со изложбата градот се навраќа на визионерството и уметноста на Богдан Богдановиќ, која зборува тивко, но длабоко.
-Богдановиќ творел во надреалистички манир, со јазик на симболика и поетика, создавајќи споменици што не изгледаат како споменици…. „Могилата на непобедените“ е едно од неговите највеличенствени дела – и единствено што, од идеја до реализација, било завршено за само една година, во 1961. … Во ова дело, изградено во мермер, нема знамиња, нема симболи на идеологија. Има тишина. благодарност и човечка топлина – рече Христоска, на отворањето на изложбата.
Автор на изложбата е м-р Маре Јанкова Грујиќ, историчар на уметност, од Центарот за истражување ВАМ од Белград, која рече дека „Могилата на непобедените“ од Богдановиќ е најлирско и најскулптурно дело со мотивите, техниката и со потези кои никогаш не биле повторени.
Адвокатот Жарко Стеваноски, кој е кандидат за советник од политичката партија ЛЕВИЦА за Советот на општина Прилеп, на својот ФБ профил објави дека ќе се откаже од хонорарот кој ќе го добива од општината.
Во својот статус на ФБ, Жаре пишува:
-ИЗБРАНА е функцијата СОВЕТНИК во Советот на Општина Прилеп!
Народ не бира. Ние сме емисари од народот со задача да им ги испорачаме сите оние работи кои сме им ги ветувале за време на изборите.
Од сите нас, народот избира поединци кои се “истакнале” во средината и преку нивниот опшествен статус, народот очекува да му биде возвратено со подобрување на нивната благостојба.
Функцијата Советник не се извршува поради задоволување на социјалниот статус на советникот.
Надоместокот за работа во советот нема да го користам за сопствени потреби и како свој приход, ами за потребите на оние на кој ќе им биде најпотребен а живеат во мојот град.
Јас велам дека МОЖЕБИ ЗИД СО ГЛАВА НЕ СЕ ТУРКА, АМА СО ЛИЖЕЊЕ ИЧ.
Затоа, јавно ги повикувам сите останати учесници во оваа предизборна кампања кои се тркаат преку советничките листи, да покажат доблест и да се заветат дека парите од народот ќе ги остават на народот за да ги паметат идните генерации во својата заложба за подобар Прилеп.
Ветивте се и сешто, ВЕТЕТЕ ГО И ОВА
Инаку, Стеваноски е втор на кандидатската советничка листа на ЛЕВИЦА, па неговото столче во идниот состав на Советот на општина Прилеп се смета за сигурно.
Музичкиот проект Луциден сон ја претстави својата нова песна „Тајната“ – втор сингл и прв видео запис на проектот, снимен на повеќе локации во и околу Прилеп. Видеото, во режија на Елена Мелончели од Италија и продукција на Чиветте студио, ја пренесува интимната и визуелно впечатлива приказна на песната, во која играат Марија Јовеска и познатата прилепска актерка Даниела Иваноска.
Автор на музиката и текстот е Костадин Стојаноски, кој вели:
„Понекогаш, на некои работи им треба време да созреат, да искрчкаат, да се склопат сите коцкички за сонувањата да продолжат да се остваруваат. ‘Тајната’ е приказна што ја носам одамна, и ми беше важно токму во Прилеп да добие своја визуелна форма.“
Вокалот во песната го изведува Гоце Кантар, а на пратечки вокали се јавува Николина Василевска, чиј глас прекрасно го заокружува звучниот пејзаж.
Аранжманот е на Луциден сон, а продукцијата, миксот и мастерингот ги потпишува Savo Karelian Production (Финска).
„Тајната“ е објавена преку издавачката платформа Amuse, а видеото може да се погледне на YouTube каналот на Луциден сон.
-На 09.10.2025 во 00:03 часот во ОВР Прилеп е пријавено дека на кеј „4 Јули“ во Прилеп, 15-годишник од Прилеп, управувајќи велосипед изгубил контрола и паднал на коловозот. Во несреќата со тешки телесни повреди се здобил 11-годишен малолетник од Прилеп, кој се превезувал на велосипедот, додека 15-годишникот се здобил со телесни повреди, констатирани во Градската болница Прилеп. Извршен е увид од увидна екипа од ОВР Прилеп – информираат од МВР.
